Agerkari digitalak, Euskadi Irratiaren arabera

Data: 2006(e)ko uztailaren 13a Egilea: Joxe Aranzabal

Euskadi Irratiak gero eta gehiago jotzen du agerkari digitaletara, batez ere berauetan agertzen diren izenburuak irakurtzeko (albistegietan) eta aipamenak egiteko (bestelako irratsaioetan), baina agerkari digital horiek bakarrik dira paperezko edizioak dituzten egunkarienak. Agerkari digital hutsak, digital moduan sortu zirenak paperezko edizio barik, Sustatu esate baterako, aipatu ere ez.

Kategoriak Sailkatugabeak | Etiketak | 4 iruzkin

Gu bai sektarioak!

Data: 2006(e)ko uztailaren 10a Egilea: Joxe Aranzabal

Francoren kontra ez ginen hobeto bizi. Diktadoreak biltzen gintuen, despota hura egotzi nahi genuelako agintetik, baina elkarri mokoka ibiltzen ginen, zein abertzaleago edo zein iraultzaileago, eta gaitzetsi egiten genituen gure iritzietatik kanpo zihardutenak. Ni ere saltsa horietan ibili nintzen, eta ez nago bat ere harro egindakoaz.

Joan den ostiralean lagun batzuk etorri zitzaizkigun Gernikatik gurekin afaldu eta Musikairek antolatutako jaialdiaz gozatzera. Batek goraintziak eman zizkidan unibertsitate garaian nirekin ibilitako lagun baten partetik. Deustuko Unibertsitatean ikasi genuen elkarrekin, eta elkarrekin aritu ginen Euskal Kultur Mintegian, unibertsitatean bertan euskara eta euskal kultura bultzatu guran.

Azaldu nion Gernikako lagunari garai hartan gure arteko liskarrak etengabeak zirela Euskal Kultur Mintegian. Haiek Aresti ekarri nahi bazuten, guk ezetz, espainolista hutsa zelako. Berdin Oskorrirekin, antzeko arrazoiengatik. Kasu horietan gu ginen puruetan puruenak.

Gaur atzera begiratzen dut, eta lotsatu egiten naiz. Tartean aukera izan dut Aresti hobeto ezagutzeko eta Oskorriren ibilbideaz gozatzeko, eta zortea izan dut tratatzeko Alderdi Komunista, EMK nahiz LKI alderdietan ibilitako zenbait lagun, eta konturatu naiz zein oker genbiltzan eta zein erraz kondenatzen genuen jendea, nahiz eta haiek guk beste edo gehiago maite zuten gure herria.

Hala eta guztiz ere, gure arteko harremana inoiz ez da eten, oso noiz behinkakoa izatera iritsi bada ere. Batzuetan nahikoa izan da batak besteari goraintziak helaraztea, oraingoan bezala. Eskerrak.

Kategoriak Sailkatugabeak | Etiketak | 4 iruzkin

Fernando gogoan

Data: 2006(e)ko uztailaren 9a Egilea: Joxe Aranzabal

Minbiziak eraman du Fernando Muniozguren, argazkian Koldo Zuazorekin eta Juan Manuel Etxebarriarekin batera. Orain urtebete-edo berarekin elkartu nintzen Zarautzen. Elkarrekin bazkaldu genuen, eta orduan esan zidan buruan ebakuntza eginda, laster hasiko zela tratamenduan, aurre egiteko minbiziari. Oso baikor eta sendo aurkitu nuen orduan. Orduko elkarrizeta haren ondorioz Fernandok blog bat sortu zuen, Hau ta hori ta bestia, joik buruakin postia eta hor, tarteka, utzi dizkigu bere hausnarketak. Azkena martxoaren 6an idatzita.

Kategoriak Sailkatugabeak | Etiketak | 2 iruzkin

ETAren hautsa

Data: 2006(e)ko uztailaren 6a Egilea: Joxe Aranzabal

Erosi bezain laster, eskuetatik kendu ezinik ibili naiz Joseba Zulaika ikertzailearen azken liburua, hain egin zait interesgarria eta originala. Nire uste apalean ETAren hautsa da azken urteotan euskaraz idatzi den saiorik onena, distiratsuena eta gaurkoena.

“Kristo, Lenin edo ETArekin identifikatzeak hondamendi hutsa gertatu zitzaiguneko belaunaldikoak gara gu”, dio Joseba Zulaikak liburuan, eta egia esan, hortik abiatu da egilea aztertzeko Euskal Herriaren egoera ETAk su-eten iraunkorra aldarrikatu zuenetik.

