Osasun kontuak, ezin hobeto

Data: 2006(e)ko abuztuaren 30a Egilea: Joxe Aranzabal

Gaur goizean Galdakaon izan naiz, ospitalean, miaketa egiten ikasturtea hasi aurretik. Jesus Ojangurenek hartu nau, nire hematologoak, eta, odol analisien emaitzak ikusita, esan dit oso ondo nagoela. Ohatilaren gainean ere aztertu nau, eta hor ere arazorik ez. Kontuan hartuta prednisona gutxi hartzen ari naizela (egun batean 5 mg eta hurrengoan 2,5), agindu dit aurrerantzean ez hartzeko Aciclovir, botika bat orain harte hartu dudana herpesetik babesteko. Otsailean-edo itzultzekotan geratu naiz, prednisona erabat kendutakoan.

Kategoriak Sailkatugabeak | Etiketak | 8 iruzkin

Liburu denda berria Mondragoen

Data: 2006(e)ko abuztuaren 29a Egilea: Joxe Aranzabal

Atzo ezusteko ederra hartu genuen. Mondragoen nintzela Begorekin, hara non aurkitu genuen liburu denda bat irekita Erdiko kalean, Portaloitik oso hurbil. Elkar argitaletxeak ireki zuen liburu denda abuztuaren 10ean, eta harrezkero zabalik dago. Hire zena baino dezente handiagoa, txukun geratu da, oso. Hala ere, uste dut Mondragoek liburu denda handiagoa beharko lukeela, baina hori beste kontu bat da. Ongi etorririk beroena Elkar liburu dendari!

tagzaniapaste
Elkar liburu denda map – Tagzania

Kategoriak Sailkatugabeak | Etiketak , , | 2 iruzkin

Akitanian izan gara

Data: 2006(e)ko abuztuaren 7a Egilea: Joxe Aranzabal

Abuztuaren 3an abiatu ginen, bi autotan, Akitaniarantz. Hiru egun egin genituen, zein baino zein ederragoa, eguraldi ona lagun genuela. Bordele, Saint Emilion, Bergerac, Perigueux eta Sarlat bisitatu genituen, leku gutxi agian, baina polit askoak. Guztira zortzi lagun joan ginen, bi beribiletan. Batean Javier koinatua, Begoña arreba, Bego emaztea, Miren alaba eta bostok, Javier gidari. Bigarrenean, Larraitz iloba, Oskar senarra eta Paula bien alaba, Oskar gidari. Flickr-en duzue bidaiaren kronika, argazkitan.

Kategoriak Sailkatugabeak | Etiketak | Utzi iruzkina

Landis, Gurpegi…

Data: 2006(e)ko abuztuaren 2a Egilea: Joxe Aranzabal

Gatlin, Ullrich, Basso, Heras, Hamilton, Liberty Aseguruak, Astillero, Eufemiano Fuentes, eta Puerto eskandalua. Zer gertatzen ari da eliteko kirolean? Bada gertatzen da eliteko kirola ez dela bat ere osasuntsua, eta hor goian aritzeko kirolariek dopatu beharra dutela. Hala ere, hain da handia nagozioa goi mailako kirolaren inguruan, hain dira itzelak interes ekonomikoak, sekulako gezurra antolatu baita beroien inguruan.

Nire abiapuntua hauxe da: gaur egun ez da posible Frantziako Tourra egitea, egiten den bezala ziztu batean, dopatu barik. Eta ez da posible urtebetean Espainiako Liga, Kopa, Eurokopa eta Munduko Txapelketa jokatzea dopatu barik. Bergauza tenisean: nork jasan dezake lau orduko partida izugarri baten ostean beste bat, eta beste bat, denak ere erritmo beldurgarrian? Eta zer esan NBAko gizon erraldoi horien aurrean? Gimnasioan bakarrik ez dira horrelako gorputzak egiten.

Gezur handi bat bizi dugu, besteak beste heroiak behar ditugulako. Horiek dira gure txuteak. Panem et circenses forever.

Kategoriak Sailkatugabeak | Etiketak | 3 iruzkin

Lila Downs

Data: 2006(e)ko uztailaren 31a Egilea: Joxe Aranzabal

Aurtengo Musikaire jaialdiak amaiera ezin hobea izan du: Lila Downs abeslari mexikarra. Elorrioko plaza mukuru bete zen, eta, bi orduz giro berezia sortu zen gure artean. Aurretik ez nuen ezagutzen Lila Downs, baina izugarri gustatu zitzaidan: emakume indartsua ikusi nuen, sentiberatasun handikoa eta nortasun sendokoa. Abeslari moduan ere, aparta, bere taldea bezalakoa. Jaialdi gogoangarria. (Argazkia: Jose Felix Diaz de Tuesta).

