Banutarrak

Data: 2005(e)ko apirilaren 26a Egilea: Joxe Aranzabal

Igande gauean Documentos TV ikusi nuen. Zati bat. Errumaniako familia baten kasua erakutsi zuten, Madrilen bizi direnak: hiru anaia Errumaniatik etorriak, euretariko bi beren neskalagunekin, eta hirugarrena, Martxoaren 11ko biktima.

Hiru planotan erakutsi zuten Banutarren historia, familia hark Banu baitzuen abizena: Madrilgo etxebizitza batean, autobusean Errumaniara bidean, eta Errumanian, Banutarren jaioterrian. Bizimodua gogorra zen Madrilen, baina are gogorragoa Errumanian, jasanezina ia.

Eta orduan gogoratu nintzen azkenengoz ospitalean izan ginenean, Deustuan, ospitaletik irtenda Casa Vasca jatetxera joan ginela menua jatera. Eta han zerbitzari gehienak errumaniarrak zirela. Barran zebiltzanak urduri ari ziren, bezeroei ulertu ezinik, eta nola zerbitzatu asmatu ezinka. Esan zigutenez, hilabete zeramaten Euskal Herrian. Dena zen arrotz beraientzat. Gogorra.

Kategoriak Sailkatugabeak | Etiketak | Utzi iruzkina

Etxeparegandik Sintxanengana

Data: 2005(e)ko apirilaren 25a Egilea: Joxe Aranzabal

Sebero Altube aztoratu egingo litzateke entzungo balu Sintxanen abestia, ETBk arratsaldero ematen duena, bukaeran dioela “…nire izena da Sintxan!”. Baina gure klasikoek horrelako asko idatzi zituzten: aditza elementu osagarrien aurretik.

Aste Santu honetan Patxi Salaberriren azken liburua eraman nuen oporretara, Euskal klasikoen atarian, eta hor adibide mordoa aurkitu nuen idazteko modu horrena. Hona ekarriko dizkizuet horietako hainbat, seguruenik gaur egun erdarakadatzat hartuko genituzkeenak.

Bernard Etxepare: Zeren baskoak baitira abil, animos eta jentil, eta hetan izan baita, eta baita, zientzia guzietan letratu handirik, miraz nago, jauna, nola batere ezten saiatu bere lengoaje propiaren faboretan heuskaraz zerbait obra egitera eta eskributan imeitera (14. or.)

Estebe Materre: Baina nahi dut jakin dezaten halakoek nik hizkuntza hunetan dakidana Saran ikasia dudala. (25)

Axular: Liburutto haur da emazurtza. Posthumus. Aita hilez gero sortua. (36) Batak erraiten du behatzea, eta bertzeak so egitea. (42)

Juan Tartas: Edirenen duzu laur kapitulu ene liburian: lehenian progatzen dut paganoen erranaz. (50)

Joannes Etxeberri, Sarakoa: Hau da dohain berezi bat, gure Jainko Jaunak gizonari xoilki eman diona. (54) Noeren barka hura gelditu zen Armeniako mendi haren gainean, zeina deitzen baita Baris. (65)

Manuel Larramendi: Irakurriko dute hala eleizetan nola etxeetan, eta Euskaraz hutsik dakitenak ta Gaztelania arrastaka baizikan eztakitenak ere, nahiko dute behin baino gehiagotan aditu. (88)

Sebastian Mendiburu: Loiolan, Jangoikoari eskerrak eta nere zori onez, hasi nintzen soinekoz Aita S. Ignazioren seme izaten. (100)

Bernard Larregi: Bigarrena, Jainkoaren graziarekin, agertuko da heldu den urtean, eta mintzatuko da Testament Berriaz. (110)

Juan Antonio Ubillos: Berezko hitz hoek, hitzkribitzean ta esatean, ezarri behar dira bakoitzari dagokan tokian. (112)

Juan Antonio Mogel: Ekusten ditugu konfesategiak jendez inguraturik, hurbiltzen dira gero aldara santura; uste gentzake poztutzeko gauza dala.. (124) Konfesio onak dakar berez komunio ona. (125) Bere sermoiak ziren txit lauak, berdintza edo konparazio ederrekin eginak. (128)

Bizenta Antonia Mogel: Deritzat entzuten nagoala mutiltxo, neskatxatxo ta nekazari askoren farra ta algara gozoak irakurri edo aituaz ipui honek. (147)

Jean Pierre Duvoisin: Iragan dituzu zelai aberatsak, mendi gogor, itsaso mortuak. (200)

