Hamar atsotitz gustuko

Data: 2009(e)ko martxoaren 12a Egilea: Joxe Aranzabal

Betidanik erakarri naute esaera zaharrek, atsotitzek. Hainbeste, non garai batean, orain 30 bat urte, Eskola Politeknikoan nenbilela irakasle, Mondragoen, zerrenda luze bat bildu, eta Zakilixuten zenbait komikirekin apaindu bainituen, hark ere atsotitz piloa erabiltzen baitzituen.

Orduko zerrenda hari begira, hamar esaera zahar aukeratu ditut, gustuko ditudalako:

  • Etxeko anderea nongo, gure aireak hango
  • Apaizak azken hitza bere
  • Haurrak hazi, nekeak hasi
  • Ororen nahiz, oro gal
  • Puta semea, on bada benturaz, gaizto bada sorkuraz
  • Lan lasterra, lan alferra
  • Pilotan eta emakumearekin, kontuz faltarekin
  • Itsusi guztiak ederzale
  • Hobea, maiz, onaren etsai
  • Hil hadi, goratuko haute

Kategoriak Sailkatugabeak | Etiketak , | 2 iruzkin

Retweet

Data: 2009(e)ko martxoaren 11a Egilea: Joxe Aranzabal

Aurreko batean irakurri nion twitterlari bati kokoteraino zegoela retweetak jasotzen, hau da, norbaitek beste norbaiten mezua gustatu, eta bere horretan aipatzen duenean, aurretik RT jarrita. Hori dela-eta, apenas egin dudan errebote modu hori, inor ez mintzeko.

Orain, berriz, sartu naizenean Twitalyzer webgunean, horrek esan dit ez naizela bat ere eskuzabala Twitter-en, bertan ez baitut erabiltzen retweet-ik. Horrela jakin dut retweet egitea ona izan daitekeela, zelanbaiteko errekonozimendutzat hartzen delako besteek egindako lan onarekiko.

Eroriz-eroriz ikasten baita oinez, horrela nabil ni Twitteren, poliki-poliki ikasten.

Kategoriak Sailkatugabeak | Etiketak , | 4 iruzkin

Emakumeen oraina, argazkietan

Data: 2009(e)ko martxoaren 10a Egilea: Joxe Aranzabal

Dantzariak
Herenegun Emakumearen eguna zela-eta, Joxe Felix Diaz de Tuesta lagunak begiratu egin zuen bere Flickr kontuan zenbat argazki ote zituen “emakumeak” etiketarekin. Harri eta zur geratu zen, 2.500 argazkietatik, 566 baititu etiketa hori dutenak.

Omenaldi gisa, 65 argazki aukeratu zituen, denak emakumeak dituztenak protagonista, eta horiekin bilduma bat egin. Bilduma ederra. Berauek ikusita, Joxefek horrela dio Atauri bere blogean:

  • Argazkiok ikusita (emakumearen kondizioa eta status soziala jasotzeko asmorik eduki gabe ateratako argazkiak dira) begi bistakoa da zer nolako bilakaera izan duen emakumearen estatus sozialak gizartean ni jaio nintzenetik hona: argazkiok jasotzen dituzten jarduera horietatik gehienak debekatuta zeuzkan emakumeak orain mende erdi. Ikaragarria, benetan!

Kategoriak Sailkatugabeak | Etiketak , | 2 iruzkin

Futbolari aberatsak eta berezko hautespena

Data: 2009(e)ko martxoaren 9a Egilea: Joxe Aranzabal

Orain laupabost urte izango dira, Xabier Bengoetxea Realeko jokalari oihari entzun nion Huheziko ikasleei esaten zein gogorra den futbolarien bizimodua, igandero azterketa publikoa egiten baitzaie, eta astelehenero epaiketa, hedabide guztietan.

