Amaitu da eritasuneko baimena

Data: 2011(e)ko otsailaren 21a Egilea: Joxe Aranzabal

Hogeita zortzi egun egin ditut fakulatea zapaldu barik: lau Galdakaoko Ospitalean, eta gainerakoa, etxean. Aldi horretan atsedena hartu dut, asko irakurri eta paseatu. Baina hori ere amaitu da, joan den ostiralean jaso nuen-eta senda agiria.

Atzo, eguraldi ona baliatuta, arineketan egitera irten nintzen. Poliki-poliki, 28 minutu egin nituen. Gustura eta pozik etxeratu nintzen.

Gaur, berriz, lehendabizi osasun etxera joan behar, odola ateratzera, eta gero fakultatera. Anjel Lertxundik atzo idatzitako zutabea etorri zitzaidan burura —Bileritis—, itzuli baino ez, hiru bilera izango ditut-eta. Ez dakit noiz egingo dudan lan.

Kategoriak Sailkatugabeak | Etiketak , , | Utzi iruzkina

Zhivago doktorea

Data: 2011(e)ko otsailaren 18a Egilea: Joxe Aranzabal

Aspaldi nuen asmoa liburu hau irakurtzeko, El doctor Zhivago, eta ospitaleratu nindutenean, urtarrilaren 24an, berau irakurtzen hasi nintzen, jakin barik astia izango ote nuen liburutzarrori (747 orrialde ditu) ganoraz leitzeko. Zorionez, izan dut astia, eritasuneko baimena uste baino luzeago joan da-eta. Pozik irakurri dut, eta oso gustura geratu naiz.

Hamahiru bat urte izango nituen El doctor Zhivago filma ikusi nuenetik, eta erabat ahaztuta nuen, egia esan behar badut. Azken urteotan, berriz, behin eta berriro irakurri dut Boris Pasternak idazlearen gainean, eta nahi nuen bere libururik ezagunena irakurri. Bertan aurkitu dut sentiberatasun handiko idazle bat, izadi maitalea eta pertsonengan sinisten duena. Liburu hau maitasun historia bat da, baina XX. mende hasierako Errusian kokatua, orduan gertatu ziren auzi, talka, gerra eta iraultza artean. Atzealdean, gerraren doilorkeria eta iraultzaren gehiegikeriak. Ez harritu Sobiet Batasuneko agintariak haserretu baziren Pasternakekin, liburuak zorrotz kritikatzen baititu sobietarren desmasiak ere.

Liburua artean amaitzeke nuela, joan den larunbatean, Documentos RNE entzun nuen harrikoa egin bitartean, eta, kasualitatea, Boris Pasternak zuen aztergai. Esan beharrik ez dago, arreta handiz entzun nuela irratsaioa, eta horregatik ekarri dut hona, badaezpada zuetariko baten batek berau entzun nahiko balu. Boris Pasternak pertsona interesgarria da, eta Zhivago doktorea, liburu ederra. Ahal baduzue, irakurri.

Kategoriak Sailkatugabeak | Etiketak , | Iruzkin 1

Txantxibiri kalea, jasota

Data: 2011(e)ko otsailaren 17a Egilea: Joxe Aranzabal

Tanger taberna inguruak zulatzen
Egun hauetan Txantxibiri kalea, gurea, hankaz gora dago, langileak jo eta ke ari dira-eta, sanjuanak ondoren berau soilik oinezkoentzat izan dadin. Dena hankaz gora, baina kurioso, hemen ari diren langileak, portugesak gehienak, oso garbiak eta zainduak direlako. Eskerrik asko, Xose!

Porlana berdintzen

Kategoriak Sailkatugabeak | Etiketak , , , , , | 3 iruzkin

Stefan Zweig-en beste aurpegia

Data: 2011(e)ko otsailaren 16a Egilea: Joxe Aranzabal

Egun hauetan Stefan Zweig idazlearen biografia bat irakurri dut, Una vida de Stefan Zweig. Nostalgias europeas, Jean-Jacque Lafaye idazle frantsesak idatzia. Liburuak idazle austriarraren beste aurpegi bat erakutsi dit, haren joera suizidak, ahuldadeak eta, batez ere, haren lehen emaztea, Friderike, orain gutxi arte erabat ezezaguna niretzat.

Orain urte pare bat El mundo de ayer irakurri nuenean, Stefan Zweig-en autobiografia, harrituta geratu nintzen bertan egileak ia aipatu ere ez zuelako egiten bere lehen emaztea. Orain irakurri berri dudanak, berriz, bete du haren hutsunea, eta liburu horretan Friderike Zweig emakume interesgarri askoa azaltzen da, hogeita hamar urtez idazlearen sostengu eta babesa.

