What Would Google Do?

Data: 2009(e)ko ekainaren 23a Egilea: Joxe Aranzabal

Dagoeneko hainbat aldiz aipatu dut liburu hau, What Would Google Do?, baina oraingoan bereziki gomendatu nahi dizuet, liburu aparta iruditu zait-eta. Jeff Jarvis kazetariak idatzi du, eta bertan jasotzen du Internet zelako aldaketa handiak eragiten ari den gure kulturan, negozioetan eta bizimoduan.

Kontuan hartuta Google dela enpresarik esanguratsuena Internet aroan —Amazon, eBay, Facebook, Craigslist eta Wikipediarekin batera, besteak beste—, egileak aztertzen du zelakoak izango liratekeen gure enpresak eta erakundeak —auto enpresak, unibertsitateak, egunkariak, administrazioa, etxe agentziak, etab.—, baldin eta beren jardueran aplikatuko balituzte Googlek-eta ezarri duten lan metodologia.

Ahal baduzue, irakurri liburua. Udarako Millenium trilogiaren osagarri egokia izan daiteke.

Kategoriak Sailkatugabeak | Etiketak , | Utzi iruzkina

Bekatxoa

Data: 2009(e)ko ekainaren 22a Egilea: Joxe Aranzabal

Joan den osteguna ezkero pikorta bat daukat betazalaren beheko ertzean, ezker begian, eta horrekin nabil amorratuta, oraindik ez da-eta desagertu, nahiz eta tantak ematen ari naizen konjuntibitisa osatzeko, antza denez horixe baita bekatxoaren eragilea.

Atzo lagunarteko bazkaria izan genuen, eta bertan hainbat izen entzun nituen era horrelako pikorta izendatzeko, lagunen jatorriaren araberakoak:

  • Mimor, Mondragoen.
  • Begitxindor, Elorrion.
  • Erle-kisten, Goierrin.

Behin etxean, Hiztegi Batuan begiratu nuen, eta hor bekatxo agertzen da. Galdera egin nahi dizuet bekatxoa izan duzuenoi: zelan osatu duzue? Mila esker, aurretiaz.

Kategoriak Sailkatugabeak | Etiketak , , , | 4 iruzkin

Biozu rollua? Saiatu Zugaz

Data: 2009(e)ko ekainaren 19a Egilea: Joxe Aranzabal

Zer egiten dute gaztetxoek etxera iristen
direnean, lagunei agur esanda? Seguruenik, txateatu bost minutu
lehenago kalean agurtutako lagun berberekin, baldin eta etxean
ordenagailua eta Interneteko konexioa baldin badute. Gaur egungo
gaztetxoak etengabe ari dira elkarrekin komunikatzen.

Zugaz sare
soziala da —Goienak sortu berria— eta, seguru asko, areagotu egingo du
joera hori gure inguruko gaztetxoen artean, era guztietako tresnak
eskaintzen baititu —doan— gazteak komunikatu eta elkarrekin jolas
daitezen, horretarako mezu laburrak, argazkiak eta bideoak erabilita.
Eta bideo joko pilo bat.

Zugaz hobeto ezagutze aldera, bertan
kontu bat sortu eta saltseatzen ibili naiz. Atentzioa eman dit zenbat
aukera eskaintzen dituen eta zein erraza den nabigatzeko. Goienak
plataforma bat sortu die Euskal Herriko gazteei, euskaraz. Orain haien
esku dago berau erabiltzea, hobetoen egiten dutena egiteko: “zmz wapa”,
“zutaz pentsatzen… TeKiero!!”, “biozu rollua?” Garai bateko
erromerietan bezala, baina aro digitalean.

Kategoriak Sailkatugabeak | Etiketak , , | 2 iruzkin

Adam Shandro gogoan

Data: 2009(e)ko ekainaren 18a Egilea: Joxe Aranzabal

Zortzi urte zituela ezagutu nuen Adam Shandro, 1981eko neguan, hilabete batzuetan bere etxean bizi izan nintzenean, Boisen, AEBetan. Atzo jakin nuen ekainaren lehen egunetan hil zela, 36 urte zituela, bere kirol hegazkinak Atlanta mendiaren kontra jo zuenean, Idahon bertan.

