Ibarretxe azkenetan?

Data: 2007(e)ko urtarrilaren 29a Egilea: Joxe Aranzabal

Gaur jende asko elkartuko da Bilbon Juan Jose Ibarretxe Eusko Jaurlaritzako lehendakariaren alde, baina irudipena dut hauxe izango dela bere azken aginte aldia. Elementu gehiegi ditu kontra:

Partidu Popularra
Aspalditik saiatu dira popularrak Ibarretxe Ajuria Enetik kentzen. Botu bidez lortu ez dutenean —Ibarretxek jipoi galanta eman zion Mayor Orejari— era guztietako boikotez edo epaileak erabilita ahalegindu dira. Popularrek zikindu nahi dute Ibarretxe bera, eta baita lehendakaritza ere.

Partidu Sozialista
Sozialistek erabaki dute Ibarretxek alde egin behar duela, lotzen baitute Lizarra-Garazirekin eta baita Ibarretxe Planarekin, zeinari ukatu baitzioten izatea ere Madrilgo Parlamentuan. Horregatik, ez dute zirkinik ere egin Ibarretxe joan ez dadin auzitegietara. Umiliazio hori pasarazi nahi diote, bera erretzeko.

Eusko Alderdi Jeltzalea
EAJ amaitzear dago basamortuko zeharkaldia, eta hortik irteteko Partidu Sozialista behar du. Zapaterok bidea erakutsi zion Imazi Maragall Kataluniako lehendakaritzatik kendu zuenean. Gaurko manifestazioa egin beharrekoa zen EAJrentzat, baina urtebete barru Ibarretxe Plana eta auzitegietako afera porrot politiko gisa argudiatuko dira lehendakaria aldatzeko.

Batasuna
Ibarretxe auzipetuko dute Batasunako kideekin hitz egin duelako, baina Batasunak ez du zirkinik egingo Ibarretxeren alde, Baskongadetako txotxongilo buru ikusten duelako.

Ez naiz analista politiko, baina egun hauetan, ohean sukarrak jota nengoela, behin eta berriro etorri zaizkit pentsamendu horiek burura. Baliteke ni oker ibiltzea, baina uste dut Ibarretxeren patua idatzita dagoela, lehendakaritzari dagokionez.

Kategoriak Sailkatugabeak | Etiketak , , , , | 4 iruzkin

Saturrarango seminario-kartzela

Data: 2007(e)ko urtarrilaren 25a Egilea: Joxe Aranzabal

tagzaniapaste
Saturrarango seminario-kartzela map – Tagzania
Aprobetxatuta orain Euskal Herri osoa ikus daitekeela bereizmen handiarekin Google Mapsen, Saturraran aukeratu dut erakusteko non zegoen garai bateko emakumeen espetxea eta ondorengo apaizgaitegia, non bi urtez ikasi bainuen, 1963an hasita, Donostiara igaro aurretik.

Kategoriak Sailkatugabeak | Etiketak , , , | Utzi iruzkina

Tio Pedro

Data: 2007(e)ko urtarrilaren 22a Egilea: Joxe Aranzabal

Dena hasi zen iragan azaroaren 23an. Orduan 20 urteko neska batek, Daniela Aranzabalek, erantzun bat utzi zuen Mexikotik Mikel Iturriaren gaztelaniazko blogean, nirekin jarri nahi zuela harremanetan. Tartean Pedro Aranzabal bere birraitona aipatzen zuen.

Harritu egin nintzen apur bat, guk ere izan dugulako familian tio Pedro bat, aspaldi batean Mexikora joan zena. Gure aita zenaren osaba zen tio Pedro, gure amandrearen neba. Aitak eta amak kontatu zigutenez, behin agertu zen emaztearekin sekulako aiga batean, auto handi dotore batean, gure artean autoak banaka ikusten ziren sasoian. Antza denez, futbol jokalari famatua izan zen Mexikon, eta gero ezkondu egin zen negozio gizon baten alaba batekin. Hori baizik ez genekien guk.

Danielari idatzi nionean, ordea, hark bestelako irudi bat eskaini zigun tio Pedroren gainean. Hauxe zioen bere erantzunean:

  • Mira mi abuelo se llama Pedro Aranzabal la verdad nose bien de ke parte de españa era pero le voy a preguntar a mi abuelo mi bisabuelo llego a mexico joven vivio en un pueblo llamado lequitio de aca luego se paso a la ciudad de torreon coahuila mexico!!!! aca somos muchos familiares por ke tubo 5 señoras por keno con todas se caso!!!!!!!! y tubo alrededor de 20 hijos!!!! ahi tengo una foto de mi abueno en cuento pueda te la mando!!! y tu ke me puedes contar???

