Euskadi ala Euskal Herria?

Data: 2008(e)ko azaroaren 14a Egilea: Joxe Aranzabal

Euskal selekzioko jokalariek (ala eusko selekziokoek esan behar, behin
horrela jarrita?) eta beste askok esan dute “Euskal Herria” izenarekin
ez baldin bada, ez dutela jokatuko selekzioarekin. “Euskadi” izenak ez
omen du balio, nahiz eta selekzioaren jatorrizko izena –hasieran
“Euzkadi”, eta gero “Euskadi”– horixe izan, eta izen horrekin jokatu
izan zuen Frantzian, Errusian, Belgikan eta Hego Ameriketan, oker ez
banabil, Errepublika garaian eta ondoren. A zelako abilidadea dugun
nonahi zatiketa eragiteko, puruetan puruen agertu behar zoro horrekin.

Ulertuko nuen planto egitea, selekzioaren impasse egoerari amaiera
emate aldera, urtean behingo partida folklorikoarekin aspertuta, baina
izena dela-eta? Gaitz egiten zait ulertzea, benetan, ez bada klabe
politikoan, atzean ematen baitu sokatira gupidagabea jokatzen ari
direla euskal (ala eusko?) nazionalismoaren bi adar nagusiek. Ni,
behintzat, aspertuta naukate, batzuek zein besteek.

Kategoriak Sailkatugabeak | Etiketak , , | 3 iruzkin

Vatikanoa, berriz noraezean

Data: 2008(e)ko azaroaren 13a Egilea: Joxe Aranzabal

Obamaren taldeak jakinarazi zuenean presidente kargua hartu bezain
laster Obamak atzera botako zituela Bush-en zenbait erabaki, hala nola
diru publikoa ez ematea zelula amen ikerkuntzari, Vatikanoa berriro
atera da plazara esanez “zelula amek ez dutela ezertarako balio”, eta
ez dela komeni ikerkuntza bultzatzea alor horretan.

Ni, berriz, oso pozik nago Obamaren erabakiarekin, horrek itxaropena
ekarriko digulako gaixotasun larriak ditugun edo izan ditugun askori.
Nire ustez, zelula amen gaineko ikerkuntzak biziak salbatuko ditu, eta
gaixo askoren egoera hobetuko du. Horri hesiak jarri nahi izatearekin,
Vatikanoa orpoz orpo doa AEBetako fundamentalistekin, Bush-ek agintean
jarri zituen horiekin.

Kategoriak Sailkatugabeak | Etiketak , , | Utzi iruzkina

Aurrera bolie!

Data: 2008(e)ko azaroaren 12a Egilea: Joxe Aranzabal

ETAko militante ospetsuek babarrunak jaten badituzte, babarrunak jatea delitua izan daiteke, hedapenez. Txomin Iturbek aurrera bolie! erabiltzen bazuen, aurrera bolie! esatea delitua izan daiteke, hedapenez. Esapide hori ustez erabili izanagatik atxilotu nahi omen du epaile batek Iñaki De Juana, horrekin deia egin bide baitzuen borroka armatuari segida emateko.

Gure etxean betidanik erabili izan dugu aurrera bolie! esapidea, animo gisa unean uneko oztopoak gainditze aldera: gaixotasun bat dela, ezusteko txar bat, nota eskasa… Gure aita zenak erabiltzen zuen, eta guk ere erabiltzen dugu, Mondragoen mundu guztiak erabiltzen duelako. Eta ez epaile horrek eta beste askok pentsa dezaketen zentzuan.

Kontua da Txomin Iturbe ere mondragoetarra zela, eta hark famatu egin zuela esapidea beste testuinguru batean. Orain aurrera bolie! esatea delitu izan daiteke, borroka armatua goraipatzea. Horrek ez dauka ez hankarik, ez bururik, baina errentagarriagoa izan daiteke krisi ekonomikoaz berba egitea baino.