Adam iritsiko zen goi mailako kirolaria izatera, AEBetako olinpiar taldekoa izan baitzen kayak espezialitatean. Kayak utzita, hegazkinlari trebe bihurtu zen, nahiz eta segitu zuen kirola egiten, hainbat espezialitatetan. Alarguna utzi du, Lori, eta bi alaba: Adelyn eta Ellen, ezagutzen ez ditugunak.

Biziki eskertzen diot Mertxe Urrutiari gutuna bidali izana, The Idaho Statement egunkariko zatikiekin, Adamen heriotzaren berri ematen. Ezbeharraren berri izan bezain laster, gogoratu egin zen ni Shandrotarrekin bizi izan nintzela, eta erabaki zuen gutuna di-da batean bidaltzea, Mertxe lege zaharrekoa baita, eta ez baita konpontzen Internetekin.

Asko zor diegu Shandrotarrei, etxekotzat hartu baininduten ingelesik apenas nekienean, eta jarrerarik abegikorrena izan baitzuten gurekin. Cathy, Tim eta Jamie-ri, eta baita beren familiei, gure doluminik sentikorrenak.

Ohar hau idatzi dugu gonbidatuen liburu digitalean, familiak The Idaho Statement egunkarian jarri duena:

  • The Shandro family treated us as members of their family in the early 80s, when Adam was eight years old, and we barely spoke any English. Today is a day of sorrow for us too, here in the Basque Country. We remember Adam, and we keep you in our hearts Cathy, Tim, Jamie and your families. On June 21st, we will toast to Adam with txakoli, a Basque white wine, just looking to the Udalatx and Anboto mountains. Joxe, Bego and Miren (Elorrio, Basque Country)
Kategoriak Sailkatugabeak | Etiketak , , , , | Utzi iruzkina

Familia bila Erasmus ikasleentzat

Data: 2009(e)ko ekainaren 16a Egilea: Joxe Aranzabal

Irailean 15 ikasle etorriko
zaizkigu Europatik HUHEZI fakultatera, Erasmus egitasmoaren barruan.
Hori dela-eta, familia bila gabiltza, prest egongo direnak ikasle
horiek hartzeko beren etxeetan. Lau hilabeteko kontua izango da:
irailetik abendura, biak barne. Aldi horretan, ikasle horiek ikasi
egingo dute, unibertsitate ikasketak osatzera datoz-eta.

Jeneralean
ikasle horiek ingelesa dute bigarren hizkuntza, eta ez dute jakiten ez
euskararik, ez eta gaztelaniarik ere. Hemen dauden bitartean, ingelesez
ikasiko dute. Alde horretatik, komeni da hartuko dituztenek ere
ingelesa jakitea. Kasu horretan, aukera oso ona da etxeko seme-alabek
ingelesez hitz egin dezaten aldi batez etxean bertan, eta lagunak egin
ditzaten atzerrian, eurek ere kanpora doazenerako.

Diruari
dagokionez ere, aukera interesgarria izan daiteke etxeko hipotekak
ordaintzen laguntzeko, gela bakarra hartuz gero, 300-350 euro artean
ordaintzen baitute errenta hilero.

Formula hau, kanpoko ikasleak
familiatan hartzea, asko erabiltzen da Europan, eta baita Ameriketan
ere. Guk ere bide hori jorratu nahi dugu, abantailak baino ez baitizkiogu
ikusten. Inor animatzen bada, utz dezala erantzun bat blog honetan
bertan, edo dei dezala fakultatera: 943 71 41 57, eta galdetu Txema
Egañaz (119 luzapena).

15 ikasle Europakoak
Datozen ikasleetatik, 10 etorriko dira Irakasle
ikasketak egitera. Gainerako bostek Ikus-entzunezko komunikazioa
aukeratu dute. Erdi Europa eta Eskandinaviatik etorriko dira ikasle
guztiak

  • Belgika: 8
  • Herberehereak: 3
  • Danimarka: 1
  • Finlandia: 1
  • Suedia: 1
  • Norvegia: 1

Datorren
ikasturtekoa izango da Erasmus egitasmoaren hirugarren aldia. Lehen
urtean 9 ikasle etorri ziren Huhezira. Bigarrenean, 5. Hirugarrenean,
berriz, 15.