Are harrituago geratu nintzen erantzun horren aurrean, hori ez baitzen nik nuen informazioa tio Pedroren gainean. Betiko moduan, erantzun hori nire neba-arrebei zabaldu nien. Eta horietako batek pasarazi zion Zaloña baserriko lehengusina txiki bati, tio Pedro Zaloña baserrian jaio baitzen, Aretxabaletan.

Ostiralean jakin nuenez, Zaloñako lehengusina txiki batek esanda, tio Pedroren seme-alaba “ofizialek” berretsi egin diote Mexikotik tiok beste seme-alaba batzuk izan zituela ezkontzatik kanpo, denak ezkondu aurretik, berandu esposatu baitzen gure senidea, 50 bat urterekin. Beraz, Daniela zuzen dabil antza, eta gure tio Pedro dontsuak 20 bat seme-alaba izan zituen, bost emakumerekin.

Ostiralean bertan idatzi nion Danielari, eta esan nion zer lotura izan dezakegun, non jaio zen bere birraitona, eta mapa batzuk bidali nizkion, erakusteko non dagoen Aretxabaleta. Badakit, halaber, Zaloñako jabeak sekulako ilusioa duela ustekabeko senide horiek ezagutzeko, eta idatzi egingo diela, eta gonbidatu, etor daitezen ostera bat egitera Euskal Herrira. Baldin badatoz, bazkari handi bat egingo dugu aranzabaldarrok. Eta kopak jasoko ditugu eta topa egin tio Pedro emankor haren alde.

Kategoriak Sailkatugabeak | Etiketak , , , , | 2 iruzkin

Imanol Urbieta

Data: 2007(e)ko urtarrilaren 18a Egilea: Joxe Aranzabal

Gustura irakurri dut Jakin aldizkarian Miel Angel Elustondo idazleak Imanol Urbietari egindako elkarrizketa luzea. Gustatu zait elkarrizketatzailearen idazteko modua, eta gustatu zait Imanol Urbieta bera: sortzailea, hurbila, sentibera, ekintzailea, euskaltzalea, artista, abenturazalea… Liluratuta geratu naiz berarekin.

Kategoriak Sailkatugabeak | Etiketak , | 3 iruzkin

Apple, Microsoften arrastoan

Data: 2007(e)ko urtarrilaren 17a Egilea: Joxe Aranzabal

Aspaldion Apple erakusten ari da berak ere monopolio izan nahi duela, Microsoft ordenagailuetan nola. Garai batean saiatu zen Macintosh ordenagailuekin –erabaki zuenean sistema itxi bat eramango zuela, erabat bateraezina artean zebiltzan ordenagailuekin–, baina orduko hartan Microsoft bizkorragoa izan zen, justu alderantzizko estrategiarekin.

Oraingo honetan, berriz, iPod musika jogailuaren arrakastan oinarrituta, berriro ari da helburu bera lortu guran, oraingo honetan musikaren esparrutik abiatuta. Behin erabateko nagusitasuna irabazita musika salmentan, oraingoan beste pare bat esparrutara egin nahi du salto, sakelako telefonoetara (iPhonekin) eta etxeko telebistetara (AppleTV erabilita).

Microsoftek Windows bihurtu zuen bere estrategiaren erdigune, eta Applek gauza bera egin nahi du iTunes denda eta aplikazioarekin. Bai iPod eta baita iPhone kargatzeko eta kudeatzeko iTunes behar da; bestela, ez dabiltza. Eta AppleTVk ere horra jo beharko du telebista saioak lortze aldera.

Miresten dut Applek zer grina duen berrikuntzarako, gehienetan oso produktu onak ateratzen baititu, baina ez zait bat ere gustatzen monopolio bihurtu nahi hori, monopolioek estutu egiten baikaituzte, eta une batetik aurrera, oztopo bihurtzen dira berrikuntza ororentzat. Argigarria da, oso, Timesonline albistariak horren gainean atera duen artikulua.

