Mugarri bat gehiago

Data: 2006(e)ko maiatzaren 22a Egilea: Joxe Aranzabal

Atzo, ia lau urtez lehenengo aldiz, Bego emaztearekin batera irten nintzen arineketan egitera, Miren alaba alboan genuela bizikleta gainean. Errepidera irten ginen, eta ordu erdi egin, gelditu barik. Oraindik ez daukat Begok duen erraztasuna, hauspoak bete egin zitzaizkidan tarteka, baina arineketaldi gogoangarria izan zen hirurontzat.

Lasterka egiteko modua aldatu nuenetik, izugarri aurreratu dut nire hasierako asmoetan, minik hartu barik, gainera. Hiru astean iritsi nintzen hogei minutu egitera, gelditu barik. Eta orain astebete, ordu erdi egin nuen errepidean. Noski, sasoi batean baino dezente astiroago noa orain, baina berdin-berdin balio dit, minik hartzen ez dudan bitartean hankak indartzen joango dira-eta.

Kategoriak Sailkatugabeak | Etiketak , | 5 iruzkin

Egunkarien etorkizuna, Goio Aranaren arabera

Data: 2006(e)ko maiatzaren 19a Egilea: Joxe Aranzabal

Goio Arana diseinatzaile sarituak artikulu bat idatzi du Maquetadores aldizkarian, eta hor aztertzen du egunkarien etorkizuna eta Interneten eragina berauetan. Merezi du.

Kategoriak Sailkatugabeak | Etiketak , | Utzi iruzkina

Blogak, banitatearen erakusleiho

Data: 2006(e)ko maiatzaren 18a Egilea: Joxe Aranzabal
Oraingoan Felipe Juaristi idazle azkoitiarrak jakinarazi digu blogak “norberekeriak harro erakusteko tokiak” iruditzen zaizkiola, “banitatea eta hantustea biak eskutik helduta paseatzen diren zelai ezdeusak”. Gaitzerdi, bere zutabea ere halakotzat jo baitzuen maiatzaren 10ean Territorios gehigarrian argitaraturiko zutabean, El Correon.
Adiskide batek esanda jakin dut debatea izan dela euskal letretan. Nire kulpa da, aitor dut, ez dakidalako nora jo behar den polemika debatedun orriak, paperezko ala elektroniko, jotzeko. Pereza infinitua izango da nirea, ezintasunarekin batera. Interneten sartu eta blogen bila hasteko gogorik eza, noski, espazio horiek norberekeriak harro erakusteko tokiak iruditzen baitzaizkit, zutabe hauxe beezala, ezberdintasunak ezberdintasun, banitatea eta hantustea biak eskutik helduta paseatzen diren zelai ezdeusak. Ez dakit horretaraino iritsiak ote garen honako zutabegileok. Zalantza dut. Idaztea berez da banitatearen erakusleiho. Hori dakienak bide erdia egina du, norberarenak ez diren galtza harroak ez janzteko.

Eskerrik asko Iban Zalduari honen berri ematearren Eibartarrak posta zerrendan. Nik handik hartu dut.

Felipe Juaristiren jarrera ez da bakarra, badira beste idazle batzuk ikuspegi ezkorra dutenak sareari buruz. Zergatik, baina? Entzun pokastina.

powered by ODEO

Kategoriak Sailkatugabeak | Etiketak , , , , | 5 iruzkin

Egun zoragarria

Data: 2006(e)ko maiatzaren 17a Egilea: Joxe Aranzabal

Atzokoa egun zoragarria izan zen niretzat. Jai hartu nuen fakultatean, Joxeferi laguntzeko bere liburuaren aurkezpenean eta, egia esan, haurrak bezala ibili ginen, ilusioz beterik. Bai Donostian eta baita Arrasaten ere.

Arrasatetik abiatu aurretik, Iñaki agurtu genuen Ekiloren. Aspaldi ginen berarekin egon gabe, eta ordu laurden bat-edo igaro genuen ederra, AEBetako kontuak eta hemengoak jorratzen.

Donostia zoragarri zegoen. Bero bai, baina brisara ederrarekin. Topaguneko lagunak agurtu genituen KMko aretoan, tartean Joxe Rojas, aspaldiko geek mac zalea. Prentsaurrea ondo irten zen. Lagunak izan genituen han, Mikel Irizar eta bere bi lankide, tartean Joxe Austin Arrieta; Lierni Narbaiza koinata eta bere ikaskideak; Vanessa argazki ikasle katalana; Enrike bekadun berezia. Noski, kazetariak ahaztu barik, tartean Mertxe Ezeiza, Goenkaleko azken fitxajea.

