Zelakoa izango da Internet 2015ean?

Data: 2009(e)ko apirilaren 10a Egilea: Joxe Aranzabal

MMH erakundeak (Museum of Media History) bideo bat egin du, erakusteko zelakoa izango den Internet 2015ean, hau da, zazpi urte barru, eta bertan zer rol izango duen paperezko prentsak.

Kategoriak Sailkatugabeak | Etiketak , , | 3 iruzkin

Tomas Ondarra

Data: 2009(e)ko apirilaren 8a Egilea: Joxe Aranzabal

Laguna dut Tomas Ondarra, 90 hamarkadan hainbat kongresutan elkartu ginenetik. Artean El Correon zebilen, infografia buru. Gero Argentinara joan zen, eta bertan zazpi urte egin zituen Clarin egunkarian. Gaur egun, berriz, El País kazetan dabil, Madrilen, infografia buru.

Orain dela gutxi baina, bloga estreinatu du Tomasek, El Dibu, eta bertan bere ilustrazioak ari da erakusten —Tomas ilustratzaile bikaina baita—, egunkarirako egiten dituenak, eta bestelakoak. Zuek zeuek ikusi.

Kategoriak Sailkatugabeak | Etiketak , | Utzi iruzkina

Bezeroa, enpresaren aliatu

Data: 2009(e)ko apirilaren 7a Egilea: Joxe Aranzabal

Gaur egun enpresa aitzindariak ez dira konformatzen bezeroari arrazoia aitortzearekin —“Bezeroak beti du arrazoia”—, ezta nonbaiten Iradokizun kaxa xixtrin bat jartzearekin, haren iritziak behetik gora jasotzeko, noranzko bakarrean. Enpresa aitzindariek eztabaida bidez jaso nahi dituzte bezeroen iritziak eta iradokizunak, eta horretarako, birdefinitzen ari dira bezeroarekiko elkarrizketa.

Enpresa horietako bi dira Dell ordenagailu egilea eta Starbucks kafe saltzailea. Lehendabizikoak IdeiaStorm webgunea sortu zuen, bere bezeroen ideiak, iradokizunak eta proposamenak jaso eta, kasu askotan, gauzatzeko. Ondoren, kafe saltzaileak sortu zuen MySturbucksIdea.com webgunea, helburu berarekin. Horretarako, biek darabilte Salesforce.com enpresaren Ideas plataforma.

Biek ala biek berehalako erantzuna jaso zuten: milaka boto, ideia eta iruzkin, Dell-en kasuan, esate baterako, 11.477 ideia jaso dituzte dagoeneko, eta 85.429 iruzkin.

Kafe kontuetara etorrita, bezero batek eskatu zuen izotz koskorrak kafearekin egiteko, era horretan edari hotzak urtu ez daitezen. Berehala jaso zuen 7.600 berezoren babesa. Beste batek, berriz, eskatu zuen arratsaldez ere saltzeko kafe deskafeinatua, berak arratsaldeko 15:00etatik aurrera hasten baita kafeina bako kafea edaten, arazorik ez izateko loarekin. 6.080 puntu jaso zituen.

Noiz edo behin hari garbiak agertzen dira arazo beten inguruan: zenbait bezerok eskatzen zuten ilara bizkor bat jartzea kafe egin berria ordaintzeko, denbora ez galarazteko zenbait zaleren eskari sofistikatuekin (deskafeinatua txokolate hauts piska batekin, baina esne erdigaingabetu epelarekin…), beste batzuek eskariak iPhone bidez egitea, eta beste askok programatu ahal izatea beren eskariak Starbucks txartelean, halako moldez, non dendan sartzeaz bat, eskatu eta ordain bailezakete. Kasu horietan garbi dago haria: jendea aspertuta dago ilara amaigabeekin. Hala ere, kexatu beharrean, bezeroek soluzioak eskaintzen dituzte, musutruke. Enpresak galdetzea besterik ez zuen.

Webgune biak komunitateak dira, sarean antolatuak, bezeroen ideiak jaso, partekatu eta eztabaidatzeko, enpresek egia bihur ditzaten. Noiz ikasiko dute gure enpresek beste horrenbeste egiten?

Kategoriak Sailkatugabeak | Etiketak , | Utzi iruzkina

Sploga

Data: 2009(e)ko apirilaren 6a Egilea: Joxe Aranzabal

Sploga da spam bloga, blog berezia software automatikoarekin egina, gezurrezko edukiarekin eta lotura mordoarekin, denak zenbait bezeroren webguneetara zuzenduta, haien webguneek gora egin dezaten Googlen rankinetan.

