Firefox 3.6 eta 4 artean

Data: 2011(e)ko martxoaren 30a Egilea: Joxe Aranzabal

Atzo Firefox 4.0 instalatu nuen laneko ordenagailuan, PC batean, eta Google Chrome-ren antza hartu nion. Etxean ere saiatu nintzen Firefox 4.0 instalatzen, baina nire Macintosh PowerBook G4 motakoa da, ez dauka Intel txipa, eta ezin izan nuen Firefoxen azken bertsioa instalatu. Aurrerantzean, bada, lanean 4.0 erabiliko dut. Etxean, ostera, aurreko bertsioa. Biak, euskaraz.

Gustatzen zait Firefox 4.0, nahiz eta oraindik ez nagoen ohituta fitxak URLaren gainean erabiltzen, Google Chromek erabiltzen dituen legez. Pentsatzen dut erabili ahala, ezaugarri interesgarri gehiago aurkituko dizkiodala, Euskalbar eraberritua kasu.

Bestela ere, gustatzen zait Mozilla Firefox, erabiltzaileongan pentsatzen duelako. Atzo hondamendi handia izan nezakeen, etxean 4.0 instalatzerakoan, 3.6 bertsio zaharra ordezkatu bainuen, konturatu barik 4.0 ezin zela instalatu, nire ordenagailuaren arkitektura zaharkitua delako. Orduan ikaratu egin nintzen, pentsatu bainuen nire gogokoak eta gehigarriak pikutara bota nituela. Zorionez, ez zen horrela izan. Firefox 3.6 berriro instalatutakoan, hantxe agertu zitzaizkidan txunkun-txukun gogokoak eta gehigarriak, lehendik neuzkan bezala. Hura alibiyua!

Kategoriak Sailkatugabeak | Etiketak , , | 6 iruzkin

Erroma bisitatzen

Data: 2011(e)ko martxoaren 28a Egilea: Joxe Aranzabal

Moises miresten
Martxoaren 23tik 27a arte, Erroman izan gara, Italiako hiriburua bisitatzen. Pozik itzuli gara, primerako eguraldia izan baitugu, jan ere, ederto, eta Erroma benetan gustatu zaigulako. Eragozpen bat aipatu behar izanez gero, Wi-firik eza izan da: hotelean ez zeukaten, eta leku askotan ere ez. Ordenagailua eraman nuen arren, ezin izan nuen bertatik ezer bidali.

Joan den asteazkenean, lau lagun abiatu ginen Santanderko aireportutik: Begoña Aranzabal arreba, Jabier Larrañaga koinatua, Bego Larrañaga emaztea eta laurok. Jabier genuen gidari, aurretik oso ondo ezagutzen zuen-eta Erroma. Bere gidaritzapean bisitatu ditugu Erromako lekurik esanguratsuenak. Gozada hutsa izan da, historia eta arteaz gain, Jabierrek oso ondo ezagutzen du-eta Italiako zinema, eta hori beti izan dugu oso present gure ibilietan.

Lehen gauean, Treviko fontana inguruetan ginela, euskaldun batekin egin genuen topo bertako izozkitegi batean: Maialen zuen izena, Oiartzungoa, eta han ari zen lanean. Horrezaz gain, oso hurbil sentitu dugu Migel Angel, Rafael, Caravaggio eta beste fenomeno askoren arnasa. Bidaia ederra izan da. Bertan ateratako argazkiak Flickr-en ikus ditzakezue. (Goiko argazkia: Begoña Aranzabal)

Kategoriak Sailkatugabeak | Etiketak , , | Utzi iruzkina

MUniversitas aldizkariaz

Data: 2011(e)ko martxoaren 19a Egilea: Joxe Aranzabal

MUniversitas aldizkariak bost urte bete dituela-eta, MUtelebistak erreportaje bat eskaini dio Mondragon Unibertsitatearen paperezko organoari, hementxe ikusgai. Zorionez, parte zuzena izan dut unibertsitatearen komunikazioak dituen hiru zutoinetan: aldizkaria (MUniversitas), webgunea eta Interneteko telebista (MUtelebista).