Euskal nazionalismoa aztertzen du Joseba Zulaikak, eta horretarako hainbat sinbolo baliatzen ditu, hala nola, Lauaxeta, Txabi Etxebarrieta, Ernest Lluch, Telmo Zarra eta Jokin Gorostidi, besteak beste. Noski, ETAren bilakaera du aztergai, eta horretarako pentsalari, idazle, poeta eta kantari mordo batez profitatzen da. Zenbait kasutan, ur sakonetan sartu denean, kostata egin dut igeri —eta horretan uste dut baduela zerikusirik euskara zenbaitetan gordinak—, baina beti egin dut aurrera, gaiak berak, eta Josebaren begiradak harrapatuta.

Idazle trebea denez gero, egileak oso ondo txertatu ditu liburuan azken orduko gertakari esanguratsuak: ETAren su-etena, Zarra futbolariaren heriotza, Judaren ebangelioa eta Jokin Gorostidiren heriotza, denak azken hirui hilabeteotan gertatuak. Horiek, baina, zelofan dotorea eta gaur-gaurkoak dira janzteko aldamio sendo eta zindo bat, liburu honen nondik norakoak oinarri sendoetan bermatzen baitira, gertakari puntualetatik harago.

Gaurkotasun handikoa

Baikortasun erabatekoa dario liburuari, nahiz eta zenbaiti gogorra egingo zaion azken zatia, non Josebak proposatzen duen Euskal Herriaren pizkunde bat, hirugarrena, hasierako ETAren planteamenduetan oinarritua. Horretan ausarta izan da, oso, nola ausarta izan baita euskal nazionalismoaren disekzioa egiterakoan, gupidarik gabe batzuetan, maitasunez askotan eta ironiak zipriztindua.

Klase politikoa derrigortuta dago liburu hau irakurtzera, baita kazetariak, tertulianoak, irakasleok, presoak, ikasleak eta gure herria maite duten guztiak. Ezinbesteko irakurketa uda honetarako.

Kategoriak Sailkatugabeak | Etiketak | 4 iruzkin

Google Analytics

Data: 2006(e)ko uztailaren 5a Egilea: Joxe Aranzabal

Atzo ikastaro batean izan nintzen Gasteizen, nola atera etekinik handiena Google Analytics programari. Bost orduko saioa izan zen, Multiplica enpresako bi lagunek emanda, Araba Enpresa Digitala erakundearen babespean. Burua datuz beteta, baina gustura itzuli nintzen, Google Analytics aparta baita.

Nik interesa dut programa horretan, berau erabiliko dugulako neurtzeko zer trafiko dabilen Mondragon Unibertsitatearen webgune berrian. Hala ere, atzoko entzule gehienak informatikariak ziren, eta ikastaroaren zati handi bat haiei zuzendu zitzaien.

Banuen programa horren berri azalekoa, baina harrituta itzuli nintzen zelako posibilitateak eskaintzen dituen webgune bateko trafikoa jakin eta horren arabera neurriak hartzeko erakundearen marketinean eta webgunearen diseinuan edo kudeaketan. Orain apunteak berriro irakurri, eta batez ere programan saltseatu egin behar dut, ikasitakoa ahantzi ez eta programa ganora apur batez erabiltzeko.

Kategoriak Sailkatugabeak | Etiketak , , | 2 iruzkin

Benito

Data: 2006(e)ko uztailaren 4a Egilea: Joxe Aranzabal

Igande gauean Benito Lertxundi izan genuen Elorrion, Musikaire jaialdietan. Plazer handia izan zen hainbeste urteren ondoren berriro zuzenean entzutea Benitori, emanaldia zoragarria izan zen-eta. Asko hobetu du Benitok urteen joanean, eta bete-betean asmatu du musika taldearekin. Han ginen milatik gora entzuleok, adin eta estilo guztietakoak, ederki pasatu genuen.

Kategoriak Sailkatugabeak | Etiketak | Iruzkin 1

Asteburu bat Lesakan

Data: 2006(e)ko uztailaren 3a Egilea: Joxe Aranzabal

Euskal Eskola Publikoaren jaian Mirenek paper bat bete zuen zozketa batean. Handik egun batzuetara jakin genuen berak irabazi zuela zozketa, eta horrek eskubide ematen zigula bi laguni asteburu bat igarotzeko Atxaspi hotelean, Lesakan. Eta hara abiatu ginen joan den ostiralean.

Ostiralean joan ginen Lesakara, aprobetxaturik Mireni tokatu zitzaiola egonaldi bat bi pertsonarentzat hango hotel batean. Beribila hantxe bertan hondatu zitzaigun, baina kontent itzuli gara.

Autobidean, baina, argi gorri bat piztu zitzaigun minutu batez-edo. Garajera deitu, Elorriora, eta alternadorea izan zitekeela. Argia itzali egin zen, eta guk aurrera. Bera inguruan, aldiz, ostera piztu zen argia, baina orduan segurtasun uhalena izan zen. Aurrera egin, eta hotelaren parera iritsi ginenean, automobila erabat geratu zen, bateria guztiz hustuta. Zorte itzela izan genuen, eguneko etaparen helmugan ginen-eta. Hantxe ziren zenbait gazteri esker, autoa behar zen moduan utzi eta hotelera igo ginen.