Kategoriak Sailkatugabeak | Etiketak | Utzi iruzkina

Atarikoen bazkaria

Data: 2006(e)ko uztailaren 29a Egilea: Joxe Aranzabal

Atzo gauen Lila Downs abeslari mexikarraren kantaldi zoragarria gozatu eta gero, gaur bazkaria egin dugu Berrio-Otxoa 41eko auzotarrok, guztira 12 lagunek. “Aitor Larrañagak”:http://enezerak.blogspot.com/ prestatu du bazkaria, ezin hobeto. Besteok ohore egin diogu mahai gainean ipinitakoari, eta ezin hobeto igaro dugu. Eskerrik asko, Aitor, Bego eta Miren!

Kategoriak Sailkatugabeak | Etiketak | 2 iruzkin

Orixeren gutunak

Data: 2006(e)ko uztailaren 25a Egilea: Joxe Aranzabal
Atzo, Gasteizen nengoela, liburudenda batean sartu eta liburu berri bat ikusi nuen: Orixe. Gutunak (1917-1961), Paulo eta Ibai Iztuetak prestatua. Esku artean hartu, eta, ustegabean, Orixek Telesforo Monzoni idatzitako gutun baten hasiera hau irakurri nuen:
Etsai leiala: Olaxe, olaxe! Etsaiak aurpegiz. Ederki elkartu zera nere etsairik aundienarekin, ark prantsesez diona zuk euskeraz esateko. Orixen esan oi dana, zuek bai, biok kaka zulo batetik egiten duzutela!

Orixeren diplomazia goren graduan. Hori irakurri bezain laster erabaki nuen erostea, eta gaur horrekin nabil. Harrituta nago, hala ere, zenbat gutun idatzi zituen Orixek gaztelaniaz, baita euskaraz ondo zekien jendeari ere.

Kategoriak Sailkatugabeak | Etiketak , | Utzi iruzkina

Spam inbasioa

Data: 2006(e)ko uztailaren 20a Egilea: Joxe Aranzabal

Nola edo hala aurre egin behar azken egunotako spam inbasioari —egun batean 945 erantzun itsatsi zitzaizkidan Faroan, denak spam nazkagarria—, CodeSyntax eta Goiena.net enpresek hesi bat ipini diete intrusoei, bere blogetan sartzen direnei. Hori dela eta, hemendik aurrera, blog honetan erantzun bat utzi nahi duzuenen guztiok galdera bati erantzun beharko diozue erantzuna argitaratu aurretik: “zenbat dira 2 + 3?” Galdera mezuaren testu azpian aurkituko duzue.

Horrekin, seguru nago traba handia ezarriko diegula spamgileei. Horien robotek asmatuz gero trikimailua, aldatu besterik ez legoke bai galdera eta baita erantzuna ere. Arazorik bazenute, jakinarazi, mesedez, kontaktu orrian mezu bat bidalita, eskuineko zutabean, faroaren azpian.

Beste batzuek ere izan dute arazo antzekorik, Karrajua blogak esate baterako, eta horrek ere antzeko trikimailu bat erabili du spama geldiarazteko, captchak direlakoak. Berak bezala, nik ere espero dut trikimailua dela-eta ezer interesgarririk ez galtzea erantzunetan.

Bi egunean, traba hori ezarri dugunetik, desagertu egin dira, ia, spamak erantzunetan. Hala ere, oraindik geratzen beste spam batzuk, tracbacketan itsasten direnak. Horientzat CodeSyntaxek badu beste erremedio bat, baina a posteriori. Eskerrik asko, beraz, Goienari eta CodeSyntaxi, egindako lan onagatik.

Tracbakck zaborra

Kategoriak Sailkatugabeak | Etiketak , , | 6 iruzkin

Omenaldia Fernandori

Data: 2006(e)ko uztailaren 17a Egilea: Joxe Aranzabal

Larunbat arratsaldean Eibarren izan nintzen, beste jende askorekin batera, Fernando Muniozgureni egindako omenaldian. Ekitaldi ederra izan zen, Eibarko lagunek batez ere, eta Euskal Herriko euskaltzale askok egindakoa. Igartzen da eibartarrak ohituta daudela horrelako omenaldiak egiten, frankismo garaian ere hileta zibilak egiten baitziren han. Gainera, leku aproposa dute horretarako, Txantxa Zelaiko auditorioa. Gainerako herrietan ere izendatu beharko genituzke leku batzuk horretarako, gero eta gehiagok nahi dugu-eta hil ondokoak elizatik kanpo egin.

Kategoriak Sailkatugabeak | Etiketak | 2 iruzkin

Agerkari digitalak, Euskadi Irratiaren arabera

Data: 2006(e)ko uztailaren 13a Egilea: Joxe Aranzabal

Euskadi Irratiak gero eta gehiago jotzen du agerkari digitaletara, batez ere berauetan agertzen diren izenburuak irakurtzeko (albistegietan) eta aipamenak egiteko (bestelako irratsaioetan), baina agerkari digital horiek bakarrik dira paperezko edizioak dituzten egunkarienak. Agerkari digital hutsak, digital moduan sortu zirenak paperezko edizio barik, Sustatu esate baterako, aipatu ere ez.

Kategoriak Sailkatugabeak | Etiketak | 4 iruzkin