Paula jaio da

Data: 2006(e)ko maiatzaren 5a Egilea: Joxe Aranzabal

Larraitz eta Oskar gure ilobak dira, eta maiatzaren 3an alabatxo bat izan zuten, Paula. Jaio berriak gure amaren izena eramango du. Izan ere, familian bi Paula izango ditugu orain: gure ama, mater familias sendoa, eta jaio berria. Atzo izan ginen Gurutzetako Ospitalean, eta pozik eta onik ikusi genituen denak: guraso berriak, aiton-amonak, izeko-osabak eta gure Miren, pozez zoratzen lehengusin txikia besoetan izanda.

Berria jákin nuenean, Julen Lekuonaren abesti hura parafraseatzeko gogoa egin zitzaidan: kanta dezagun denok, hau degun alaia, Paula jaio da-eta, kanta aleluia!

Goiko argazkian Bego, Miren eta Paula jaio berria agertzen dira. Argazki gehiago, hemen

Kategoriak Sailkatugabeak | Etiketak | 2 iruzkin

Baimena urtebeterako

Data: 2006(e)ko maiatzaren 4a Egilea: Joxe Aranzabal
Atzo gutun bat jaso nuen Valdecillako Ospitaletik, Santandertik. Pozik nago hark ekarritako berriekin. Halaxe dio:
En la valoración realizada destaca que presenta un quimerismo 100% del donante. No hay otros hallazgos dignos de mención. Próximo control, dentro de 1 año, previa petición de fecha.

Beraz, dena ondo. Batetik, nire odolean Fatima arrebak emandako zelulak dira nagusi erabat, ondo ibiltzeko behar den bezala, transplante bat izan eta gero. Gainerako probak ere ondo irten dira. Eta, lehenbiziko aldiz, urtebete eman didate hurrengo kontrola egiteko. Aupa, Joxe!

Kategoriak Sailkatugabeak | Etiketak | 15 iruzkin

Upelak ala petrolioa, zer garestitu da?

Data: 2006(e)ko maiatzaren 3a Egilea: Joxe Aranzabal

Evo Moralesek hautsak harrotu ditu nazioartean, Boliviako petrolio enpresak nazionalizatu egin ditu eta. Euskadi Irratiak atzo esan zuenez, erabaki horrek “petrolio upela” garestitzea ekarri du, bi dolar. Horren arabera, upelak garestitu dira, eta ez petrolioa. Beste hedabide batzuetan, berriz, entzun eta irakurri genuen petrolioa garestitu dela. Merkatua nola dabilen ikusita, horixe da logikoa, petrolioa garestitzea, eta ez upelak. Orduan, zergatik nahaspila?

Nahaspila sortzen da ez dugulako garbi zer den upel petrolioa eta zer petrolio upela, edo, bestela esanda, garai batean Sustatun piztutako eztabaidara itzuliz, botila ardoa eta ardo botila. Esaten badugu iazko uzta txarraren ondorioz “botila ardoa” garestitu dela, badakigu ardoa garestitu dela. Baina irakurtzen badugu “ardo botilak” garestitu direla, orduan ondorioztatu beharko dugu kristal produkzioa okertu egin dela, eta hortik botilak garestitzea.

Beraz, Evo Moralesen erabakiak ekarri du, ondorio moduan, “upel petrolioa” garestitzea. Has gaitezen, beraz, pentsatzen nola aprobetxatu, ahalik eta ondoen, energia.

Kategoriak Sailkatugabeak | Etiketak , | Iruzkin 1

Aste Santuan irakurritakoak

Data: 2006(e)ko maiatzaren 2a Egilea: Joxe Aranzabal

Aste Santuko oporretan hiru liburu irakurri ditut, hirurak gustura irakurri ere: bat teknologia berrien gainekoa, bigarrena saio bat, eta hirugarrena eleberri bat. Hirurak gomendatzeko modukoak.

Blogs, Wikis, Podcasts

Beste hau, Lazarraga. Ernazimendua euskaraz, Pruden Gartziarena da, eta oso gustura irakurri nuen. Zenbait gauza irakurriak nituen Lazarragaren gainean Sustatun eta Berrian, Pruden Gartziak berak idatziak, baina liburua ez zait errepikakorra egin. Bereziki erakargarria egin zait euskal pizkundeaz egin duen saioa. Beharbada oraindik froga gehiago falta dira, baina iradokitzailea da, oso. Ia-ia eleberri bat moduan irakurri nuen, erraz eta gustura.

