Agur, Bertatik bertara

Data: 2006(e)ko ekainaren 21a Egilea: Joxe Aranzabal

Nonbaiten irakurri dut, Argiaren Harian uste dut izan dela, datorren astean amaituko dela Bertatik bertara saioa ETB1en. Ia dozena bat urte egin ditu pantailan, hamaika, zehatzago izateko. Saioak aurkezle eta zuzendari bat baino gehiago izan ditu, eta berriemaile asko. Eskola ona. Gorabehera eta guzti, gustura ikusi dut Bertatik bertara, eta eskertzen diot ekarri digun estilo bizia, oso telebistakoa. Nire zorionik beroena hor lan egin duten guztiei, merezi dute-eta.

Kategoriak Sailkatugabeak | Etiketak , , | 4 iruzkin

Martzianoen inbasioa

Data: 2006(e)ko ekainaren 20a Egilea: Joxe Aranzabal

Atzo Patxi Lurra lagunak horrela esan zidan, ikusita spam mordoa sartu zaidala erantzunetan: “Jode, Joxe: Martzianoek bereganatu dabe erantzunen zutabea. Gora gizakiok!” Eta arrazoia du. Azken hilabete honetan gero eta spam gehiago sartzen ari zait erantzunetan, eta, egia esan, ez daukat erremedio eraginkorrik horretarako.

Konturatuta nengoen niri baino lehen Luistxori ere antzeko zerbait gertatu zitzaiola Ingelesen Hilerrian, baina bere blog berrituan erantzun nahi duenak captcha erako galdera bati erantzun behar dio, bestela ezin itsatsi erantzuna. Iban Arantzabalekin hitz egingo dut ea posible den Faroan ere antzeko zerbait ipintzea, bestela barraka ixteko gogoa ematen du, hain da gogaikarria spam hori!

Kategoriak Sailkatugabeak | Etiketak , | 2 iruzkin

Gomendio bat lasterkarientzat

Data: 2006(e)ko ekainaren 19a Egilea: Joxe Aranzabal

Joan den ostiral iluntzean euriak harrapatu ninduen arineketan egiten ari nintzela. Amaitu orduko blai-blai eginda nengoen. Kirol oinetakoak ere halaxe nituen, erabat bustita, baina biharamun goizean siku-siku zeuden, berriro asfaltoa zapaltzeko gertu. Nola zitekeen halako aldaketa?

Kanadan erakutsi ziguten kirol oinetakoak sikatzeko modurik onena zela bere barnean egunkari paperak sartzea. Lehenengo atera barne zolak, beraiek ere lehor daitezen. Gero, hartu egunkari bateko orri oso bat, bola bat egin eskuekin, eta sartu zapatilla barruan, estu-estu. Kirol oinetako bakoitzean lau orri sartzen dira, edo lau bola. Utzi ordubete pasatzen, eta kendu paperak. Busti-busti egongo dira, paperak xukatu egingo zuen-eta oinetakoaren ura. Ondoren, errepikatu operazioa, paper sikua sartuta. Handik ordu batzuetara, kirol oinetakoak erabat lehortuta egongo dira.

Nahi izanez gero kirol oinetakoak luze irautea, inoiz ez ipini eguzki galdatan edo berogailu baten ondoan sikatzen, zeren, lehortzearekin batera, askatu egingo dira zolaren gomak. Eta orduan, akabo kirol oinetakoak.

Kategoriak Sailkatugabeak | Etiketak | Iruzkin 1

Lurretik harago joan beharra bizirik irauteko

Data: 2006(e)ko ekainaren 16a Egilea: Joxe Aranzabal

Stephen Hawking zientzialari ospetsuak esan berri du gizakiak beste planeta batzuk kolonizatu beharra duela, baldin eta bizirik iraun nahi badu espezie gisa. Astrofisiko britainiarrak uste du Lurraren berotzeak, gerra nuklearrak edo genetikoki eraldatutako birusek suntsi dezaketela gure planeta. Aspaldi Arthur C. Clarkek ere antzeko zerbait esan zuen. Adi beraz.

Kategoriak Sailkatugabeak | Etiketak | Utzi iruzkina

Badator Musikaire

Data: 2006(e)ko ekainaren 15a Egilea: Joxe Aranzabal

Aurten ere hementxe dago Musikaire, Udako Jaialdiak Elorrion. Larunbatean bertan abiatuko da, egitarau oparo batekin. Bertan gustuko ezer aurkitzen baduzue, etorri Elorriora. Ez zaizue damutuko.

Egitaraua

  • Ekainaren 17an, larunbata: The Clientele. Argiñeta auzoan. (22:30)
  • Ekainaren 24an, larunbata: Euskal kantu liriko berria. Elizan. (22:30)
  • Ekainaren 30ean, ostirala: Gelabert Psitt Psitt. Parkinean. (22:30)
  • Uztailaren 1ean, larunbata: Corsario-La barraca de Colón. Parkinean. (22:30)
  • Uztailaren 2an, igandea: Benito Lertxundi. Parkinean. (22:30)
  • Uztailaren 7an, ostirala: Racalmuto. Tola etxeko lorategian. (22:00)
  • Uztailaren 8an, larunbata: Aintzina. Gazeta auzoan. (22:30)
  • Uztailaren 9an, igandea: Los Zarabella-Patas pa arriba. (19:00)
  • Uztailaren 14an, ostirala: Makala band. San Jose ermitan. (22:30)
  • Uztailaren 15ean, larunbata: Balen Lopez de Munain. Lourdes ikastetxean. (22:30)
  • Uztailaren 16an, igandea: El negro y el flaco. Frontoian. (19:00)
  • Uztailaren 21ean, ostirala: Mac-Lari Increible. (22:30)
  • Uztailaren 22an, larunbata: San Petersburg Cello Ensemble. San Agustin elizan. (22:30)
  • Uztailaren 23an, igandea: La galera encantada-Pidopincho. Frontoian. (19:00)
  • Uztailaren 28an, ostirala: Lila Downs. Plazan. (22:30)
Kategoriak Sailkatugabeak | Etiketak | Utzi iruzkina

