Musu bat, berezia

Data: 2008(e)ko irailaren 11a Egilea: Joxe Aranzabal

Gaur goizean, etxetik irtetera nindoala, Bego hurbildu zait eta “Zorionak” esan dit, musu bat eman ondoren, “orain sei urte baino hobeto gaude”. Izan ere, horrelako egun batean, orain sei urte, minbizia aurkitu zidaten.

Kategoriak Sailkatugabeak | Etiketak , | 6 iruzkin

Gazte

Data: 2008(e)ko irailaren 11a Egilea: Joxe Aranzabal

Gure gazteak mundu digitalean murgiltzen diren neurrian, sortzen ari
dira “hizkuntza digital” bat. Euskaraz adibiderik argiena izango da Kike
Amonarrizek-eta sortu zuten SMS hiztegia, non ispilatzen baita gure
gazteen hiztegia esamesak idazteko orduan.


Ikusi nahi baduzue ingelesez zelako aldea dagoen hizkuntza
estandarra eta hizkuntza digitalaren artean, bada webgune bat, The
AOLer Translator, non sartzen baduzue esaldi bat, ingeles estandarrean, aplikazioak itzuli egingo dizue 12
urteko gazte batek idatziko lukeen moduan.Adibide bat:

  • Today I will go to the bookstore, because I want to
    buy a CD about Spielberg´s latest movie. Would you come with me?

Nik horrela idatzi nuen goiko esaldia, baina itzulgailuak beste hau eman zidan:

  • 2DAY I WIL GO 2 TEH BOKS2RE B/C I WANT 2 BUY A CD ABOUT SPEILBRG´S
    LAETST MOVEI!1!111!1! OMG WTF WUD U COMA WIT M3?????? WTF LOL

Zuek ere egin proba, jolas polita da-eta, eta laguntzen du
ulertzen hizkuntza guztiak, ez bakarrik euskara, zenbateraino aldatzen ari
diren teknologia berrien eraginez.

Kategoriak Sailkatugabeak | Etiketak , | 4 iruzkin

Antsietatea, larregiko informazioak eragina

Data: 2008(e)ko irailaren 10a Egilea: Joxe Aranzabal

Batezbesteko bulegari amerikarrak orduro 6 etenaldi izaten ditu lanean.
Egun batean jasotzen ditu 52 telefono dei, 36 mezu posta elektroniko
bidez, 23 mezu entzuteko, 18 gutun, 18 barne memorandum, 14 fax, 13
post-it, 8 dei bilatzailera, 4 dei eskuko telefonora eta 3 mezulari.
Horrela irakurri nuen Microsiervos webgunean.

Horra, bada, antsietatea, infoxikazioa edo informazio betekada. Kontuz horrekin.

Kategoriak Sailkatugabeak | Etiketak , | 2 iruzkin

Baliteke nire hurrengo ordenagailua PC izatea

Data: 2008(e)ko irailaren 9a Egilea: Joxe Aranzabal

1991 ezkero nire ordenagailuak beti izan dira macintosh. Orain Powerbook bat daukat, eramangarri bat, eta pozik nabil berarekin. Hala ere, zalantza dut zer erosiko dudan hurrengo: mac bat ala PC bat.

Beti erabili ditut mac ordenagailuak, horiekin hasi nintzelako Arrasate Pressen, eta niretzat Applen ordenagailuak erabilerrazagoak izan direlako. Hala ere, azken urteotan, gehien erabiltzen ari naizen aplikazioak —Office modukoak, argazkiak, bloga, egutegia, posta elektronikoa, informazio batzailea, mapak, etab.— ez daude nire ordenagailuan, baizik eta hodei informatikoan, alegia, hortik zehar dauden zerbitzari batzuetan.

Hori horrela izanda, zer zentzu du bi bider gehiago ordaintzea ordenagailu eta aplikazio batzuengatik eta lotzea aplikazio jabedun sorta bati, aldian behin, berriro ordaindu behar izango dut-eta berauek eguneratzeko?