Atzo, berriz, John Carlin kazetari britainiarrari irakurri nion artikulu bat El País egunkarian, eta iruditu zitzaidan Xabier Bengoetxeak zirriborratutako haria berriz agertzen zela, beste testuinguru batean. Paragrafo bat:

  • Futbol jokalariak askoz ere fidelago hezurmamitzen du merkatu askea bankariak baino. Gaur egun urtean milioitik gora euro irabazten duten mila jokalarien artean dagoen jokalaria hor dago berezko hautespen nekeza igarota. Milioika haurrek egiten dute amets futbol profesionalean jokatuko dutela, eta milioika geratzen dira bidean. Gailurrera iristeko, supergizaki baten ezaugarriak bildu behar dira: talentua, indar fisikoa, ausardia, jarraikitasuna eta are adimena eta irudimena ere. Berdin dio nor den norberaren aita, edo zer lagun dituen. Ez eta pobre edo aberats jaio ote den. Bankariekin ez bezala, eta are gainerako bizibideekin (kazetariak eta idazleak kanpoan utzi barik), futbolean irabazteko, oso ona izan beharra dago, eta kito.

Kategoriak Sailkatugabeak | Etiketak , | 2 iruzkin

Atxagaren oihartzuna hedabideetan

Data: 2009(e)ko martxoaren 7a Egilea: Joxe Aranzabal

Bernardo Atxaga bada nor Euskal Herrian. Atzo bere azken eleberria aurkeztu zuen Donostian, Zazpi etxe Frantzian. Hori dela-eta, gaur sei egunkarik lehen orria eskaini diote idazleari: Berria, Deia, DV, Gara, Noticias de Gipuzkoa eta Noticias de Alava. Horietatik lauk, gainera, argazki nagusia eman diote, eta beste batek bigarren mailako argazkia.

Hori guztia lehen plaman. Horrezaz gain, barruko orrietan ere leku zabala eskaini diote egunkariek; Berriak, esate baterako, bi orrialde. Kontuan hartu barik atzo telebistek eta irratiek, baita Sustatuk ere, albisteari eman zioten lekua.

Atxaga fenomeno soziologiko bihurtu da gure artean. Zerbait esaten duenean, entzun egiten zaio.

Kategoriak Sailkatugabeak | Etiketak , | 3 iruzkin

Craigslist al da munduko putetxerik handiena?

Data: 2009(e)ko martxoaren 7a Egilea: Joxe Aranzabal

Zenbait prostitutak dio Craigslist “ezinbestekoa dela beren segurtasun fisikoa bermatzeko”, prostitutek galbahe moduan erabiltzen baitute sareko iragarki zerbitzua (bertan lanak, etxebizitzak, autoak, etab. iragartzen dira), eta, horri esker, ez dutela putazainen beharrik.

Txikagoko Cook konterriko sheriffak, ostera, uste du Craigslist dela AEBetako prostituzio iturririk handiena, eta horregatik, auzipetu egin du sareko zerbitzua.

Zer esango luke Tom Dart jaunak —hori baita sheriffaren izena— DV, El Correo eta beste egunkari errespetagarrien zerbitzu erotikoak ikusiko balitu?

Kategoriak Sailkatugabeak | Etiketak , | Iruzkin 1

Mantas Logura: ¡qué hermosura!

Data: 2009(e)ko martxoaren 6a Egilea: Joxe Aranzabal

Herenegun gogoratu ere ez nintzen egin Sustatuk zuzenean eman behar zuela Athletic-Sevilla futbol partida. Telebistan ikusi nuen lehen zatia, eta bigarrena, berriz, irratian entzun nuen gehiena. Biharamunean, ostera, ikusi nuenean atsedenaldian iragarkiak ere sartu zituztela Sustatun, Mikel Zarate zenak aspaldi idatzitako beste batzuk etorri zitzaizkidan gogora:

  • Siempre a su disposición: Camisería Egunon.
  • Gurdi, Gurdi, Gurdi: Éste es su coche. Gurdi, Gurdi, Gurdi. El coche que le hará feliz. Gurdi, Gurdi, Gurdi, Gurdi, Gurdi…
  • Mantas Logura: ¡qué hermosura!
  • Nortasun! Nortasun!! Nortasun!!! Hiriburuko dendarik handiena, ederrena, onena. Nortasun! Nortasun!! Nortasun!!! Ez zaitez zenbakitu, makinatu baloitu… Izan zaitez zeu, nortasundun zeu. Zatoz, erdu Nortasun dendara; etorri Nortasunera.
Kategoriak Sailkatugabeak | Etiketak , , | 2 iruzkin

