Pello Zubiria gure artean

Data: 2008(e)ko urriaren 17a Egilea: Joxe Aranzabal

Atzo Pello Zubiria izan genuen Huhezin. Hitzaldi bat ematera etorri zen Ikus-entzunezko Komunikazioko ikasleei. Aspaldi elkar ikusi barik geunden, eta benetan poztu nintzen tabernan agertu zitzaigunean, adar soinuan, bere garai onenetan bezala. Argi eta zorrotz ikusi nuen, sasoiko. Urte askotarako, Pello!

Kategoriak Sailkatugabeak | Etiketak , | Iruzkin 1

Obama eta Olano

Data: 2008(e)ko urriaren 16a Egilea: Joxe Aranzabal

Gipuzkoarron artean askoz jende gehiagok ezagutzen omen du Barack Obama
Gipuzkoako ahaldun nagusia bera baino, alegia, bertako gobernu
probintzialeko burua, Markel Olano, baino. Lehendabizi entzun nuenean albistea, harritu egin nintzen. Euskarazko
Wikipedian begiratu eta, hara!, Obamak sarrera bat du euskaraz. Olanok,
berriz, ezer ez.

AEBetako hedabideek halako indarra dute, ezen hango presidenteak izar
bihurtzen baitira gure inguruko hedabideetan ere: Europako
egunkarietan, telebista guztietan, irratietan, Interneten…, haiek
agertzen dira gehien albistegietan, onerako edo txarrerako. Berdin
lehendakarigaiekin ere. Begira aurten zelako oihartzuna izan duten
Hillary Clintonek, Barack Obamak, John McCainek, Joe Bidenek eta Sarah
Palinek.

Horri gehitzen badiogu Markel Olanok oso perfil apala duela, dena
esanda dago. Bide batez, Barack Obamak Imanol Muruaren garaian ere –azken ahaldun nagusietan
bera izango zen ezagunena, seguruenik– ez nintzateke harrituko artean Bill Clinton ezagunagoa izango balitz orduko gipuzkoarron artean. Inperioaren indarra.

Kategoriak Sailkatugabeak | Etiketak , , | Utzi iruzkina

Txatarra garestia

Data: 2008(e)ko urriaren 15a Egilea: Joxe Aranzabal

Atzo arratsaldean Steve Jobs Apple enpresako lehendakariak MacBook
ordenagailu berriak aurkeztu zituen. Oraingoan, ahalegin handia egin
omen dute hardwarearekin, ordenagailuak aluminiozkoak eta pieza batean
eginak izango dira-eta. Jonathan Ive diseinu arduradunak ere laudorio
itzelak egin zizkien ordenagailu berriei. Gainera, Nvidia txartelak
eramango dituzte, bideo jokoak eta irudiak hobeto eta bizkorrago ikus
daitezen. Horrezaz gain, LED pantaila bat izango dute, zeinaren bidez
ordenagailua istant batean pizten baita, eta trackpad zabalago bat.
Esandakoa: gehiena, hardwarea, txatarra.

Prezioak berriz, merkeenak 900€ (plastikozkoak), hurrengoak 1.650€tik
gora eta garestiena 1.750€tik gora. Nire ustez, prezio horiek garestiak
dira gaur egun, kontuan hartuta gero eta aplikazio gehiago ditugula
hodei informatikoan, han, zenbait zerbitzaritan, eta ez gure
ordenagailuetan ostatu hartuta. Ulertzekoa da Applen akzioak beheratu
izana, adituek uste baitute krisialdi honetan Applen produktuak
(jeneralean beste guztiak baino garestiagoak) gutxiago salduko direla.

Kategoriak Sailkatugabeak | Etiketak , , | Iruzkin 1

Gabriel Arestiren urteurrenean

Data: 2008(e)ko urriaren 14a Egilea: Joxe Aranzabal

Atzo lanetik irtendakoan, autoan sartu eta Angel Zelaietari entzun nion
Euskadi Irratian, Gabriel Arestiren gainean hitz egiten. Aspaldi
irakurria nuen Zelaietak idatzitako biografia Arestiri buruz; hala ere,
gustura entzun nuen atzokoa. Gogora etorri zitzaizkidan Gabriel
Arestiren irudiak hitzaldi bat ematen Deustuko Unibertsitatean:
irakurri egin zuen euskaraz, azentu arrotzarekin. Baten batek esan zuen
ordurako oso gaixorik zegoela. Handik gutxira, hil egin zen.

