Aroa upategian

Data: 2012(e)ko uztailaren 30a Egilea: Joxe Aranzabal


Atzo Zurukuainen izan ginen, Nafarroan, Aroa upategia bisitatzen. Berau paraje zoragarri baten erdian dago, Lizarratik hurbil, eta atzoko eguraldiak horixe nabarmendu zigun. Bertan Kepa Larunbe eta Txus Macias aurkitu genituen, Aroa upategiko nagusiak, euskaradunak biak, eta haiekin batera bisitatu genuen upategia. Bazkaldu ere, bertan egin genuen, ezin hobeto, hainbat ardo probatuta: zuria, gorria, beltza eta gozoa, azken hau postrearekin hartzekoa.

Hara joateko txango modukoa antolatu genuen. Elorriotik abiatu eta Ataunera joanda, Lizarrustitik gora egin eta, Etxarri-Aranatz igarota, Lizarraga gainera jo genuen. Handik behera, ordura arteko hodeiak eguzki bihurtu ziren, eta horrela jaitsi ginen Abarzuzarantz. Handik Murugarrenerako bidea hartu, eta upategiraino. Txango ederra egin eta primerako eguna igaro genuen. Flickr-en jarri ditugu han ateratako argazkiak.

Kategoriak Sailkatugabeak | Etiketak , , , | Utzi iruzkina

Spikedrivers, Esteñibarren

Data: 2012(e)ko uztailaren 24a Egilea: Joxe Aranzabal

Spikedrives in Esteñibar, Elorrio
Macondon bezala, Esteñibar baserrian ere, berau Elorrion, gauza harrigarriak gertatzen dira noiz behinka. Atzo, esate baterako. Kanpo aldean afaltzen ari ginela, izar iheskor batek zeharkatu zuen zeru ezin garbiagoa, eta afaltiarrok aho zabalik geratu ginen, tartean Constance Redgrave, Maurice McElroy eta Ben Tyzak, Spikedrivers musika taldeko kideak. Zerbait handiagoren iragarpena ematen zuen.

Ondoren etorri zen sekula bizi izan dudan kontzerturik ederrena. Gaueko 23:15ak aldera, Spikedrivers taldeak formatu txikiko emanaldia eskaini zigun Esteñibarren geunden guztiei, hamar lagun guztira. Ordubetez, blues tankerako abestiak jo zizkiguten, zein baino zein ederragoa. Izarrak ere, dir-dir ari ziren, emanaldia hain izan zen-eta liluragarria.

Larunbat arratsaldean agertu ziren Spikedrivers taldekoak Esteñibar baserrian, hiru egunerako atseden hartzera. Egun horietan, Flickr-en ikus daitekeen moduan, inguruaz gozatu, bertako jakiak eta edariak dastatu, probasaioak egin, mahastian jardun eta etxekoen konpainiaz gozatu zuten, hainbeste, ezen jasotakoa itzuli nahi izan zuten bart gaueko emanaldiarekin.

Gaur gauean Hor Dago! jatetxean joko dute, Gasteizen, baina formatu handian, beheko bideoan bezala. Hantxe izango gara.

Kategoriak Sailkatugabeak | Etiketak , , , , , , | Utzi iruzkina

Hilario Azkarate gogoan

Data: 2012(e)ko uztailaren 23a Egilea: Joxe Aranzabal

Hilario Azkarate hil da, gure haurtzaroko pilotaririk nagusia. Justu atzo bere etxe ondotik igaro ginen musikari talde batekin paseatzen ari ginela, eta azaldu genien bertan bizi zela garai bateko euskal pilotaren txapeldunik handienetako bat. Gaur, berriz, haren heriotzaren berri zabaldu da.

Umetan izan nuen Hilarioren berri, aita zenarekin batera Kanpazar gaineko tabernan eskuz banakako hainbat final ikusi genuenean. Orduan telebista zuri-beltzekoa zen, pilota iluna eta askotan jokoa nondik nora zihoan asmatu ezinik ibiltzen ginen —zer ikusirik ez gaur egungo pilotaleku berdez edo beltzez margotuekin—, baina emozio biziz bizi izaten genituen finalok. Eta pozik, gure gogoena Hilario bera izanda, bost aldiz irabazi zuelako txapelketa.

Behin Elorriora etorrita bizi izatera, hemen ikusten nuen, patxadaz, kalean, lagunekin txikiteoan. Gizon tenplaua. Geroago, berriz, ezagutu nituen Juli emaztea eta Dorleta alaba zena. Gelditzen diren familiartekoei, besarkada handi bat.

Kategoriak Sailkatugabeak | Etiketak , , , , , | Utzi iruzkina

Bost aplikazio iPad-erako

Data: 2012(e)ko uztailaren 20a Egilea: Joxe Aranzabal

Atzo eta gaur artean bost aplikazio gehitu dizkiot nire iPad-ari, lagun diezadan zenbait lan hobeto egiten. Hiru doakoak dira, eta bi ordainpekoak.

