Orotarikoa, formatu digitalean

Data: 2005(e)ko abenduaren 5a Egilea: Joxe Aranzabal

Egia da, jaun-andreak: Orotariko Euskal Hiztegia (OEH) formatu digitalean dago oraintxe bertan, nahiz eta Ibon Sarasolak behin eta berriro esan —eta azkenengoz Sautrela saioan, joan den larunbatean—, hiru urte gehiago beharko direla —OEH orain urtebete bukatu zen, berez— hiztegia formatu digitalera pasatzeko. OEH formatu digitalean dago, eta, nahi izatera, sarean ipin daiteke bost minutu baino lehenago.

Digitala, definizioz, zenbakien bidez adierazten da. Horixe dio Ibon Sarasolaren Euskal Hiztegiak. Eta nola ordenagailu guztiek zenbakiekin egiten duten lan, beraietan landutako produktuak digitalak dira. Horixe dio Robin Williams adituaren Jargon hiztegi teknikoak. Horrek esan nahi du ordenagailuetan gordetzen den guztia digitala dela: testu bat, argazki bat, marrazki bat, audio zati bat, bideo bat… Artikulu hau berau, Faroan argitaratu aurretik ere, nire ordenagailuan gordeta zegoela, gai digitala zen. Orobat, OEH guztia formatu digitalean dago, berau egiteko ordenagailuak erabili direlako. Nire aurretik Jabi Zabalak ere ederki azaldu zuen hori erantzun batean.

OEH sarean ezartzea bost minutuko kontua izan daiteke. Euskaltzaindiak di-da egin lezake hori, horrela erabakiko balu. Eta erabaki zoragarria izango litzateke, geroko gerotan eta luzamendutan ibili gabe —hiru urte gehiago itxaron beharra horixe baita—, denon eskura ipiniko luke-eta sekulako altxorra.

Orotarikoaren fruituak

Eta nola Ibon Sarasolak lan mardula egin baitu Zehazki hiztegiarekin, zeina, egileak horrela esanda, oinarritu baita Orotarikoan, hala egin dezakete beste askok altxor horretan oinarrituta. Luistxo Fernandezek dagoeneko aurreratu ditu zenbait lan ildo. Eta gero besteok, merkatuak alegia, erabakiko dugu lan horiek onak diren edo ez. Nik, adibidez, erosteko asmoa dut Zehazki hiztegia. Eta, geroago ere, prest egon naiteke beste batzuen lanak ere erosteko.

Adar jotze galanta izango litzateke OEH diru publikoarekin egin eta gero, lau urte behar izatea —dagoeneko bat joan da, bobilis-bobilis—, lau urte eta diru publiko gehiago, hori denon eskura ipintzeko. Eta are adar jotze handiagoa Euskaltzaindiak era mugatuan ipiniko balu sarean, Euskalterm dagoen bezala, hitzez hitz kontsultatzeko moduan bakarrik, horrela urteak atzeratuko bailuke, alferrik, OEHn oinarritutako ikerkuntzaren eta produktuen zabalkundea.

Entzun, Euskaltzaindia

Euskaltzaindiak ez du diru publiko gehiago behar, ez eta hiru urte gehiago ere, OEH sarean jartzeko bere osoan. Gaur bertan egin lezake hori. Nik ere horixe eskatzen diot.

Kategoriak Sailkatugabeak | Etiketak , , , | 4 iruzkin

Blogari baten erantzunak

Data: 2005(e)ko abenduaren 3a Egilea: Joxe Aranzabal

Joan den larunbatean berandu ireki nuen posta elektronikoa. Iñigo Bilbao kazetariaren mezu bat nuen, biharamonean Berria egunkarian erreportaje bat egin nahi zuela euskal blogarion gainean, eta ea erantzungo nizkion galdera batzuei. Erantzun nion, baina berandu zen. Ordurako egunkaria eginda zegoen-eta. Hala ere, hona ekarriko ditut orduan idatzitako erantzunak.

Noiztik daukazu eta elikatzen duzu bloga?

2004ko azaroaren 8an sortu nuen nire lehen bloga, Blogger plataformarekin. Geroago, 2005eko otsailaren 22an Goiena.net-era pasatu nintzen, eta harrezkero hortxe nago, Goiena.net-en blog komunitatean. Lehenago, baina, 2001ean hasi nintzen parte hartzen Sustatu.com talde blogean. Hantxe hasi nintzen ikasten blogintzari buruz.