Donostian

Handik irtenda, Fnac dendan sartu ginen, kuskuseatzera. Ondo dago, besterik gabe. Bi liburu erosi nituen han: Notebook, Paco Aristirena, eta Ripley trebea, Patricia Highsmith-ena. Bazkaldu ere, han ondoan bazkaldu genuen, alboko terraza batean. Kontu kontari. Eta bukatutakoan, izozki bat txokolatezkoa.

Mondragoeko aurkezpena Kajoi tabernan egin genuen, tabernak albo batean duen areto berezian, eta zer esango dizuet, oso ondo egon zen. Berrogeita hamar bat lagun, taldetan, elkarren ondoan, kopa ardoa eskuan, entzuten lehendabizi eta elkarren artean hitz egiten gero, pintxoak jan bitartean. Giro berezia izan genuen, lagun artekoa. Joxefek liburu dezente saldu zituen han, eta sinatu. Egun biribila eta gogoangarria.

Mondragoen

Kategoriak Sailkatugabeak | Etiketak | 2 iruzkin

Blog bat liburu baten zerbitzuan

Data: 2006(e)ko maiatzaren 16a Egilea: Joxe Aranzabal

Joxe Felix Diaz de Tuesta nire aspaldiko lagunak liburu bat aurkeztuko du gaur Donostian eta Arrasaten: Euskal Herria atzerritarren ahotan. Eta liburu hori sustatzeko eta bultzatzeko, blog bat sortu du: Argitan. Beraz, Joxefek marketin-tresna moduan erabiliko du bloga, berak ez baitu izango, besteok izan dugun moduan, argitaletxe bat atzean zabalkunde lanak egiteko. Hori berak egingo du.

Lan interesgarria egin du Joxefek, ia 250 orrialdetan jaso baititu atzerritar ospetsu askok (Dante, Shakespeare, Rabelais, Hugo, Steer, Heminguay, Welles…) Euskal Herriaz eta euskaldunon gainean esandakoak. Kontua da haien begietan ez omen garela hain gaiztoak, zenbaitek sinetsarazi nahi izan diguten legez.

Liburua euskara hutsean dago, oso ondo eginda, zenbait argitaletxek ateratzen dituztenak baino hobeto. Horretan meritu handia izan dute Joxefek berak, Jon Etxeberria maketagileak, Diego Martiartu hitzaurregile eta itzultzaileak eta Gertu moldiztegiak.

Ni ere Joxeferekin izango naiz, goizean Donostian (KM kulturunean) eta arratsaldean Mondragoen (Kajoi tabernan), liburua aurkezten. Honatx han esango ditudanak, pokastin honetan. Entzun nahi baduzu, klik egin biribil arrosan.

powered by ODEO

Kategoriak Sailkatugabeak | Etiketak , , | Utzi iruzkina

Berria berritua

Data: 2006(e)ko maiatzaren 15a Egilea: Joxe Aranzabal

Ez dit zirrara berezirik sortu paperezko Berria berrituak, eta sentitzen dut hori esateak. Gaur egungoa zailagoa egiten zait irakurtzeko. Izan ere, uste dut tipografiaren tratamenduak huts egin duela oraingoan, tipografia baitago irakurgarritasunaren oinarrian.

Txikienetik hasita, zerbait bilatu nahi duenak agendan, jai dauka, lupa bat hartzen ez badu. Eta jakin nahi duenak zer film ematen duten halako herritako zinetokitan, beste horrenbeste. Letra txikiegiak eta zenbait testu kolore grisetan jartzeak du horren errua. Halaber, zenbait albiste txikik izenburu indargeak dituzte orain, eta hainbat aipu oharkabean pasatzen dira, letrak gris tankerakoak izanda, ez direlako ondo irakurtzen.

Letratipoak nola antolatzen diren, ezinbestekoak izaten dira kontrastea sortzeko eta, horren bidez, irakurlearen begiak batetik bestera bideratzeko. Uste dut horretan ere kale egin duela diseinu berriak zenbait kasutan.

Azalean aldatu egin dute izenburuen tipografia, eta berau indartu. Horren ondorioz, baina, Berria izenak berak indarra galdu du, orain borroka bizian baitabil beheko izenburu indartsuekin.

Une berezi batean harrapatu nau Berriaren diseinu aldaketak, baina hori ondorengo pokastinean azaltzen dut, Egunkarien gainbehera izena duen honetan. Entzun nahi baduzu, klik egin biribil arrosan.

powered by ODEO

Kategoriak Sailkatugabeak | Etiketak | 10 iruzkin

Nire lehen pokastina

Data: 2006(e)ko maiatzaren 12a Egilea: Joxe Aranzabal

Aurrekoan, Biz Stone blogariari esker jakin nuen Odeo enpresak erabat berritu duela bere webgunea. Egia esan, orain bi webgune ditu: bat pokastinak grabatzeko eta bestea pokastinak entzuteko. Sartu nintzen lehenera, eta konturatu nintzen erabat berritu dutela eta, nire zorionerako, inoiz baino errazago egin dutela pokastin bat sortzea.