Kontakizunean aurrera, Zelaietak ELA berri aipatu zuen, Eladioak, eta
aipatu zituen orduan oso gogor egin zutelako Arestiren kontra. Aurpegia
ilundu zitzaidan orduan, garai hartan neu ere hantxe ibili bainintzen,
nahiz eta artean oso gaztea nintzen. Lotsatu egiten naiz orduan
izandako jarrerarekin, bidegabea zelako, eta jarrera hark elikatu
dituelako, neurri handi batean, gerora etorri diren muturreko beste
asko.

Lotara egiterakoan, liburu apalategian arakatu, eta Gabriel Arestiren
poema liburu bat hartu nuen. Argia itzali aurretik, hark sortutako
munduan barrena abiatu nintzen. Nire omenaldi xumea izan zen, Gabriel
jaio zela 75 urte betetzen diren honetan.

Kategoriak Sailkatugabeak | Etiketak , , | Utzi iruzkina

Afaria Elorrion Erasmus ikasleekin

Data: 2008(e)ko urriaren 13a Egilea: Joxe Aranzabal

Erasmus ikasleak sukaldariekin
Joan den ostiralean afaria antolatu genuen Elorrion, Alkartu elkartean, Erasmus ikasleekin. Zortzi etorri ziren, Huheziko bostak (Chiara, Louise, Sara, Saskia, eta Tieme), bat Goi Eskola Politeknikotik (Julien), eta bi Enpresa Zientzien Fakultatetik (Adriana eta Taric).

Eguraldia primerakoa izan genuen. Hori aprobetxatuz, ostera bat egin genuen herrian, bertako kale eta etxe ederrak ikusten. Trago bat hartu genuen Tanger tabernan, eta gero, afaltzera.

Hasi aurretik baina, Juan Mari Lersundik elkartea erakutsi zigun, eta bertako historia kontatu. Bitartean, Bego emaztea eta Balen laguna azken ukituak ematen ari ziren sukaldean. Afaria zoragarria izan zen. Gure ikasleek apetito ona erakutsi zuten, baita egarri puntua ere. Azkenean, elkartea bete egin zen, eta zenbait mahaitan kantuan hasi ziren. Berandu, baina pozik joan ziren denak Mondragoera. Orduko zenbait argazki Flickr-en ipini ditut ikusgai.

Kategoriak Sailkatugabeak | Etiketak , , | Utzi iruzkina

Amabirjina garotakoa

Data: 2008(e)ko urriaren 12a Egilea: Joxe Aranzabal

Nikolas Zendoiari irakurri nion lehen aldiz esapide hori, Amabirjina
garotakoa, Pilarikaz ari zela, alegia, gaurko egunagatik. Eta harritu
egin nintzen, mutikotan gaurko egunez gu ere Aguletara joaten baikinen,
aitaren baserrira, aitak lagundu egiten baitzien tio Patxiri eta Jose
Kruz lehengusuari garo biltzen. Goizean goizetik etxetik irten,
Kanpazar igo, eta Angiozar aldera egiten genuen, San Migel de Montetik
aurrera, pinudi batzuetara iritsi arte. Han nagusiak jo eta su hasiko
ziren lanean, gu jolasean genbiltzan bitartean, ni bai, behintzat.
Eguerdian, berriz, Jesusa lehengusinak ekarriko zuen bazkaria astoan,
eta hantxe bazkalduko genuen, basoan, nagusiek arratsaldeko saioari
ekin aurretik. Pentsatzen dut beste baserri askotan gauza bera egingo
zutela, eta horregatik emango ziotela Pilarikari izen hori, Amabirjina
garotakoa.

Zorionak!
Gaurko egunez, hiru pertsona oso hurbilek egiten dituzte urteak: Bego
emazteak, Pili Otxoak eta Joxe Felix Diaz de Tuestak. Hirurei, nire
besarkadarik beroena. Urte askotarako!