Zerk bultzatu zintuen bloga sortzera?

Gaixotu nintzenean, artikulu sorta bat idatzi nuen Sustatun, gero liburu batean batu zirenak, Medikuak esan dit minbizia dudala. Harrezkero, esan zitekeen bide bat irekia nuela, esperientzia pertsonalak kontatzearena. Beraz, bukatu nuenean Sustatuko artikulu sorta hura, logikoa ikusi nuen neure bloga sortzea, hor denetariko gauzak azaltzeko. Beharbada heriotzari adarrak ikusi izanak areagotu egin du niregan idazteko gogoa, ez dakit, hori pentsatu dut José Luis Sampedroren azken liburua irakurritakoan, Escribir es vivir. Hori izan liteke. Baina bada beste kontu bat, eta horrek izugarri erakartzen nau: blogek zelako askatasuna eskaintzen duten gauzak argitaratzeko. Doakoak dira, eta ez dute beste hedabideen morrontza asko eta asko. Eta elkar erabileak dira, irakurleek ere aukera dute-eta beren iritziak sartzeko.

Hasierako asmoekin jarraitzen duzu edo, egin ahala moldatuz joan zara?

Esperientziak beti behartzen zaitu gauzak moldatzera, baina uste dut hasierako asmoarekin segitzen dudala: egunero zerbait idatzi: hausnarketa bat, kontakizun bat, albiste bat… zerbait.

Sarearen hoztasuneik haratago blogean sortutako harremanek eragin dituzte bestelako loturak?

Nork dio sarea hotza dela? Sarea da beste hedabideak bezain hotza edo beroa, neutroa delako. Geuk egiten dugu sarea hotz edo bero. Nik, behintzat, horrela ikusten dut. Eta, bai, hainbat harreman egin dut sarean, eta oso aberatsak izan dira. Niretzat sarea leiho handi bat izan da, eta horren bitartez munduari egin diot kuku, bai gaixorik nenbilenean, eta baita gero ere. Asko zor diot sareari.

Kategoriak Sailkatugabeak | Etiketak , , | 2 iruzkin

Euskara, sinbolo eta traba

Data: 2005(e)ko abenduaren 2a Egilea: Joxe Aranzabal

Euskadiko Lan Elkartuko Kooperatiben Federazioari gertatu zaio Euskal Herrian erakunde askori gertatzen zaien gauza bera, euskara erabiltzen dutela, sinbolo gisa, itxurak gordetzeko. Eta horrelakoetan, igarri, nola ez. Diseinu enpresa bati eman enkargua kartelak egiteko, han inork ez daki euskaraz, sekulako hanka sartzea egiten dute… baina nola inork ez duen kalitate kontrolik egiten euskarazkoan, aurrera doa, banatu egiten da, gure eskuetara iritsi arte.

Gonbita bat jaso nuen atzo, Euskadiko Lan Elkartuko Kooperatiben Federazioak bidalita, abenduaren 14an joan nadin Gasteizera, jardunaldi batzuetara: Ekialdeko herrialdeek eta Europar Batasunaren zabaltzeak Euskadiko kooperatibetan duten eragina. Esku programa ikusi nuenean, ordea, harrituta geratu nintzen; dena hankaz gora, gaztelaniaren hurrenkeran: Buruzko jardunaldia – Ekialdeko herrialdeek eta Europar Batasunaren zabaltzeak Euskadiko kooperatibetan duten eraginari.

Horrelako hanka sartzeak irain bihurtzen dira euskaldunontzat. Inork ez gaitu errespetatzen, ez dugu kalitate kontrol minimorik ere merezi. Erabaki dut abenduaren 14an baditudala gauza garrantzizkoagoak egiteko, Gasteizera joatea baino.

Kategoriak Sailkatugabeak | Etiketak , | 3 iruzkin

Ezustekoa Israelen

Data: 2005(e)ko abenduaren 1a Egilea: Joxe Aranzabal

Zur eta lur geratu nintzen atzo, irakurri nuenean The Jerusalem Post egunkarian Shimon Peres politikari israeldarrak Alderdi Laborista utzi eta Kadima alderdiari emango diola laguntza, Ariel Sharonek orain bi aste inguru sortutako alderdi berriari. Txaketero baten azken txiribuelta ote, ala komentzimenduak gidatu du Peres beteranoa?