Atzera begira, gogoan dut hiruretatik bat ere ez genuenean (Interneti zegokionez, fakultate bakoitzak zeukan bere webgunea, hala-moduzkoa), unibertsitateak erabaki zuen, hasteko, paperezko aldizkari bat sortu behar zela, eta ni ez nentorren bat, uste bainuen webguneak zuela lehentasuna, unibertsitatearen irudia eta eskaintza bateratzeko.

Hala ere, nire esku ezarri zuten aldizkaria, nik koordina nezan. Aurrera atera genuen, eta airoso atera ere, etxean talde eraginkorra sortu genuelako (Idoia Peñakoba, Susana Azpilikueta eta Mila Arregi Erredakzio batzordean, nirekin batera) eta Arteman enpresaren laguntza izan baikenuen.

Denborarekin, beste proiektu eta lanetan sartu ahala, utzi behar izan nuen aldizkariaren koordinazioa. Gaur egun Gorka Etxabek koordinatzen du aldizkaria, Arteman enpresatik, eta beste jite bat eman dio. Berak dioen moduan, arreta handiagoa eskaintzen zaie pertsonei. Erredakzio batzordean ere izan dira aldaketak: Mila Arregik agur esan zigun, eta Amaia Aizpuru eta Marian Iñurrategi iritsi ziren. Maketazioan ere, Garbiñe Beitiak egiten ditu maketazio eta diseinu lanak, hasieran Goio Aranak egin zituenak.

Bost urte igaro dira, baina MUniversitasen itxurak sendo dirau, eta horretan zerikusi handia du Lorena Martinez ilustratzailearen lanak, sormen eta kolorez betea.

Bost urte berehala joan dira. Bitarte horretan, aldizkariak bete du bere egitekoa, hasieran nik uste baino dezente hobeto, gainera. Zorionak denoi!

Kategoriak Sailkatugabeak | Etiketak , , , , | Utzi iruzkina

Atauri gurean

Data: 2011(e)ko martxoaren 18a Egilea: Joxe Aranzabal

Elkarri argazkiak ateratzen
Atzo Joxe Felix Diaz de Tuesta argazkilaria izan zen Mondragon Unibertsitatean, Humanitate eta Hezkuntza Zientzien Fakultatean. Bertara gonbidatu genuen Web 2.0 ikasgaira, azal ziezaien Ikus-entzunezko Komunikazioko ikasleei berak zelan erabiltzen duen Flickr.

Joxefek “Atauri” ezizena erabiltzen du Flickr-en, eta, hain zuzen, azaldu zigun berak zelan erabiltzen duen aplikazio hori bere argazkiak erakutsi eta partekatzeko. 3.000tik gora argazki ditu Flickr-en, 600etik gora kontaktu, 300.000tik gora bisita eta jarraitzaile asko.

Aitortu zigunez, Flickr da bere erakusketa gela: merkeena eta zabalena. Beste behin, txundituta geratu nintzen bere argazkien kalitatearekin. Horra atzoko hitzaldiaren argazkiak Flickr-en.

Kategoriak Sailkatugabeak | Etiketak , , , , , | Utzi iruzkina

Kindle irakurgailuaren alde ilunak

Data: 2011(e)ko martxoaren 14a Egilea: Joxe Aranzabal

Kindle 3.0 irakurgailua erabili ahala, konturatzen ari naiz badituela alde ilunak, hasieran harrapatzen ez nituenak, eta berauek zerikusia dute Amazon enpresaren negozio modeloarekin, berak sortu baitzuen Kindle. Hona hemen hiru, Kindle aplikazioari buruzkoak, zeinaren bidez irakurgailuan dauden liburuak irakur baitaitezke ordenagailuan, telefonoan edo tableta digital batean:

