Gaur arratsaldean hitzordua dut Donostian, bertan parte hartuko baitut elkarrizketa batean Anjel Lertxundirekin —Oinazea kontatu, oinazez kontatu—, Jaime Otamendi moderatzaile dugula.
Gaixotasunaren inguruan egingo dugu berba. Anjel Lertxundik aztertuko du literaturak zelan kontatu duen sufrimendua XX. mendean. Nik, berriz, neure esperientziaren berri emango dut, zelan bizi izan nuen minbizia.
Mahai-ingurua arratsaldeko 19:30ean hasiko da, euskaraz, Gipuzkoako Foru Aldundian, Tronu aretoan.
San Isidro eguna beti izaten dugu gogoan, gure auzoko jaiak baitira, Musakola auzokoak, Mondragoen. Egun seinalatu horretan, bost neba-arrebok autoak hartu, eta Kantabriara egin genuen, gure senar-emazteon konpainian, asteburua elkarrekin igaro nahi genuen-eta.
Villacarriedon hartu genuen ostatu, Soñanes jauregian, 1719an eraikitako eraikin barroko eder horretan, eta handik antolatu ditugu, Jabier Larrañaga koinatuaren gidaritzapean, hainbat bisita, Valles Pasiegos parajean zehar.
Asteburu ederra izan da: bapo jan dugu, ederto edan, izadiaz gozatu dugu, eta ezin pozikago itzuli gara etxera, Naia eta Unai ilobek haurtxo bat oparitu digute-eta, gu hantxe ginen bitartean: Ekain. Ezin gehiago eskatu. Asteburuko argazkiak Flickr-en daude ikusteko moduan.
Amazonek Kindle Publishing
for Blogs egitasmoa kaleratu berri du. Horren bidez, edozeinek jar
dezake bere bloga irakurgai Kindle irakurgailu digitalean. Horretarako,
hainbat pauso egin behar dira:
Ez da
marabilla bat, Kindlen blogaren edukiak zuri-beltzean ikusiko dira,
bideoak-eta ezin izango dira ikusi, Kindle oraindik ez dago salgai
Europan… Hala ere, beste kanal bat da zure edukiak urbi et orbi
zabaltzeko. Interesatzen bazaizu, irakurri artikulu hau.
Liburua esku artean nuela, begiratzen hasi nintzen barruko orrialdeetan, eta kontakizun labur baten hasierak eman zidan atentzioa: “Jendeak nahi duena esango du, baina nik ez dut sinesten Mathilde Samodeski andrea bihotzekoak jota hil denik.” Hasiera zoragarria iruditu zitzaidan. Beste ipuinen hasierak irakurri nituen, eta oso onak haiek ere. Liburua erosita irten nintzen liburu dendatik.
Hildakoek ez dute hitz egiten. Horra atzo erositako liburuaren izenburua, Arthur Schnitzler idazle austriarrarena. Dagoeneko bi ipuin irakurri ditut, 11 ditu guztira, zein baino zein ederragoa.
Atzo esku artean izan nuen Elhuyar aldizkariaren azken alea, erabat birdiseinatua. Egia esan, oso itxura ona hartu nion diseinu berriari: argia eta dotorea iruditu zitzaidan.
Tipografia dotorea du, irakurterraza, espazio zuri ederrak ditu, ondo jokatzen du argazkiekin, eta informazioa, oro har, ondo antolatua du. Azalean bertan, Elhuyar izena bera ondo irakur daiteke, burua alde batera bihurritu beharrik barik. Emaitza bikaina iruditu zitzaidan.
Zientzia.net sareko aldizkariak ere eskertuko luke birdiseinu bat, batez ere irakurterraztasunari dagokionez. Orain badu nora begiratu.
Larunbat gauean Miss Potter filma ikusi nuen etxean, Beatrix Potter
idazle britainiarraren biografia, Renée Zellweger aktoreak antzeztuta.
Jakin-mina nuen Beatrix Potter-en gainean, Miren txikia zela hainbat
istorio irakurri baikenituen harenak, zein baino zein politagoa.
Gustura ikusi nuen filma, bertan argi erakusten baitira Potter
andereñoaren sorkuntza, sentiberatasuna eta nortasun handia.
Applek arbel digital bat aterako omen
du aurten, tamainaz gaur egungo iPhone halako hiru. Horixe diote
zurrumurruek, gero eta ozenago. Urtarrilean, bestalde, PQ Labs enpresak
Multi-Touch iTable mahai digitala aurkeztu zuen Las Vegasen.
Bai
arbela eta baita mahaia ere senideak iruditzen zaizkit niri, oso
antzekoak kontzeptuz. Bigarrena garestia izango da oraingoz, baina
lehena txurroak bezala sal daiteke, prezio batere eskuragarrian jartzen
badute. Eta begitatzen zait biek ala biek aldatu egingo dutela zelan
erabiltzen ditugun tresna informatikoak. Saguak eta arkatz digitalak,
esate baterako, egunak zenbatuta izan ditzakete.
Arbel digitala,
kasu, erabat eramangarria izan daiteke, eta hor denetik egin ahal
izango da: Interneten nabigatu, posta kudeatu, liburuak irakurri
(testuliburuak, liburu normalak, egunkariak, etab.), bideo jokoetan
ibili, marraztu, margotu, argazkiak editatu, telefonoz hitz egin, bideo
konferentziak egin…
Ordenagailua erostekotan direnek hobe
izango dute itxarotea, ahal badute behintzat, tresna eta software
horiek beste paradigma bat ireki dezakete-eta informatikaren erabileran.