Aurikularrak eta mikroa ipini (orain urtebete inguru erosi nituen Skype erabiltzeko), larakoak sartu, klabijak, record botoiari eman, eta grabatzen hasi naiz. Harrituta utzi nau zein erraz egin daitekeen. Hori bai, hau pokastina a capella da, ahots hutsarekin egina, inolako edergailurik gabe. Hemen duzue emaitza: Gelditasunaren gorazarrea. Klik egin zirkulu larrosean, eta entzungo duzue. Esango didazue.

Kategoriak Sailkatugabeak | Etiketak , , , | 2 iruzkin

Berriro hasi naiz lasterka egiten

Data: 2006(e)ko maiatzaren 10a Egilea: Joxe Aranzabal

Apirilaren 24an hasi nintzen berriro lasterka egiten. Elorrioko futbol zelaira joan, eta hantxe hasi nintzen, belar artifizialaren gainean, tipi-tapa, lasterraldiak eta oinez aldiak tartekatzen. Hasiera xumea izan zen oso: minutu bat arineketan eta minutu bat oinez, horrela hogei minutu bete arte. Gaur, berriz, lau minutu arineketan eta minutu bat oinez. Hala ere, horretara iristeko, aldatu behar izan dut arineketan egiteko modua.

Ikusirik berriz ere min hartzen nuela ezkerreko hankan, Akilesen zainean, erabaki nuen beste modu batean lasterka egitea, buru gainean sabai bat banu bezala, burutik gertu, edozein modutan ere saihestu beharrekoa. Hori dela eta, hankak gutxiago jasotzen ditut arineketan egiterakoan, eta, beraz, lurra kolpatu ere, gutxiago.

Horri esker, azken astean ez dut minik hartu. Horrela segituz gero, hankak indartuz joango dira eta arazo gutxiago izango dut aurrerantzean. Beraz, gutxieneko maila bat hartu arte, sistema horrekin segituko dut, hori bai, arineketaldiak eta oinez aldiak tartekatuz. Piano-piano.

Kategoriak Sailkatugabeak | Etiketak | 2 iruzkin

Zer egingo du orain MCCk?

Data: 2006(e)ko maiatzaren 9a Egilea: Joxe Aranzabal

El Mundo egunkariak nahastu egin zuen MCC martxoaren 11ko atentatuarekin, esan baitzuen poliziak MCCren txartel bat aurkitu zuela furgoneta batean, terroristena inondik ere. Gero, “El País”:http://www.elpais.es/ egunkariak argitu zuen “Orquesta Mondragón”:http://es.geocities.com/laorquestamondragon2000/ musika taldearen zinta bat aurkitu zutela.

Hori argituta, ondokoa gertatu zen, Anjel Lertxundik kontatu bezala: “Antena 3 telebistak Zaplanari: ‘Zer da azkenean, Mondragoi taldeko bisita-txartel bat edo Mondragoi Orkestraren kasetea?’. Eta Zaplanak: ‘Biak, biak!”. Ordurako jakina zen El Mundok huts egin zuela. Hala ere, Zaplanak nahiago izan zuen gezurrarekin segitu.

Gero bat baino gehiago saiatu da hanka-sartzea justifikatzen: “Con tantas pruebas y tanto Mondragón cualquiera se lía,” esan du batek.

Kooperatibista batek haserre idatzi du, eta gogor salatu du El Mundo egunkaria. MCC bera, ordea, isildu egin da. Inork ez ditu eramango El Mundo eta Zaplana auzitegietara, taldeko 70.000 kooperatibisten izenean, gezurra esan dutelako, eta taldea iraindu, jakinda gezurretan ari zirela? Libre da edozer esatea MCCren kontra?

Kategoriak Sailkatugabeak | Etiketak | 2 iruzkin

Zirkulu berde hori

Data: 2006(e)ko maiatzaren 8a Egilea: Joxe Aranzabal

Joan den larunbatean oso nabarmen gertatu zen berriro. Hasier Etxeberria elkarrizketatzen ari zen Castillo Suarez poeta Sautrela saioan, eta azken hau oso ondo ikusten zen bitartean, Hasierren aurpegia berde agertzen zen. Bakarrik burua mugitzen zuenean irteten zen zirkulu berdetik. Esan zitekeen, Hulk, Shrek edo Digante berdea zebiltzala pantailan.

Arazoa ez da oraingoa, lehendik ere gertatzen zen, baina konpondu beharko lukete, itsusitu egiten baitu Sautrela, programa bat oso ondo egina bestela.

Kategoriak Sailkatugabeak | Etiketak , , | Utzi iruzkina