Horra “8. probintzia“ irratsaioaren 35. saioa. 2008ko maiatzaren 25ean egin dugu Euskadi Irratian, Amarauna saioan.
Edukiak
Saio honetan, honako gai hauek jorratu ditugu:
Gaur MoodleMoot Euskadi 08 jardunaldiak egin dira Garaia Berrikuntza Gunean, Mondragoen, eta han aurkezpen labur bat egin dut Web 2.0 ikastaroari buruz. Hango testua irakurri nahi duenak, klik egin dezala Google Docs dokumentu honetan.
Gustuko dut sasoi hau. Ikasturtearen azken txanpan, etxera itzuli eta, arratsalde partean, zazpi t’erdiak inguruan, zozoak kantari hasten dira etxe inguruko teilatuetan. Noiz edo behin, burua ateratzen dut teilatuko leihotik, eta hor ikusten ditut erretolika batean, elkarren artean hizketan. Polita.
Gizarte digitalak aurrera egin ahala, egunkariek arriskuak eta aukerak dituzte zerumugan. Bideo honek ederto erakusten du hori. Euskaratu egin ditut hor agertzen diren testuak:
El País egunkariak gogoratu duenez, 1984an kazetari batek galdetu zionean Andres Casinello Espainiako Zerbitzu Sekretuetako buruari bera ote zen GAL erakundeko burua, garai hartan askok uste zuten bezala, horrela erantzun omen zion: “Egia izango balitz, eta zuk aurkitu izan bazenu, zure biziak bi pezeta balioko luke”.
Horrela ez du edozeinek hitz egiten. Berba horien atzean estatu aparatuen indarra dago, prest edozertarako, estatua bera iraunarazteko.
Horra “8. probintzia“ irratsaioaren 34. saioa. 2008ko maiatzaren 18an egin dugu Euskadi Irratian, Amarauna saioan.
Edukiak
Saio honetan, honako gai hauek jorratu ditugu:
* Flickr eta Joxe Felix Diaz de Tuesta.
* Zertaz hitz egin den euskal blogosferan.
* Bi blog aipagarri: Giroa barrutik eta BertsoplazaTV.
Nazioarteko informazioa irakurri nahi dudanean, edo teknologiaren gainekoa, sarri Google News zerbitzura jotzen dut, di-da batean informazio piloa jartzen baitu nire esku. Azken aldi honetan, berriz, konturatu naiz Google hasi dela bideoak ere sartzen eskaintza horretan. Plus (+) zeinua agertzen den bakoitzean, bideo bat erakusten du, informazioaren aberasgarri. Klik egin + zeinuan, eta pantaila bat zabalduko da, Google News-en bertan.
Garbi dago informazioa jasotzeko modua aldatzen ari dela, aberasten esango nuke, formatu bakarrean baino, testuan alegia, informazioa hainbat formatutan eskaintzen baitzaigu. Kultura digitalaren abantailak.
Beste norbaitek ezin hobeto adierazten duenean, ez dago zertan asmatzen ibili. Nik ere bat egiten dut Javier Vizcainorekin, Anjel Lertxundirekin eta Mikel Iturriarekin.
Atzo ezkero, eta Gari Araolaza adiskidearen laguntzarekin, Apture aplikazioa erabiltzen ari naiz blog honetan. Gehigarri honi esker, testuari testuinguru multimedia erants diezaioket —dela argazki bat, dela bideo bat, dela aipamen bat Wikipediatik hartuta—, halako moldez non ohiko loturak zaharkituak gelditzen baitira. Apture honekin, hipertestuak pauso bat gehiago egin du, eta baita Interneteko idazkuntzak ere. Aukera eskaintzen du, gainera, irakurlea orrian gera dadin, hortik zehar joan beharrik barik.
Probatzeko, pasatu kurtsorea hemengo loturen gainean. Horietako zenbaitetan, leiho bat irekiko da, eta hor ikusiko da, bertatik alde egin barik, loturaren bestaldean dagoena: argazki bat, bideo bat, edo aipu bat. Han eta hemen begiratuta, konturatu naiz oso ondo dabilela Flickr, YouTube eta Wikipediarekin.
Zelan instalatu
Printzipioz, Apture prestatuta dago Blogger eta Typepad blog plataformentzat, baina gurean ere erabil daiteke. Horretarako, izena eman behar da aplikazioan, eta kode puska bat itsatsi albo-zutabean, hor egon daitezkeen beste kode batzuen ondoren. Guk horrela egin dugu Faroan, nahiz eta beste plataforma batzuetan Apturek gomendatzen duen diseinuko plantillan txertatzea.
Loturak betiko moduan egiten dira, baina emaitzak ezin dira ikusi artikulua argitaratu arte. Hala ere, lan asko ondoren egin behar izaten da, aplikazioak tutorialean erakusten duen moduan. Egoki ikusten baduzue, probatu.
Harrituta
irakurri dut Hillary Clintonek 21 milioi dolar zor duela, baina harrituago geratu
naiz jakin dudanean AEBetako hauteskundeen historian irabazleek lagundu izan
dietela beren aurkariei zorra kitatzen.
Beraz, galtzaileak beti du motibo bat
oso materiala irabazleari laguntzeko hemendik eta azaroa arte, azken bozketa
egiten denean.