  • Kindle erosi aurretik, 25 bat liburu nituen erosiak Amazonen. Badakit Kindle plazaratu zuenean, orain hiruzpalau urte, Amazonek bistaratzen uzten zituela formatu digitalean aurretik berari paperean erositako liburuak. Etxearen kortesia. Baina orain ez. Niri sekula ez zaizkit Kindlen agertu liburu horiek, aurrez paperean erosi nizkionak.
  • Kindle 3.0 irakurgailuan 3.500 liburu sar daitezke, MOBI formatuan. Nik 125 bat liburu ditut hor, baina Kindle aplikazioan (ordenagailuan, telefonoan edo tabletan erabiltzen den horretan) bakarrik agertuko zaizkit Amazoni erositakoak, ez Susaren webgunetik edo beste inondik jaitsitakoak. Nire kasuan, 25 bat liburu agertzen zaizkit Kindle aplikazioan, gehienak doakoak. Gainerako liburuak bakarrik irakurgailu digitalean irakurri ahal ditut, ez beste gailuetan.
  • Sartzen baduzu Kindle 3.0 irakurgailuan txosten bat PDF formatuan, ez duzu arazorik izango berau leitzeko irakurgailuan. Aitzitik, ez zaizu agertuko Kindle aplikazioan, beste gailuetan instalatzen den horretan. Nahi baduzu PDF hori Kindle aplikazioan agertzea, aurretik bidali behar diozu Amazoni, berak instalatu dezan zure aparailuan, diru kopuru bat ordainduta. Bestela, jai-larai…

Amazonek negozio modelo itxia dauka, eta horretan Applek eta Microsoftek moduan jokatzen du: MOBI bere formatua da, eta ez da bateragarria beste batzuekin. Eta, ahal duela, diru kopuru bat nahi du Kindle bidez egindako eragiketa bakoitzeko.

Kategoriak Sailkatugabeak | Etiketak , , | Iruzkin 1

Papillon errodatzen, estra moduan

Data: 2011(e)ko martxoaren 13a Egilea: Joxe Aranzabal

Aste honetan hainbat jendek galdetu dit ea egia den Papillon filman parte hartu ote nuen. Azkena, Juan Luis Azkarate lagunak. Hauxe erantzun nion, atzo bertan:

Ez da txistea, Juan Luis. Garai hartan Donostian ikasten ari ginen, EUTGn, eta, halako batean, esan ziguten film bat errodatu behar zutela Hondarribian, eta estrak nahi zituztela. Egunero, goizeko 06:00ak aldera, autobus batek jasotzen gintuen Groseko hondartza parean, gasolindegi batean, eta egun osoa igarotzen genuen Hondarribian.

Oso polita izan zen, zeren lagun piloa elkartu ginen han. Gainera, Dustin Hoffman eta Steve McQueen ikustea gure artean, akabua izan zen. Azken hau artean Ali MacGraw-rekin zebilen, Love Story-ko artistarekin. Vespa batean joaten ziren biak Maria Cristina hotelera. Kontuan izan modako bikotea zirela orduan…

Egun batean, greba egin genuen, diru gehiago eskatzeko, ordu piloa sartzen genuen-eta, eta kontua da estren artean polizia batzuk ere bazeudela, orduko “grisak”, eta barregarria izan zen haiek ere greba egiten ikustea, ikusten baikenuen gogoz kontra ari zirela, artean debekatuta zegoen-eta greba egitea. Azkenean, lortu genuen soldata igoera. Oso ondo etorri zitzaigun dirua, garai hartan, txakur-txikirik barik ibiltzen ginen-eta.

Nonbaiten badaukat argazkiren bat, soldadu frantses jantzita, 1. Mundu Gerra garaikoa, baina ez dut aurkitzen. Esan behar dizut inoiz ez dudala nire burua ikusi pantailan, ez eta nire lagunena ere. Hala ere, Papillon ez dut saltzeko, ez horixe.

