Obama eta Clinton, bi aurpegi

Data: 2008(e)ko otsailaren 14a Egilea: Joxe Aranzabal

Bistan da Hillary Clinton eta Barak Obama hautagaiek arreta handia piztu dutela nonahi, baina begi bistakoa da, halaber, bakoitzak oso gauza desberdinak iradokitzen dituela.

Orain urtebete ia, iragan martxoan, Phil de Vellis gazteak bideo bat sortu zuen, Hillary 1984, eta hor egileak hautagaiaren tik autoritarioa jarri zuen agerian. Une hartan, bideo horrek min handia egin zion Hillary-ri, bistaratzen baitzuen hautagaiaren alde iluna.

Urtarrilaren 8an, berriz, Will.i.am Black Eye Peas taldeko liderrak hunkituta entzun zituen Barak Obamaren hitzak New Hampshireko barne hauteskundeak galdu ondoren, itxaropenez beteak baitziren. Hori zela-eta, Will.i.am-ek bideo bat sortu zuen, Yes We Can, non jasotzen baita, eta indartzen, itxaropen hura, Obamak hedaturikoa.

Obamak sekulako ahalmena du itxaropena pizteko, jendea inspiratzeko, gero eta jende gehiagok ikusten baitu bera hautagairik onena aldaketa ziurtatzeko.

Kategoriak Sailkatugabeak | Etiketak , | Iruzkin 1

Kontrola gaindituta

Data: 2008(e)ko otsailaren 13a Egilea: Joxe Aranzabal

Atzo Galdakaon izan nintzen, ospitalean, eta han ikusi nuen Jesus Ojanguren medikua. Odol analisiak egin eta ondo miatuta, esan zidan oso ondo nagoela, sei hilabete barru joateko berriro ere. Bitartean, segitzen dut Prednisona kortikoidea jaisten, poliki-poliki.

Kategoriak Sailkatugabeak | Etiketak , , | 6 iruzkin

Eta hileta zibila nahi dugunok?

Data: 2008(e)ko otsailaren 12a Egilea: Joxe Aranzabal

Ez dut presarik, baina hiltzen naizenean hileta zibila nahi dut neuretzat. Hala ere, Elorrion —eta herri askotan, Eibarren izan ezik, beharbada—, ez dago azpiegiturarik horrelako zeremoniak txukun egiteko.

Zerbait egin beharko dugu egoera konpontzeko. Udalarekin hitz egin, eta baita ehorztetxeekin ere, lehenengoak lekuren bat presta dezan horretarako, eta bigarrenek eskain ditzaten gutxieneko zerbitzuak eta azpiegiturak, nahi duenak hileta zibila izan dezan.

Zuen herrietan zelan dago kontu hau? Eskertuko nituzke zuen iritziak.

Kategoriak Sailkatugabeak | Etiketak , , | 3 iruzkin

Amaren errautsak

Data: 2008(e)ko otsailaren 11a Egilea: Joxe Aranzabal

Tia Balen errautsak botatzen

Atzo amaren errautsak zabaldu genituen Esteñibar baserrian, Elorrion, zehatzago esateko, intxaurrondo gazte baten ondoan, eguerdian bertan sartu genuena, eta olibondo gazte baten inguruan, orain dela gutxi sartutakoa. Amak izugarri maite zituen Esteñibar eta hango inguruak. Horregatik aukeratu genuen leku hura beretzat.

Lehenago, beste intxaurrondo bat egon zen hor, ihartu bitartean itzal ona eman zigun, eta amak estimatzen zuen. Arbola sartu berriak ere berdin egingo du, heldu bezain laster.

Senitartekoak eta lagunak elkartu ginen Esteñibarren, ekitaldi xume bat egiteko, tartean tia Juanita eta tia Balen, ama zenaren ahizpak, eurak izan ziren zaharrenak han, eta baita Paula txikia ere, gure arteko gazteena. Bukatzeko, abestu genuen Xabier Letek Xalbadorri eskainitako abestia, amari abesti hori bereziki gustatzen zitzaion-eta. Egun gogoangarria.

Kategoriak Sailkatugabeak | Etiketak , , , , | 2 iruzkin

8. probintzia, 21. saioa

Data: 2008(e)ko otsailaren 10a Egilea: Joxe Aranzabal

Horra “8. probintzia“ irratsaioaren 21. saioa. 2008ko otsailaren 10ean egin dugu Euskadi Irratian, Amarauna saioan.

Edukiak
Saio honetan, honako gai hauek jorratu ditugu:

powered by ODEO

Kategoriak Sailkatugabeak | Etiketak , , , | 3 iruzkin

Zenbat informazio jasotzen dugu egunero?

Data: 2008(e)ko otsailaren 7a Egilea: Joxe Aranzabal

Orain urtebete pasatxo, 2006ko azaroaren 30ean, The Economist aldizkariak horrela erantzun zion izenburuko galderari:

  • Jendeak irakurtzen du 10 MB inguru material egunero, entzuten du 400 MB egunero eta ikusten du 1 MB informazio segundoro.

Kategoriak Sailkatugabeak | Etiketak , | 3 iruzkin

Mikro-ospea

Data: 2008(e)ko otsailaren 5a Egilea: Joxe Aranzabal

Mikro-ospea fenomeno nahiko berria da Web 2.0 hedabideetan, eta hor pertsona bat izan daiteke izugarri ezaguna, ez milioika lagunen artean, Madonna izan daitekeen bezala, baizik eta talde txiki batean —milaka lagun edo dozena batzuen artean. Blog bat baldin baduzu, edo kontu bat Flickr-en, litekeena da hainbat jendek zuri jarraipena egitea, eta zutaz jakitea zuk uste baino gehiago.

