Mantas Logura: ¡qué hermosura!

Data: 2009(e)ko martxoaren 6a Egilea: Joxe Aranzabal

Herenegun gogoratu ere ez nintzen egin Sustatuk zuzenean eman behar zuela Athletic-Sevilla futbol partida. Telebistan ikusi nuen lehen zatia, eta bigarrena, berriz, irratian entzun nuen gehiena. Biharamunean, ostera, ikusi nuenean atsedenaldian iragarkiak ere sartu zituztela Sustatun, Mikel Zarate zenak aspaldi idatzitako beste batzuk etorri zitzaizkidan gogora:

  • Siempre a su disposición: Camisería Egunon.
  • Gurdi, Gurdi, Gurdi: Éste es su coche. Gurdi, Gurdi, Gurdi. El coche que le hará feliz. Gurdi, Gurdi, Gurdi, Gurdi, Gurdi…
  • Mantas Logura: ¡qué hermosura!
  • Nortasun! Nortasun!! Nortasun!!! Hiriburuko dendarik handiena, ederrena, onena. Nortasun! Nortasun!! Nortasun!!! Ez zaitez zenbakitu, makinatu baloitu… Izan zaitez zeu, nortasundun zeu. Zatoz, erdu Nortasun dendara; etorri Nortasunera.
Kategoriak Sailkatugabeak | Etiketak , , | 2 iruzkin

Twitter-en ustekabeko erabilerak

Data: 2009(e)ko martxoaren 4a Egilea: Joxe Aranzabal

2006an Evan Williams-ek Twitter sortu zuen, beste zenbait lagunekin batera. Aurkezpen labur honetan berak azaltzen duenez, hasieran Twitter sortu zuten Odeo aplikazioaren osagarri gisa (geroago, hau ere saldu egin zuten), jendeak aukera izan zezan familiartekoei eta lagunei esateko zertan ari zen.

Hortik aurrera baina, erabiltzaileek erabili dute Twitter beste modu batzuetan, sortzaileek aurrez ikusi bakoak: hondamendietan, marketina egiteko, politikan, hitzaldietan, elkarri erantzuteko, bilaketak egiteko eta elkarri laguntzeko.

Kategoriak Sailkatugabeak | Etiketak , | Iruzkin 1

Twitterlari gorra

Data: 2009(e)ko martxoaren 3a Egilea: Joxe Aranzabal

Jende gehienak
erabiltzen du Twitter sareko elkarrizketan parte hartzeko: batzuetan
hitz egiten eta bestetan entzuten. Baina bada Twitter erabiltzen duenik
bakarrik hitz egiteko, beste inori entzun barik. Horixe da Berria
egunkariaren kasua.

Begiratzen baduzue bere Twitter kontuan, eskuineko
zutabearen goi aldean, Berriak 107 jarraitzaile ditu Twitter-en, baina
bera ez zaio inori jarraitzen, antza ez zaio-eta interesatzen besteek zer
dioten. Ez dakit zerk bultzatuta jokatzen duen horrela Berriak, baina
niri estrategia okerra iruditzen zait, hedabide batentzat batez ere.

Twitter
horrela erabilita, Berriak kamustu egin du komunikazioa, eta bide
bakarreko informazio bihurtu du. Hori arriskutsua izan daiteke
beretzat: zenbaitek harrokeriatzat har dezake jarrera (“nik diodana da
inportantea, zuk esana ez zait interesatzen”), aintzat hartuta,
gainera, Twitterren bertan badirela beste hedabide batzuk Berriaren
antzeko informazioa eskaintzen dutenak. Horrela jokatuta, gainera,
Berriak uko egiten dio feedback-ari, irakurleek bueltan ematen duten
informazioari.

Beste ezeren gainetik, Twitter elkarrizketa da. Elkarrizketa
polifonikoa: batzuk mugatzen dira esatera non dauden edo zer egiten ari
diren une horretan, beste batzuek partekatu nahi dute pentsamendu bat,
zenbaitek jakinarazi nahi du artikulu edo bideo interesgarria aurkitu
duela, hainbatek galdera egiten du, eta beste hainbatek erantzun,
urliak bere bloga sustatzeko darabil Twitter, halako fakultatek bere
kontuen berri emateko… Hain zaila da entzutea?

Kategoriak Sailkatugabeak | Etiketak , | 2 iruzkin

Blogari ona, twitterlari eskasa

Data: 2009(e)ko martxoaren 2a Egilea: Joxe Aranzabal

Aspalditxo irakurtzen dut Enrique Dans-en bloga, informazio asko eta hausnarketa interesgarriak ematen baititu, batez ere teknologia berrien inguruan. Twitter-en ere, badut haren aditzerik, abendua ezkero-edo jarraitzen natzaio-eta.

Baina Twitteren ez da bat ere interesgarria Enrique Dans. Bere Blackberry telefonoa erabiltzen du era honetako mezuak bidaltzeko:

Erabiltzen du Twitter bere GPSa balitz bezala. Baina horrek niri ez dit ezer eskaintzen. Beraz, ezabatu egin dut nire Twitter kontuan.

Kategoriak Sailkatugabeak | Etiketak , , | 3 iruzkin

Twitteskundeak

Data: 2009(e)ko martxoaren 1a Egilea: Joxe Aranzabal

Atzo arratsaldean izan zen. Twitter-en ari nintzen, mezuak irakurtzen, eta Teketen blogariaren mezu batek eman zidan atentzioa: “Twitteskundeak jarraitzeko orria” zioen. Hara, esan nion neure buruari, hor daukak hitz berri bat, orain arte inon entzun edo irakurri bakoa; horrek merezi dik lekua Komunikazio-glosategian. Esan eta egin. Sarrera hau prestatu nuen, azaltzeko Twitteskundeak zer diren:

  • twitteskunde. (Internet) Hauteskundeen jarraipena Twitter mikroblogean. Badirudi Gorka Julio Teketen blogari euskaldunak erabili zuela hitz hori lehen aldiz 2009ko martxoaren 1eko hauteskunde bezperan.