Twitter-en ustekabeko erabilerak

Data: 2009(e)ko martxoaren 4a Egilea: Joxe Aranzabal

2006an Evan Williams-ek Twitter sortu zuen, beste zenbait lagunekin batera. Aurkezpen labur honetan berak azaltzen duenez, hasieran Twitter sortu zuten Odeo aplikazioaren osagarri gisa (geroago, hau ere saldu egin zuten), jendeak aukera izan zezan familiartekoei eta lagunei esateko zertan ari zen.

Hortik aurrera baina, erabiltzaileek erabili dute Twitter beste modu batzuetan, sortzaileek aurrez ikusi bakoak: hondamendietan, marketina egiteko, politikan, hitzaldietan, elkarri erantzuteko, bilaketak egiteko eta elkarri laguntzeko.

Kategoriak Sailkatugabeak | Etiketak , | Iruzkin 1

Twitterlari gorra

Data: 2009(e)ko martxoaren 3a Egilea: Joxe Aranzabal

Jende gehienak
erabiltzen du Twitter sareko elkarrizketan parte hartzeko: batzuetan
hitz egiten eta bestetan entzuten. Baina bada Twitter erabiltzen duenik
bakarrik hitz egiteko, beste inori entzun barik. Horixe da Berria
egunkariaren kasua.

Begiratzen baduzue bere Twitter kontuan, eskuineko
zutabearen goi aldean, Berriak 107 jarraitzaile ditu Twitter-en, baina
bera ez zaio inori jarraitzen, antza ez zaio-eta interesatzen besteek zer
dioten. Ez dakit zerk bultzatuta jokatzen duen horrela Berriak, baina
niri estrategia okerra iruditzen zait, hedabide batentzat batez ere.

Twitter
horrela erabilita, Berriak kamustu egin du komunikazioa, eta bide
bakarreko informazio bihurtu du. Hori arriskutsua izan daiteke
beretzat: zenbaitek harrokeriatzat har dezake jarrera (“nik diodana da
inportantea, zuk esana ez zait interesatzen”), aintzat hartuta,
gainera, Twitterren bertan badirela beste hedabide batzuk Berriaren
antzeko informazioa eskaintzen dutenak. Horrela jokatuta, gainera,
Berriak uko egiten dio feedback-ari, irakurleek bueltan ematen duten
informazioari.

Beste ezeren gainetik, Twitter elkarrizketa da. Elkarrizketa
polifonikoa: batzuk mugatzen dira esatera non dauden edo zer egiten ari
diren une horretan, beste batzuek partekatu nahi dute pentsamendu bat,
zenbaitek jakinarazi nahi du artikulu edo bideo interesgarria aurkitu
duela, hainbatek galdera egiten du, eta beste hainbatek erantzun,
urliak bere bloga sustatzeko darabil Twitter, halako fakultatek bere
kontuen berri emateko… Hain zaila da entzutea?

Kategoriak Sailkatugabeak | Etiketak , | 2 iruzkin

Blogari ona, twitterlari eskasa

Data: 2009(e)ko martxoaren 2a Egilea: Joxe Aranzabal

Aspalditxo irakurtzen dut Enrique Dans-en bloga, informazio asko eta hausnarketa interesgarriak ematen baititu, batez ere teknologia berrien inguruan. Twitter-en ere, badut haren aditzerik, abendua ezkero-edo jarraitzen natzaio-eta.

Baina Twitteren ez da bat ere interesgarria Enrique Dans. Bere Blackberry telefonoa erabiltzen du era honetako mezuak bidaltzeko:

Erabiltzen du Twitter bere GPSa balitz bezala. Baina horrek niri ez dit ezer eskaintzen. Beraz, ezabatu egin dut nire Twitter kontuan.

Kategoriak Sailkatugabeak | Etiketak , , | 3 iruzkin