Sustatu vs ZuZeu?

Data: 2009(e)ko apirilaren 16a Egilea: Joxe Aranzabal

Atzo izar bat gehiago agertu zen, erabat berria, euskarazko komunikazioaren esparruan: ZuZeu albistari digitala. Harritzekoa bada ere, salbuespenak salbu, sarean ez nuen igarri bozkario berezirik, euskaraz bizi garenon informazio esparrua zabalduko delako (Sustatun, adibidez, albisteak ez zuen erantzunik jaso), baina bai zelabaiteko kezka, Hasier Etxeberria ZuZeu albistariko bultzatzaile nagusiak Komunikariak sarean idatzi eta Sustatun bertan agertutakoagatik: “Behingoagatik euskarazko sarearen tripetan konpetentzia dagoela dirudi”.

Bat bitan banatzen da?
Errepikatu egingo al da, beste behin, euskaldunon arteko betiko
madarikazioa, alegia, bat bitan banatzen dela beti? Euskaltzaindia vs
Euskarazaintza, HPS vs Kontseilua… Kanpotik ari naiz hitz egiten, baina
ez zait iruditzen beldur horrek funts sendorik duenik, hasteko ZuZeu ez
delako Sustaruren eszisioa. Antza denez, Hasier Etxeberriak eta
Luistxo Fernandezek elkarrekin hitz egin zuten ea zerbait egin
zezaketen batera, baina ez bide ziren ados jarri. Kito.

Nik, berriz, beste modu batean ikusten dut egoera. Nire autoaren
irratian hainbat irrati-emisora dauzkat memorian sartuta: Euskadi
Irratia, Gaztea, EITB Irratia, Herri Irratia… Hori bitasuna baino
gehiago da: lautasuna, bai, gutxienez. Baina ez naiz kexatzen,
eskertzen baitut aukera gehiago izatea.

Iruditzen zait batak zein besteak —Sustatuk nahiz ZuZeuk— posizionatzea
dutela desafio handien euskal sarelarioi begira, produktu desberdinak
eskaintzea, nahiz eta biek informazioa erabili lehengai, eta
horretarako, asmatu beharko dute erabiltzaileei entzuten.

Flickr eta Facebook
Beharbada adibide bat jarrita hobeto ulertuko da zer esan nahi dudan. Flickr 2004an sortu zen jendeak argazkiak parteka zitzan Interneten. Beraz, argazkiak dira bere espezialitatea. Facebook, ostera, urte berean jaio zen, baina sare sozial gisa.

Kontua da gaur egun askoz ere argazki gehiago daudela Facebooken Flickr-en baino, nahiz eta hori ez izan Mark Zuckerberg-en
hasierako asmoa. Horrek kalterik ekarri dio Flickr-i? Bat ere ez.
Zergatik? Bitartean, Flickr ere aldatzen joan delako: hasieran zen
zerbitzu bat familiari eta lagunarteari begira, baina azken urteotan,
aldatzen joan da, eta gaur egun da argazkizale potenteen sare eta
erakusleiho globala. Flickr-ek erakutsi du badakiela entzuten, eta joan
da sortzen bere erabiltzaileek aldian-aldian eskatutako azpiegiturak.
(Gainera, argazkizale sutsu horietako askok eta askok pro kontua dute Flickr-en, eta urtean 25 dolar ordaintzen dute, argazkiak muga barik igotzeko)

Hala Flickr-ek nola Facebookek argazkiak kudeatu behar dituzte euren
negozioetan, baina biak dabiltza olatuaren aparretan, bakoitza bere
nortasunarekin.

Sustatu eta ZuZeu
Atzo ezkero, beste panorama bat dugu euskarazko komunikazio digitalean,
orain aukera bat gehiago dugulako. Bakoitzak bere ezaugarriak ditu:
Sustatuk ia zortzi urteko historia, sinesgarritasuna, eta
etorkizunerako asmoak. ZuZeuk, ilusioa eta anbizioa gauzak ondo
egiteko. Arrakasta izango dute, asmatzen badute euskal sarelarion
nahiak entzuten eta interpretatzen. Nik horixe opa diet.

Bitartean, “kanta dezagun denok, hau degun alaia, ZuZeu jaio da-eta, kanta aleluia!”