Jean-Baptiste Daskonagerre: Nahi ginuen gure herritarreri eskaini lan xume bat eskaraz egina. (202) Jakintsuek kausituko dute huntan dudarik gabe zenbeit huts handi. (202)

Mixel Elizanburu: Ene liburuan erran dut nola heiek ere zeihar daitezken bide onetik. (213) Orai dugun hirurgarren Errepublika hau, 1848koa bezala, da erdia mentsa edo erdia imizila. (216)

Bazilio Joanategi: Noizbait hasi naiz berriz ere lanean, eta egin dut bertze liburu bat berri-berria. (225)

Jean Pierre Arbelbide: Mintzaira hori da Eskuara; eta nahi banauzu sinetsi, emazu oraino kobla hau izkribatu dituztun kantuen ondotik. (246)

Kategoriak Sailkatugabeak | Etiketak | Iruzkin 1

Adi, Craigslist iritsi da

Data: 2005(e)ko apirilaren 24a Egilea: Joxe Aranzabal
Azken hamabost urteotan munduko egunkari gehienek irakurleak galdu dituzte, eta dirua. Orain, berriz, Craigslist agertu da, eta iragarkiak kendu dizkie, eta diru gehiago. Enpresa argitaratzaileak ikaratan daude. Nola liteke enpresa ipotx batek, 18 langilerekin, dardaratan ipintzea munduko egunkaririk ahaltsuenak? Francis Pisanik horrela azaldu du, artikulu honetan:
*El éxito de Craigslist.org muestra ademas la existencia de amenazas específicas. Lanzada en 1995 por Craig Newmark, un programador en San Francisco ofrece ahora clasificados gratis en 100 ciudades de 20 países entre las cuales Buenos Aires, México, Sao Paolo y, no oficialmente todavía, Madrid. Les quita de esta manera una de sus fuentes tradicionales de ingresos a los periódicos establecidos.*

Zeintzuk dira atalik bisitatuenak Craigslisten? Lana, etxeak, saltzekoak, pertsonalak eta foroak. Eta zergatik sartzen da hainbeste jende? Craigslistek aukera ematen dielako zuzenean negoziatzeko euren artean, bitartekaririk gabe, eta, noski, bitartekariek kobratzen dutena ordaindu beharrik barik. Egunkariak ikaratan, eta inmobiliaria mordoa ateak ixten.

Argibide gehiago jakin nahi izanez gero Craigslisten gainean, klik egin hemen.

Kategoriak Sailkatugabeak | Etiketak | Iruzkin 1

Gizakom

Data: 2005(e)ko apirilaren 23a Egilea: Joxe Aranzabal

Aste honetan bertan blog bat sortu dugu fakultatean, Gizakom, eta hori egin dugu bi karrera plazaratzeko, Enpresarako Giza Zientziak, eta Informazioa eta komunikazioa, biak HUHEZIn. Esperimentu bat da, hala ere. Gure ustez bloga erreminta egokia izan daiteke ikasketa horiek zabaltzeko. Horregatik, informazio asko emango dugu bertan: albisteak direla, iritzi artikuluak, beste nonbaiten aurkitutako gai interesgarriak, elkarrizketak…

Nahi dugu informazio hori iritsi dadin horren premian izan daitezkeenengana: balizko ikasleak, gurasoak, orientatzaileak, tutoreak, Giza Baliabideetako arduradunak. Eta, bueltan, nahi dugu jende horren iritzia ere jaso. Eta horretarako blogak ez du parekorik, ahalbidetzen baitu elkarrizketa irakurleekin. Horegatik, horietako askori bidali diegu mezu bat esanez Gizakom jaio dela, eta horren helbide gorde dezaten beren gogokoenen zerrendan.

Neu izango naiz editore Gizakomen. Baina ez naiz bakarrik ibiliko. Alboan izango dut talde bat laguntzen, bloga ahalik eta aberatsen izan dadin. Lortuko ahal dugu!

Kategoriak Sailkatugabeak | Etiketak | Utzi iruzkina

Izuikara

Data: 2005(e)ko apirilaren 22a Egilea: Joxe Aranzabal

Atzo ezusteko itzela eman zidan autoak. Etxera bidean nintzen. Kanpoan euria, eta ni ohi baino polikiago Kanpazar igoten. Erraustegi ondoko bihurgunean sartu nintzenean, gurpilak noraezean sentitu nituen. 40ra-edo nindoan, eta beribila justu-justu nire bidetik. Auto bat jaisten, eta ni ezker-eskuin, trastoa menderatu arte. Arnasa barik geratu nintzen. Eta “Oñatiko istripuaz”:http://www.goiena.net/Debagoiena/News/1114066853 gogoratu. Gaur bertan, fakultatera bidean, garajean geratuko naiz, gurpilak aztertzera.

