Astotxoa, gure astotxoa…

Data: 2011(e)ko ekainaren 14a Egilea: Joxe Aranzabal

Astoak Gazeta auzoan, Elorrion
Igande gehienetan, bazkaldu ostean, osteratxo bat egiten dugu Gazeta auzoan, Elorrion. 2.840 metro gorabeheratsu izaten dira, baina oso politak, beti dugu-eta ezusteko atseginen bat. Joan den igandean bezala, Barrutieta aldean asto hauek ikusi genituenean, lasai-lasai belarra jaten, tartean astakumea ere bazela.

Etxera iritsi nintzenean, Ipui antzeko hartu nuen esku artean, Mikel Zarateren liburu ederra, eta bertan Ekidazuko astasendia irakurri nuen, ipuin mingotsa bezain ederra.

Postdata: Beste asto bat ere etorri zitzaidan gogora, Platero, Juan Ramon Jimenezek aspaldi sortutakoa. Hona hemen lehen paragrafoa, Platero eta biok euskarazko bertsiotik hartuta, Patxi Ezkiagak itzuli bezala:

  • Platero ttikia da, iletsua, leuna; guztiz biguna kanpotik, erabat kotoizkoa dela, ez duela hezurrik emateraino. Bere begietako arbeltxezko ispiluak bakarrik dira gogorrak, kristal beltzezko kakalardoak balira bezala.

Bingen Ametzagak, berriz, 1953an horrela euskaratu zuen Platero eta biok lanaren lehen paragrafoa, Montevideon bizi zela, Urugain:

  • Txiki, iletsu, leguna da Platero; azalez hain biguina ta dana linaberazkoa dala, hezurrik ez daukala esan liteke. Haren begien azabatxezko ispiluak bakarrik dira gogorrak, bi leiarrezko kakarraldo iduri.
Kategoriak Sailkatugabeak | Etiketak , , , , , | Iruzkin 1

Angiozarren, Darwinekin

Data: 2011(e)ko ekainaren 8a Egilea: Joxe Aranzabal

Atzo Angiozarren izan nintzen, Bergaran, bertan lurperatu zuten-eta Rufina Zubierrementeria, Zabaleta baserrikoa, emakume berezia inondik ere: irekia, alaia, eskuzabala… Laurogeita hamalau urterekin hil zen, eta, albistea jakin bezain laster, erabaki nuen hara joan behar nintzela, Rufinari agur esatera. Elizara iritsitakoan, bertan sartu nintzen, meza hasita zegoen-eta.

Eliza barruan, gogoak ekarri zidan bezperan ikusitako filma, Creation. Bertan ikusten zen zelako drama bizi izan zuen Charles Darwin-ek eboluzioaren teorian barneratu ahala, teoria hark albo batera uzten baitzuen Jainkoa, ezinbestekoa, bestalde, bere emaztearen bizitzan. Bitxia izan zen, zeren  abadeak ere gogoan izan zuen Darwin, birritan aldarrikatu baitzuen Jainkoaren egitekoa mundua sortzerakoan, eta birritan baztertu eboluzioaren egitekoa.

Elizkizuna amaituta, autorantz nindoala euripean, Rufina zenaren erretratoa ikusi nuen eskela batean, horman, eta haren irribarrearekin itzuli nintzen etxera, Darwini erakusten nizkion bitartean gure arbasoen parajeak.

Kategoriak Sailkatugabeak | Etiketak , , | 3 iruzkin

Zelan berreskuratu ordenagailu lapurtua

Data: 2011(e)ko ekainaren 3a Egilea: Joxe Aranzabal

Joan den martxoaren 21ean Joshua Kaufman gazteari ordenagailu eramangarria ostu zioten bere apartamentuan, Oakland hirian, Kalifornian. Aplikazio berezi bati esker, Hidden, Joshuak ebidentziak jaso zituen lapurraren kontra, Muthanna Albedashi, 27 urteko taxi gidari bat, eta ordenagailua berreskuratu zuen.