Kategoriak Sailkatugabeak | Etiketak , , | Utzi iruzkina

Evelyn Berezin, emakume aitzindaria

Data: 2009(e)ko ekainaren 15a Egilea: Joxe Aranzabal

Emakume gutxi pasatu dira Informatikaren historiara. Horietako bat, zalantza barik, Evelyn Berezin da, informatikari estatubatuarra, 1925ean jaioa. 1953an berak asmatu zuen lehen bulegoko ordenagailua, Underwood enpresan zebilela. Geroago, Olivettik erosi zuen Underwood, eta Berezinen asmakuntza ahazturaren putzuan geratu zen.

Geroago, Berezin Teleregister enpresara joan zen, eta han asmatu zuen United Airlines enpresarentzat lehen online erreserba sistema, hegazkineko txartelak erosteko.

1968an Evelyn Berezinek asmatu zuen lehen testu prozesatzailea, idazkariek eta edozeinek idatzi, editatu eta gorde zitzaten testuak, ordura arteko idazmakina elektrikoekin baino erosoago. Burroughs Corporation enpresak erosi zuen Berezinen asmakuntza, baina gorde egin zuen armairuan, eta huts egin zuen aukera paregabea lider izateko testu prozesugintzan.

Gaur egun, Evelyn Berezin lotuta dago hainbat unibertsitate eta erakunderekin, Informatika bultzatzen.

Kategoriak Sailkatugabeak | Etiketak , | Utzi iruzkina

Jon eta Zanna ezkondu egin dira

Data: 2009(e)ko ekainaren 14a Egilea: Joxe Aranzabal

Bego, Jon eta Zanna
Atzo egun gogoangarria izan zen familian, Jon eta Zanna iloben ezkontza ospatu genuen-eta. Elorrion izan zen, Alkartu sozietateko lorategian. Hantxe elkartu ginen ezkonberrien senitartekoak eta lagunak, eta hantxe ospatu genuen ezkontza, berez Jon eta Zanna orain hilabete eta erdi ezkondu baitziren, hor nonbait, Elorrioko udaletxean.

Eguraldi ona, mahai bat, mahai zapia, bi ikurrin —gurea eta Brasilgoa—, lore sorta bat, atrila, mapa bat (Matto Grossokoa, Zanna hangoa baita) eta maitasunezko hitz batzuk, Begok esanda, nahikoa izan ziren ekitaldia hunkigarria egiteko. Ondorengo bazkaria ere primerakoa izan zen, Balen Irazolak prestatua, berak bakarrik dakien moduan. Argazki gehiago, Flickr-en. Zorionak, bikote!

Kategoriak Sailkatugabeak | Etiketak , , | Utzi iruzkina

Scribd liburuak saltzen hasi da

Data: 2009(e)ko ekainaren 13a Egilea: Joxe Aranzabal

Orain arte, dokumentuak
partekatzea izan da Scribd online zerbitzuaren helburua. Aste honetan,
ostera, liburu denda digitala ireki du. Ez edozelan, gainera, Simon
& Schuster argitaletxe handia bertan hasiko da-eta liburuak
saltzen, tartean Stephen King eta Chelsea Handler idazle ospetsuen
liburuak. Horrezaz gain, argitaletxe horrek eskainiko ditu Scribd
zerbitzuaren webgunean milaka eta milaka liburu-pasarte, eta horiek
lotura egingo dute Simon & Schuster argitaletxearekin.

Orain
arte argitaletxeek gogor egin dute Scribd zerbitzuaren aurka, leporatu
izan baitiote bere zerbitzuan jaits zitezkeela liburu askoren edizio
piratak. Ikusita negarrak ezer gutxirako balio duela, euretariko bat,
handienetakoa, ausartu egin da demonioarekin bat egitera, Scribd
zerbitzuarekin alegia. Amazonek, aurkari bat gehiago izango du, eta ez
edozelangoa.