Doakoak

  • Diigo. Dagoeneko erabiltzen dut nire ordenagailuetan, sareko dokumentuak gorde, sailkatu eta partekatzeko. Erabili ere, oso pozik erabiltzen dut, oso lagungarria da-eta bere lanean.
  • Genius Scan. Aprobetxatzen du iPad 3ren kamera tableta eskaner bihurtzeko. Bertan egindako dokumentuak .JPG edo .PDF formatuetan parteka daitezke.
  • iTalk recorder. Mezuak grabatzeko. Hasteko, sakatu botoi gorriari, eta hasi berba egiten, Amaitzeko, sakatu berriz botoi gorriari. Emaitza edozein modutan parteka daiteke

Ordainpekoak
Kapritxo moduan, bi aplikazio erosi ditut, ordainpekoak, arrazoi desberdinengatik. Horra:

  • 360 Panorama. 0,79 € kostatzen da, eta balio du iPadarekin argazki panoramikoak ateratzeko. Gomendatzen da argazkiak egunez ateratzea, iluntzean eta leku itxietan ez baitabil ondo. Aurkitzen duzunean toki polit bat, apuntatu, sakatu botoiari eta mobitu iPada ezkerrerantz eta eskuinerantz —nahi baduzu, eman buelta osoa—. Berak automatikoki lotuko ditu argazki guztiak. Emaitza bertan ikusi, Panoramaren webera igo (lagunekin-eta partekatzeko), edo egokitu egin dezakezu Twitter-era bidaltzeko (horrelakoetan ere, ikusgarriak omen dira emaitzak). Oporretarako jostailu ederra izan daiteke iPada daukagunontzat.
  • Brushes. 5,99 € balio du, eta pintatzeko erabiltzen da. Hau erosi dut erakusteko nire anaia Ramon pintoreari Brushes zelan dabilen, bera ere anima dadin tableta digitalean margotzera. Dagoeneko izen handiko margolari zenbaitek erabiltzen dute.
Kategoriak Sailkatugabeak | Etiketak , , | Utzi iruzkina

TED liburuak

Data: 2012(e)ko uztailaren 12a Egilea: Joxe Aranzabal

TED elkarteak TED Books aplikazioa sortu du, eta berau erabilita, nahi duenak bere iPad edo iPhone aparailuetan irakurri ahal izango ditu elkarteak bi astez behin kaleratzen dituen liburuak. Eskaintza izugarri gustatu zaidanez, harpidetu egin naiz bildumara, eta 15 liburu jaitsi ditut nire iPadera.

Egiaztatu dudanez, liburu horiek eduki aberatsak dituzte. Alegia, testuaz gain, izango dituzte audioa, argazkiak, bideoa eta sare sozialen zenbait elementu.

Di-da batean irakurtzekoak
Oro har, TED liburuek 20.000 hitz baino gutxiago izango dituzte, eserialdi batean irakurtzeko modukoak. Hobeto irudika dezagun zertaz ari diren, TED elkarteak kalkulu hauek egin ditu, jakiteko zenbat denbora behar izaten dugun ondoko hauek irakurtzeko:

  • Tuit bat: 4 segundu.
  • TED hitzaldi bat: 18 minutu.
  • Aldizkari bateko artikulu bat: ordu erdi.
  • TED liburu bat: ordubete.
  • Saio liburu bat: astebete.
  • Martutene: udako oporrak (txantxetan ari naiz 😉

Diru kontuak
Batez beste, liburu bakoitzak balio izango du 3 dolar. Hala ere, harpidetza egin daiteke 3 hilabetean 6 liburu irakurtzeko, 15 dolar ordainduta. Eskaintza moduan, harpidetza egiten dutenek lehen 90 egunetan, katalogo osoa izango dute eskura, orain artekoa.

Nik harpidetza egin dut, aprobetxatzeko indarrean daukaten eskaintza, eta 12 euro ordainduta, 15 liburu jaitsi ditut. Bide batez esanda, atzo bertan hori baino gehixeago, 13,50 euro, ordaindu nuen Elkar liburudendan Blog liburua erosteko, berau 107 orrialdeko liburua.

TED taldea 1984an sortu zen “Merezi duten Ideiak Zabaltzeko” helburuarekin. Harrezkero, mundu osora hedatu da, web bat dauka 3.200 bideorekin, eta egitasmo zabala garatu du, beka, sari eta hitzaldiak barne, denak ere besteak motibatzeko asmoarekin.

Kategoriak Sailkatugabeak | Etiketak , , , , | Utzi iruzkina

Iñaki Elorza, “Txapas”

Data: 2012(e)ko uztailaren 10a Egilea: Joxe Aranzabal

Ohi baino beranduago irten nintzen fakultatetik, eta, autoan nindoala, nor egokitu irratian eta Iñaki Elorza “Txapas”, baina ez kirolez hitz egiteko, baizik eta bere fonotekaz. Ordubete inguru, Euskadi Irratiko kirol esatariak 10 abesti aurkeztu zizkigun.