Helburu hori lortze aldera —Googlen bilaketetan goian agertzea—, zenbait enpresak kontratatu egiten dute jendea herrialde pobreetan, diru apur baten truke, spam blogak sor ditzaten. Beste batzuek nahiago dute blogariak kontratatu artikulu baikorrak idatz ditzaten zenbait enpresaren alde, haien loturak eskainita.

Kategoriak Sailkatugabeak | Etiketak , , , | Utzi iruzkina

Twitter, bilatzaile eta guzti

Data: 2009(e)ko apirilaren 3a Egilea: Joxe Aranzabal

Twitter berritua
Ezarian-ezarian, Twitter ari da aldaketa nabarmenak egiten bere webgunean, batez ere azken hilabetean. Nire kontuan, hiru berritasun ditut aipatzeko:

  1. Lauki bat, Twitter-en beste zerbitzu batzuk iragartzeko: Twi-stor-i, etab.
  2. Bilatzailea. Orain hiru bat egun agertu zitzaidan, orriaren eskuin aldean. Lehen Twitter Search-en egiten nituen bilaketak, orain Twitter-en orri nagusian egin ditzaket.
  3. Gai beroak. Bilatzailearekin batera agertu zitzaidan, justu haren azpian, eta hor zerrendatzen dira une horretan zer gai dauden puri-purian Twitter-en.

Irakurri dudanez, azken bi berritasun horiek oraingoz zabaldu dira erabiltzaile gutxi batzuen artean bakarrik, seguruenik Twitter kontuari jarraitzen gatzaizkionen artean.

Kategoriak Sailkatugabeak | Utzi iruzkina

Etorkizuna, ikuskizun

Data: 2009(e)ko apirilaren 2a Egilea: Joxe Aranzabal

Unatuta itzuli bainaiz etxera, neka-neka eginda, erabaki dut oparituko dizkizuedala beste hamar atsotitz eder, ez dut-eta beste ezer idazteko gogorik. Zuentzat.

  • Neu nagusi ala muturrak hautsi
  • Dakienak, badaki. Ez dakienak, baleki
  • Lasto-su, laster-su
  • Itsuak ikusgura, errenak ibilgura, gorrak entzungura
  • Deus ez duena, balu, emaile handi
  • Otsoak egiten duena beleari atsegin zaio
  • Garizuma eta urkabea, zoritxarrekoentzat
  • Haurtzaroan ikasia, zahartzaroan oroi
  • Emaile bahaiz, adiskide faltan ez haiz
  • Elerik hoberena, laburrena
Kategoriak Sailkatugabeak | Etiketak , | Utzi iruzkina

Twitter-ek idazle hobea egiten zaitu

Data: 2009(e)ko apirilaren 1a Egilea: Joxe Aranzabal

Asko hitz egiten da Twitter zein egokia den marketina eta negozioa lantzeko, baina Jennifer Blanchard kazetariaren iritziz, Twitter egokia da, orobat, norberaren idazkuntza lantzeko. Zelan?

Behartzen zaitu zehatza izatera
Twitter-ek gehienez jota 140 karaktere eskaintzen dizkizu zeure mezuak idazteko, ez 140 hitz. Ez da toki handia, zeren letrak, sinboloak, puntuazioa eta espazioak karakterrak baitira. Horrek esan nahi du zehatza izan behar duzula. “Laburra eta ona, bi bider ona”.

Behartzen zaitu hiztegia lantzera
Twitter-en hitz motzak bilatu behar dituzu, esanguratsuak. Sarri sinonimo egoki bila abiatuko zara, zeure mezua doitzeko, adjektibo eta adberbiio gutxiagorekin, esan nahi duzun hori sar dadin 140 karakteretan

Behartzen zaitu hobeto editatzera
Askotan zaila izaten da zure mezua sarraraztea 140 karakterretan, zentzua galdu barik. Horregatik, maiz berridatzi behar izaten dira esaldiak, esatekoa biribil joan dadin.

Kategoriak Sailkatugabeak | Etiketak , | Utzi iruzkina

Eta zer dio Korrikak berak?

