Atarikoen bazkaria Txantxibiri 1ean

Data: 2010(e)ko uztailaren 12a Egilea: Joxe Aranzabal

Atariko bazkaria Txantxibiri 1ean
Atzo atarian bazkaldu genuen Txantxibiri kaleko auzoek. Aitor eta Bego izan genituen sukaldari, eta besteok esker onez jan genituen haiek prestatutakoak, denak gozoak. (Argazkia: Aitor Larrañaga-Miren Aranzabal)

Kategoriak Sailkatugabeak | Etiketak , , , | Utzi iruzkina

Ilargipean saioan, minbiziaz berbetan

Data: 2010(e)ko uztailaren 9a Egilea: Joxe Aranzabal

Atzo gauean Euskadi Irratian izan nintzen, Ilargipean saioan, Dani Arizalarekin hizketan. Minbiziaz hitz egin genuen, nik orain ia zortzi urte bizi izandako esperientziaz. Dani bera hunkituta aurkitu nuen, haserre puntu batekin bizitzarekin, bere koadrillako lagun bati ere linfoma bat aurkitu diotelako. Berrogei minutu inguru jardun genuen, giro patxadatsuan. Hemen duzue han hitz egindakoa.

Kategoriak Sailkatugabeak | Etiketak , , | 2 iruzkin

Gazte minbizidunak blogeatzen

Data: 2010(e)ko uztailaren 6a Egilea: Joxe Aranzabal

Minbizia gaixotasun beldurgarria izan daiteke, eta gogorregia bakardadean igarotzeko. Horregatik seguruenik, Britainia Handian gero eta gazte gehiago ari dira blogeatzen beren gaixotasunaren gainean, The Guardian egunkariak dioenez.

Ez dira lau katu, zeren Teenage Cancer Trust erakundearen arabera, Britainia Handian egunero sei gazteri jakinarazten zaie minbizia dutela, 13 eta 24 urte artekoak. Blog horietan gazteek garbi eta zintzo hitz egiten dute beren gaixotasunaz, eta prest agertzen dira irakurleekin elkarrizketan aritzeko.

Rosie Kilburn gaztea da, 18 urte baino ez ditu-eta. “2008ko otsailaren 1ean jakinarazi zidaten gibeleko minbizia nuela, 16 urte bete eta hilabetera. Xok ikaragarria izan zen, nire familian inork ez baitzuen minbizirik izan. Horrezaz gain, uste nuen garaitezina nintzela, nire adineko guztiek bezala”.

Kristin Hallengak 24 urte ditu, eta halaxe idazten du: “Blogean izan naiteke irekia eta zintzoa. Bertan hainbat gauza esan ditzaket, zuzenean esango ez nizkionak ez amari, ez ahizpari, ezta beste inori ere”.

Paul Nicholls-ek 26 urte ditu, eta izugarri ikaratu zen esan ziotenean minbizia zuela. “Bi arrazoirengatik sortu nuen bloga: ez nuelako nahi egunean 300 aldiz erantzun behar izatea zelan nabilen. Eta transmititu nahi nuelako zer den minbizia, eta zein garrantzitsua den bizitza egunero bizitzea”.

Kategoriak Sailkatugabeak | Etiketak , , | Iruzkin 1

Arrasateko Udala konfesionala da?

Data: 2010(e)ko uztailaren 5a Egilea: Joxe Aranzabal

Goiena.net-en ikusi nituen, San Joan jaiak zirela-eta, Arrasateko Udaleko zenbait zinegotzi parrokian sartzen, Salvera, San Joanen irudia bizkarrean zeramatela. Eta nik neure buruari: zer egiten dute zinegotzi horiek hor, Arrasateko Udala ez bada konfesionala, nik dakidala behintzat?

Arrasateko Udala aipatu dut, baina Euskal Herriko edozein udal aipa nezake, gehienetan gauza bera gertatzen baita: egun seinalatuetan, agintari zibilek parte hartzen dute Eliza Katolikoaren ekitaldietan, kontuan hartu barik udalak ez direla erakunde konfesionalak.

