Elgoibarren

Data: 2005(e)ko martxoaren 11a Egilea: Joxe Aranzabal

Atzo Elgoibarren izan nintzen, Barren aldizkariak gonbidatuta. Han, hemezortzi lagunen artean, nire gaixoaldiaz hitz egin nuen, hartarako erabilita liburuaren aurkezpenean prestatutako argazkiak. Ordubete pasatxo izan zen guztira, galde-erantzunak barne.

Banuen gogoa Elgoibarrera joateko, hainbat alditan ezin joana izan bainuen gaixorik egon bitartean. Eta han lagun artean sentitu nintzen: Jasone, Alberto, Imanol, Alex, Pello, Maite… eta beste batzuk. Aurrekoetan bezala, hainbat momentutan isildu egin behar izan nintzen, emozioak hartaratuta. Mahaitik, baina, konturatu niontzen beste batzuk ere halaxe zeudela. Normala, horrelako gaiak jorratzen direnean.

Nik bukatutakoan, Jasonek heriotzaz egin zidan galdera. Eta erantzunaren barruan, kontatu nien anekdota bat —gero konturatu nintzen, etxera bidean— bere garaian ez nuena kontatu.

Pasadizo ahaztua

Valdecillara joan aurretik, Galdakaon izan ginen Bego eta biok, eta Jesus Ojangurenekin hitz egin genuen. Egun hartan lehen aldiz, aipatu zigun mini-alotransplantea, eta gaixoak zer aukera zituen hiltzeko; %15 bat, gaizki gogoratzen ez badut.

Hitz egindakoan, beheko solairura joan ginen, txanda hartzera hurrengo hitzordurako. Jende asko zegoen ilaran. Ni jarri egin nintzen, eta Bego iilaran ipini. Esku artean Patxi Zubizarretaren” liburu bat neukan, Usoa, eta hura irakurtzen hasi nintzen. Baina, halako batean, begira geratu nintzen liburuko azalaren irudi ederrari, eta heriotzaren ideia etorri zitzaidan:

—Eta hiltzen banaiz… nola esango diet nire lagunei eskerrik asko, eta maite ditudala?

Ideia horrek harrapatu, eta tristura mugagabe batek estali ninduen. Orduan konturatu nintzen negarrez ari nintzela, Bego etortzearekin batera. Hura berbetan zetorren, jendetza haren gainean seguru asko, baina berehala konturatu zen ni ez nengoela entzuten.

—Zer gertatzen zaizu, laztana? Patxo bat eman zidan, eta burua ferekatu.

Nola edo hala, kontatu nion zer etorri zitzaidan burura, heriotzaren orduan lagunak eta hurbilekoak nituela gogoan. Garbitu begiak, sartu liburua poltsan, eta abiatu ginen automobilerantz.

Urtebete eta erdi pasata, badaukat erantzun bat orduko galderarentzat: hiltzen banaiz, jakizue izugarri maite zaituztedala, eta betiko eskertuko dizuedala oparitu didazuen adiskidetasuna.

Kategoriak Sailkatugabeak | Etiketak | 2 iruzkin

Kameleoia

Data: 2005(e)ko martxoaren 10a Egilea: Joxe Aranzabal

Herenegun Espainiako Gotzainen Batzarrak ezusteko galanta eman zuen: Rouco Varela alde batera utzi, eta Ricardo Blazquez aukeratu zuen buru aldi berrirako. Lehena belatza omen zen; bigarrena, ordea, usoa. Eta denok pozik, PPkoak izan ezik.

Pentsatzen hasita, berriz, argi geratu da, beste behin, nolako ahalmena duen elizak aldez aldatzeko: gobernuan PP dagoela? Rouco Varela. Sozialistak daudela buruan? Ricardo Blazquez. Eta, ez gaitezen engaina, EAJ dela nagusi? Juan Maria Uriarte. Kontua da beti boterearekin ondo konpontzea. Kameleoiak ez dira trebeagoak.

Kategoriak Sailkatugabeak | Etiketak | Utzi iruzkina

Vanessa eta Begoña

Data: 2005(e)ko martxoaren 9a Egilea: Joxe Aranzabal

Atzo gauean Sorginen Laratza ikusi nuen, zati bat. ETBko bi berriemaile gazte ziren eguneko gonbidatuak: Vanessa Sanchez eta Begoña Cortina. Lehena berriemailea Parisen, eta bigarrena, Londresen.

