Beti erakarri nau espazioko igogailuak, Arthur C. Clarke idazleak ezagun egindako ideia. Orain baino lehenago ere idatzi izan dut berari buruz. Sei urte igarota, hemen nago berriro ere, gai berari bueltaka, aprobetxatuta NASAk joan den astean antolatutako lehiaketa, The Space Elevator Games, norgehiagoka bat bilatzeko teknologiarik egokienak espazioko igogailua egite aldera. Sari nagusia irabazi nahi duenak igo beharko du kilometro bateko kable bat 5 metro segundoko lastertasunez.
Zer da baina, espazioko igogailua? Kable bat, lur azaletik gora abiatuko litzatekeena, ekuadorretik ahal dela, eta orbita egonkorrean jarritakoan lotuko litzatekeena bai espazioko hotel bati edo propio hantxe kokatutako asteroide bati, 35.000 bat kilometrora. Orbita egonkorrean egonda, lotuneak birak emango lituzke Lurrarekin batera, beraz, beti egongo litzateke puntu berean. Transbordadore elektromagnetiko bat arduratuko litzateke jendea eta kargak garraiatzen kablean gora eta behera. Goiko argazkian, Pat Rawling artistaren bertsioa ikus daiteke.
Inoiz eraikitzen bada horrelako igogailurik, eta seguru nago eraikiko dela, espazioko garraioa erabat aldatuko da. Ea zenbat urte behar diren horretarako.
