José Saramago idazlearen azken liburua irakurri berri dut, Caín. Bere azkena da, baina nik berari irakurri diodan lehena. Eta gustatu zait. Kainen begiak erabiltzen ditu Saramagok —Jaungoiko Ahalguztidunak kondenatu eta bazterturiko gizonaren begiak—, Jaungoikoaren beraren beste ikuspegi bat emateko: pertsonaia krudel, apetatsu eta hiltzaile erabatekoa.
Ondorio horietara iristeko Saramagok berrirakurri egin ditu Itun Zaharreko zenbait pasarte esanguratsu (Abelen hilketa, Abraham eta Isaaken artekoa, Sodoma eta Gomorra, Jerikoren konkista eta Noeren ontzia, besteak beste), baina zentzu komuna erabilita, ez fedea, eta ikuspegi laikoa, umorearekin nahasita.
Liburu hau dela-eta, Eliza Katolikoak aleluia beltza jo du, eta Portugalgo diputatu batek eskatu dio bere gobernuari kentzeko Saramagori Portugalgo naziotasuna. Hala ere, irakurtzeko gomendatuko nizueke, ondo pasatuko duzue-eta.
Irakurri Ensayo sobre la ceguera, Saramagorena berarena, itzela.
Ikuspegi ateoa esango nuke nik 😉 Eskuartean dut liburua. Asteburuan irakurriko dut.
Liburu izugarri onak ditu Saramagok, Iñigok gomendatutakoa irakurri beharrekoa da.
Bai, Birasuegi, zuzenagoa litzateke “ikuspegi ateoa” esatea “laikoa” baino. Bestetik, apuntatuta geratu da Ensayo sobre la ceguera. Eskerrik asko, Iñigo.