Hidden
Hidden aplikazioak 15 dolar balio du, eta Mac ordenagailuetan soilik erabil daiteke. Aktibatzen denean, eramangarriaren nondik norakoak jasotzen ditu eta argazkiak egiten dizkio lapurrari, iSight kamera erabilita. Halaber, pantaila-argazkiak ateratzen ditu, ordenagailuan egiten diren operazioak jasotzeko.

PC Magazine aldizkariak kontatzen duenez, hasieran Joshua Kaufmanek ez zuen arrakasta handirik izan Oaklandeko poliziarekin, azken honen baliabide faltagatik. Aldiz, sortu zuenean blog bat Tumblr-en, Morroi honek dauka nire MacBooka, bertan jarrita lapurraren argazkiak, eta hasi zenean tuiteatzen horren gainean, jende askoren arreta jaso zuen, tartean Good Morning America telebista saioarena, eta, ondorioz, baita Oaklandeko poliziarena ere, zeina, orduan bai, lanean jarri zen, lapurra atxilotu arte.

Prey
Joan den hilean, bestalde, Cult of Mac aldizkariak kontatu zuen zelan Sean Power kanadarrari ordenagailu eramangarria lapurtu zioten, MacBook Pro bat. Prey aplikazioa eta Twitter erabilita, kanadarrak ere berreskuratu egin zuen ordenagailua. Prey software libreaz eginda dago, multiplataforma eta doakoa da, eta Hidden aplikazioaren antzera egiten du lan.

Kategoriak Sailkatugabeak | Etiketak , , , | Iruzkin 1

Hezur muina Erik haurrarentzat

Data: 2011(e)ko maiatzaren 31a Egilea: Joxe Aranzabal

Erik 8 urteko mutikoa da, eta emaile baten hezur muina behar du leuzemiari aurre egiteko. Bert eta Ainhoa haren gurasoek deia zabaldu dute Euskal Herrian, anima gaitezen hezur muinaren emaile egitera, Erik-ek, eta beste askok, aukera gehiago izan dezaten.

Ni ere hezur muinaren transplante bati esker bizi naiz. 2003an egin zidaten transplantea, Fatima arrebaren hezur muina sartuta. Erik-ek ez du horrelako zorterik izan familian, baina izan lezake inguruan, gutako asko emaile egiten bagara.

Inguru hauetan Josep Carreras fundazioak koordinatzen ditu hezur muinaren emaileak nazioarteko sare zabal batean. Gure kasuan, adibidez, hiru euskaldun elkartu ginen Valdecillako Ospitalean, Santanderren, hezur muineko transplantea egitera: horietarik bik familian genituen emaileak; hirugarrenari, ordea, Alemaniatik ekarri zioten hezur muina, berearekin bateragarria.

Santanderrera egin aurretik, Fatima arrebak hainbat injekzio hartu zituen etxean, zelula amen produkzioa bizkortzeko. Eguna iritsi zenean, berriz, laupabost ordu egin zituen ohe batean etzanda Santanderko Ospitalean, beso biak zabalik. Beso batetik tutu batek odola eramaten zuen, eta beste batek odol hori itzuli beste besora. Tartean, makina batek zurrupattzen zizkion odoleko zelula amak, hezur muina osatzeko beharrezkoak. Egun batzuk geroago, hezur muin hori, hiru bat poltsatan, niri sartu zidaten, odol transfusio bat bailitzan.

Harrezkero, Fatimak ez du bat ere arazorik izan emaile izatearren. Badaezpada, bost urtez, odol analisi bat egiten zuen urtean behin, eta emaitzak Valdecillako Ospitalera bidali, han kontrola zezaten bere bilakaera, osasun sistemak zaindu egiten ditu-eta hezur muinaren emaileak.

Ni, berriz, hemen nabil, berriro bizimodu normala egiten, transplantea egin zidatela laster zortzi urte beteko direnean. Erik txikiak ere merezi du horrenbeste. Egin zaitez hezur muinaren emaile eta emaiozu bizia. Berak, eta beste askok, eskertuko dizute.