Badakit nondik gatozen, eta badakit, halaber, askotan zaila egiten dela urte luzeetako ohiturak haustea. Baina uste dut ordua iritsi zaiela udalei, eskolei eta gainerako erakunde publikoei (baita futbol taldeei ere), erakunde zibil moduan lan egiteko, aintzat hartuta bere ordezkatuen artean gero eta jende gehiago dagoela beste sinismenak dituena, edo, beste barik, ez duena ezelango erlijiotan sinisten. Denok ordaintzen ditugu berdin zergak edo kuotak, eta denok ditugu eskubide berberak. Beraz, iruditzen zait erakunde publikoek hobe luketela agertuko ez balira inongo elizaren ekitaldietan, herritar guztion errespetuz.

Kategoriak Sailkatugabeak | Etiketak , | Utzi iruzkina

Performance = gintonic

Data: 2010(e)ko uztailaren 2a Egilea: Joxe Aranzabal

Hitzek denbora behar izan dute habia egiteko gure artean, eta kanpotik baldin badatoz, are gehiago. Hori gertatzen ari zaio performance berbari. Ramon anaiak joan den ostiralean egin zuenaren harira, zenbait jendek ez zekien zer izango ote zen performance hori. Inguruan baina, beti dago norbait azalpen egokia duena, kasu honetan bezala, Bergaran gertatua.

Elkartu dira bi lagun, eta batak galdetu dio besteari ea zer den performance bat, Ramonek egingo duen hori, adibidez.
–Hik badakik gintonic bat zerez eginda dagoen?
–Bai: ginebra, tonika, izotza eta limoia.
–Bada performance bat duk gintonica bezalakoa: arte ekitaldi bat, uztartzen dituena artearen hainbat adierazpide, kasu honetan pintura, musika, dantza, arkitektura eta antzezpena.

Atzo gauean entzun nuen, afaltzen ari ginela, eta erosi bezala saltzen dizuet.

Kategoriak Sailkatugabeak | Etiketak , , , | Utzi iruzkina

Zorionak, Ramon!

Data: 2010(e)ko ekainaren 28a Egilea: Joxe Aranzabal

Munibeko gizona, mezuaren berri ematen
Joan den igandea ezkero, banekien “Gau magikoak Munibeko plazan” ikuskizun polita izango zela, baina errealitateak gainditu egin zuen nire aurreikuspena. Giro berezia sortu zen Munibe plazan: gaua, argiak, musika, koreografia, dantzarien jantziak, margolanak, jendea…

Ramon Aranzabal ausartu egin zen ikuskizuna horrela planteatzen, eta asmatu egin zuen bete-betean. Ekainaren 25a ezkero han izan ginen guztiok ikusiko dugu Munibe plaza beste begi batzuekin, artistak erakutsi zigun begiradari esker.

Nahi baduzue orduko argazkiak ikusi, Flickr-en dituzue.

Kategoriak Sailkatugabeak | Etiketak , , , , , | Utzi iruzkina

Gonbidatuta zaudete Munibe plazara

Data: 2010(e)ko ekainaren 25a Egilea: Joxe Aranzabal

Ramon Aranzabal, Andoni Etxebarriarekin
Gaur 22:30ean nire anaia Ramonek
(ezkerrean, Andoni Etxebarriarekin batera) aurkeztuko du “Gau magikoak Munibeko plazan”, ikuskizuna. Bi urtean
gogor egin du lan hau prestatzen, baina dagoeneko dena du gertu:
babesleak hitzartuta, margolanak eginda eta eskegita —bat izan ezik,
hori larunbatean eskegiko da, ikuskizunean erabili eta gero—, dantzak
eta jantziak probatuta, komunikazioa landuta…

Eguraldia soilik ez
dago seguru, baina hondamendi bat gertatu ezean, ikuskizuna egin egingo
da, Ramonek horrela du erabakita, aprobetxatu nahi du-eta udako
solstizioaren lilura.

Joan den igandean Munibe plazan izan
nintzen, Bergaran, orduan egin baitzen lehen probasaiioa plazan bertan
(lehendik Musiraka dantza taldeak hainbat saio egin zituen Osintxun),
eta sinistuta irten nintzen gaur iluntzekoa ikuskizun ederra izango
dela. Osagaiak, behintzat, primerakoak ditu: lekua, ordua, margoak,
istorioa, musika, dantza…


Ramonen ausardia

Egia esan, harrituta
nago Ramonekin, ikusita zelako ur handitan sartu den proiektu honekin.
Atzean geratu da Fagorreko langile hura, deseatzen zegoena erretiroa
noiz hartuko, bere ametsak betetzeko.