Kategoriak Sailkatugabeak | Etiketak , , | 2 iruzkin

Plone egun oparoa

Data: 2008(e)ko azaroaren 10a Egilea: Joxe Aranzabal

Joan den ostiralean, azaroak 7, World Plone Day zela-eta, CodeSyntax enpresak mintegi bat antolatu zuen Tagzania enpresa jaio berriaren bulegoetan, Eibarren, eta bertan bildu gintuen hogeita hamar bat lagun, denak Plone erabiltzaileak gure enpresetan.

Konpainia onean
CodeSyntaxek berak egin du dagoeneko egun hartako kronika bere webgunean. Ni oso gustura izan nintzen mintegian, konpainia onean, egia esan: ezkerrean Iban Arantzabal izan nuen, eta eskuinean Oier Araolaza. Aurretik baina, Maite Rementeria agurtu nuen, Faro hau diseinatu zuen diseinatzaile aparta. Guapa zegoen, oso, eta apur bat gizenago, haurdun dago-eta. Otsailean mutikotxo bat ekarriko du. Niri ere sekulako ilusioa egin zidan bera hain pozik ikusteak.

Mintegia
Mintegiak bi zati izan zituen, eta tartean atsedenaldi bat, kafea hartu eta elkarrekin hitz egiteko. Niri bigarren zatia interesatu zitzaidan gehiago, Mikel Lizarraldek eta Gari Araolazak egindako aurkezpenak. Lehenak edukiaz hitz egin zuen, Interneten elkarrizketa sortu beharraz. Bigarrenak, ostera, Google Analytics aplikazioaren posibilitateak aurkeztu zizkigun, jakin dezagun zer neurtu geure webguneetan, ondoren egin beharreko aldaketak ganoraz egiteko.

Bi hitz ikasi nituen mintegian, ordura arte ezezagunak, freemium eta HIPPO, eta dagoeneko sartu ditut Komunikazio-Glosategian. Han nenbilela, Gari Araolazak Grooveshark musika programa erakutsi zidan, eta dagoeneko nik beste lau laguni erakutsi diet, oso erabilerraza baita.

Probetxu handiko goiza izan zen. Orain irakurri egin behar ditut han hartutako apunteak, eta hasi nire jarduera hobetzen.

Plone
Baina zer da Plone? Plone da Edukiak kudeatzeko sistema bat, software libreaz egina eta doakoa, eta oso hedatua nazioartean administrazio, hezkuntza eta enpresen webguneak egiteko. Eraikita dago Zope aplikazio zerbitzariaren gainean, eta Python hizkuntza erabiltzen du. Euskal Herrian CodeSyntax enpresak egiten du lan Plonerekin.

Zer ikusirik dute NASA, Mondragon Unibertsitatea, CIA, Udinese Futbol Taldea, Yale-ko Unibertsitatea, Goiena.net, Brasilgo Gobernua, Dantzan.com, Oxfam, Utah-ko Unibertsitatea eta Zingi Zango erakundeek? Denek darabilte Plone euren webguneak kudeatzeko. Atera kontuak.

Kategoriak Sailkatugabeak | Etiketak , , , | Utzi iruzkina

Behobia-Donostia gogoan

Data: 2008(e)ko azaroaren 9a Egilea: Joxe Aranzabal

Gaur ez gara joan Behobiara lasterka egitera. Horren ordez, eta aprobetxatuta giro ezin hobea, Begok eta biok Elorrion bertan egin dugu atxintxika. Eguerdian irtenda, tipi-tapa, tipi-tapa, Iguria auzorantz jo dugu, eta gero Kanpazar gora, lehen bihurgune esturaino. Bueltan hobeto ibili gara, haizea alde genuelako. Guztira 50 minutu izan dira, aspalditxo egin dudan lasterketarik luzeena. Primeran.

Kategoriak Sailkatugabeak | Etiketak | Utzi iruzkina

56 urte, eta aurrera

Data: 2008(e)ko azaroaren 8a Egilea: Joxe Aranzabal

Gaur nire urtebetetzea da, 1952ko azaroaren 8an jaio bainintzen. 56 urte bete ditut, eta pozik nago, zelan ez, orain sei urteko ezustekoa igarota.