Liburuaren izen osoa da Blogs, Wikis, Podcasts, and Other Powerful Tools for Clasrooms, eta Will Richardson irakasle blogariak idatzi du. Niretzat sekulako aurkikuntza izan da, oso ondo uztartzen baititu teknologia berriak irakaskuntzarekin. Gizakom blogean zabalago idatzi dut liburu honen gainean.

Lazarraga

Hau ere irentsi egin nuen, Paul Auster idazle amerikarraren azken lana, Brooklyngo erokeriak. Gizon nagusi baten historia kontatzen digu, erretiroa hartu berria eta minbizitik irten berria, baina horren inguruan pertsonaia asko sartuko dira, eta irten, batzuk bere inguruan dabiltzanak, eta beste asko literaturaren gordailutik berreskuratuak, izan ere, Austerrek inork baino hobeto egiten du metaliteratura.
Poe, Kafka eta beste idazle batzuen gaineko historiak oso dira erakargarriak. Oskar Aranaren itzulpena, ona iruditu zait. Liburuan aurrera egin ahala, gero eta hobea.

Eragozpen bat aipatu behar izanez gero, bat aipatuko nuke: liburuan hainbat akats agertzen dira behin eta berriro, hizkuntzarekin lotuak. Nik uler dezaket pertsona batek ez erabiltzea ondo mugagabea, baina non daude argitaletxeko zuzentzaileak? Ala ez dago zuzentzailerik?

Brooklyngo erokeriak

Kategoriak Sailkatugabeak | Etiketak | 2 iruzkin

Mondragoe, a zer anabasa!

Data: 2006(e)ko apirilaren 28a Egilea: Joxe Aranzabal

Sorry, your browser doesn’t support iframes.

Halaxe da, bai, Arrasate hankaz gora dago, jasota. Mutur batean, Kataide eta Eroskiko lotune amaigabea egiten; barrurago, kiroldegia, Gelmako etxeak eta Zerrajerakoak; erdigunean, lurrazpiko aparkalekuak; harago, autobidea… Orain, berriz, hiru hilabeterako itxi dute Kanpazartik Mondragoera doan bide zaharra, eta, horren ondorioz, ordu gorrietan sekulako auto iladak antolatzen ari dira Kataideko biribilgunean, autobidea bukatzen den lekuan. Eta, hori gutxi balitz, laster hasiko dira lanak Olandixoko tunela eta tranbiaren bidea egiteko.

Kategoriak Sailkatugabeak | Etiketak | 3 iruzkin

Zeren arabera saritu diseinua

Data: 2006(e)ko apirilaren 27a Egilea: Joxe Aranzabal

Business 2.0 aldizkariak diseinu sariak eman berri ditu bigarren aldiz, Botton Line diseinu sariak. Irabazlea, hilkutxa bat, Uono enpresa alemaniarrak atera duen hilkutxa arrauzkara. Hori bezain harrigarria, ordea, epaimahaiak zer irizpide erabili dituen sariak emateko, oso kontuan hartzekoak iruditu zaizkit-eta.

Izan ere, Business 2.0 aldizkariak eratutako epaimahaia estetika baino harago joan da sariak epaitzeko orduan. Hauek izan dira irizpideak:

  1. Estetika.
  2. Erabiltzaile esperientzia.
  3. Marka estrategia.
  4. Iraunkortasuna.
  5. Berrikuntza.
  6. Arrisku hartzea.
  7. Estrategia korporatiboa.
  8. Eragina negozioan.
  9. Kultur eragina.
  10. Sorpresa.

    Eta hamar onenak hauek izan dira, Business 2.0 aldizkariaren arabera:

Hamar onenak

  1. Hilkutxa arrauzkara.
  2. My M&Ms webgunea.
  3. Sling Media Slinbox.
  4. Google Maps.
  5. Citroen C4.
  6. Erabili eta botatzeko bideo kamera.
  7. Nemo Hypno kanpin denda.
  8. Dyson DC-15 xurgagailua.
  9. Apple iPod Nano.
  10. Target ClearRX boteila.
Kategoriak Sailkatugabeak | Etiketak , | Utzi iruzkina

Txernobil gogoan

Data: 2006(e)ko apirilaren 26a Egilea: Joxe Aranzabal

Egun hartan bero egiten zuen, eta erabaki nuen lasterka egitea elastikorik gabe. Kibutza utzi eta basamortuan barneratu nintzen, beduinoen herriskaraino. Kibutzera bidean, ordea, euriak harrapatu ninduen. Biharamonean irakurri nuen The Jerusalem Post egunkarian Israelen bezperan egindako euria erradiaktiboa izan zitekeela, Txernobiletik zetorren-eta, non bizpahiru egun lehenago indarretxe nuklear bat lehertu baitzen. Egia balitz, kutsatuta nengoke.