Entzuten ari nintzela, konturatu nintzen “Txapas” nire imaginarioaren parte dela, Benito Lertxundi, Ramon Saizarbitoria edo Olariaga diren moduan. Harrituta geratu nintzen, zelako gauza interesgarriak kontatzen zituen, eta zein gustu ona duen musikarako. Bejondeiala, motel!

Kategoriak Sailkatugabeak | Etiketak , | Utzi iruzkina

Aurkezpeñak forever

Data: 2012(e)ko uztailaren 9a Egilea: Joxe Aranzabal

Asteburu honetan web satiriko bat agertu zaigu euskarazko umore politikoaren basamortuan, Aurkezpeñak forever, webgune bat Goio Aranak sortua, egunero-edo gai bat adar soinuan jorratzeko asmoz. Horretarako argazki bat aukeratu du Goiok, peto-petoa, eta berau errepikatuko du beti, zenbait ukiturekin, egoera jakin bat ironiaz azaltzeko.

Aurkezpeña
Goio Aranak berak horrela definitu zuen Aurkezpeña hitza 2012ko otsailaren 3an: “ekitaldi baten aurkezpen publikoa egiteko era oso euskalduna, jende mordoa ipinita hizlarien ostean”. Eta Pinterest gunean adibide mordoa bildu ditu. Nik dakidala, bera izan zen lehena hitz hori erabiltzen, eta arrakasta dezente izan du, Googlek erakusten duen bezala.

Hala ere, Aurkezpeñak forever erakusleiho hutsa baino gehiago da: ironia eta kontrastea baliatuta, web berriak begi-bistan jartzen digu herri monolitiko eta immobilista bat, antza kondenatuta behin eta berriro tropel moduan agertzera. Niri, behintzat, horixe iradokitzen dit.

Web irekia
Aurkezpeñak forever Goio Aranak sortu du, baina ateak irekita utzi ditu bertan nahi duenak parte har dezan. Horretarako nahikoa da “Submit” botoian klik egin, bertan testu bat sartu eta jatorrizko argazkiari egin beharreko aldaketak egitea. Photoshop edo antzeko programaren bat gustuko izan eta umorea dantzan atera nahi izanez gero, Aurkezpeñak forever adierazpide ezin interesgarriagoa izan daiteke.

Kategoriak Sailkatugabeak | Etiketak , | Utzi iruzkina

Baso bat ardo Higgs-en ohoretan

Data: 2012(e)ko uztailaren 6a Egilea: Joxe Aranzabal

Egunean barrena ezin izan nuen gauza handirik irakurri bezperan Suitzan, CERN laborategietan, iragarritako aurkikuntzaren inguruan: Higgs bosoia edo oso antzekoa. Lanetik bueltan, Interneten sartu eta hainbat artikulu irakurri nituen aurkikuntzaren eta Higgs bosoiaren gainean.

Pozik irakurritakoarekin, botila bat ardo ireki nuen afaltzeko, ardo zuria, bezperako aurkikuntza eta Mirenek prestatutako patata tortilla dastatu eta ospatzeko. Peter Higgs jauna, topa eta zorionak!

Kategoriak Sailkatugabeak | Etiketak , , , | Utzi iruzkina

Path, familia eta lagunarterako

Data: 2012(e)ko uztailaren 5a Egilea: Joxe Aranzabal

Egun hauetan sare sozial bat aurkitu dut, Path, egokia oso familia eta lagun hurbilekin konektatuta egoteko. Denetik dauka apur bat —testua, irudiak, audioa, mapak…—, baina esan liteke Facebook moduko bat dela, esparru pribaturako.

Dave Morin gazteak sortu zuen Path 2010ean, Shawn Fanning Napster-eko sortzailearekin batera, baina iaz bihurtu zen ezagun, orduko bertsio eguneratuarekin. Gaur egun bi milioi lagunek darabilte Path elkarren berri izateko. Instagram bezala —eta harekin lehian—, hau ere telefono aurreratuetan dabil, iOS eta Android sistemetan. Oraingoz 16 hizkuntzatara dago itzulita, eta, bertako arduradunek diotenez, prest daude boluntarioek hizkuntza gehiagotara itzul dezaten.

Kategoriak Sailkatugabeak | Etiketak , | Utzi iruzkina

Ezbaian, sareko telebistan

Data: 2012(e)ko uztailaren 4a Egilea: Joxe Aranzabal

Robert Wright kazetariak plataforma bat asmatu du, Bloggingheads.tv, eztabaida politikoa Internetera eramateko.  Honetaz eta hartaz hitz egiten da Bloggingheads.tv horretan: Obamaren osasun planak, zergak, Siria, Egipto, euroa, alderdikeria, gutxiengoak…, eta beti bideo kamera baten aurrean, eztabaidak bideoan erakusten baitira.

Bloggingheads.tv 2005ean sortu zen, eztabaida pizteko politika eta ideien inguruan. Eztabaidak bi lagunen artean izaten dira, eta pantaila bakarrean erakusten dira, berau bi zatitan banatuta. Bertako arduradunek diotenez, pozik daude telebista horretan ikuspegi asko eta askotarikoak agertzen direlako.

Kategoriak Sailkatugabeak | Etiketak , , , | Iruzkin 1