Kategoriak Sailkatugabeak | Etiketak , , , | Iruzkin 1

Ama Paulak, 90 urte gaur

Data: 2007(e)ko urtarrilaren 15a Egilea: Joxe Aranzabal

Denok berriro
Paula Mendizabal, gure ama, 1917ko urtarrilaren 15ean jaio zen Uritte baserrian, Eskoriatzan. Gaur, hortaz, 90 urte bete ditu. Hori dela eta, atzo festa txiki bat egin genuen Esteñibar baserrian, Elorrion, Kontxa Intxausti bere lagunaren konpainian.

Hamabost lagun elkartu ginen bazkarira. Zaharrena ama Paula bera, eta txikiena Paula txikia, gure amaren birbiloba. Hasteko, menestra jan genuen, Lierni koinatak maisuki prestatua. Ondoren, txuleta hezur bakoa. Eta amaitzeko, bizkotxoa, amak berak eta Begok prestatua. Kafera iritsi aurretik, bertso batzuk kantatu genizkion amari, Mikel Irizarrek atonduak. Eta gero zorionak eta opariak.

Egun biribila izan zen, arratsaldea amaitu aurretik Esteñibarko bizilagun berria ezagutu genuen-eta, Aimar Aranguren, Asier eta Amaia auzoen seme jaioberria. Ongi etorri beroa egin genion Aimar txikiari. Atzoko festako argazki sorta bat ikusi nahi baduzue, klik egin hemen.

Atzo kantatu genizun arren, gaur ere bihotz bihotzez abestu nahi dizut, ama, zorionik beroenak!

Kategoriak Sailkatugabeak | Etiketak , , , | 3 iruzkin

S.O.S. Hezur-muin emaileak behar dira

Data: 2007(e)ko urtarrilaren 14a Egilea: Joxe Aranzabal

Maialen Zulueta haur mondragoetarrak 4 urte ditu, eta hezur-muin transplantearen premia, iragan martxoan leuzemia linfoblastiko bat aurkitu zioten-eta. Harrezkero hartu du kimioa, baina gaitza berriz agertu omen zaio, eta umeak ez luke beste kimio aldi bat jasango. Horregatik transplantea. Zoritxarrez baina, ez diote aurkitu emaile aproposik, bere ezaugarri genetikoak beteko dituena. Horregatik, Maialenen gurasoek dei bat egin dute, borondatezko emale eske.

Nik zorte handia izan nuen orain lau urte, linfoma aurkitu zidatenean emaile bat antzeman zutelako familian bertan, nire arreba Fatima. Honi odol apur bat atera zioten, aztertzeko bere odola genetikoki bateragarria ote zen nirearekin. Ondoren, Valdecillan, goiz bat iragan zuen etzanda ohe batean, beso batetik odola atera eta bestetik berriro sartzen zioten bitartean, tartean makina batek bereizten baitzituen premiazko zelula amak, gero transplantean erabiliko zirenak. Beraz, kasu honetan emaile izateak ez du ezer traumatikorik eskatzen.

Nora deitu
Lerro hauen bidez gonbidatu nahi zaituztet hezur-muin emaile izan zaitezten Maialen txikia salbatzeko, zenbat eta jende gehiago aurkeztu, aukera handiagoak izango ditu-eta emaile bat aurkitzeko. Nik zortea izan nuen, eta Fatimaren hezur-muinari zor diot orain bizitzea. Zuek beste horrenbeste egin dezakezue Maialenen alde. Nahi izanez gero, deitu telefono hauetara:

  • Donostia: 943 00 74 00
  • Bilbo: 944 00 73 33
  • Gasteiz: 945 00 62 91

Mila esker denoi.

Kategoriak Sailkatugabeak | Etiketak , , | 2 iruzkin

Google, oroimenaren makulu

Data: 2007(e)ko urtarrilaren 12a Egilea: Joxe Aranzabal

Atzo gertatu zitzaidan. Lagun bati bidali nion mezu elektroniko bat, eta hor Gurutze Irizarren izena aipatu behar nion. Baina idazteko orduan, ezin gogoratu Gurutzeren izena. Ezin nuen sinistu: Gurutzeren aurpegia ikusten nuen argi eta garbi, gogoan nituen haren neba-arreba zenbaiten izenak, baina ezin harenaz gogoratu.