1952an gertatuak
Jakin-minak jota, Wikipedian begiratu dut, ni jaiotako urtean, 1952an, zer gertatu zen ikusteko:

  • Ezusteko elurte handia egin omen zuen Algerian.
  • Elizabeth II Britainia Handiko erregin bihurtu zen.
  • AEBetan bihotz mekaniko bat erabili zen lehen aldiz gaixo batekin.
  • Neguko Olinpiar Jokoak jokatu ziren Oslon.
  • Winston Churcillek iragarri zuen Ingalaterrak bonba atomikoa zuela.
  • Eliza Katolikoak debekatu egin zituen André Gide-ren liburuak.
  • Anne Frank-en egunkaria argitaratu zen.
  • Eisenhower-ek AEBetako presidentzialak irabazi zituen.
  • Godoten esperoan estrenatu zen, Samuel Becketten lana.
  • Narinder Singh Kapanyk zuntz optikoa asmatu zuen.
  • Jonas Salk zientzialari amerikarrak polioaren kontrako txertoa asmatu zuen.
  • Eva Peron hil zen.
  • Ernest Hemingway-ek Agurea eta itsasoa argitaratu zuen.
  • Fausto Coppik Frantziako Tourra irabazi zuen bigarren aldiz.
  • Albert Schweitzer-ek irabazi zuen Bakearen Nobel saria.
  • Quim Monzo, Orhan Pamuk, Nelson Piquet eta Carlos Knorr nire laguna zena jaio ziren.

Kostata jaio omen nintzen. Hori esaten zuen, behintzat, gure ama zenak. Bera beldur zen nire aurrekoa bezain bizia izango ote nintzen, baina berehala konturatu zen pastel hutsa nintzela, jan eta lo egiten duten horietakoa.

Kategoriak Sailkatugabeak | Etiketak , | 12 iruzkin

Albiste onak

Data: 2008(e)ko azaroaren 6a Egilea: Joxe Aranzabal

Atzo kontrol eguna izan nuen Galdakaoko Ospitalean. Hara joan aurretik
baina, goizeko lehen orduetan, ordenagailura joan, eta ikusi nuen
Obamak irabazi zituela hauteskundeak AEBetan. Albiste ona. Gero, autoan
nindoala, informazio gehiago jaso nuen Euskadi Irratian. Itxaron gelan
telebista zegoen piztuta, Tele5, eta han ere, ez zegoen beste
mintzagairik. Odola aterata, kafe ordua. Egunkariek ez zuten esaten nor
zen irabazlea, baina artikulu interesgarriak aurkitu nituen zenbaitetan. Lluis
Bassets adituak, esate baterako, hau zioen artikulu batean, El País
egunkarian:

  • Nahiz eta hedabide tradizionalek Obama maite, berriek eman diote
    garaipena: Internet, marketin birala, telefono bidezko mezuak, bideoak
    YouTuben, bideo jokoak. Obamak jendetzak mobilizatu ditu, ezohiko
    zerbait AEBetako politikan, baina mobilizaziorik biziena ikusi da
    hedabide berrien erabileran, txat eta sare sozialetan.

Medikuak deitu zidanean, aurrean zituen azken eskanerraren emaitzak.
Dena ondo, esan zidan, datu guztiak erabat normal daude. Ohatilan
etzan, eta ondo miatu ninduen. Arazorik ez. Hurrengo hitzordua,
otsailean. Ordurako beharbada erabat kenduta izango dut Prednisona,
kortikoide bat oraindik ere hartzen nabilena, erretxazo kontuak
konpontzeko. Irtendakoan, Begori deitu diot: albiste onak.