Zergatik ez erosi ordenagailu bat merkea eta ahaltsua, oinarrizko sistema ireki batekin, Dell enpresak saltzen duen Inspiron Mini 9 bezalakoa, zeina baitator Ubuntu 8.04 sistema eragilearekin, Wifi konexioaarekin, eta salduko baita 300 eurotan? Burutazio horiekin nabil egunotan, eta uste dut azkenean horrelako zerbait egingo dudala, garbi dut-eta Windows ez dudala sartuko nire esparruan.

Kategoriak Sailkatugabeak | Etiketak , , , | Iruzkin 1

Demokratak eta errepublikanoak

Data: 2008(e)ko irailaren 8a Egilea: Joxe Aranzabal

Interneti esker, ikusi egin ditut hautagai garrantzitsuenen hitzaldiak bai demokraten biltzarrean, Denverren, eta baita errepublikanoenak, Saint Paulen, biak AEBetan. Batzuetan, CBS erabili dut horiek ikusteko, eta bestetan NBC.

Demokratak, ondo
Demokraten artean, bost hizlari nabarmenduko nituzke: Michelle Obama, Hillary Clinton, Bill Clinton eta, denen gainetik, Barack Obama. Lehenengo lauren hitzaldiak onak iruditu zitzaizkidan, mamitsuak eta ondo bilbatuak, bakoitza bere estiloan: hunkigarria Michelle, indartsua Hillary, eraginkorra Bill. (Joe Biden ere ondo egon zen, baina militarrei egindako keinuak ez zitzaizkidan gustatu).

Baina Barack Obamarena neurriz kanpokoa iruditu zitzaidan: hura ez zen izan hautagai baten hitzaldi alderdikoia, baizik eta manifestu bat erabatekoa, bere herriak aurrera egin dezan bere gidaritzapean. Begori eta zenbait neba-arrebari ere antzeko zerbait iruditu zitzaien, denok ikusi baititugu hitzaldi hauek guztiak. Baina harrigarriena izan da ikustea Pat Buchanan kazetari kontserbadoreak zelako loreak egin dizkion Obamari bere hitzaldiagatik, haren ustez horixe izango baita AEBetako historian horrelako biltzarretan sekula egin den hitzaldirik onena.

Errepublikanoak, hutsal
Sarah Palin hautagaiaren hitzaldia ikusi nuen, eta, ondo irakurri bazuen ere, hutsala iruditu zitzaidan, bere hitzaldia esaldika eraikita baitzegoen, bakoitzaren bukaeran txaloak jasotzeko asmoz, eta gehienak ziren ziriak demokratei botatakoak (bide batez, behin bakarrik aipatu zituen izenez, bestela “our oponents” izendatzen baitzituen, “gure aurkariak”), oso modu alderdikoian.

Eta zer esan McCain lehendakarigaiaren gainean? Zer ikusirik ez aurreko guztiekin. Bera izan zen eskasena nire iritziz, esandakoak ere txarto esan zituelako.

Postscriptum: Hizlari guztiek hiru teleprompter erabili zituzten beren hitzaldien testua irakurtzeko. Baina horretan ere, batzuk hobeto moldatu ziren, nire gusturako Bill eta Barack denen gainetik.

Kategoriak Sailkatugabeak | Etiketak , , , , | Utzi iruzkina

Altxor uhartean berriro

Data: 2008(e)ko irailaren 4a Egilea: Joxe Aranzabal

Egun hauetan Altxor uhartea irakurtzen ari naiz berriro, Robert Louis
Stevenson idazlearen eleberririk ezagunena seguruenik, oraingo honetan
Elkar argitaletxeak argitaratuta. Lanetik etxeratu bezain laster,
liburua hartu, jarri eta irakurtzen hasten naiz Jim Hawkins gaztearen
gorabeherak bukaneroen artean. Izugarri gozatzen ari naiz liburua,
nahiz eta badakidan gaur bertan amaituko dudala.