Bukaeran ezusteko bat eman zieten biei: morrosko bat hurreratu zitzaien, suhiltzaile jantzita. Eta han non hasi zitzaien strip-tease egiten mahai gainean. Begoña Cortinak ez zekien zer egin, eta mutila hurbildu zitzaionean xirri batzuk egin ziezazkion, ematen zuen neska lehertzeko zorian zegoela. Ez zuen ezer esaten, baina haren aurpegiak eta gorputzaren keinuek garbi adierazten zuten disgustura zegoela. Vanessa, ostera, hobeto moldatu zen, umore piska bat erabilita.

Ulertzen dut Begoñaren jarrera, seguru bainago hura ez zela joan programara mutil baten ipurdi olioztatua ferekatzera. Eta pena eman zidan neska hura sufritzen ikusteak…, baina Sorginen Laratzara doanak jakin beharko luke zer aurki lezakeen hor.

Kategoriak Sailkatugabeak | Etiketak | 3 iruzkin

Udaberria

Data: 2005(e)ko martxoaren 9a Egilea: Joxe Aranzabal

Gaur goizean Eskoriatzara iritsi naizenean, hotz egiten zuen fakultateko aparkalekuan: – 2ºC. Zerua, berriz, garbi, eta, han gainean, Kurtzebarri, zuri-zuri. Automobiletik irten eta birigarroaren txioketak hartu nau, alai eta luze. Aurrera egin eta harnasa hartu dut. Eta orduan gogoratu naiz udaberriaz. Datorren seinale ote?

Kategoriak Sailkatugabeak | Etiketak | Iruzkin 1

Mondragoetik bueltan

Data: 2005(e)ko martxoaren 9a Egilea: Joxe Aranzabal

Atzo arte ez nuen jakin izan eztabaida luzatu dela Anjel Lertxundi eta Jose Luis Lizundiaren artean, lehenak idatzitako zutabe baten harira. Irakurria nuen zutabea, eta baita Lizundiaren lehen erantzuna, baina ez atzetik etorri ziren beste biak. Atzo arte.

Egia esan, irakurri nuenean Lizundiaren lehen erantzun hori, pentsatu nuen harrosko zetorrela euskaltzaina. Ez zuen, bada, salatu Lertxundi, oriotarra “asko ezagutzen ez dituen gaietan” sartzen zelako? Bigarren artikuluari, berriz, beste tonu bat dario, baina gurasokeria puntu batekin.

Niri ere, “ez dut blogik irakurtzeko astirik” esanda, hasi zait azaltzen ez dakit noizko erabakia, aurrekariak garbi izan ditzadan. Eskertzen diot Lizundiari ahalegina, baina Euskaltzaindiaren erabakiak gorabehera, nik garbi daukat Mondragoen jaio nintzela, horrela deitzen diotela nire gurasoek, horrela sentitzen dudala nik, eta horrela segituko dudala deitzen, nahiz eta onartzen dudan Arrasate ere hor dagoela.

Kategoriak Sailkatugabeak | Etiketak | Iruzkin 1

Geek

Data: 2005(e)ko martxoaren 8a Egilea: Joxe Aranzabal

Orain denbora asko ez dela, Gari Araolazak harritu gintuen bere blog ederrarekin, Teknosexua, zeinek azpititulu moduan baitauka “geek euskaldun baten memoriak”. Baina zer da berba hori, geek?

Euskaltermen begiratu dut, eta begira zer dioen. Geek: “Internetekin zoratuta dagoena, ahal duen denbora guztia sarean murgilduta ematen duena”. Nahiko definizio neutroa.

Baina beti ez da horrela izan. Begiratu dut beste hiztegi batean, The New Hackers Dictionary, eta hor aurkitu dut beste definizio bat, askoz ere negatiboa: gizartean integratu gabea, kirasduna, eta horrelako beste lore batzuk.

Seguru nago Garik beste definizio bat emango diola hitz horri. Nik, behintzat, ez dut ikusten bera lehen definizioaren barruan, eta are gutxiago bigarrenean.