Kategoriak Sailkatugabeak | Etiketak , , , | Utzi iruzkina

Sabadell-en elastikoa

Data: 2011(e)ko maiatzaren 29a Egilea: Joxe Aranzabal

Atzo, telebista ikusten ari nintzela, une batez Eibar-Sabadell partidako irudi batzuk ikusi niituen, labur. Eta Sabadell-ekoen elastikoak ikusita, gogoratu nintzen, Sabadell-ekoa izan zela nik izan dudan futbol kamiseta bakarra.

Seminarioan nengoela, amari futbol elastiko bat eskatu nion, eta, zelan ez dakidala, Sabadell-ekoa bidali zidaten, ez titularra (zuri-urdina), baizik eta bigarrena, atzo Sabadell-ek Ipuruan jantzi zuena (publizitate barik, hori bai). Elastiko harekin jokatzen nuen, bai Saturraranen eta baita Donostian ere, gaizki, hori bai, futbolean ez bainintzen bat ere ona.

Kategoriak Sailkatugabeak | Etiketak , , | Utzi iruzkina

Giro bitxia Elorrion, hauteskundeak direla eta

Data: 2011(e)ko maiatzaren 27a Egilea: Joxe Aranzabal

Egun hauetan giro bitxi samarra sumatzen dut Elorrion, ezker abertzaleak alkatetza gal dezakeela-eta. Igandean Bilduk eta EAJk seina zinegotzi irabazi zituzten, nahiz eta Bilduk 200 bat boto gehiago irabazi jeltzaleek baino. PPk, azkenik, zinegotzi bat.

PPko zinegotziak dagoeneko adierazi du ekainaren 11n EAJri emango diola botoa, eta horrek asaldatu egin du ezker abertzaleko zenbait jende.

Asko baina, ez dira gogoratzen Lizarra-Garaziko itunaren garaian, indar abertzaleek akordio bat sinatu zutenean orduko hauteskundeetan errespetatuko zituztela alderdi abertzaleen arteko zerrendarik bozkatuenak, ez dira gogoratzen orduan EAJk irabazi zuela Elorrion, eta ezker abertzaleak kendu egin ziola alkatetza, bertako independenteekin hitzarmena eginda. Joseba Permach etorri behar izan zen Elorriora, bere alderdikideei eskatzera errespeta zezatela Lizarra-Garaziko alderdiek hitzartutakoa, baina alperrik. EAJk zinegotzi bat gehiago zeukan ezker abertzaleak baino, baina azken honek oposiziora bidali zituen Sabinoren jarraitzaileak.

Dozena bat urte pasatxo gertatutakoa legezkoa eta balekoa izan bazen, bi aste barru gerta daitekeena ere halakoxea izango da. Hala ere, interesgarria izango da ikustea alderdiek eta berauen jarraitzaileek zelan erantzuten duen.

Kategoriak Sailkatugabeak | Etiketak , , , , , | 8 iruzkin

Tu quoque, Odon?

Data: 2011(e)ko maiatzaren 26a Egilea: Joxe Aranzabal

Donostiako alkate hogei urtez izanda, eta sinistuta berriro irabaziko zituela joan den igandeko hauteskundeak —beste askok ere horixe uste genuen—, Odon Elorza eskuzabal agertu zen donostiarren artean. Halaxe idatzi zuen bere blogean, fair play dotoreaz:

  • Respeto a la lista mas votada por la ciudadanía, de manera que ya anuncio que no pactaré con nadie para quitar la Alcaldía al candidato-a de dicha lista. Solo aspiraré a la Alcaldía si somos la lista mas votada. Dudo que otros puedan decir lo mismo.

Atzo, berriz, eta behin hasierako ezustekoa igarota, ez zigun esan, bada, ezetz, goiko hori adierazi zuenean ez zela ari Bilduri buruz, artean Bildu legeztatu barik baitzegoen, eta orain ahaleginak eta bost egingo dituela Bilduri alkatetza kentzeko, oso kezkatuta dagoelako Donostiaren etorkizunaz?

Twitter-en haserre galanta eta katxondeo latza eragin du Donostiako azken alkatearen txiribueltak. Ez da gutxiagorako. Nik, egia esan, ez nuen espero horrelako itsusikeria bere partetik. Hala ere, egia baldin bada EAJk esan duena, uste dut bere zoria erabakita dagoela. Alea jacta est.