Orduan bururatu zitzaidan Googleri laguntza eskatzea. Idatzi nuen “Irizar + Sahara”, eta han aurkitu nuen behar nuen erantzuna: Gurutze. Arnasa hartu nuen. Eskerrak adimenak modu bat baino gehiago dituela jopuntu batera iristeko, kasu honetan zeharka, nekizkien bi elementu erabilita (“Irizar + Sahara”). Pentsatu nuen, orobat, Google bezalako bilatzaile bat inguruan edukitzeak eramangarriagoa egin dezakeela nire zahartzaroa, oroimenak kale egiten duenean batez ere.

Kategoriak Sailkatugabeak | Etiketak , , | 2 iruzkin

iPhone al da etorkizuneko ordenagailua?

Data: 2007(e)ko urtarrilaren 11a Egilea: Joxe Aranzabal

Apar ugari harrotu du Steve Jobsek herenegun egindako aurkezpenak, batez ere hark aurkeztutako iPhone telefonoak. Bego eta biok gaueko 11:30ak arte izan ginen aurkezpena ikusten ordenagailuan eta, egia esan, txundituta geratu ginen telefonoarekin. Ez dakit telefono horrek arrakasta izango duen, baina ez dut zalantzarik etorkizuneko telefonoak horrelakoak izango direla. Gozada bat ikustea zelan egin litekeen horrelako bitxi bat, bat ere teklatu barik.
 
Atzo, ordea, Mihai Alexandruk zioen etorkizuneko telefonoa ez ezik, iPhone etorkizuneko ordenagailua ere izan daitekeela. Izan ere, zioen kazetariak, pare bat urte barru zeinek erosiko du PC bat, eros badezake iPhone bat gaur egungoa baino bi aldiz bizkorragoa, disko gogor lau aldiz ahaltsuago batekin? Izan ere, iPhonek posta elektronikoa, musika, sms-ak, telefonoa, argazkiak, mapak, etab. ditu, eta dena Mac OS X sistema eragileak olioztatua. Nik ere irudipena dut Applek zerbait handia asmatu duela oraingoan ere.

Kategoriak Sailkatugabeak | Etiketak , | Iruzkin 1

Zergatik Firefox: testigantzak

Data: 2007(e)ko urtarrilaren 10a Egilea: Joxe Aranzabal

Gero eta jende gehiagok darabil Firefox Interneten nabigatzeko. Mundu osoan milioiak eta milioiak dira erabiltzaileak. Euskal Herrian ere, gero eta gehiago. Asko, ordea, oraindik ez dira ausartzen saltoa ematera. Horientzat, hainbat testigantza ekarri ditugu hona; batzuk adituak dira Internet kontuetan eta beste batzuk, erabiltzaile hutsak. Denok kontatuko digute zergatik darabilten Firefox.

Gari Araolaza (CodeSyntax)
Azken bost urteotan Mozilla eta bere oinordeko Firefox erabili ditut nire eguneroko lanean. Nabigatzailea da nire lanean zabaltzen dudan lehen aplikazioa eta ixten dudan azkena. Hiru urtez Windows-en erabili dut arazorik gabe eta azken bi urteotan Linux-en erabili dut. Pasahitz, cookie eta beste guztiak arazorik gabe pasatu nituen sistema batetik bestera.

Lehen ere aplikazio ona zen, baina e-posta programatik banandu eta bera bakarrik gelditu zenetik, askoz gusturago erabiltzen dut. Nabigatzaile azkarra da, arina eta erabilgarria. Fitxa bidezko nabigazio gabe ezingo nuke bizi, eta sufritzen dut nonbaiten Explorer erabili behar dudanean. Pasahitzak, formularioetako datuak gogoraratzen ditu, eta oso erraz kudeatu daitezke. Pop-up leihoak kontrolatzen ditu eta norberaren eskutan gelditzen da bere kontrola.

Segurtasun aldetik ere, Phising-erako arriskua minimoa da hasieratik, ez Explorer bezala, non helbide barran helbide okerrak erakusteko aukera zegoen hasiera batean. Bestalde, segurtasun arazo bat sortu eta oso egun gutxira (gehienez 4 edo 5) eguneraketa automatikoki deskargatzeko proposatzen dizu nabigatzaileak berak. Jakina da Explorerren kasuan sarritan hilabeteak pasatu direla segurtasun akatsak konpondu gabe.
Asko erabiltzen ditut luzapen edo estentsioak, eta horien bidez aplikazio asko gehitu daitezke gai oso desberdinetarako. Orain momentuan adibidez, Firefox 2.0-ri esker Xuxen euskarazko zuzentzailea lotzeko modua dago, eta oso ondo dabil!