Oñatiar guztiei, eta bereziki hildakoen familiartekoei, besarkada handi bat.

Kategoriak Sailkatugabeak | Etiketak | 2 iruzkin

Gazteak eta ausartak

Data: 2005(e)ko apirilaren 21a Egilea: Joxe Aranzabal

Aurreko batean Joseanek eskatu zidan ea sinatuko nion nire liburu bat bere alabari, hamabost bat urtekoa. Irakurketa aukeratu behar-eta institutuan, eta nire liburua hautatu zuen, lehendik ere irakurria baitzuen zerbait Sustatun. Pozik sinatu nion, jakina, are gehiago adin horretakoa izanda, ausarta izan zelako gaia aukeratzerakoan. Sinatutakoan, Josean bera ere han geratu zen, garajean, irribarre zabala ezpainetan. Jesusek eta bere emazteak, bestalde, ez dakite euskararik, baina beraien seme-alabek bai. Eta alaba nagusiak, hamabost bat urtekoa hori ere, lan hirukoitza hartu du bere gain: nire liburua irakurtzea, berau gurasoei itzultzea, eta neba gaztetxoari azaltzea. Liburuaren bidez bere aita berraurkitu du. Harro dago aitaz, eta ez zaio motiborik falta, ni ere harro bainago Jesus Ojanguren nire medikuaz.

Kategoriak Sailkatugabeak | Etiketak | Utzi iruzkina

Benedikto XVI

Data: 2005(e)ko apirilaren 20a Egilea: Joxe Aranzabal

Atzo arratsaldean beribilean sartu nintzenean jakin nuen Vatikanok aukeratu zuela buru berria: Benedikto XVI. Ondoren, baina, ikasi nuen nor den Erromako apezpikua: Ratzinger kardinala. Eta atsekabetu egin nintzen, elizaren dogmatikoen burua gailendu delako. Lehenengo gauza pentsatu nuen Opus Deik ondo lotuta zituela gauzak.
Euskaltzaindia eta pontifizeak

Ratzinger kardinalak aukeratu du Benedikto izenarekin aginduko duela. Bego horretan. Baina nik zalantza handiak ditut aita santu deitu behar ote diogun, behintzat katoliko sentitzen ez garenok.

Euskaltzaindiak aspalditxo erabaki zuen nola deitu San Petriren ondorengoak. Hemen aurkituko duzue zerrenda luze bat, orain arte izan diren pontifize guztien izenekin. Eta hor agertzen da Benedikto izena ere.

Aita santu?

Beste erlijio batekoa balitz, esango genuke jaun hori dela jauntxo feudal bat, estatu teokratiko bateko buru, non ez dagoen demokraziaren aztarnarik, non elizako printzeak jauntxoak berak aukeratzen dituen, non sekretismoa den araua, eta non emakumeak erauzita baitaude agintetik eta ez baitute bozkatzeko eskubiderik. Horrelako gobernu bat zuzentzen duenari aita eta santu deitu behar diogu?

Ondo deritzot katolikoek horrela deitzen badiote, eskubide osoa dute horretarako, baina uste dut badela garaia besteok beste izen bat erabil dezagun kargu hori izendatzeko, hizkuntzan ere ispila daitezen euskal gizartean gertatu diren aldaketak.

Orain arte hiru modu erabili ditut aita santu izenaren ordez: Erromako apezpikua, baina erretorikoegia iruditzen zait; San Petriren ondorengoa, hori ere lotuegia santutegiari; eta pontifizea. Hau neutroagoa da, baina luzeegia aukeran. Bestelako proposamenik baduzue, eskertuko dizuet esatea.

Kategoriak Sailkatugabeak | Etiketak | 9 iruzkin

Elgeta: bestaren kronika

Data: 2005(e)ko apirilaren 19a Egilea: Joxe Aranzabal

Zazpiak laurden gutxi izango ziren Elgetara heldu nintzenean, igande arratsaldean. Autoa utzi, ordenagailua hartu, eta Espaloirantz abiatu nintzen. Bidean Xabier Mendiguren Elizegi eta Elena Lakarekin egin nuen topo. Xabier blogaria da, eta Elenak laster hasiko du berea, Goiena.net-en barruan. Espaloira iritsi orduko gurekin genituen Eneko Astigarraga, Julen Gabiria eta Josu Martinez. Espaloian sartu, lagunak agurtu, eta lanean hasi ginen. Aurretik erabakita genuen Julen Gabiriari irakatsiko niola nola zintzilikatu argazkiak blogean. Ordenagailua atera, argazki pare bat egin, eta han hasi ginen, egin beharrekoak egiten. Berandu baino lehen, Julenek bi argazki sartu zituen: bat Faro honetan, eta bestea berean. Beraz, ikasi du hori nola egiten den.