Kategoriak Sailkatugabeak | Etiketak , , | Iruzkin 1

Zer ikasi Obamaren kanpainatik

Data: 2008(e)ko azaroaren 5a Egilea: Joxe Aranzabal

Chris O´Brien kazetaria zur eta
lur geratu zen jakin zuenean Obamaren taldeak erabiliko zituela bideo jokorik
arrakastatsuenak  bere kanpainaren publizitatea
egiteko. Hori zela-eta, artikulu bat idatzi zuen IdeaLab blogean:
Erredakzio taldeek zer ikas dezaketen Obamaren kanpainatik. Hona hemen
zati bat, gutxi gorabehera itzulita:

“Zer harreman dute bideo
jokoek eta erredakzio taldeek? Argi dago azken urte honetan Obamaren
kanpainak oso ondo ulertu duela bere komunitateak zelan bilatu eta
kontsumitzen duen informazioa, hainbat plataforma erabilita. Obamak
denak eman ditu ontzat, eta moldatu egin du bere mezua jendeak
plataforma horiek darabiltzan erara.

“Ikasgai garrantzitsu bat
da, erredakzio talde guztiek ikasi beharrekoa. Iaz The Next Newsroom
Project egitasmorako egindako ikerketan sei printzipio antzeman
genituen erredakzio taldeek bere egin beharrekoak. Horietako batek
eskatzen die ontzat hartzea plataforma guztiak. Ez da nahikoa esatea,
“Eh, lehendabizi sarean egon nahi dugu”. Horren ordez, pentsatu zelan
erabili plataforma guztiak modu bertsuan: sakelako telefonoak, sarea,
papera, irratia eta telebista. Eta prest egon esperimentatzeko ager
daitezkeen beste batzuekin, bideo jokoak barne.

“Ezinbestekoa da
erredakzio taldeek ulertzea beren komunitateak, non dauden, zelan
eskuratzen dituzten albisteak eta informazioa, eta berau zelan
kontsumitzen duten era guzti horietan”.

IdeaLab.http://www.pbs.org/idealab/2008/10/is-barack-obama-the-newsroom-o.html

Kategoriak Sailkatugabeak | Etiketak , , | Utzi iruzkina

D eguna

Data: 2008(e)ko azaroaren 4a Egilea: Joxe Aranzabal

Gaur Fagor Etxetresna Elektrikoak kooperatibako langileek batzar
berezia egingo dute Uarkape pilotalekuan, Mondragoen, erabakitzeko
kobratuko ote duten Gabonetako aparteko paga. Debagoienean ez da beste
ezertaz hitz egiten, Fagor txarto baldin badabil, beste batzuk are eta
okerrago ibil daitezkeelako. Kooperatibistek erabakitzen badute ezetz,
ez dutela kobratuko geratzen den aparteko paga, izango da neurri bat
gehiago, beste askoren artean, krisi ekonomikoari aurre egiteko.

Gaurko izenbururik potoloenak itsasoz bestaldetik etorriko dira,
seguruenik, gaur bozketa eguna baita AEBetan, baina gure arteko askoren
begiak Uarkapera begira daude, han zer erabakiko.

Kategoriak Sailkatugabeak | Etiketak , | Iruzkin 1

Hamilton, txapeldun

Data: 2008(e)ko azaroaren 3a Egilea: Joxe Aranzabal

Pilota partida ikusita —inork esplikatuko dit zer esan nahi duen Retegi Bi horrek?—, eta aprobetxatuta euria goian behean ari zuela kalean, atzo 1 Formulako azken lasterketa ikusi nuen, Brasilgo sari nagusia. Bukaera ikusgarria izan zuen, Hamiltonek azken bihurgunean pasatu baitzuen Glok alemana, Massaren familiartekoak salto eta brinko ari zirela, pentsaturik brasildarra zela munduko txapeldun berria.

Pedro de la Rosa pilotoa izan ezik —beti neurtua eta jakintsu komentarista moduan—, Tele 5ko kazetariak desastre hutsa dira, berbalapikoak eta partzialak, dena ikusten baitute Alonsoren arabera.

Faboritoei dagokienez, berdin zitzaidan batak zein besteak irabaztea, Massak edo Hamiltonek. Azkenean baina, Hamiltonek irabazi, puntu batengatik bada ere. Zorionak!

Kategoriak Sailkatugabeak | Etiketak , | Utzi iruzkina