Kategoriak Sailkatugabeak | Etiketak , , , , | Iruzkin 1

Tostoia 2.0

Data: 2008(e)ko urriaren 10a Egilea: Joxe Aranzabal

Atzo ireki zen modu ofizialean 2008-2009 ikasturtea
Mondragon Unibertsitatean. Ekitaldia hasi orduko ikusi nuenez luze joko
zuela, mapa kontzeptual bat egiten hasi nintzen gure departamenduan
sortu berri dugun Glosategiaren inguruan: zertarako, zabalkundea, barne
sustapena, erabilerak, etab. Konturatu orduko, estrategia oso bat nuen
antolatuta.

Txosten akademikora iritsi ginenean, arretaz entzun
nion David Sanchez lankideari, Web 2.0 izan baitzuen hizpide, nahiz eta
berak beste modu batean izendatu zuen: “2.0 enpresa: atomoetatik eta
bit-etatik harantzago”. Ondo egon zen David, baina ez dakit
zenbateraino ulertu zioten hango askok.

Berriro nire mapan
murgilduta nengoela, Iosu Zabala errektorearen hitzek asaldatu
ninduten. Natibo digitalez eta etorkin digitalez hasi zen hitz egiten,
eta bien artean dauden aldeez. Harritu egin nintzen, uda honetan asko
irakurri dudalako gai horren inguruan, Marc Prenskyk behin eta berriro
aipatzen baititu kontzeptu horiek bere azken liburuan. Geroago,
Mendeberri 2.0 ere aipatu zuen errektoreak, argi du-eta Mendeberri
egitasmo pedagogikoari erantsi nahi dizkiola Web 2.0 teknologiak, hauek
partehartzea eta partekatzea baitakarte.

Eskerrak ordurako nire
mapa kontzeptuala ia amaitua nuen, zeren orduan Juan Jose Ibarretxeren
txanda etorri zen, eta lehendakariak ez zigun atsedenik eman.
Spielbergen filmetan nola, ezustekotik ezustekora eraman gintuen:
Zapaterori egurra eman zion, “latigo”, gainera, nire lagun batek esaten
duen moduan; nazioarteko finantza sistemari ere, egurra; zer esanik ez
Europako Batasunari, bere politika ekonomikoagatik. Lo zeudenak esnatu
egin ziren, eta aspertuak, piztu. Adrenalina jaisteko, berriz, bukaeran
musika klasikoa.

Zenbait lankideri ez zitzaien ondo iruditu
Ibarretxeren portaera, unibertsitate ekitaldi batean hitz egin zuelako.
Niri, berriz, berdin dit, denek baliatzen baitituzte horrelako
ekitaldiak beren espitxak egiteko. Hori bai, denok bat etorri ginen:
ekitaldia tostoi galanta izan zen, bi ordu eta erdiko tostoia. Eskerrak
nik ere aprobetxatu nuela mapa kontzeptual txukun bat egiteko. Orain,
MindMeisterrera pasatuko dut, txukun-txukun, eta gero saiatu horko
apunte guztiak gauzatzen.

Kategoriak Sailkatugabeak | Etiketak , , , | 3 iruzkin

Euskal Herria Erasmus ikasleen begietan

Data: 2008(e)ko urriaren 9a Egilea: Joxe Aranzabal

Komunikazioan ditugun Erasmus ikasle biak hasiak dira praktikak egiten eitb24 zerbitzuan. Han egingo dituzten lanen artean, bat izango da hainbat erreportaje idaztea Euskal Herriaren gainean. Eta, dagoeneko, idatzi dute lehena. Tieme Hermans mutil herberehetarrak Maritxu Kajoi aukeratu du gaitzat. Saskia Kamphuis neska herberehetarrak, ostera, pintxoak, gure tabernetan hain ugari ikusten direnak. Biek ala biek, ederto idazten dute, ingelesez noski.

Denbora gehiago eramango balute gure artean, ohartuko lirateke euskaltzale belaunaldi bat joaten ari zaigula. Gotzon Garate, kasu. Edo Juan San Martin. Atzo bertan, etxera joan eta, telebista piztu nuenean, hantxe ikusi nuen Joxe Mari Iriondo Juan San Martin elkarrizketatzen, aspalditxo egindako saio batean. Eta orduan pentsatu nuen zenbat jende joan zaigula azken aldi honetan: Luis Villasante, Juan Mari Lekuona, Lourdes Iriondo…

Ekaitza, ekaitza…
Aitortu behar dut harritu egin nintzela irakurri nuenean Sarah Palin presindenteordegai estatubatuarrak esan zuela Barack Obama terroristen laguna dela, etab. CBS telebista kateko analista baten iritzian, hemendik eta azaro bitartean, errepublikanoak saiatuko dira Obamaren irudia ahalik eta gehien zikintzen, jakina baita kanpaina gordin eta itsusi jartzen denean jendeak erantzuten duela abstenituz, eta hain zuzen, horixe nahi omen dute errepublikanoek, bozketa egunean ahalik eta jende gehien gera dadin etxean, parte hartze handiak demokratei egiten dielako mesede.

