Maiatzaren 5 honetan gogoak Saturraranera egin dit. Aspalditxo, 1964an-edo, hara joan nintzen Arrasateko zenbait mutikorekin, Saturrarango seminariora, abade izateko asmoarekin. Hamaika urte nituen orduan.
Oker ez banabil, 65 ikasle ginen gure kurtsoan. Eta haietatik, bat bakarrik abadetu zen. Geroago, hark ere utzi egin zuen apaizgoa. Beraz, gure koadrilla handi hartatik ez da abaderik geratzen.
Aurrekoan, berriz, nonbaiten irakurri nuen Baionako apaizgaitegia itxi egin behar dutela, ez dagoelako apaizgairik. Non eta Euskal Herrian, katolizismoaren gotorlekuan, Iñigo Loiolakoaren sehaskan. Horrek eman beharko lieke zer pentsatua Ratzingerri eta eliza katolikoaren indarraz hitz egin duten guztiei, Erromako azken hileta jendetsuen aurrean.