Data: 2009(e)ko martxoaren 31a Egilea: Joxe Aranzabal

Eman du zeresana, bai, igandean hemen bertan idatzi nuen artikuluak —Korrika eta ETAren presoak. Beste behin, elkarrizketa sortu da Interneten, blog honetan eta Twitter-en, eta bertan parte hartu dugu euskaltzale talde batek, bi ikuspegi nagusirekin: batzuek Korrika euskararen aldeko aldarrikapen huts izan dadin, eta beste batzuek Korrika era guztietako aldarrikapenen aterpe izatearen alde. Korrika izan genuen hizpide, behin eta berriro.

Internetek begi-bistan jarri du gaia: euskaltzaleen artean desadostasunak daude Korrika zelan proiektatzen den. Baina, zer dio Korrikak berak auzi horren gainean?

Korrika ondo kokatuta dago Web 2.0 esparruan, besteak beste badituelako bloga eta kontu bat Twitter-en. Bietan begiratu dut, baina hor ez dut aipamenik aurkitu eztabaidaren gainean. Hala ere, auzia ez da hutsala, ez da lau sarelari zororen ika-mika zentzugabea, ikusitakoak ikusita, Nafarroako Gobernuak erabaki baitu diru laguntza kentzea Korrikari.

Zilegi du Korrikak isilik egotea. Beste batzuek ere horixe egin dute behin baino gehiagotan. Baina Telefonicak, Euskaltelek, Volkswagenek edo enpresa handi horietako batek hori egiten duenean —isilik geratu Interneten edo merkatuan egiten zaizkion kritiken aurrean— hasten da bezeroak galtzen, gaur egungo bezeroak azalpenak eskatzen dituelako, argibideak, batez ere Internetek ahotsa eman dionetik. Gari Araolazak ezin argiago adierazi zuen Faroan, erantzun batean:

  • Ni ez naiz inor esateko nork joan behar duen Korrikan, baina Korrikarekin bat egiten badut euskararen alde nagoelako da, Korrikaren aldarria euskara dela ulertzen dudalako. Oker baldin banago, argitu dezatela aurretik eta gero erabakiko dugu joan ala ez.
Kategoriak Sailkatugabeak | Etiketak , , | 14 iruzkin

Korrika eta ETAko presoak

Data: 2009(e)ko martxoaren 29a Egilea: Joxe Aranzabal

Ikusi dudanean gaurko Berria egunkariaren azala
zur eta lur geratu naiz, bertako argazki handiari begira. Argazkian
agertzen dira korrikalariak Iruñeko alde zaharra zeharkatzen,
Korrikaren pankarta aldean daramatela, eta lerro bat atzerago,
dozenatik gora pertsona beste horrenbeste argazki handi eramaten, ETAko
presoenak nik pentsa.

Oraindik ezin dut ulertu zergatik agertzen diren argazki horiek euskararen festa erreibindikatiboan, niretzat horixe baita Korrika. Presoen hizkuntza eskubideak aldarrikatzen ote dira? Eta Inazio Uria euskaldun petoaren hizkuntza eskubideak? Eta Isaias Carrasco etorkinaren hizkuntza eskubideak? (“Etorkinak izan ziren maiz lekukoa eramaten, bereziki Txantrea auzoan: txiletarrak, mexikarrak, katalanak…”)

Era
horretako agerpenek kalte egiten diote euskarari, eta kalte Korrikari
berari ere, euskara euskal herritar guztion hondarea baita, ez batzuena
edo besteena soilik.

Kategoriak Sailkatugabeak | Etiketak , , | 45 iruzkin

Cirque du Soleil

Data: 2009(e)ko martxoaren 27a Egilea: Joxe Aranzabal

Atzo Bilbon izan nintzen, Cirque du Soleil ikusten. (Ez, ez nituen
ikusi Patxi Lopez eta Basagoiti, baina bai agintari eta jende ospetsu
asko.) Beste behin, liluratuta irten nintzen zirku horretatik. Haria
beste batzuetan baino meheagoa iruditu zitzaidan Varekai ikuskizunean,
baina atal guztiak ikusgarriak izan ziren.

Cirque du Soleil izugarria da: zirkuaren krisirik sakonenean,
berrasmatu egin zuen zirkua: hartu zituen zirkuaren eta Broadwayren
elementurik komenigarrienak, eta munduko zirkurik onena egin zuen. Dena
da polita bertan: koreografia, musika, jantziak, umorea… Aukerarik
baldin baduzue Varekai ikusteko, ikusi, ez zarete-eta damutuko.

Kategoriak Sailkatugabeak | Etiketak , | Utzi iruzkina