Orain hogei urte, indarretxe nuklear bat lehertu zenean Txernobilen, gu Israelen geunden, Mishmar Hanegev kibutzean. Egun erdiz hebreera ikasten eta beste erdiz, lanean. Zur eta lur geratu ginen hondamendiaren berri izan genuenean, eta gure artean eztabaida ugari izan zen, zenbaitek uste baitzuten amerikarrek asmatutako albiste bat zela, Sobiet Batasuna ahultzeko.

Egun hauetan arretaz irakurri dut National Geographic aldizkariak Txernobilen inguruan argitaratutako erreportajea. Mila historia hunkigarri daude horren atzean.

Kategoriak Sailkatugabeak | Etiketak , | Utzi iruzkina

Erosle kaskarra

Data: 2006(e)ko apirilaren 25a Egilea: Joxe Aranzabal

Oraingoan hanka sartu dut hondoraino. Tenerifen geundela, argazki makina bat erostera joan ginen, opari bat egiteko, baina azkenean bideo kamera bat ere erosi genuen, eta magnetofono digital bat. Lehenbizikoarekin komediatan nabil, bideo kamerak ez baitu mac ordenagailua ezagutzen, eta bigarrenarekin ere behar leku dezente oraingoz. Nola gertatu zen, baina?

Jeneralean zerbait erosi behar badut, saiatzen naiz horren gainean irakurtzen eta galdetzen, erostera joan aurretik jakinaren gainean egoteko. Iragan astean, berriz, lasai joan ginen argaki makina bat erostera, eta sartu ginen Los Cristianos auzoan dauden ehunka denda txiki horietako batean. Ravi indiar gazteak hartu gintuen. Gozo hitz egiten zuen, eta ez zen larregi saiatzen denetik saltzen, nahiz eta, bide batez, erakutsi zigun bideo kamera bat guk eskatu barik.

Merkea zen, erabilerraza, eta balio zuen gure argazki makina apalak orain hiru urte baino gutxiago. Hori ikusita, burura etorri zitzaidan erreminta ona izan zitekeela bideokastina egiteko, eta animatu nintzen erostera, aintzat hartu barik Macintosh bat dudala, etab. Gogoan nuen argazki makina oso ondo dabilela iPhoto programarekin, eta pentsatu nuen bideo kamera ere halaxe ibiliko zela. Kia. Baina errua nirea da, berotan erosi nuelako, aurrez egin beharrekoak egin barik. Ikasiko dut.

Kategoriak Sailkatugabeak | Etiketak , | 3 iruzkin

Bukatu dira oporrak

Data: 2006(e)ko apirilaren 24a Egilea: Joxe Aranzabal

Joan den astea Kanarietan igaro dugu, Tenerife uhartearen hego aldean: eguraldi ona, pasiera luzeak goizean, irakurraldi lasaiak egunean zehar, berbaldi pausatuak, kafeak Gomera uharteari begira iluntzetan… Kirioak lasai eta suspertuta ekarri ditugu.

Kategoriak Sailkatugabeak | Etiketak | Utzi iruzkina

Gidabaimena beste hiru urterako

Data: 2006(e)ko apirilaren 11a Egilea: Joxe Aranzabal

Atzo lehen opor eguna aprobetxatu nuen gida baimena berrizteko. Hiru urterako berritu didate, esan zidaten-eta hamar urte igaro behar direla “remisión completa” aitortu zidatenetik. Hiru igaro dira, beraz, 2013a arte hiru urtez behin berrituko didate gidabaimena. Egia esan, berdin dit hiru urtez behin egitea edo bost urtez behin. Kontua da gidabaimena edukitzea.

Kategoriak Sailkatugabeak | Etiketak , | Utzi iruzkina