Kategoriak Sailkatugabeak | Etiketak , | 2 iruzkin

Betaurrekoak, hautsita

Data: 2009(e)ko apirilaren 15a Egilea: Joxe Aranzabal

Bart gauean betaurrekoak apurtu zitzaizkidan. Zehatzago esateko, betaurrekoen eskuin besoa. Inoiz gertatu bazaizue, jaten ari zaretela, hortz baten betegarria edo azala platerera erortzea, hori bizi izan baduzue, orduan ulertuko duzue nire etsipena, anteojo horiek barik ezin baitut ondo irakurri edo pantaila aurrean ganoraz lanik egin.

Gaur goizean optikan izan naiz, eta esan didate ostiral arte, gutxienez, itxaron beharko dudala berriak etorri arte. Izorra hadi! Bitartean, XX. mendeko azken hamarkadan ibilitakoak jantzi beharko ditut, nahiz eta horiek ez diren bifokokoak. Gaitz erdi.

Kategoriak Sailkatugabeak | Etiketak | Utzi iruzkina

Twitter eta bloga

Data: 2009(e)ko apirilaren 14a Egilea: Joxe Aranzabal

Twitter Revolution liburuak gomendatzen du nork bere blogeko lotura jartzea Twitter-en profila betetzerakoan, ez webgune batekoa. Eta horretarako, Simon Leung Googleko adituaren iritzian oinarritzen da:

  • Googlek ikusten ditu hedabide sozialak (blogak-eta) aginpide handiko gune moduan, eta, ondorioz, gorago sailkatzen ditu webgune estatiko eta salmentako orriak baino, zeren eta haietan baitabil jendea etengabe parte hartzen eta elkarren artean eragiten. (199. or.)
Kategoriak Sailkatugabeak | Etiketak , | Utzi iruzkina

Interneten etorkizuna

Data: 2009(e)ko apirilaren 12a Egilea: Joxe Aranzabal

Hemen duzue beste bideo bat, Simon Herguetak egina, zelakoa izango den Interneten etorkizuna, baldin eta gobernuek eta erakundeek ez badute kontrolatzen. (Via Enrique Dans).

Kategoriak Sailkatugabeak | Etiketak | Utzi iruzkina

Twitter, okindegian

Data: 2009(e)ko apirilaren 11a Egilea: Joxe Aranzabal

Albion okindegia Londresen dago, eta Twitter hasi da erabiltzen, jakinarazteko harpidedunei noiz atera duen ogi egin berria labetik: “Croissant bero eta egin berriak… zain dituzu!”, eta antzeko mezuak bidaltzen ditu.

David Dedrick okindegiko arduradunak esan omen duenez, esperimendua oso ondo doa, eta bai ogiak zein pastelak berehala saltzen omen dituzte. Hain ondo, ze pentsatzen ari dira sistema zelan zabaldu hiriburuko beste okindegietan.

Kategoriak Sailkatugabeak | Etiketak , , | 2 iruzkin

Zelakoa izango da Internet 2015ean?

Data: 2009(e)ko apirilaren 10a Egilea: Joxe Aranzabal

MMH erakundeak (Museum of Media History) bideo bat egin du, erakusteko zelakoa izango den Internet 2015ean, hau da, zazpi urte barru, eta bertan zer rol izango duen paperezko prentsak.

Kategoriak Sailkatugabeak | Etiketak , , | 3 iruzkin

Tomas Ondarra

Data: 2009(e)ko apirilaren 8a Egilea: Joxe Aranzabal

Laguna dut Tomas Ondarra, 90 hamarkadan hainbat kongresutan elkartu ginenetik. Artean El Correon zebilen, infografia buru. Gero Argentinara joan zen, eta bertan zazpi urte egin zituen Clarin egunkarian. Gaur egun, berriz, El País kazetan dabil, Madrilen, infografia buru.

Orain dela gutxi baina, bloga estreinatu du Tomasek, El Dibu, eta bertan bere ilustrazioak ari da erakusten —Tomas ilustratzaile bikaina baita—, egunkarirako egiten dituenak, eta bestelakoak. Zuek zeuek ikusi.

Kategoriak Sailkatugabeak | Etiketak , | Utzi iruzkina

Bezeroa, enpresaren aliatu

Data: 2009(e)ko apirilaren 7a Egilea: Joxe Aranzabal

Gaur egun enpresa aitzindariak ez dira konformatzen bezeroari arrazoia aitortzearekin —“Bezeroak beti du arrazoia”—, ezta nonbaiten Iradokizun kaxa xixtrin bat jartzearekin, haren iritziak behetik gora jasotzeko, noranzko bakarrean. Enpresa aitzindariek eztabaida bidez jaso nahi dituzte bezeroen iritziak eta iradokizunak, eta horretarako, birdefinitzen ari dira bezeroarekiko elkarrizketa.