Kategoriak Sailkatugabeak | Etiketak , | Utzi iruzkina

Eskoriatzan, paseatzen

Data: 2011(e)ko martxoaren 12a Egilea: Joxe Aranzabal

Eskoriatzan, paseatzen
Joan den astean hasi ginen, Goio Arana lankideak gonbidatuta, bazkal ostean pasetzen Eskoriatzan zehar, berriro lanean hasi aurretik. Ostera horietan leku ikusgarriak begiztatzen ari gara, Luis Ezeiza eskolako horma hori, esate baterako.

Argazki hau telefonoarekin hartu nuen. Bertan, Goio Arana eta Eneko Bidegain ageri dira, bidelagunak.

Kategoriak Sailkatugabeak | Etiketak , , , , , | Utzi iruzkina

Beira adimenduna

Data: 2011(e)ko martxoaren 11a Egilea: Joxe Aranzabal

Honako hau bideo komertziala da, enpresa batek sortua bere produktuak iragartzeko, beira adimenduna batez ere. Nolanahi den, marketin usaina alde batera utzita, bideoak erakusten digu zein izan daitekeen gure etxeen eta inguruen bilakaera etorkizun hurbilean, batik bat Mendebalean.

Horietako zenbait gauza gaur egun ere egin daitezke, adibidez aurrez aurreko bideo konferentzia iPhone pare bat erabilita. Edo panel bateko irudia norberaren telefonora ekartzea telefonoarekin panela ukituta, HPk bere tableta digitala eta telefonoa erakutsi zituenean ikusi zen legez. Beste batzuek, ostera, denbora gehiago beharko dute gauzatzeko.

Kategoriak Sailkatugabeak | Etiketak , , , , | 2 iruzkin

Sintrom-ekin burrukan

Data: 2011(e)ko martxoaren 9a Egilea: Joxe Aranzabal

Aurreko bi asteetan pare bat aldiz ahaztu nuen Sintrom hartzea, botika bat odolaren koagulazio maila arintzeko. Huts larri samarra, antza. Are eta larriagoa, astelehenean ahaztu egin bainuen erizainari horren berri ematea. Ondorioz, igo egin didate Sintrom kopurua datozen bi asteetarako, nire odolaren koagulazio maila behar baino apalago dago-eta.

Lierni Narbaizak esplikatu zidan gertatuaren esanahia, koinatak, eta estrategia bat iradoki zidan, Sintrom ez ahazteko, bera medikua baita, eta ona, gainera.

Aurrerantzean, arratsaldez hartuko dut Sintrom, etxera iritsi eta merendatzen dudanean. Era horretara, inoiz ahazten badut ordu horretan pastila hartzea, beti izango dut aukera berau iluntzean hartzeko. Horrezaz gain, apuntatu egingo dut egunero Sintrom noiz hartzen dudan. Seguru nago horrela hutsegite gutxiago egingo dudala. Mila esker, Lierni!

Kategoriak Sailkatugabeak | Etiketak , , | Utzi iruzkina

Oraindik erosi ez euskarazko liburu digitalik

Data: 2011(e)ko martxoaren 7a Egilea: Joxe Aranzabal

Larunbatean La Vanguardia egunkarian irakurri nuen Lorenzo Silva idazle espainiarrak komentzitu duela Destino argitaletxea, kalera ditzan bere liburu guztiak (21), gehi bi narrazio argitaragabeak, formatu digitalean, denak 3,99 eta 5,99 euroan, eta DRM barik, hau da, kontrol antikopiarik gabe. Poztu egin nintzen, uste baitut horixe dela bidea liburu elektronikoak sustatzeko.

Egun berean, Arantxa Urretabizkaiari egindako elkarrizketa leitu nuen Berrian. Gogoa sartu zitzaidan haren azken liburua erosteko, 3 Mariak, baina bertsio digitalean. Gurebook-en sartu nintzen, eta ikusi nuen hantxe zegoela, 8,50 euroan, DRM barne. Ez nuen erosi.

Horren ordez, arreba batek utzita, atzo liburuaren paperezko bertsioa ekarri nuen etxera, horrek ez du-eta DRMrik, ez eta beharrik ere.

Kategoriak Sailkatugabeak | Etiketak , , , | 5 iruzkin