Hauteskunde kanpainan ez ezik, telefonoen merkatuan ere ekaitza agertu zen atzo, Blackberry konpainiak Storm telefonoa aurkeztu baitzuen, telefono bat ukipen pantaila bat duena, iPhonek bezala. Iragan Gabonetan ez bezala —orduan iPhone zen bakarra ukipen pantailarekin— aurtengoetan bospasei telefono izango dira ezaugarri horietakoak: iPhone, Samsung Sprint, G1, Nokia 5800 XPressMusic eta Blackberry Storm, besteak beste. Geroz eta garbiago dut ordenagailu eramangarrien baliabide gero eta gehiago sartuko direla aparailu horietan, eta berandu baino lehen, horrelako batekin ibiliko garela batetik bestera, erabat konektatuta.

Kategoriak Sailkatugabeak | Etiketak , , , , | Utzi iruzkina

Jendetzaren jakituria

Data: 2008(e)ko urriaren 7a Egilea: Joxe Aranzabal

Googlek aldatu egin du informazioa bilatzeko modua. Orain, Page Rank
formula dela-eta informazio esanguratsua da beste batzuentzat
informazio esanguratsua dena. Bestela esanda, webgune bat edo web orri
bat esanguratsuak izango dira, baldin eta jende askok loturak egiten
baditu gune horietara, ustez informazio interesgarria dutelako.

Hamar urte daramagu informazioa horrela bilatzen, Google orain 10 urte
jaio baitzen, baina esan daiteke informazioa bilatzeko modu hori hedatu
egin zaigula erosteko orduan ere. Fagor hozkailu bat erosi nahi badut
–edo Bosch, AEG zein Zanussi–, niretzat ez da nahikoa marka horren
webgunera joan eta han esaten zaizkidan marabillak irakurtzea, hozkailua
enkargatzeko. Areago, informazio hori susmagarria egingo zait,
kontrastea falta zaiolako. Niretzat askoz ere esanguratsuagoa izango da
www.erosihozkailua.com bezalako webgune batean sartu, eta han
irakurtzea zenbait erosle anonimoren iritziak erosi dituzten hozkailuen
gainean. Haiek oso pozik baldin badaude Fagor hozkailuarekin, niretzat
hori izango da faktore erabakigarri bat. Ostera, txarto hitz egiten
badute Fagorrez, horrenak egin du niretzat.

James Surowiecki adituak deitzen dio The Wisdom of Crowds, jendetzaren jakituria. Eta egia da. Uda honetan Londresera joan aurretik, erabaki
genuen zer hoteletara joango ginen, hainbat faktore kontuan hartuta:
kokapena, prezioa, zerbitzuak eta beste erabiltzaileen iritziak; dena
Interneten jasoa. Googlek aldatu egin du informazioa bilatzeko modua ez ezik, baita gauzak erostekoa ere.

Kategoriak Sailkatugabeak | Etiketak , | Iruzkin 1

ETBn ere, filmak jatorrizko bertsioan

Data: 2008(e)ko urriaren 6a Egilea: Joxe Aranzabal

Joan den ostirala ezkero, ETB2n ere ikus ditzaket filmak jatorrizko bertsioan, Lurreko Telebista Digitala erabilita. Bezperan idatzi nuen ETBn ezin nituela filmak jatorrizko bertsioan ikusi. Ostiralean, berriz, etxera iritsi, telebista piztu, eta Paul Newman aktore hil berriaren film bat ikusi nuen ingelesez, The towering inferno. Ezusteko atsegina, inola ere, nahiz eta filma ez zen beste mundukoa.

Kategoriak Sailkatugabeak | Etiketak , | Utzi iruzkina