Kategoriak Sailkatugabeak | Etiketak | 6 iruzkin

Debagoieneko blog komunitatea

Data: 2005(e)ko martxoaren 7a Egilea: Joxe Aranzabal

Jaio berri da Debagoieneko blog komunitatea. Lehendik Faro hau aurkeztu genuen martxoaren 22an, baina joan den ostiralaz gero, sarean dago blog komunitate horren lehen taldea:

  • Piperrautsa. Mikel Irizarrek egingo du, iritzi emailea Euskadi Irratian eta Argian. Mikelek izen bereko zutabe bat du Goienkaria astekarian.
  • Arrosak latan. Leire Kortabarria kazetari oñatiarrak izango du horren ardura. Gustuko du Leirek idaztea, eta blog hau sortu du “espresiobide pertsonal moduan”.
  • Mathiasen kopilotua. Edu Mendibil kazetari bergararrak ipini dio izena blog honi, omentzeko kirol hegazkin batean Moskuko Plaza Gorriraino egin zuen gazte alemaniar hura.
  • Zinema. Antonio Zabalak sortu du blog hau, zinema kritikaria Goienkarian.

Blog komunitate hau Debagoienean sortu da, Goiena.net-ek babestuta, baina asko zor dio Eibar.org komunitateari, hura baita aitzindaria eremu horretan. Gustatzen zait blog berrien itxura, dotorea eta bateratua, bat dator-eta Goiena.net-en irudi korporatiboarekin.

Badakit laster blog gehiago etorriko direla, horretan baitabil Iban Arantzabal buru-belarri. Ea blog komunitate oparoa osatzen dugun!

Kategoriak Sailkatugabeak | Etiketak | Utzi iruzkina

Patxitraperoren pokastiña

Data: 2005(e)ko martxoaren 6a Egilea: Joxe Aranzabal

Joan den ostiral gauean afari-bilera izan genuen geurean. Julen Gabiria etorria zen elkarrizketa bat egitera, eta lanak bukatuta, afari gozoa egin genuen, Julen bera, Mikel Irizar eta Fatima arreba ere tartean zirela.

Kafe orduan, huntaz eta hartaz hitz egin genuen, ordu txiikiak iritsi arte, eta tartean euskal blogosfera izan genuen mintzagai. Eguneko berrikuntza aipatu genuen orduan, “Patxitraperoren lehen pokastiña.”:http://patxitrapero.blogspot.com/2005/03/blogosfera-santua.html Ordenagailua jaitsi, eta entzun egin genuen. Barre ederrak egin genituen, gero! Zorionak, Patxi, eta segi umore horrekin!

Kategoriak Sailkatugabeak | Etiketak | Utzi iruzkina

Esteñibarren, elurretan

Data: 2005(e)ko martxoaren 6a Egilea: Joxe Aranzabal

Elur asko zegoen atzo Esteñibar baserrian, Elorrion. Bazkalostean irristatzera irten ginen, eta gustura ibili ere. Mikel, Miren eta Joxe saiatu ziren aldapan behera, besteok txilioka animatzen genituen bitartean.

Ezkerretik eskuinera, Joxe, Elene txikia, Ima, Miren (prest jaisteko), Bego, Mikel eta Fatima.

Kategoriak Sailkatugabeak | Etiketak | Utzi iruzkina

Non dago Ertzaintza?

Data: 2005(e)ko martxoaren 6a Egilea: Joxe Aranzabal

Aurtengo neguan sei ekaitz izan ditugu, elur ekaitzak alegia, eta baita egun benetan hotzak. Eta ia beti, arazoak izan ditugu Kanpazar mendatea igarotzeko, auto ilara luzeak. Kanpazar ez da mendate garaia edo zaila igotzeko; beraz, zer dela eta halako arazoak?

Ertzaintza garden bihurtu da, ez balego bezala. Orain, elurra hasten denean, inork ez du kontrolatzen nork igo ahal duen eta nork ez, inork ez die esaten kamioizaleei itxaroteko behean, bidea garbitu bitartean ezin izango dutela igo. Eta, noski, inork esaten ez badie ezer, kamioizaleek aurrera egiten dute, nahiz eta gero, zeharkatuta geratzen badira, mundu guztiak jaso kalteak beraien atzean.

Aurten arazo ugari izan ditugu Kanpazarren, bai, baina gehienak izan dira antolakuntza eskasagatik, ez berez elurra tonaka egin duelako. Eta, nire iritzian, Ertzaintzak zerikusi handia izan du horretan.

Kategoriak Sailkatugabeak | Etiketak | Utzi iruzkina