Kategoriak Sailkatugabeak | Etiketak , , , | Utzi iruzkina

Etorri zatoz ala joan zoaz?

Data: 2011(e)ko maiatzaren 25a Egilea: Joxe Aranzabal

Atzo bi lankideren arteko elkarrizketa entzun nuen telefonoz, kafea hartzekotan zirela. Halako batean, batek galdetu zion besteari: “Hator ala hoa?”, eta arraroa egin zitzaidan, hori esateko, bizkaieraz behintzat, guk aspalditik erabili baitugu beste esamolde hau, orain urte dezente Derion ikasitakoa, euskara berreskuratzen hasi ginenean: “Etorri hator ala joan hoa?”.

Ez dakit beste euskalkietan zelan adierazten duten une berezi hori, non ez baitakigu laguna etorri datorren ala joan doan, egoera anbiguoa delako. Badakit, ordea, bizkaierazkoa formula dotorea bezain eraginkorra dela, eta euskara batuan ere balio lezakeela.

Kategoriak Sailkatugabeak | Etiketak , , | 3 iruzkin

Nire botoa

Data: 2011(e)ko maiatzaren 24a Egilea: Joxe Aranzabal

Bildu legeztatu zutenean, izugarri poztu nintzen, pentsatu bainuen aro berri bat ireki zitekeela Euskal Herriko politikan. Hala ere, maiatzaren 22an Aralar izan zen nire aukera. Eta ez naiz damutzen, nahiz eta ikusi Bildu eta Aralar artean 7 eta 1eko proportzioan egon zirela botoak, hor nonbait.

Orain hamar urte Aralarrek bide politikoen alde egin zuen, garbi, eta banandu egin zen Batasunetik. Artean ni ez nengoen ez batean, ez bestean —gaur ez nagoen legez—, baina niretzat oso garrantzitsua izan zen erabaki hura. Eta, harrezkero, Aralarri eman diot botoa hauteskunde gehienetan. Euskaltzaleak dira, ezkerrekoak, eta jokatzen dute errespetuz eta errealismoz. Gauza guztietan ez nago ados eurekin, baina azken aldi honetan aukera hori aurkitu dut hurbilen nigandik.

Eta Bildu? Bi urtean erakutsi beharko du gai dela koalizio bat lideratzeko, bidelagunak zaintzeko, aurkariak errespetuz tratatzeko, koalizio zabalagoak lantzeko eta malgutasunez jokatzeko. Barruan ere, ikustekoa izango da zelan moldatzen diren guardia zaharra eta aurpegi berriak. Koalizioak eskuzabaltasunez jokatzen badu, sari are handiagoak jasoko ditu, joan den igandekoa baino. Aitzitik, harrokeriaz ibiliz gero, atzera egin lezake.

Susmoa dut ezker abertzalearen balizko batasuna ere faktore horien pean egongo dela. Nire botoa ere bai.

Kategoriak Sailkatugabeak | Etiketak , , , | 8 iruzkin

Partitokrazia Euskal Telebistan

Data: 2011(e)ko maiatzaren 23a Egilea: Joxe Aranzabal

Atzo iluntzean haserretu egin nintzen Euskal Telebistarekin, berau erabili bainuen batez ere udal eta foru hauteskundeen jarraipena egiteko. Eta haserretu egin nintzen politikariei eman zien protagonismo neurrigabeagatik.

Atzokoan ez zen nahikoa izan gauan barrena zuzeneko konexioak egitea alderdi politikoen egoitzekin, beraien iritziak jakiteko. Horrezaz gain, lehen kateak bost politikari eraman zituen platora, hor ere monopoliza zezaten iritzia. Eta, zelan ez, hainbat momentutan, ETB1eko platoak oilategi bat ematen zuen, politikariak elkarri mokoka.

Hain zaila da soziologo, politologo, kanpainetan aditu eta kazetari zenbait eramatea platora, lagun diezaguten ulertzen emaitzak?

Kategoriak Sailkatugabeak | Etiketak , , | 2 iruzkin