Gure artean, Luistxok aurreratu zigun horrelako zerbait buztan luzeaz eta mikro-audientziaz ari zela: “Etorkizunean denok izango ditugu 15 harpidedun”. Gaur, ostera, Clive Thompson kazetariari irakurri diot mikro-ospeaz hitz egiten: zelan gaztetxoak jazten diren modu berezian party batera joan aurretik, baibaitakite han ateratako argazkiak Flickr-en agertuko direla, nola blogari baten jarraitzaileek posta zerrenda bat sortu zuten Yahoon, eztabaidatzeko haren mezuen gainean, etab.

Clive Thompson baikor da, eta uste du fenomeno berri horren aurrean, jendea garatzen hasi dela hainbat gizarte gaitasun, mikro-ospera egokitzeko. “Ikasten ari gara zelan bizi jendetzaren aurrean”. Fenomeno berria esan dugu, baina, horrela ote? Ez hainbeste, egilearen iritziz beti egin baitugu horrelako zerbait: herri txikietan zabaltzen diren txutxumutxuek antz handia dute blogetan hedatzen direnekin; bestetik, jazten garen bakoitzean, ozen esaten ari gara zelakoak garen. “Mikro-ospeak apur bat irekiagoa egiten du betidanik landu dugun gizarte ingeniaritza —eta agian, zintzoagoa”.

Kategoriak Sailkatugabeak | Etiketak | 2 iruzkin

Mitxel Kaltzakorta: euskara komunikagarriagoa

Data: 2008(e)ko otsailaren 4a Egilea: Joxe Aranzabal

Laguna eta lankidea dut Mitxel Kaltzakorta. Ostiralean bere azken liburuaren ale bat oparitu zidan, Prosa komunikagarriago egiten. Pozik ikusi nuen Mitxel, eta izugarri poztu nintzen beragatik, badakit-eta zelako lan handia egin behar izan duen liburu hau esku artean ikusi bitartean.

Nik asko ikasi dut Mitxelengandik, berak erakutsi zidan euskara biziagoa idazten. Eta nirekin erabilitako sistema bera darabil orain liburu honetan, irakurleari pausoz pauso erakusten dio-eta zelan konpondu komunikazio arazoak, atzerakargak eragindakoak.

Liburua oso didaktikoa da: unitate bakoitza teoria apur batekin hasten da, ondoren adibideak erakusten dira, eta, bukatzeko, ariketak, irakurleak berak ahaleginak egin ditzan esaldi gaizki antolatuak konpontzen. Liburuaren amaieran, gainera, soluzioak eskaintzen ditu Mitxelek, aurretik proposatutako ariketa guztienak.

Klasikoak, xehe-xehe
Lan hau egin aurretik, Mitxel Kaltzakortak goitik behera irakurri ditu euskal klasikoak ez ezik, baita Auspoa argitaletxeko liburuak ere. Hori behin eta berriro ikusten da liburuan barrena, egileak sarri aipatzen baititu klasikoen esaldiak, orrialde eta guzti markatuta.

Liburu hau erabat gomendagarria da euskara komunikazio tresna dugun guztiontzat, irakasleak izan, kazetariak edo ikasleak. Nik, behintzat, biziki gomendatzen dizuet.

Kategoriak Sailkatugabeak | Etiketak , , , , | Iruzkin 1

8. probintzia, 20. saioa

Data: 2008(e)ko otsailaren 3a Egilea: Joxe Aranzabal

Horra “8. probintzia“ irratsaioaren 20. saioa. 2008ko otsailaren 3an egin dugu Euskadi Irratian, Amarauna saioan.

Edukiak
Hogeigarren saioan honako gai hauek jorratu ditugu:

powered by ODEO

Kategoriak Sailkatugabeak | Etiketak , , , | Utzi iruzkina

Aita-semeen balentriak

Data: 2008(e)ko urtarrilaren 31a Egilea: Joxe Aranzabal

Lagun on batek bidali dit bideo hau. Hunkitu egin nau, benetan. Bertan Dick eta Rick Hoyt aita-semeak agertzen dira, Australiako Ironman  lasterketa gogorra egiten. Kontua da Rick semeak burmuineko paralisia duela, eta ezin duela mugitu; aitak eraman zuen bide osoan: ontzitik tiraka igerian egin bitartean, edo bizikleta gainean nahiz gurpildun aulki batean.

Jaio zenean, zilbor-hestea korapilatu zitzaion Rick jaio berriari, eta horrek eragin zion burmuineko paralisia. Hortik aurrera, ezin hitz egin eta ezin mugitu. Gurasoei esan zieten haur hura begetal hutsa izango zela bere bizi guztirako, eta hobe zutela erakunde batera eramatea. Gurasoek, berriz, ezetz, hezi egingo zutela edozein haur bezala. Eta horrela egin zuten, eta haurrak erantzun ere bai. Hamabi urterekin, ordenagailu batek ahotsa eman zion, programa berezi bati esker. Geroago, unibertsitateraino iritsi zen, eta bertan graduatu.

Institutuan zebilela, mutilak eskatu zion aitari berak ere nahi zuela jarduera fisikoren bat egin. Aita, orduan, arineketan egiten hasi, eta semea berarekin eramaten zuen, gurpildun aulki berezi batean. Harrezkero, 950 lasterketa egin dituzte elkarrekin, tartean 60 maratoi eta 6 Ironman. Aitak 66 urte ditu, eta semeak 44. Osasunak lagundu bitartean, segitzeko asmoa dute. Ikusi bideoa.

Kategoriak Sailkatugabeak | Etiketak , , | 3 iruzkin