Arrasate-Oñati: eginda

Data: 2007(e)ko maiatzaren 13a Egilea: Joxe Aranzabal

Joxe-Bego Oñatin
Atzo arratsaldean bete nuen promesa, osatze bidean nengoela Sustatun egindakoa: berriz egingo nuela Arrasate-Oñati lasterketa. Luxuzko konpainian egin ere: Bego emaztea, Eneko Astigarraga eta Juan Martin Elexpuru lagunak izan bainituen denbora guztian nirekin. Eurei esker iritsi nintzen, justu halabaina, gasolina erreserban. 1h eta 10’tan egin genuen Arrasatetik Oñatirako bidea.

Bero handi samar egin zuen. Abiapuntura iritsi ginenean, 28º C egiten zuen, eta lasterketan, 26ª C inguru. Aurrez uste bezala, irten eta berehala ia denek aurrera egin zuten, ziztu batean. Atze aldean, berriz, taldetxo bat geratu zen, umoretsua oso. San Prudentzioraino martxa onean joan ginen, eta ingurukoen umorea gozatzen. Handik aurrera, atzerago geratu ginen, ni nekatzen hasi nintzen-eta. Zubillagan pasatzerakoan, suhiltzaileek euri artifiziala prestatu ziguten, nahiz eta ni albotik pasatu.

Oñatin sartu orduko justu nindoan, eta ordurako martxa dezente motelduta. Nire lagunek, berriz, etengabe animatzen ninduten, eta aholkuak ematen lasai joan nendin. Horrela iritsi nintzen Oñatiko plazara. Azken metroetan bizkortu egin genuen pausoa, jendearen animoek bultzatuta. Eskutik helduta ailegatu ginen Bego eta biok, Eneko eta Juan Martin ondoan genituela. Bihotz-bihotzetik eskertzen dizuet, Bego, Juan Martin eta Eneko, bidean eman zenidaten laguntza. Baita Joxe Felix Diaz de Tuestari, argazkia atera eta uztearren. Oso eskuzabalak zarete, eta lagun onak. Eskerrik asko.

Azken lasterketa
Ia denak aurrean hartuta iritsi ginen, eta pozik, bete nuelako agindutakoa. Badakit, hala ere, atzokoa izango dela nire azken lasterketa. Segituko dut arineketan egiten, baina nire kasa edo Begorekin, lasai eta gozatzen, horrela nabilenean ez baitut sentitzen lehiak dakarren presiorik.

Kategoriak Sailkatugabeak | Etiketak , , , , | 17 iruzkin

Arkaitz eta Iban

Data: 2007(e)ko maiatzaren 11a Egilea: Joxe Aranzabal

Atzo, Donostian nintzela Euskal Informatikarien Bilkuran, jarri nintzen Arkaitz Zubiaga eta Iban Arantzabal blogarien artean. Gozamen hutsa izan zen niretzat ikustea gazte biak zelan idazten ari ziren, bata Mutilmedian eta bestea Sustatun, bilkuran esandakoen jarraipena egiteko. Biek ala biek sekulako ahalmena dute entzunaz batera, hizlarien berbak laburbiltzeko.

Gorka Julioren asmakizunak ere, Popatxat delakoak, arrakasta handia izan zuen, hizlariak jo eta ke ari ziren bitartean, entzuleek ere jo eta su ziharduten-eta txateatzen. Bilkura interesgarria, oso.

Kategoriak Sailkatugabeak | Etiketak , , , , , | Utzi iruzkina

Informatikari Euskaldunen Bilkura 07

Data: 2007(e)ko maiatzaren 10a Egilea: Joxe Aranzabal

Donostian nago, Informatikari Euskaldunen Bilkuran. Sarrera hitzaldia egin dut hemen, 250 lagunen aurrean. Web 2.0 izan dut hizpide. Nire esperientzia ekarri dut hitzaldira, eta zenbait hausnarketa. Horretarako testua eta diapositibak erabili ditut.

Hitzaldiaren testua
Nahi duenak irakurri hitzaldiaren testua, hementxe dauka, Scribb aplikazioan. Ikusiko duzue hainbat hitz azpimarratuta daudela. Hitz horiek bide diapositibak markatzen dituzte. Badakizue hortik dokumentuak jaitsi ahal dituzuela hainbat formatutan.

Hitzaldiaren diapositibak
Hitz egin bitartean aurkezpen bat erabili dut, eta hori ikusi ahal duzue Slideshare aplikazioan.