Harekin kontrastean, Stefan Zweig-en alde ilunak agertzen ditu liburuak, batez ere errealitatea asumitzeko eragozpenak eta joera suizidak, bere bizitzan barrena behin baino gehiagotan erakutsi zituenak. Nire begietan horrek ez dio baliorik kentzen Stefan Zweig-en lanari, baina balio handia ematen dio Friderike emazteari, zeinaren liburu bat aurkitu baitut sarean, interesgarria izan daitekeena irakurtzeko: Destellos de vida.

Kategoriak Sailkatugabeak | Etiketak , | Utzi iruzkina

Ideateca

Data: 2011(e)ko otsailaren 11a Egilea: Joxe Aranzabal

Eskerrak Euskal Herrian badugula enpresa bat, Ideateca, bideojokoak egiten dituena, baina ez edozein, baizik eta bideojoko ederrak, diseinu bikainarekin.

Iragan udan izan nuen iBasket jokoaren berri, eta izugarri gustatu zitzaidan. Jakin nuen, gainera, sekulako arrakasta izan zuela Applen AppStoren, iPhonentzako dendan.

Atzo, berriz, Sumon ikusi eta probatu nuen. Zer esango dizuet? Ahal baduzue, probatu, izugarri ondo pasatuko duzue-eta. Baina, kontuz, zeren eta mendetasuna eragin dezake, hain da-eta erakargarria.

Kategoriak Sailkatugabeak | Etiketak , , | Utzi iruzkina

Bitartekari digitalak

Data: 2011(e)ko otsailaren 10a Egilea: Joxe Aranzabal

Esan ziguten merkataritza digitalak prezio hobeak ekarriko zituela, merkeagoak, besteak beste bitartekariak (eta berauek kobratzen zituzten diruak) desagertuko zirelako. Neurri batean horrela izan da, liburu digitalak merkeago eros baitaitezke orain. Hala ere, Applek aldatu egin nahi ditu gauzak.

PCWorld aldizkariak azaltzen duenez, Apple konturatu da iPad darabilten askok liburuak Amazonen erosten dituztela, Kindle for iPad aplikazioa erabilita. Hori ez zaio gustatu, salerosketa horietatik ez baitu txakur handirik ikusten. Hori aldatzeko, Applek kobratu nahi die Amazon, Sony, Barnes & Noble eta beste liburu saltzaile askori, zeinek sortu baitituzte aplikazio bereziak euren liburuak iPadetan irakurri eta erosteko, kobratu nahi die saldutako liburu bakoitzeko %30, zergatik eta salerosketa iPad batean egin delako.

Bestela esanda, Applek nahi du bitartekari digitala izan, hau da, dirua irabazi besteek bere plataforma bat erabiltzen dutelako, beste ezer egin barik. Ez dago argi zer gertatuko den: Amazonek-eta onartzen badute Applen hordagoa, liburuak garestitu egingo dira; ez badute onartzen, haien liburuak ezin izango dira irakurri Applen aparailuetan, nagusiak gaur egun plataforma mobiletan.

Non geratuko da Amazonen leloa, orain artekoa behintzat, “Erosi behin, irakurri nonahi”, bideo honetan azaltzen dena? Ikusi egin behar.

Kategoriak Sailkatugabeak | Etiketak , , , | Iruzkin 1

Sintrom

Data: 2011(e)ko otsailaren 8a Egilea: Joxe Aranzabal

Gure bideak aspaldi banatu ziren, bost bat urte bai, eta, ni, behintzat, orduan izugarri poztu nintzen alde batera utzi nuelako, baina orain adiskidetu egin gara berriro —halabeharrez, dena esatera—, egunero hartzen ari bainaiz Sintrom, botika bat odola mehetzeko.

Orain tokatzen zait Sintromen errutina ikastea berriro: astelehen goizean anbulatoriora joan, eta odola atera. Egun berean, baina 14:30ean, gerturatu berriro anbulatoriora, jasotzeko aginduak hurrengo aste(et)an zenbat Sintrom hartu, odol analisien arabera erabakitzen baitute Galdakaon zenbat hartu behar dudan.

Kardiologoak esan zidanez, oraingoan bizi guztirako hartu beharko dut Sintrom, oraingo hau bigarren tronbosia izan dut-eta. Hortaz, hobe errutina ondo ikasten badut.

Kategoriak Sailkatugabeak | Etiketak , , | 5 iruzkin

Nire Kindle gizentzen ari da

Data: 2011(e)ko otsailaren 7a Egilea: Joxe Aranzabal

Amazonek dio Kindle 3 irakurgailuan 3.500 liburu sar daitezkeela. Ni ez naiz, ezta hurrik eman ere, marka horretara iristen, baina dagoeneko baditut 155 liburu nire Kindlen. Horietatik, bi erosi egin ditut; gainerakoak, doakoak dira.