Gauez, piraten orroak

Seminarioan sartu berri ginela, Saturraranen, noiz edo behin,
jeneralean larunbatetan, Altxor uhartea jartzen ziguten lo hartzeko
orduan, disko batean baitzuten grabatuta Stevensonen lana, oso ondo
eginda, gainera. Logela handietan egiten genuen lo orduan, ikasle piloa
batera, oheak ilaratan zeudela, eta denok desiratzen izaten ginen
istorio hura entzuteko: “Ron, ron, ron, la botella de ron…!” Inor ez
zen lokartuko, harik eta azken korapiloa askatu arte, halakoxea baitzen istorioaren indarra.

Kategoriak Sailkatugabeak | Etiketak , , | Utzi iruzkina

Siesta

Data: 2008(e)ko irailaren 3a Egilea: Joxe Aranzabal

Astelehenean Loiun izan nintzen, aireportuan, bi ikasle jaso behar
nituen-eta Herberehetakoak, gurera baitatoz Erasmus egitasmoaren
barruan. Neska eta mutila dira, jatorrak oso, eta jakin-min handikoak
Euskal Herriaren gainean. Paraje menditsuak eman zien atentzioa,
Euskalduna eta Guggenheim inguruen ederrak eta eguraldi onak.



Galdera asko zituzten niretzat: euskara, borroka armatua…, baina
harrigarriena bukaeran egin zidaten, Arrasatera iristen ari ginela:
egia da hemen mundu guztiak siesta egiten duela? Hori zekarten buruan,
nonbaiten irakurrita seguruenik. Espero dezagun lau hilabete hemen
eginda, beste irudi bat eramango dutela euskaldunoi buruz.

Kategoriak Sailkatugabeak | Etiketak , , | 3 iruzkin

Bukatu da, akabo

Data: 2008(e)ko irailaren 1a Egilea: Joxe Aranzabal

Bukatu dira, bai, oporrak. Ondo ibili gara, lasai, apur bat bidaiatuz eta asko irakurriz. Abuztuaren erdi aldean, ostera, hazizurriak izan ditut, paperak. Eskuin masaila handitu zitzaidan apur bat, belarri aurrea, seguruenik nire tratamenduak eraginda. Hala ere, nahiko oharkabean pasatu ditut, ondorio txarrik barik. Laster ahaztuko ditugu kontu horiek, lanean hasi bezain laster. Gaurtik aurrera.

Kategoriak Sailkatugabeak | Etiketak | Utzi iruzkina

Antonio Caballero

Data: 2008(e)ko abuztuaren 28a Egilea: Joxe Aranzabal

Atzo Galdakaon izan nintzen, ospitalean, kontrol eguna nuen-eta. Itxaroten nengoela, aspaldiko ezagun bat agertu zen itxaron gelan, Antonio Caballero, 87 urteko gizon bat, orain bost urte eta erdi gurekin egoten zena kimio saioak hartzen, bera leuzemiak eta ni linfomak jota geundela.

Argalduta aurkitu nuen Antonio, baina itxura onarekin. Beti bezain berritsu eta baikor, nahiz eta azken aldi honetan ospitaleratuta egon den, arazo fisikoekin.  Granadan jaio zen, eta gogor egin behar izan du lan bere familia aurrera ateratzeko. Erretiroa hartu zuenetik, berriz, eta orain gutxira arte, txinpartak atera dizkio ortuari Galdakaon bertan, han bizi da-eta aspaldi honetan.

Benetan poztu nintzen Antonio berriro ikusteaz, niretzat eredugarria izan baita erakutsi duen ausardia gaixotasunari aurre egiteko.

Kategoriak Sailkatugabeak | Etiketak , , , | Utzi iruzkina

Urrezko domina Berriari

Data: 2008(e)ko abuztuaren 27a Egilea: Joxe Aranzabal

Apur bat berandu nabil, baina Berria egunkaria zoriondu nahi dut Olinpiar Jokoek iraun duten sasoian atera duen gehigarriagatik, paperezko edizioan beti ere. Oso ondo egina iruditu zait, eta interes handiz irakurri dut.

Egunkaria bera baino hobea iruditu zait: diseinu garbia, tipografia ona, kolore egokiak, argazki zoragarriak eta kronika interesgarriak. Zorionak, beraz, gehigarria egin duten guztiei.

Kategoriak Sailkatugabeak | Etiketak , , | Utzi iruzkina