Orain Gorka Juliori entzuten ari gara, bera egiten ari baita bigarren hitzaldia. Gero Gari Araolaza etorriko da.

Kategoriak Sailkatugabeak | Etiketak , , , | 2 iruzkin

Xabi Paya

Data: 2007(e)ko maiatzaren 9a Egilea: Joxe Aranzabal

Xabi Paya aldibereko itzulpena egiten
Atzo komunikatzaile peto bat ikusi nuen: Xabi Paya bertsolari, itzultzaile eta irakaslea. HUHEZIko Literatura Astean izan zen, Andoni Egaña eta Onintza Enbeitarekin batera, frogatu guran euskara ez dakitenek ere goza dezaketela bertsolaritzaz, itzulpenari esker.

Hori frogatzeko, irakasle, zeremonia maisu, itzultzaile eta bertsolari lanak egin zituen, eta denetan bikain aritu zen. Atentzioa ematen du zer gazte den, eta zelako heldutasuna duen. Komunikazioaren fenomeno bat iruditu zitzaidan.

Kategoriak Sailkatugabeak | Etiketak , , , , , | 4 iruzkin

Barriola-Irujo: partida ederra

Data: 2007(e)ko maiatzaren 7a Egilea: Joxe Aranzabal

Gozatu ederra hartu genuen atzo Barriola-Irujo pilota partida ikusten. Hamar lagun ginen telebistaren aurrean, eta ia denak Abelen alde. Gozatu genuen, hortaz, horren garaipena, baina batik bat partidaren ederra, tanto asko ikusgarriak izan baitziren.

Abelek ondo irabazi zuen lehia, une askotan Irujoren baliabideak erabilita, bolea eta sotamano batik bat. Estu hartu zuen iazko txapelduna, eta aurre egin zion ausarki. Lau t’erdikoan tanto batengatik galdu zuen, baina atzokoan, irabazi egin zuen, eta ondo irabazi, gainera.

Igartzen da gaurko mezu hau erabat dela subjektiboa, baita pilotarien izen-deiturak erabiltzerakoan ere: erraz irteten zait Abel esatea, alegia Leitzako pilotariaren izena, zeinak nolabaiteko hurbiltasuna adierazten baitu, baina Juan barik, Irujo irteten zait, deitura, zerbait hotzagoa. Aitortzen diot Irujori pilotari handia dela, seguruenik gaur egungo onena, baina ez zait bat ere gustatzen haren jenio erru-banatzailea. Zilegi bekit, beraz, nire zorionik beroenak ematea Abel Barriolari, merezi du-eta.

Kategoriak Sailkatugabeak | Etiketak , , | 2 iruzkin

Insignis pinua eta bizkaiera

Data: 2007(e)ko maiatzaren 4a Egilea: Joxe Aranzabal

Aspaldi nerabilen buruan (behin Joan Mari Torrealdairi ere aipatu nion, eta hark, baietz), eta atzo berriro etorri zitzaidan burura, Arrasateko pinudi sartu berriak ikusterakoan: Insignis pinua hedatuta dago batez ere bizkaiera hitz egiten den eremuetan. Zergatik ote?

Kategoriak Sailkatugabeak | 6 iruzkin

Borramarka Anaiak, jo eta ke lanean

Data: 2007(e)ko maiatzaren 2a Egilea: Joxe Aranzabal

Irakurri berri dut Bernardo Atxagaren azken liburua, Markak. Gernika 1937, Pamiela argitaletxeak orain dela gutxi kaleratua. Bertan Atxagak batu egin du han eta hemen barreiatuta zegoen informazioa eta zenbait hausnarketa utzi dizkigu, ahantz ez dezagun 1937an Gernikan gertatutakoa. Ekarpen esanguratsua bonbardaketaren 70. urteurrenerako.

Liburu hau irakurrita, bi gauza geratu zaizkit gogoan. Batetik, zenbat zor diogun George L. Steer kazetari hegoafrikarrari, zeinak, oso gazte zela, idatzi baitzuen The Times egunkarian zer gertatu zen Gernikan, oso estilo bizi eta zehatzarekin. Bigarrenik, Atxagak Borramarka Anaiak deitzen dien horiek —horrela deitzen die Gernikan gertatutakoaz gezurra hedatzen ari direnei—, oraindik ere lanean dihardutela kupida barik.