Garatzaile moduan Explorerrek baino estandarren errespetu hobea eskaintzen du eta horri esker errazten zaigu garapena, nahiz eta bukaeran Explorerrentzat konponketak egin behar izaten ditugun, gauzak “gaizki” kodetuz, Explorerren ongi ikusi daitezen.

Iban Arantzabal (Goiena)
Hasieran gomendioz ezagutu nuen Firefox. Internet ingurunean asko erabiltzen da. Gainera, diseinuan sartuta ibili nintzen sasoi batean eta aplikazio batzuk bazituen Explorerrek ez zituenak, CSSak lantzeko.

Firefoxen gustatzen zait gehien-gehien fitxa sistema, gustatzen zait diseinu aldakorra izatea, gustatzen zait atzetik duen soft librearen filosofia guztia (komunitatea egiteko zer hobeto?), gustatzen zait librea delako, bizkorra delako, euskaraz ere badagoelako, gustatzen zaizkit eta behin eta berriz harritzen naute Firefox-eko gehigarriek. Aipagarrienen artean, euskaldunondako: Euskalbar Firefox-erako tresnabarra eta Xuxenen aplikazioa nabigaziorako. Eta hau erabiltzen ez dutenek ez dakite zer galtzen duten.

Peio Arreitunandia (IMH)
Guk 350 PC ditugu, (ia) guztietan biak instalatuta, Firefox eta IE, eta oraindik ez dira sutan jarri. Hori bai, erabiltzaileak, gero eta gustorago, gutxika-gutxika, Firefoxera pasatzen ari dira. Gutaz aparte, beste ikastetxe batzuk ere bide hortatik doaz (Iurreta, Mendizabala…), guztiak gela eta PC askorekin, eta denok gustura.

Josu Azpillaga (CodeSyntax)
Firefox-ekin nabigatzen hasi nintzenean, batez ere abiadura eta pestainen (goiko tab-ak) aukera estimatzen nizkion gehien nabigatzaile honi. Oraindik ere, abantailarik handienak horiek iruditzen zaizkit. Gero ohartu nintzen, ordea, bazituela abantaila gehiago: hizkuntzen trataera egokiagoa, leihoak blokeatzeko aukera, appletak-eta instalatzeko orduan transparentzia handiagoa (kontrol gehiago) eta orriak erakusteko orduan estandarrak errespetatzea, batez ere.

Eta, orain, Firefox nabigatzailearentzat komunitateak prestatu dituen estentsioak erabili ahal izatea estimatzen dut izugarri. Denetarako daude estentsioak eta lana asko errazten didate hauetako batzuk.

Luistxo Fernandez (CodeSyntax)
Firefox software librea dugu, eta euskaraz dago. IExplorer ere euskaratuta ikus daiteke, baina sistema eragilearen konfigurazioaren baitan dago hori. Luzapen interesgarri mordoa dago Firefox-erako, adibidez, Euskalbar hiztegi kontsultak egin ahal izateko. Fitxen bidezko nabigazioa ere oso erosoa da Firefox-en. Bookmarkletak askoz errazago kudeatzen dira Firefox-ekin, bestalde: jendeak ikasi beharko lituzkeen aplikazio txiki interesgarriak dira bookmarkletak…

Estandarretara egokituago dagoela, eta segurtasunaren aldetik sendoagoa dela, gauza jakina da, Interneten apur bat dabilenarentzat.

IExplorer plataforma bakarreko softwarea da. Firefox, guztietan dabil, baita Mac eta Linuxean, primeran gainera. Tresna bat toki batean ikasi, edozein plataformatan erabili (norberak bere hobespenak batetik bestera migratzeko, adibidez).

Patxi Gaztelumendi (gaztelumendi.org)
Ez naiz inoiz Explorer erabiltzailea izan. Interneten hasi nintzenean, 94-95 Netscape erabiltzen genuen. Ondoren, gainbeherak direla kausa, Mozillarekin hasi ginen. Nabigatzaile librea ordurako, sekulako aukerak eskaintzen zituena. Suite berean posta zerbitzua, mozilla composer —html orriak egiteko aukera ona— eta nabigatzailea integratuta. Apur bat astuna zela zioten, pisutsua, orduko garatzaileek, eta Euskal Herrian Librezalekoei esker Mozilla ere euskaraturik geneukan ordurako. Mozilla Firefox agertu zen gero, eta hasierako bertsioetatik erabili izan dut. Euskaraz beti. Eta Interneteko langintzetan egunero darabilt Firefox. Azken bertsioa ere, 2.0 azkarra, ziurra, arina, inteligentea eta erabilterreza iruditzen zait, euskaraz daukagu, gainera.