Kategoriak Sailkatugabeak | Etiketak , | Utzi iruzkina

Juan Bautista

Data: 2009(e)ko ekainaren 12a Egilea: Joxe Aranzabal

Gaur joan da azkenengoz lanera, 45 urtez beharrean ibilita, ikasi
bitartean ere –Eskola Politeknikoan zebilen, Mondragoen– lan egiten
baitzuen egun erdiz. Anaia dut Juan Bautista, mutiletan zaharrena,
nahiz eta denetan bigarrena den.

Nola aita zenak Unión Cerrajeran egin zituen laneko urte guztiak, hala
Juan Bautistak ere Fagor kooperatiban eman ditu bere lan urteak. Beti
enpresa berean, gaur arte. Hemendik aurrera Aloña inguruek –Aizkorri
eta Urbia barne– sarri ikusiko dute Juan Bautista, mendia du-eta
gustuko. Ekain jaio berriari ere eskainiko dio astirik, seguru nago,
aitaitaren zereginetan.

Besarkada handi bat, Juan, eta gozatu hemendik aurrerakoak!

Kategoriak Sailkatugabeak | Etiketak , , , | Utzi iruzkina

Anaia txikia

Data: 2009(e)ko ekainaren 10a Egilea: Joxe Aranzabal

Zenbait adituk Anaia txikia esaten diote lan egiteko era honi. Amazon liburu dendan
sartzen garen bakoitzean, arrastoak uzten ditugu: liburu jakin
batzuetan bakarrik egiten dugu klik, guri interesatzen zaizkigunak.
Amazonen robotak, anaia txikiak, zaindu egiten ditu gure mugimendu
guztiak, eta ondorioak ateratzen ditu: “Joxeri gustatzen zaizkio
teknologia berrietako liburuak, diseinuari buruzkoak eta Apple
enpresaren produktuak lantzen dituztenak”. Hori horrela da. Hortik
aurrera, Amazonek astean behin bidaltzen dit mezu bat posta
elektronikora, eta mezu horretan ematen dit informazioa ustez niri
gustatzen zaizkidan liburu horien inguruan.

Horrekin batera,  klik egiten dudanean liburu batean, Amazonek esaten
dit: “liburu hori erosi duen zenbait jendek beste liburu hauek ere
erosi ditu”, eta erakutsi egiten dit zer liburu diren horiek. Behin
baino gehiagotan, kontuan hartzeko proposamenak ikusi ditut iradokizun
horretan. Ikusten? Amazonek zelatatu
egiten nau, zelatatu egiten gaitu, baina informazio hori erabiltzen du
bere zerbitzua hobetzeko. Horregatik esaten zaio teknika horri Anaia
txikia, eta ez Anaia handia, azken honek oso konnotazio negatiboak
dituelako, esan nahi baitu kontrola eta zaintza, askatasuna murrizteko.

Googlek
gauza bera egiten du. Etengabe ari da ondorioak ateratzen guk bere
bilatzailean uzten dugun informazioan, guri eskaintzeko bere zerbitzuak
modu zehatzagoan. Googlek ez digu kobratzen bilatzailea, posta
elektronikoa edo Office paketea erabiltzeagatik, baina, horren truke,
publizitatea bidaltzen digu bilaketa bakoitzean, oso publizitate
diskretua, bilaketaren eskuineko zutabean. Kontua da publizitate horrek
zerikusia duela guk egindako bilaketarekin. Beraz, hartzen du balio
erantsia: bilaketak ez badu balio, akaso publizitatean aurkituko dugu
geure galderaren erantzuna. Hor ere Anaia txikia ari da lanean, gure
mesederako.

Gai hau ere jorratu nuen joan den asteazkenean Euskal Kulturgintzaren Transmisioa ikastaroan, eta ikus daiteke bertan erabili nuen aurkezpenean.

Kategoriak Sailkatugabeak | Etiketak , , | Utzi iruzkina