Dezente pentsarazi dit Peresen erabakiak. Izan ere, 61 urte eginda Alderdi Laboristan, Bake Nobel saria irabazita, eta 82 urte beteta, ez dut uste kargu baten goseak eraman duela Peres alderdiz aldatzera. Urteak egin dituzte israeldarrek bakebidean aurrera egin ezinik, eta egoera horrek nonbaitetik egin behar krak. Ondorioz, Israelgo mapa politikoa errotik aldatuko da. Orain, baina, jakin egin behar aldaketak nola eragingo dien palestinarrei, horren guztiaren atzean Palestinaren arazoa baitago.

Kategoriak Sailkatugabeak | Etiketak | Utzi iruzkina

Agur Hire liburu dendari

Data: 2005(e)ko azaroaren 30a Egilea: Joxe Aranzabal

Gaur du azken eguna Hire liburu dendak Arrasaten. Hori dela eta, atzo hatxe izan nintzen, eta hiru liburu eraman nituen, hango lagunen oroigarri:

Pilarrek dendaren zigilua ipini zidan ale bakoitzean, eta bere sinadura, nik horrela eskatuta. Oparitu ere oparitu zizkidan, berak horrela nahita. Eskerrik asko opariagatik, eta eskerrik asko urte luze hauetan eskainitako maitasunagatik. Faltan sentituko zaituztet.

Kategoriak Sailkatugabeak | Etiketak | 4 iruzkin

Faxa

Data: 2005(e)ko azaroaren 29a Egilea: Joxe Aranzabal

Atzo fax bat bidali nuen aspaldiko partez. Hiru urte izango ziren, bai, ukitu ere ez nuela egiten tramankulua, nahiz eta ordenagailuaren ondoan daukadan. Iruditu zitzaidan aspaldiko teknologia bat erabiltzen ari nintzela.

Mirenek-eta partida bat irabazten duten bakoitzean, fax bat bidali behar izaten da Bizkaiko Saskibaloi Federaziora. Eta nola aurten Bego den gure taldeko ordezkaria, bada guri tokatu hori egitea.

1995ean-edo erosi nuen faxa etxerako, eta bizpahiru urtez erruz erabili nuen. Orduan begitandu zitzaidan sekulako asmakizuna. Ordea, posta elektronikoa erabiltzen hasi nintzenetik, erabat baztertu nuen, izan ere, posta elektronikoak zaharkituta utzi zuen faxa. Federaziokoak, baina, oraindik ez bide dira horretaz jabetu.

Kategoriak Sailkatugabeak | Etiketak , | 4 iruzkin

BBBilbo

Data: 2005(e)ko azaroaren 28a Egilea: Joxe Aranzabal

Atzo bilkura eguna genuen euskal blogariok Kafe Antzokian, Bilbon. Irratia.com-ek bost urte bete dituela-eta B&B 2.0 antolatu zuten irratiko lagunek. Joateko asmoa nuen, baina bezperan katarroa hartu nuen, eta atzo ia egun osoa ohean igaro.

Arratsaldeko 20:30ak inguruan, hala ere, txoritokira igo, eta bisita bat egin nuen hainbat blogetan: Sustatu, Gaztelumendi,org, Prospektiba eta e-gor, besteak beste, jo eta ke ari ziren, bilkuraren berri ematen. Hirugarrenaren zain geratuko naiz.

Kategoriak Sailkatugabeak | Etiketak , , | Iruzkin 1

Elorriok, irabazi

Data: 2005(e)ko azaroaren 26a Egilea: Joxe Aranzabal

Aznenean gure neskatilek irabazi egin dute saskibaloian. Elorrio kt3k 29-23 irabazi dio Lauxeta Ikastola B taldeari. Amaitutakoan, Josu Blancok atera die argazki hau. Hortxe daude denak, Rocio eta Leti entrenatzaileekin batera.

Zutik ezkerretik hasita, Itsaso, Irune, Altea, Ziortza, Ane, Rocio, Elene, Miren A., Miren S. eta Leti. Belauniko ezkerretik hasita, Katxa, Leire, Irati, Ainhoa, Maddalen eta Edurne.