2008an erretiratu zenetik, bere energia
guztiak proiektu honetan erabili ditu, eta bide horretan denetik egin
behar izan du: proiektua diseinatu, margolanak pintatu, gidoi bat
idatzi, babesleak bilatu eta haiekin negoziatu, laguntza teknikoa
bilatu, dirua arriskatu, komunikazio lanak egin, antzezleak bilatu,
antzezpenak zuzendu…, eta hori guztia ganoraz eta irribarre batekin.
Hori dok eta, Ramon!

Kategoriak Sailkatugabeak | Etiketak , , , , , | Utzi iruzkina

San Joan sua, Esteñibarren

Data: 2010(e)ko ekainaren 24a Egilea: Joxe Aranzabal

San Joan sua Esteñibarren, Elorrion
Atzo iluntzean Esteñibar baserrian izan ginen –Gazeta auzoan, Elorrion–, azken hamabost urteotan bezala, hantxe igaro genuen-eta San Joan bezpera.

Betiko moduan, Mikel Irizarrek prestatu eta gobernatu zuen sua, baina atzokoan sekula baino ume gehiago izan genituen inguruan, eta horrek are eta bereziago egin zuen ilunabarra, ikusita txikiek zein ondo pasatzen duten horrelako gau magiko batean, kantatzen lehendabizi eta suaren inguruan gero.

Eskerrik asko Esteñibarko jaun-andreei, beste behin ere, gau zoragarria eskaini zeniguten-eta!
tagzaniapaste
Esteñibar baserria, Elorrio map

Kategoriak Sailkatugabeak | Etiketak , , , | Utzi iruzkina

Telebistako berriak, lau minutuan

Data: 2010(e)ko ekainaren 22a Egilea: Joxe Aranzabal

RTVEk ondo
aprobetxatzen du sarean lehenago pantailarako egindako lana. Ikusi,
bestela, zer egiten duen “El Telediario en cuatro minutos” atalean.
Hartzen du, oso-osorik, albistegiaren sarrera, lau minutukoa, eta,
dagoenetan, sareratzen du bere webgunean, telebistakoa eman eta gutxira.

Hala ere, nire gusturako, luzetxo geratzen da. Nik minutu bat kenduko
nioke.

Kategoriak Sailkatugabeak | Etiketak , | Utzi iruzkina

Munilla vs. Arregi

Data: 2010(e)ko ekainaren 19a Egilea: Joxe Aranzabal

Calvino XVI. mendeko Suitzan Castelliorekin nola, halaxe jokatazen ari da XXI. mende hasiera honetan Jose Ignacio Munilla Gipuzkoako gotzaina Joxe Arregi teologoarekin: isilarazi nahi du edo, bestela, Hego Ameriketara bidali.

Hala ere, Castellio bere garaian bezala, Joxe Arregi ausartu egin da ezetz esatera, eta salatu egin du Berria egunkarira bidalitako gutun batean Gipuzkoako gotzainaren jarrera —(koldarra, diot nik), honek ez baitu nahi agindua berak eman, zikindu egingo luke-eta gotzainaren irudi dagoeneko mailatua—, eta hitz egiteko askatasuna eskatzen du. Horren harira, teologo azpeitiarrak zenbait galdera kaleratu ditu, adibidez:

  • Nola liteke Elizan, egiaren izenean, errore teologikoak gehiago pertsegitzea gezurra, harrokeria, handigosea eta diru-gosea baino, pederastia ez aipatzearren?

Ez dakit Iban Zalduak ez ote dion zeharka erantzun galdera horri, atzo nire Facebook-en utzitako ihardespen batean:

  • Eta zer espero daiteke Eliza bezalako egitura jerarkiko, bertikalista eta ez-demokratiko batengandik? Ni harritzen nauena da halakoekin jendea harritzen segitzeak…

Ni ez naiz harritu, baina amorrua sentitu dut eliza ofizialaren jokabideagatik, zelan estali nahi dituen dogma, intolerantzia, eta fanatismoa sekretismoa eta zurikeria erabilita. Eta kasu honetan, Joxe Arregiren adierazpen askatasuna aldarrikatu nahi dut.

Kategoriak Sailkatugabeak | Etiketak , , , | 2 iruzkin