Ingelesez 60 bat liburu daukat, denak Kindlen dendatik jaitsiak, doan, aspaldiko liburuak direlako: Charles Darwin, Lev Tolstoi, etc. Beste 25 bat euskaraz dauzkat, Armiarmaren webgunetik jaitsita, horiek ere doan jaits daitezke-eta, ePub edo PDF formatuetan. Eta gainerakoak gaztelaniaz daude, lagun batek pasatuta. Horiek iPub formatuan zeuden, baina Calibre aplikazioaren bidez MOBI formatura pasatu ditut, horixe baita Kindlek darabilen formatuetako bat.

Une honetan bi liburu ari naiz irakurtzen Kindlen, bat ingelesez, eta bestea gaztelaniaz, eta biak eroso irakurtzen ditut, ez dut orria ukitzeko premiarik sentitzen.

Kategoriak Sailkatugabeak | Etiketak , , | Utzi iruzkina

Zelan irakurtzen dugun ibilian gabiltzala

Data: 2011(e)ko otsailaren 3a Egilea: Joxe Aranzabal

Telefono aurreratuak eta tableta digitalak agertzeaz batera, hainbat aplikazio agertu dira, informazioa zabaltzekoak, eta aplikazio hauek aldatzen ari dira zelan irakurtzen dugun ibilian gabiltzala. Oraingoan hiru aipatuko ditugu: Flipboard, Pulse eta Taptu. Hirurak informazio batzaileak dira, izatez, eta ederto baliatzen dituzte sare sozialak eta ikus-entzunezkoak, informazioa era multimedian aurkezteko.

Natibo digitalek nahiago dute sarean edukiak era multimedian irakurri. Etorkin digital asko ere, konturatzen ari gara era horretara edukiak hobeto sartzen zaizkigula askotan. Horretaz jabetuta, hainbat enpresa ari dira aplikazio bereziak sortzen, informazioa era sinplean, dinamikoan eta ikusgarrian aurkezteko.

Flipboard
Gure inguruan hauxe izango da era horretako aplikaziorik ezagunena, berehala zabaldu zen-eta iPad erabiltzaileen artean. Baita Sustatun ere. Flipboard aldizkari pertsonala izan daiteke, konektatzen baitu erabiltzailearen sare sozialekin, eta erakusten baititu haiek partekatzen ari diren elementurik interesgarrienak: artikuluak, argazkiak, bideoak, aurkezpenak… dena modu ikusgarrian erakutsita, elementu bisual askorekin. Flipboard eguneratzen da lagunek eguneratu ahala euren materiala. iPhone eta iPadetan dabil.

Pulse
Pulse da informazioa irakurtzeko aplikazio bat, eta berau erabil daiteke iPhone, iPad eta Android aparailuetan. Aplikazio honek jasotzen du informazioa erabiltzaileak aukeratutako informazio-iturrietatik: tradizionalak, blogak eta sare sozialak, eta hau guztiau aurkezten du arbel batean, gelaxkaz betea, modu ikusgarrian.

Taptu
Taptu ere informazio batzailea da, eta jasotzen du informazioa erabiltzaileak markaturiko informazio-iturrietatik: lagunak, albistegiak, sare sozialak, kirolak, musika, intereseko tokiak, etab. Berau erabilita erabiltzaileak jakin dezake zer gertatzen ari den Facebook-en, Twitter-en edo Linkedin-en, parteka dezake informazioa bere sarearekin. iPhone, iPad eta Android aparailuetan dabil.

Hiru aplikazioek antzeko ezaugarriak dituzte, eta egiten dute informazioa eskuragarria, dinamikoa, ikusgarria, hurbila eta berehalakoa.

Kategoriak Sailkatugabeak | Etiketak , , , , , | Utzi iruzkina

Marijose Oraa

Data: 2011(e)ko otsailaren 1a Egilea: Joxe Aranzabal

Sautrela saiokoak etorri arte elkarrizketa egitera —abendu amaieran izan zen hori—, ez nekien nor zen Marijose Oraa. Haiek esan zidaten Marijosek ere minbizia izan zuela, bularrekoa, eta liburu bat idatzitakoa zela. Saioak batu gintuen, zeren egun batzuk geroago, Marijosek berak idatzi zidan, bere burua aurkezten. Harrezkero, liburuak eta mezuak trukatu ditugu.

Bere liburua jaso bezain laster —Células caprichosas du izena—, berau irakurtzen hasi nintzen, interes handiz. Gura barik, bere esperientzia irakurtzerakoan, nirearen oihartzunak etortzen zitzaizkidan gogora: beldurrak, nekealdiak, itxaropenak, pozak, familia…

Erabakimen handiko emakumea iruditu zait Marijose, zintzoa bere buruarekin eta bere ingurukoekin. Bizitza maite du, eta zaindu egiten du bere bizitza proiektua. Gaixotasuna ere horrela gainditu du, bizipozez eta elkartasunez, jakin du-eta bere inguruan maitasun sare bat eraikitzen.

Células caprichosas bere esperientziaren isla da. Gustura irakurri dut.

Kategoriak Sailkatugabeak | Etiketak , , | Utzi iruzkina