Ourmedia ikastokia

Data: 2006(e)ko ekainaren 14a Egilea: Joxe Aranzabal

Ourmedia erakundeak, etxe globala baita hedabide lokal eta herritarrentzat, ikastoki bat ireki du Interneten, Learning Center delakoa, laguntzeko jendeari hedabide partehartzaileak erabiltzen. Hori lortzeko, irakatsiko du nola egin bideoblogak, pokastinak, gidoi digitalak eta bestelako hedabide sortu berriak. Horregatik, hor sartzen denak aurkituko ditu Bideo saila, Audio, Multimedia, Irudiak eta Testua.

Open Media Directory, berriz, biltoki handi bat da, eta hor audio eta bideo klipak aurki daitezke, baita musika zatiak ere, legez erabiltzeko modukoak edozein pokastin edo blogetan. Biak ere kontuan hartzeko baliabideak.

Kategoriak Sailkatugabeak | Etiketak | Utzi iruzkina

Liburu bikaina

Data: 2006(e)ko ekainaren 13a Egilea: Joxe Aranzabal
Gaur publizitate apur bat egin nahi diot lagun baten liburuari, Joxe Felix Diaz de Tuestak idatzitako Euskal Herria atzerritarren ahotan liburuari, eta horretarako erabiliko ditut Josemari Iturraldek joan den larunbatean Gara egunkariaren Mugalari gehigarrian idatzitako hitzak:
Liburu bikain eta baliagarri baten aurrean gaude. Euskal Herriko eskola eta ikastetxe guztiek ale bat gutxienik eduki behar lukete eskura, edozein unetan erabilgarri suerta ledin. Horrela, liburu honen laguntzaz, errazago litzaiguke berdintzea aurkariek gure kontra botatako edozein gezur, irain edota astakeria.
Kategoriak Sailkatugabeak | Etiketak | Utzi iruzkina

Ameriketara joan nintzen…

Data: 2006(e)ko ekainaren 12a Egilea: Joxe Aranzabal

Aurten 25 urte beteko dira Bego eta biok Ameriketara joan ginenetik, Ameriketako Estatu Batuetara. Ingelesa ikasi nahi genuen, eta mundua apur bat ikusi. Urtebeterako aldendu ginen, baina handik bost urtera itzuli gu.

powered by ODEO

Boisen bizi izan ginen ia urtebetez, Idaho estatuan. Vancouverrera joan ginen gero, Kanadara, eta han urtebete eta erdi egin genuen. Beste horrenbeste Ottawan, Kanadako hiriburuan.

Handik Israelera, Imanol Berriatuaren arrastoan. Han bost hilabete eta erdi egin genuen kibutz batean, egun erdiz lan egiten eta beste erdiz hebreera ikasten. Etxeratzeko dirua behar eta, beste hilabete bat egin genuen moshav batean lan egiten, kooperatiba moduko nekazari herriska batean, Negev basamortuan.

Autobusez irten ginen Euskal Herritik, 1981eko irailean, eta trenez itzuli ginen bost urte geroago, 1986ko uztailean, Egipton ere ibili eta gero. Esperientzia ahaztezina guretzat. Hortxe dituzue gure bidaia handiaren zenbait erakusgarri, IKTeroek emandako ideia bati esker eta PictureTrail programa erabilita.

Kategoriak Sailkatugabeak | Etiketak | Utzi iruzkina

Nola banatzen den publizitatearen dirua

Data: 2006(e)ko ekainaren 9a Egilea: Joxe Aranzabal
Enric Pujadas Bassat Ogilvy enpresako lehendakariak hainbat arrasto eman ditu “El País”:http://tinyurl.com/nek8t digitalen egindako elkarrizketan, nola banatzen diren publizitateari eskainitako diruak:
Publizitate inbertsioak banatzerakoan telebistak oraindik ere hartzen du diru horren %44, Internetek %2, zineari eskainitako ehuneko berdina; hala ere, erabiltzaileek eskaintzen diote Interneti beren denboraren %20, irratiari, ordea, %26 eta eguneroko prentsa idatziari %5,5.

Zerbait aldatzen ari da, ezta?

Kategoriak Sailkatugabeak | Etiketak , , , , | Utzi iruzkina

HUHEZI Tagzanian

Data: 2006(e)ko ekainaren 8a Egilea: Joxe Aranzabal

tagzaniapaste
HUHEZI (Mondragon Unibertsitatea) map – Tagzania

Aprobetxaturik Tagzaniak argazkiak ere txertatzen dituela mapekin batera, egokitu egin dut HUHEZIren inguruko mapa, eta sartu dizkiot hiru argazki, berez eskegita daudenak Flickr zerbitzuan: eraikin klasikoa kanpotik ikusita, bertako klaustroa eta Dorleta eraikina. Horrekin, eta zenbait azalpenekin nola iritsi HUHEZIraino, osatuagoa geratzen da mapa.

Kategoriak Sailkatugabeak | Etiketak , , | Utzi iruzkina