Justu liburua irakurri berritan, joan den larunbatean egokitu zitzaidan El cocidito madrileño entzutea, Radio Euskadin. Eliza katoliko espainiarraren irratiak —neofaxismo espainiarraren habia—, COPEk, sekulakoak eta bost esan zituen Gernikako bonbardaketaz (alemanek bonbardatu zutela Gernika, Francok ezer jakin barik; bonbardaketaren ondorioz ez zirela hainbeste hil; euskal nazionalismoak erabiltzen duela bere mesederako, eta gogoan ez ditudan gauza mordoa, benetan okaztagarriak).

Kategoriak Sailkatugabeak | Etiketak , , , , | Iruzkin 1

Iragarki sailkatuak Goiena.net-en

Data: 2007(e)ko apirilaren 30a Egilea: Joxe Aranzabal

Askorentzat oharkabean etorri da Goiena.net-en azken zerbitzua: iragarki sailkatuak. Erne, hala ere, oso zerbitzu ahaltsua da-eta. Atal horrek jasotzen ditu orain arte Goienkariak argitaratzen zituen iragarki sailkatuak, Debagoienari buruzkoak denak.

Sailkatuak izeneko zerbitzua atalka dator sailkatuta: etxebizitzak, garajeak, lokalak, lana, irakaskuntza, motorra, animaliak eta denetarik. Eremuari dagokionez, Debagoiena hartzen du, alegia, Leintz-Gatzaga, Eskoriatza, Aretxabaleta, Arrasate, Bergara, Oñati, Antzuola, Elgeta eta Aramaio.

Zergatik garrantzitsua
Bi arrazoirengatik da garrantzitsua zerbitzu hori:

  1. Aukera ematen diolako erabiltzaileari berak sortzeko iragarki bat, doan, ezer ordaindu barik.
  2. Iragarki hori Goiena.net-en agertzeaz gainera, agertuko baita astean birritan Goienkarian, paperezko bertsioan. CodeSyntax enpresaren ekarpenari esker, transmisio hori, sareko bertsiotik paperera artekoa, automatikoki egingo da, kazetariek beste ezer egin beharrik gabe. Horrela esan dit Iban Arantzabal Goienako Telematika arduradunak.

Debagoienako bizilagunak eta bertara datozenak konturatzen badira zerbitzu horren ahalmenaz, berau izugarri hazi daiteke, jendearen erabiliaren erabiliaz. Horren eraginez, gainera, komunitatea indartu egin liteke. Iruditzan zait izan daitekeela Craiglist zerbitzuaren antzeko aplikazioa euskaraz.

Besteontzat ere, interesgarria
HUHEZIn ohartu gara zerbitzu horren indarraz, eta gure webgunean loturak sortu ditugu Goiena.net-eko sailkatuetara horretara —hemen eta hemen—, gure ikasleek berau erabil dezaten etxebizitza bilatu eta osatzeko, lana bilatzeko edo beraiek nahi dutena egiteko.

Zorionak berriro ere Goienari, asmatzen ari da-eta aro berrira egokitzen.

Kategoriak Sailkatugabeak | Etiketak , , , | Utzi iruzkina

Zapaburu-euskara

Data: 2007(e)ko apirilaren 27a Egilea: Joxe Aranzabal

Idazkera liburuan Pello Esnalek eta Joxe Ramon Zubimendik zapaburu-euskara aldarrikatzen zuten, alegia, mezua, aditza eta lotura-hitzak aurrean dituena (208. or.). Zizare-euskara, berriz, etenik gabeko euskal prosari deritze; besteak beste, subjektuaren eta aditzaren arteko etenik gabeari (209. or.). Biak aldarrikatzen zituzten kazetaritza-euskara argia lortze aldera.

Kategoriak Sailkatugabeak | Etiketak , , | Utzi iruzkina

Messiren gola, iragarki

Data: 2007(e)ko apirilaren 26a Egilea: Joxe Aranzabal

Ezinezkoa? Messi

Astebete baino gutxiago behar izan du Adidas etxeak Messi jokalariaren gol ikusgarria iragarki bihurtzeko.  Horrelaxe irakurri dut e-cuadernon. “Imposible is nothing” leloa erabili du, eta testu bat, zeinek gutxi gorabehera markatzen baitu jokalariak baloiarekin egindako ibilbidea. Halaxe dio testuak:

  • Zer da zehazki ezinezkoa? Inork ez uste izatea egin daitekeenik? “Ezinezkoa” pentsatzea aitzakia bat da hemen geratzeko, bestek harrapatzen uzteko. Segundu zatiki bat da, zure aurkariak behar duena zuri baloia lapurtzeko. Ikusten? Azken batean ez zen hain zaila, ezinezkoa besterik ez.

Kategoriak Sailkatugabeak | Etiketak , | 5 iruzkin