Tarteka, lagunak agurtzen. Aurpegi ezezagun batzuk ere hantxe ziren, adibidez, Erramun Gerrikagoitia. Bere gauzak askotan nituen irakurrita, baina ez nuen bera ezagutzen. Eta, antza denez, ezta berak nik ere, zeren agurtu nuenean, harritu egin zen: “zu zara Joxe Aranzabal?”. Gero pena hartu nuen, ze ez nuen astirik hartu berarekin hitz egiteko, eta konturatu orduko, joanda zegoen.

Denok atera genituen argazkiak, hauxe adibidez. Aurrean ezkerretik, Elena Laka, Maite Rementeria eta Gari Araolaza daude. Atzerago, Julen Gabiria eta Arantza Tamayo, Mungiako blogaria.

Elena Lakak esan zidan zalantzak izan dituela bloga egiteko, baina azkenean, ikusita besteok zer egiten dugun, bera ere animatu egin dela. Goio Arana bere anaiarekin agertu zen, Edorta Aranarekin, hau ere laster hastekoa bloga egiten. Atzo ere barre apur bat egin genuen, zenbait jendek nahastu egiten ditu-eta gure ahotsak, Edortarena eta nirea.

CodeSyntaxeko jende asko izan zen han. Mikel Larreategi, Luistxo Fernandez, Gari Araolaza eta Maite Rementeria. Han zebilen, halaber, Oier Gorosabel. Azken hori, adibidez, ez nuen ezagutu, inoiz ikusi barik nengoen eta. Joandakoan esan zidaten hura zela Oier. Angel Bidaurrazaga ere hantxe izan zen, Euskara zuzendaria Bizkaiko campusean, EHUn. Erramunen ondoan egon zen. Beste argazki honetan ikusiko dituzue han elkartutako ia gehienak, eta pasatzen baduzue punteroa argazkiaren gainean, erraz igarriko duzue nor den nor.

Halako batean, estukada bat sentitu nuen bizkarrean. Mikel Iturria zen, nire aingeru goardetako bat. Bere emaztearekin zegoen, beti bezain abegikor eta umoretsu. Eta, ezustean, hantxe ikusi genuen Iban Zaldua ere, Volgako batelari dotorea. Agurtu nuenean, Igor Leturiarekin zegoen. Ibanek esan zigunez, laster hasiko dira literatura kritikak egiten Volgako batelariak, eta ez prezisamente nik Sustatun emandako gomendioei jarraituz, nola idatzi Interneten. Igor Leturia gu baino bi pauso aurrerago ibili zen, mobloging egiten, hau da, argazkiak atera eta telefonotik zuzenean zintzilikatzen e-gor blogean.

Mobloging

Oraindik jendea ailegatzen ari zen. Adibidez, Jabi Zabala eta Arantza Tamayo, Obabatxue blogeko jabea. Esan nion Arantzari, oso ondo idazten duela ingelesez, eta asko gustatzen zitzaidala Obabatxue. Haren zuritasuna gustatzen zait. Jabik ere kontatu zigun nola hasieran mac erabiltzailea zen, baina gaur egun biak erabiltzen dituela, mac eta windows. Batek baino gehiagok galdetu diotela ea informatikaria den, baina bera kazetaria dela, eta bere kasa ikasi duela informatikaz dakiena.

Bukaera aldera, Xabier Mendiguren Elizegirekin egin nuen trill, eta galdetu nion liburuaren gainean, ea zer moduz doan. Egia esan, lanpetuta ibili dela beste kontu batzuekin, eta ez diola kasu handirik egin, baina laster erantzungo didala.

Ez ginen bakarrik ibili Espaloian: gurekin batera hainbat kazetari, kameralari eta argazkilari ibili ziren, haiek ere bestak erakarrita, baina ez festa egiteko, baizik eta lanean.

Harrituta geratu nintzen, hori bai, zein ondo dabilen Espaloia: herritar asko lekuaz gozatzen, Wi-Fi konexioa bat ere arazorik gabea… gozamen hutsa. Elgetak bikain erantzun die blogari euskaldunen deiari, betiko moduan. Zorionak, Iban, eta zorionak Elgeta!