Kategoriak Sailkatugabeak | Etiketak , | 2 iruzkin

Twitter mehatxua al da Googlentzat?

Data: 2009(e)ko otsailaren 27a Egilea: Joxe Aranzabal

Zenbaitek horixe uste du, guri gezurra iruditzen bazaigu ere. Bi artikulu irakurri ditut —hau eta hau—eta bietan kontu bera aipatzen da, Twitter Search bihur daitekeela mehatxurik handiena Googlentzat, gero eta jende gehiago ari baita mikroblogaren bilatzailea erabiltzen unean uneko bilaketak egiteko, ni barne.

Jakin nahi baduzu jendea zertaz hitz egiten ari den oraintxe bertan, ez zoaz Googlera bilatzera, hor agertzen diren emaitzarik berrienak izan baitaitezke orain astebetekoak igoal. Ostera, bilatzen baduzu Twitter-en bilatzailean, berehala agertuko zaizkizu oraintxe bertako mintzagaiak.

Mumbaiko atentatuan, New York edo Amsterdameko hegazkin istripuetan, Amazon Kindle 2 irakurgailu digitalaren aurkezpenean… hondamendiren bat gertatzen denean edo iragarritako gertakizunen bat, jendeak Twitter-era jotzen du gero eta gehiago, batzuek bertan idazteko dakitena, eta besteek jakiteko zer gertatzen den.

Gure gizartea gero eta konektatuta dago, gu berriemaile bihurtzen ari gara, eta Twitter erabiltzen dugu gero eta gehiago elkarren berri izateko. Testuinguru horretan, Twitter bilaka daiteke unean uneko bilaketen errege…, aurretik Googlek ez badu erosten, jakina. (Harrigarria badirudi ere, Twitter sortu zutenek —Evan Williams eta Biz Stonek, besteak beste— orain zenbait urte Blogger sortu zuten, blog plataforma bat geroago Googlek erosi ziena.)

Kategoriak Sailkatugabeak | Etiketak , | 2 iruzkin

Kamioi gutxiago errepidean

Data: 2009(e)ko otsailaren 26a Egilea: Joxe Aranzabal

Gabonak ezkero bai, goizetan fakultatera bidean noanean, askoz ere kamioi gutxiago aurkitzen ditut bidean, batez ere Kanpazar mendatean gora.

Kostatu zitzaidan konturatzea, baina entzun nionean kamioizale bati esaten euretariko asko lan barik daudela krisiak jota, orduan ohartu nintzen zergatik joaten naizen orain lasaiago lanera bidean.

Sentitzen dut lan barik dauden kamioizaleengatik, baina eskertzen dut irabazitako patxada.

Kategoriak Sailkatugabeak | Etiketak , , | Utzi iruzkina

Web 2.0 baliabideak eskolarako

Data: 2009(e)ko otsailaren 25a Egilea: Joxe Aranzabal

Asteburu honetan lanean ibili naiz Web 2.0 apunteak izeneko wikian, Baliabideak izeneko atala lantzen, bai gure ikasleek eta baita edozeinek eskura izan ditzaten Web 2.0 alorreko baliabideak, batez ere ikasgelan erabiltzeko.

Proposamenik baldin baduzue hor sartzeko, eskertuko dizuet esatea. Mila esker aurretiaz.

Kategoriak Sailkatugabeak | Etiketak , , , | Utzi iruzkina

Into the Wild

Data: 2009(e)ko otsailaren 24a Egilea: Joxe Aranzabal

Asteburu honetan hiru film ikusi ditut, baina bat geratu zait bihotzean: Into the Wild, film hunkigarria, benetako historia batean oinarritua, eta Sean Penn aktoreak zuzendua.

Filmak mutil gazte baten historia kontatzen du, zeinak, behin graduatuta, alde egiten baitu etxetik, eta AEBetan ibiliko da, batetik bestera, bere ametsetako helmugara iritsi arte: Alaskara. Bidean jende asko ezagutuko du, eta denetariko egoerak bizi izango ditu, baina inoiz ez du iparra galduko Alaskara egin arte.

Film ederra da, niretzat kantu bat askatasunari, baita hori lortzea garesti ordain badaiteke ere. Gaztelaniaz, Hacia rutas salvajes izendatu zuten. Aukera baduzue, ikusi. Hona trailerra, ingelesez eta gaztelaniaz.

Kategoriak Sailkatugabeak | Etiketak , , | 2 iruzkin

Emakume antzezlerik politena

Data: 2009(e)ko otsailaren 23a Egilea: Joxe Aranzabal

Joan den ostiralean uste dut ikusi nuela albistea telebistan, eta zioen Britainia Handian aukeratu zituztela inoizko emakume aktorerik politenak. Hauxe zen sailkapena:

  1. Audrey Hepburn
  2. Angelina Jolie
  3. Grace Kelly
  4. Marilyn Monroe
  5. Sophia Loren

Nik, berriz, inoiz ez diot ezer berezirik ikusi Audrey Hepburni, Angelina Jolie oso artifiziala iruditzen zait, eta Grace Kelly, ederra bezain hotza. Gaztaroan Marilyn Monroe izan zen nire ametsetako emakumea, eta sailkapen horretan, bera jarriko nuke tokirik gorenean. Bigarren Sophia Loren. Eta hortik atzera, nahi dituzuenak.

Kategoriak Sailkatugabeak | Etiketak , | 5 iruzkin