Euskarak inoiz izan dituen tresna onenak dauzka eskura. Software libreak, auzolanak eta nazioarteko lankidetzak aukera horiek eskaintzen dizkigute. Software pribatibo eta kapitalistarekin ez da horrelakorik gurea bezalako komunitate txikientzat.

Maite Goñi (Jakintza Ikastola)
Aitortu beharrean nago Firefox nabigatzailearen erabiltzaile berantiarra naizela. Ohituta nengoen Internet Explorer erabiltzera eta beste IKTeroek Firefoxen onurak adierazten zizkidatenean, beti uzten nuen proba beste egun baterako edozein aitzakiaz. Dena den, fitxa sistema eta gehigarriak (hedapenak eta pluginak) ezagutu orduko, ordura arte galdutako denboraz ederki damutu nintzen!

Beraz, interesgarriena, aipatutako fitxa sistemaz gain, lor daitekeen integrazio maila da. Gehigarri mordoska erants dakizkioke eta hauek, gainera, etengabe eguneratuz doaz. Egun, nire jardun osoa bertatik abiatzen da: Euskalbar (ezinbestekoa), posta, jarioa, del.icio.us, gune interesgarri guztiak, bilatzaileak, fireFTP, musika, eguraldia, CSS kudeatzailea, kolore identifikadorea, neurtzailea eta ohar bloka dira, besteak beste, ohikotasunez erabiltzen ditudan tresnak.

Azkenaldi honetan, Firefoxen erabilera gure ikasle eta irakasle guztien artean zabaltzen dihardugu buru-belarri eta dagoeneko bere fruituak ematen hasia da. Amaitzeko, euskaraz egotearen garrantzia azpimarratu nahi nuke.

Asier Irizar (HUHEZI)
Zergatik Firefox? Egia es
an, ez zait iruditzen galdera zuzena denik. Beste era batera planteatuko nuke nik. Zergatik ez? Baliabide azkarra da, euskaraz dago, gainerako bilatzaileek ematen dituzten ia aukera guztiak ditu (eta beste batzuk ere bai, gainerakoek ez dituztenak). Nire lanerako ezin egokiagoa da, Euskalbar instalatu nuenetik 8 hiztegi baititut esku-eskura. Eta, gainera, software librea da!!! Eguneraketak etengabe, jaitsi nahi ditudan fitxategiak ziztu bizian… nola ez naiz, ba, Firefoxen aldekoa izango?

Mikel Irizar (Piperrautsa)
Duela hilabete batzuk erabiltzen dut Firefox nabigatzeko eta Thunderbird postarako, baina aurrez ere Mozilla erabiltzen nuen; bertsio zaharragoa, nabigatzailea eta posta batera zituen hura. Software librearen aldekoa naiz, bi arrazoirengatik: behetik gorako ekimenak maite ditudalako; eta Interneten sekulako produktuak ari direlako sortzen modu horretan

Firefox berriarekin gustura nabil. Euskaraz oso txukun dago; orri askorekin batera jardun behar dudanean (eta hau gero eta sarriago tokatzen zait) oso sistema egokia du orri guztiak eskura edukitzeko eta arazorik gabe saltatzeko batetik bestera; eta diseinua ere asko gustatzen zait, argia da oso. Aspaldi ez dut Explorerrik erabili, ez dakit nola bilakatu den azken urteotan. Izan ere, Explorer gabe nabil sarean eta ez dut inoiz izan haren inbidiarik.

Gorka Julio (Elurnet.net )
Firefox erabiltzen hasi nintzen oraindik Firefox deitzen ez zenean, oraindik Phoenix izena zuen eta beta fasean aurkitzen zen. Zergatik beta dagoen software bat erabili? Nire buruari galdera hori erantzuten ia 5 urte beranduago zaila da baina bi arrazoi nagusi daude.

1. Esperimentazioa, informatika gustatzen zitzaidanez, beti gustatu izan zait esperimentatzea eta gauza berriak probatzea, garai horietan software librearen munduan murgiltzen hasi nintzen eta Firefox nire lehenengo pausotako bat izan zen (aurretik Linux instalatu nuen baina betiko arazoa gertatu zitzaidan: ados instalatu dut, eta orain zer?).