Enpresa horietako bi dira Dell ordenagailu egilea eta Starbucks kafe saltzailea. Lehendabizikoak IdeiaStorm webgunea sortu zuen, bere bezeroen ideiak, iradokizunak eta proposamenak jaso eta, kasu askotan, gauzatzeko. Ondoren, kafe saltzaileak sortu zuen MySturbucksIdea.com webgunea, helburu berarekin. Horretarako, biek darabilte Salesforce.com enpresaren Ideas plataforma.

Biek ala biek berehalako erantzuna jaso zuten: milaka boto, ideia eta iruzkin, Dell-en kasuan, esate baterako, 11.477 ideia jaso dituzte dagoeneko, eta 85.429 iruzkin.

Kafe kontuetara etorrita, bezero batek eskatu zuen izotz koskorrak kafearekin egiteko, era horretan edari hotzak urtu ez daitezen. Berehala jaso zuen 7.600 berezoren babesa. Beste batek, berriz, eskatu zuen arratsaldez ere saltzeko kafe deskafeinatua, berak arratsaldeko 15:00etatik aurrera hasten baita kafeina bako kafea edaten, arazorik ez izateko loarekin. 6.080 puntu jaso zituen.

Noiz edo behin hari garbiak agertzen dira arazo beten inguruan: zenbait bezerok eskatzen zuten ilara bizkor bat jartzea kafe egin berria ordaintzeko, denbora ez galarazteko zenbait zaleren eskari sofistikatuekin (deskafeinatua txokolate hauts piska batekin, baina esne erdigaingabetu epelarekin…), beste batzuek eskariak iPhone bidez egitea, eta beste askok programatu ahal izatea beren eskariak Starbucks txartelean, halako moldez, non dendan sartzeaz bat, eskatu eta ordain bailezakete. Kasu horietan garbi dago haria: jendea aspertuta dago ilara amaigabeekin. Hala ere, kexatu beharrean, bezeroek soluzioak eskaintzen dituzte, musutruke. Enpresak galdetzea besterik ez zuen.

Webgune biak komunitateak dira, sarean antolatuak, bezeroen ideiak jaso, partekatu eta eztabaidatzeko, enpresek egia bihur ditzaten. Noiz ikasiko dute gure enpresek beste horrenbeste egiten?

Kategoriak Sailkatugabeak | Etiketak , | Utzi iruzkina

Sploga

Data: 2009(e)ko apirilaren 6a Egilea: Joxe Aranzabal

Sploga da spam bloga, blog berezia software automatikoarekin egina, gezurrezko edukiarekin eta lotura mordoarekin, denak zenbait bezeroren webguneetara zuzenduta, haien webguneek gora egin dezaten Googlen rankinetan.

Helburu hori lortze aldera —Googlen bilaketetan goian agertzea—, zenbait enpresak kontratatu egiten dute jendea herrialde pobreetan, diru apur baten truke, spam blogak sor ditzaten. Beste batzuek nahiago dute blogariak kontratatu artikulu baikorrak idatz ditzaten zenbait enpresaren alde, haien loturak eskainita.

Kategoriak Sailkatugabeak | Etiketak , , , | Utzi iruzkina

Twitter, bilatzaile eta guzti

Data: 2009(e)ko apirilaren 3a Egilea: Joxe Aranzabal

Twitter berritua
Ezarian-ezarian, Twitter ari da aldaketa nabarmenak egiten bere webgunean, batez ere azken hilabetean. Nire kontuan, hiru berritasun ditut aipatzeko:

  1. Lauki bat, Twitter-en beste zerbitzu batzuk iragartzeko: Twi-stor-i, etab.
  2. Bilatzailea. Orain hiru bat egun agertu zitzaidan, orriaren eskuin aldean. Lehen Twitter Search-en egiten nituen bilaketak, orain Twitter-en orri nagusian egin ditzaket.
  3. Gai beroak. Bilatzailearekin batera agertu zitzaidan, justu haren azpian, eta hor zerrendatzen dira une horretan zer gai dauden puri-purian Twitter-en.

Irakurri dudanez, azken bi berritasun horiek oraingoz zabaldu dira erabiltzaile gutxi batzuen artean bakarrik, seguruenik Twitter kontuari jarraitzen gatzaizkionen artean.

Kategoriak Sailkatugabeak | Utzi iruzkina