Autoak, kale

Larunbat goizean aseguru etxera deitu, Lagun Arora, eta horrek garabi bat bidali zigun Doneztebetik. Ikusirik inork ez zuela alternadore bat eskura inguruko garajeetan, Doneztebera eraman zuen beribila, astelehenean bertan Elorriora eramatekotan.

Eta gu Lesakan geratu ginen, ibilgailurik gabe. Hala ere, pozik ibili gara. Herriko eraikin ederrak miretsi, ibili, lasterka egin… denetik apur bat. Eta hotelaz gozatu. Izan ere, Atxaspi hotelak berriz itzultzeko gogoa eman digu: gela polita izan dugu, gosari paregabeak, bainu berezia, eta Montsek eskainitako arreta.

Lesaka, ederra

Horregatik, eta oraingoan zenbait leku eder ikusi barik utzi genituelako —Etxalar kasu—, geure buruari agindu diogu itzuliko garela Lesakara. Eta Atxaspi hotelera. Biak gomendagarriak, oso.

Kategoriak Sailkatugabeak | Etiketak | 2 iruzkin

Telebista ez da irratia

Data: 2006(e)ko ekainaren 28a Egilea: Joxe Aranzabal

Atzo iluntzean Frantzia eta Espainiaren arteko futbol partida ikusi nuen. Hasieran Cuatro aukeratu nuen, Prisa taldeko telebista katea, baina hura hitz jario amaigabea! Irratikoena baino okerragoa. Tonua, gainera, patriotero nazkagarria. Halako batean, aspertu eta Alemaniako kate bat harrapatu nuen, eta han bai, lasai asko ikusi nuen falta zena. Gutxitan hitz egiten zuten eta, piperrik ere ez ulertu arren, patxadaz ikusi nuen. Lehen zatia ikusgarria iruditu zitzaidan. Bigarrena, ostera, aspergarria. Frantziak merezita irabazi zuen.

Kategoriak Sailkatugabeak | Etiketak , | 2 iruzkin

BBCren azken bloga

Data: 2006(e)ko ekainaren 27a Egilea: Joxe Aranzabal

BBC hedabideak blog bat sortu du, berezia. The Editors izena du, eta berau bihurtu nahi du eztabaidarako foro BBCren inguruko gaietan. Denetik landuko dute blog berrian: hedabideek zer dakarten BBCren gainean, audientziak, jarraitzaileen iritziak, eztabaidak… BBCren gaineko guztia, hortxe.

Kategoriak Sailkatugabeak | Etiketak , , , | Utzi iruzkina

Aitormena

Data: 2006(e)ko ekainaren 26a Egilea: Joxe Aranzabal

Aste batzuk lehenago esan zioten minbizia zuela barrabil batean. Indianapolisko Unibertsitate Ospitalean zegoela, hantxe egingo zioten-eta ebakuntza buruan, hango onkologo batekin elkartu zen, prestatzeko bai ebakuntza eta baita ondorengo tratamendua ere. Hizketan ari zirela, bat batean medikuak galdetu omen zion aurretik dopinik hartu ote zuen. Ez hotz ez motz, txirrindulariak baietz erantzun: “EPO hartu dut, hazkunderako hormonak, kortisona, esteroideak eta testosterona”. Gaixoa Lance Armstrong omen zen, eta kontu hau orain egun gutxi atera dute Le Monde eta “El País”:http://www.elpais.es/articulo/deportes/Armstrong/admitio/1996/haberse/dopado/cancer/Le/Monde/elppordep/20060623elpepudep_5/Tes/ egunkariek. Niretzat, sinesgarritun osoa du pasarte horrek.

Minbizia izan duenak badaki medikuaren aurrean jartzerakoan, hor ez dagoela gezurrik esaterik. Gordina izan arren, egia esan beharra dago, esandakoek erabat baldintza bailezake ondorengo tratamendua. Eta, nik dakidala, inork ez du nahi izaten okerreko tratamendua jasotzerik gezurra esatearren.

Miresten dut Lance Armstrong minbiziari aurre egiteko erakutsi zuen adoreagatik. Hala ere, sinestuta nago bai bera eta bai tropel guztia dopinaren eraginpean ibili direla, nola dabiltzan NBAko jokalari erraldoi horiek eta, oro har, kirol elitean dabiltzanak, edozein kirol elitetan. Ikusleok ikuskizuna nahi dugu, antolatzaileek telebistaren erretiluan zerbitzatzen digute, eta kirolariak prestatu egiten dira guk eskatzen dugun maila ematen, horretarako edozer gauza hartu behar baldin badute ere. Negozioa oso handia da, eta berorren inguruan sorturiko gezurra ere bai.

Kategoriak Sailkatugabeak | Etiketak | 4 iruzkin