2. Internet Explorerri alternatiba bat bilatu. Internet Explorer ez zitzaidan gustatzen: nahiko mantsoa zen, eta gainera segurtasun arazo ugari zituen. Garai horietan segurtasun kontuei buruzko nire interesa oso handia zen (hacking mundua asko interesatzen zitzaidan) eta horrek ere Firefox erabiltzera eraman ninduen.

Beste galdera hau ere egin diot neure buruari. Zergatik Phoenix probatu ondoren erabiltzen jarraitu zenuen? Bilatzen ari nintzena topatu nuen sentsazioa izan nuen, azkarragoa, seguruagoa, errazagoa, baina batez ere bere inguruan mugitzen zen komunitate aktiboa. Komunitate honek Firefox inguruan tresna eta berrikuntza ugari sortzen hasi zen eta horrek interes handia pizten zidan.

Igor Leturia (Elhuyar)
Hasteko, Firefox askoz seguruagoa da Internet Explorer baino. Akats gutxiago ditu eta ez du ActiveX moduko teknologia arriskutsurik.

Erabiltzaile gisa, Firefox-ek abantaila mordoa ditu: “pestañak”, pop-up leihoen blokeatzea… Baina “de serie” dakarren abantaila horiez gain, erabiltzaileek garatzen dituzten eta aukeran instala ditzakezun “plugin” pila ditu, asko oso erabilgarriak, eta ni orain beraiek gabe nabigatu ezin izango nukeenak. Eta orain euskarazko zuzentzailea ere jarri diezaiokegu Firefox-i, formularioak-eta betetzen ditugunean (blog baterako artikulu bat idaztean, adibidez) zuzen idazteko. Horrez gain, Linux daukadan ordenagailuetan ere badabil Firefox.

Eta garatzaile gisa, Internet Explorer amesgaiztoa da. Web gune bat estandarrak betez garatzen baduzu (Javascript, XHTML, CSS), badakizu Firefox-en ongi ikusiko dela eta egin behar duena egingo duela. Aldiz, Internet Explorer-en ez, eta kristorenak eta bi egin behar izaten dira Microsoft-en nabigatzailean ere ongi ibil dadin. Baina nola jende gehienak hori erabiltzen duen, ez dugu beste erremediorik… Gainera, web garatzaileentzat Firefox-ek “Web Developper Toolbar” plugin-a dauka, oso erabilgarria, guztiz ezinbestekoa esango nuke.

Arantza Mongelos (HUHEZI)
Aukera izan nuen Firefox ezagutzeko nahiko kasualitatez, ezagun baten bidez. Egia esan, oso modu sinplean azaldu zidan (telefonoz) zer egin behar nuen programa jaisteko eta beste bi gauza (pestainen erabilera, besteak beste). Horrela egin nuen, eta ordutik hona beti Firefox saiatzen naiz erabiltzen, askoz ere “user-friendly” egiten zait, nahiz eta IEk saiakerak egin dituen (ez da berdina). Firefox oso erraz ikasten da erabiltzen eta oso fidagarria dela uste dut. Bestaldetik, software librea izateak ere konbentzitu ninduen, baina hori askoz ere aurrerago izan zen.

Jabi Zabala (Irratia.com)
Segurtasunaren funtsaz ezin dizut azalpen handirik egin, baina fido naiz seguruagoa dela dioten adituez. Nabigazioa zinez Explorer 6rekin baino errazagoa da fitxen (“pestañas”) bidez. Pop-up molestagarrien kontrako ezaugarria bikaina da… Horregatik kopiatu ditu ezaugarri horiek Explorer 7k plagio nabaria eginez… Gainera, estandarrak betetzen ditu, librea da, euskaraz da…

Arkaitz Zubiaga (Zabaldu.com)
Firefox software librea da eta horrek izugarrizko askatasuna eskaintzen dit nabigatzailea pertsonalitzerako orduan: hiztegiak, zuzentzaile ortografikoak, bilatzaileak, albisteak jarraitu ahal izateko RSS irakurleak…, eta beste gehigarri mota mordoxka erantsi dakizkioke, nahi dudan moduan erabili ahal izateko. Eta gainera, %100 euskaraz dago!

Kategoriak Sailkatugabeak | Etiketak , , | 5 iruzkin