Kategoriak Sailkatugabeak | Etiketak | Utzi iruzkina

Adobek Makromedia erosi du

Data: 2005(e)ko apirilaren 18a Egilea: Joxe Aranzabal

Sutautsa baino bizkorrago zabaldu da berria: Macromedia handia Adobe handiagoak irentsi du, 3,4 milioi dolar ordainduta. Zertarako eta aurre egiteko Microsoftek datorren urtearen hondarrean aterako duen Windows sistema eragileari, Longhorn izenekoa, zeinek eramango omen baititu zenbait ezaugarri Adobek eta Macromediak dokumentu elektronikoetan erabiltzen dituztenak. Hori dela eta, Adobe hasiko da Flash teknologia erabiltzen Acrobat programan.

Niri ere atentzioa eman dit albisteak. Izan ere, orain hamalau bat urte hasi nintzen erabiltzen Aldus Pagemaker maketatzeko, eta Aldus Freehand marrazteko. Geroago, Adobek erosiko zuen lehena, eta Macromediak bigarrena. Aurrerantzean, berriz, biak jabe beraren esku izango dira.

Kategoriak Sailkatugabeak | Etiketak | Utzi iruzkina

EAJ-PSE gobernurantz?

Data: 2005(e)ko apirilaren 18a Egilea: Joxe Aranzabal

Bukatu da Besta, hau da, blogarien festa, eta begiratu bat eman diet hauteskundeen emaitzei. Ez dut asti handirik izan horretaz pentsatzeko, baina uste dut gaurko emaitzetatik oso gobernu bestelakoa irten daitekeela Gasteizen. Nik ondorio hauek atera ditut, botelasterrean:

  1. EAHK. Bera izan da irabazlerik handiena gaurko egunean. Garbi dago Batasunaren botoak jaso dituela, eta are garbiago Batasuna legez kanporatzeak ez duela ezertarako balio izan, ez bada alderdi hori indartzeko: orain lau urte, legearen bedeinkazio guztiekin aurkeztu zelarik, 7 eserleku irabazi zituen; gaur egun, legez kanpo dagoela, bi gehiago.
  2. EAJ-EA. Lau eserleku galdu ditu, baina berak jaso ditu boto gehien; eta irabazi egin du hiru herrialdeetan. Beraz, badu pozik egoteko motiborik.
  3. PSE-EE. Kanpaina kaskarra egin du, baina pozik egon daiteke, eragotzi duelako hirukoak erabateko gehiengoa irabaztea.
  4. PP. Pozik, uste baino gutxiago galdu duelako.
  5. EB. Beharbada parlamentari gehiago espero zuen ateratzea, baina egia da Ezker Batua finkatu egin dela.
  6. Aralar. Lehen aldiz, legebiltzarkide bat lortu du Eusko Legebiltzarrean. Lorpen handia alderdi txiki batentzat. Pozik egon daiteke, beraz, hau ere.

    Orain, berriz, sekulako pastel zaila geratzen da herri hau gobernatzeko: EAJ, EA, Ezker Batua eta Aralar alderdien artean 33 eserleku osatzen dituzte. Beste aldean ostera, PSE-EEk eta PPk ere, 33 eserleku. Ez batean eta ez bestean, EAHK, 9rekin. Nola gobernatzen da hori?

Gobernagarritasuna

Arnaldo Otegik gaur eskuratu du orain lau urte aldarrikatu zuen giltza, eta enpate tekniko horren aurrean, berak erabaki lezake nork gobernatzen duen Gasteizen. Baina iruditzen zait ez batzuek ez eta besteek ere ez dutela hori permitituko. Beraz, nik esango nuke bozketa honetatik oso litekeela dela gobernu berri bat irtetea, non jeltzaleak eta sozialistak berriro elkarlanean arituko liratekeen.

Beharbada goizegi izan liteke bai jeltzaleentzat eta baita sozialistentzat ere, formula hori baliatzeko, baina urtebete barru eginda egon liteke. Lehendik ere badago aurrekaririk: Ardanza lehendakari zela, osatu zuen gobernu bat EArekin eta EErekin, baina iraun zuen pastel batek adina ikastetxen bateko atari aurrean, haren ondoren etorri baitzen EAJ-PSE gobernua.

Beraz, eta hasteko, bai jeltzaleek zein sozialistek ontzat eman dezakete orain arteko hirukoak eta Aralarrek osatutako gobernu bat, eta hemendik urtebetera-edo iritzi publikoa prestatuago dagoela, sortu gobernu egonkorra, gehiengo sendoarekin.

Bukatu aurretik, eta iruditzen bazaizue erabat gertaezina goian esandakoa, zin dagit ez dudala alkohol tantarik edan; ura eta kafea baino ez dut edan.

Kategoriak Sailkatugabeak | Etiketak | 4 iruzkin