Zorionak neskak, eta eutsi goiari!

Kategoriak Sailkatugabeak | Etiketak | Utzi iruzkina

Círculo de Lectores

Data: 2005(e)ko azaroaren 25a Egilea: Joxe Aranzabal

Atzo Xabier Mendiguren Elizegik deitu zidan, Elkar argitaletxeko editoreak. Esan zidanez, “Círculo de Lectores”:http://www.circulo.es/Contenido/Libros/Libros.asp elkarteak nire liburua aukeratu du bere aldizkarian eskaintzeko Euskal Herriko irakurleei. Antza denez, aldizkariak orrialde bat izaten du euskarazko liburuen berri emateko, eta hor joango omen da nirea, hurrengo alean.

Poztu nintzen, hori albiste ona delako liburuarentzat, horrela, seguruenik, gehiago zabalduko baita.

Hala ere, gauza batek eman zidan atentzioa: liburuaren azalpenetan ezabatu egin omen dituzte, erabat, Interneti buruzko azalpenak, irakurleak nahastuko omen direlakoan aipamen horiek irakurriz gero. Merkadotekniaren legeak izango ote dira?

Kategoriak Sailkatugabeak | Etiketak , , , | 5 iruzkin

Aldatu izena Goienkariari

Data: 2005(e)ko azaroaren 24a Egilea: Joxe Aranzabal

Goiena komunikazio taldeak oso esperimentu interesgarria abiatu du. Aprobetxaturik datorren urtetik aurrera Goienkariak edizio bakarra izango duela eta birdiseinatu behar dela goitik behera, Goienak erabaki du blog bat sortzea, Goienkaria berritzen, eta hor azaltzea birdiseinuaren gorabeherak. Nik badut proposamen bat birdiseinu taldearentzat, dakidan arren inposiblea dela.

Goio Arana diseinatzaile saritua eta Eneko Azkarate Goienkariako zuzendaria Irizar etxeko sotoan sartu dira, Goienkariaren egoitzan, Bergaran bertan, eta handik ematen ari zaizkigu beren lanaren berri: astekariaren historia, zergatik edizio bakarra, “aukeratutako tipografiak,” etab.

Nik inoiz ez dut aukerarik izan horrelako birdiseinu bat “zuzenean” jarraitzeko, eta iruditzen zait Euskal Herrian inork ez duela horrelako oportunitaterik izan, nik dakidala, gure artean sekula ez baita horrelako ezer irekian egin. Eta eskertzen diot Goienari, eta bereziki Goiori eta Enekori, aukera hori eskaini digutelako. Sinestuta nago aitzindari bihurtu direla birdiseinu kontuetan.

Nola bloga sortu duten irakurleekin elkar eragiteko, eta haien feedbacka jasotzeko, aprobetxatu nahi dut aukera proposamen bat egiteko, nahiz eta badakidan ez dutela onartuko: kendu Goienkaria izena, eta sortu beste bat.

Aldatu izena

Urte hauetan konturatu naiz Debagoienean inork gutxik ikasi duela Goienkaria izena esaten: Arrasaten batzuek Arrasate Press deitzen diote oraindik, beste batzuek Goiena, zenbaitek Goienaren periodikue, baina gutxik erabiltzen dute Goienkaria. Beraz, astekari bat dugu merkatuan, zeinaren 20.000 ale baino gehiago banatzen baitira astero Debagoienean, eta, hala ere, jendeak ez daki haren izena esaten.

Ez dakit zergatik gertatzen den hori. Akaso euskaraz gaizki eratuta dagoelako? Besterik gabe ez duelako arrakastarik izan? Jakin ez. Kontua da Goienkaria izenak ez duela arrakastarik izan.

Horregatik, eta aprobetxaturik birdiseinuak aldaketa handiak ekarriko dituela, ez bakarrik itxuran, baizik eta baita astekaria nola antolatzen den ere, proposatzen dut izena aldatzea. Orain da momentua izen egokiagoa aukeratu eta astekariari bultzada handiagoa emateko, denok jakin dezagun, pentsatu beharrik gabe ere, zein den gure astekariaren izena. Amen.

Kategoriak Sailkatugabeak | Etiketak , , | 9 iruzkin