Esnatu, Amorrortu!

Data: 2005(e)ko azaroaren 9a Egilea: Joxe Aranzabal

Zein gogorra den futbol entrenatzaileen bizimodua! Bapo irabazten dute, baina gaur egun ez dute nahikoa futbolaz jakitea; horretaz gain, liderrak izan behar dira, psikologoak, eta… komunikatzen jakin behar dute. Bestela, jendeak barre, herenegun “Maracaná 05”:http://www.cuatro.com/programas/deporte/maracana05/ saioan Jose Mari Amorrorturen kontura egin zuten legez.

Minutu batez-edo, saioko aurkezleek —eta platoan zegoen publikoak— lo itxurak egin zituzten atzeko pantaila erraldoian, Amorrortu hitz egiten ari zen bitartean.

Kategoriak Sailkatugabeak | Etiketak , | 2 iruzkin

53 tako

Data: 2005(e)ko azaroaren 8a Egilea: Joxe Aranzabal

Zorioneko ni. Azaroak 8 ditu gaur, eta badut zer ospaturik. Lehenik, nire urtebetetzea: 53 urte, horietatik hiru, nire bigarren bizialdikoak, alegia, minbizia aurkitu zidatenetik honakoak. Bigarrenik, osasun kontuak: atzo medikuak esan zidanez, dena ondo doa. Eta hirugarrenik, Faroa: nire blogak gaur bete du lehen urtea, iaz sortu bainuen Blogger zerbitzuan.

Bigarren bizialdia

Atzo Valdecillako ospitalean izan ginen, Santanderren, eta betiko medikuak barik, beste batek hartu gintuen, Ana Batlle izeneko emakume gazte batek. Esan zigunez, dena ondo doa.

Halaxe da. Minbizia aurkitu zidatenean 50 urte betetzeko nintzen. Eta harrezkero hiru pasatu dira, hiru urte erregaloz bizi izan ditudanak. Askotan sentitzen dut bigarren bizialdi bat bizitzen ari naizela, bigarren aukera bat. Horregatik, bizi dudan egun bakoitza —urte bakoitza— garaipen bat da.

Osasuna, ondo

Laster beste TAC bat egin beharko dut, eskaner berezi bat, eta sei hilabete barru, ordurako prednisona erabat kendu badut, txerto-egitasmo berezi batean sartu beharko naiz, transplantatuentzat bereziki egina. Horrek esan nahi du txikitan hartutako hainbat txerto —polio, malaria, etab.— berriro hartu beharko ditudala, transplantearen kausaz txikitan hartutakoen eragina erabat ezabatu zait eta.

Bai horixe, urtebete igaro da Faroa lehen aldiz piztu nuenetik, artean Blogger zerbitzuan eta ixilka-mixilka, probak egiteko asmoz. Handik hamabost egunera, ordea, Faroa publiko egin zen, eta, harrezkero, Bloggerren lehendabizi eta Goiena.net blog komunitatean gero, hemen ibili naiz neure penak eta pozak zuekin partekatzen.

Galdetu nion azken txertoaz, linfoma folikularretik babesteko sortutakoaz, eta esan zidan ez didala gomendatzen berau hartzea, ni orain ondo bainago, eta txerto hori gaixotasuna dutenentzat sortu baita. “Ez pentsa, gainera, txerto horiek pagotxa direnik —adierazi zidan—, hedabideetan beti hots handiagoa ematen zaie”.

Faroak, urtebete

Honaino iritsi banaiz, zuei esker izan da. Beraz, bihoakizue nire eskerrik beroena zuei guztioi: familiari, lagunei, lankideei eta irakurleei. Maite zaituztet.

Kategoriak Sailkatugabeak | Etiketak , , , | 17 iruzkin

Plaza-gizonak

Data: 2005(e)ko azaroaren 7a Egilea: Joxe Aranzabal

Orain astebete erosi nuen Donostian Manuel Lasarte bertsolariaren azken liburua: Plaza-gizonak, Auspoa argitaletxeak kaleratua. Asteon irakurri dut, eta ez zait gustatu.

Liburuak jasotzen ditu Manuel Lasarteren 56 artikulu, gehienak idatziak 2000 eta 2002 urteen artean DV egunkarian, non Leitzako bertsolariak zirriborratzen baititu hainbat pertsona ospetsuren biografiak, gehienak herri kirolariak eta bertsolariak.

Euskara aldetik liburuak ez dauka aitzakiarik, baina artikuluek mami eskasa dute. Kasurik gehienetan egileak ez du ia ezer esaten pertsonaien gainean. Joxe Mari Rekondo torero euskaldunari, adibidez, hiru orrialde eta erdi eskaini dizkio, baina denak bukatutakoan gogoekin geratu naiz jakiteko nor zen torero hori, Lasartek hainbeste maite zuena. Basarri bertsolariari buruz ere apenas dioen ezer. Eta horrela, kasurik gehienetan.

Betelana egiten du egileak, eta jeneralidadeak esan (zezenketez, bertsolaritzaz, aizkol jokoen gainean…), datuak eman beharrean. Pena hartzen dut hau esatean, baina azkenerako aspertu egin naiz.

Kategoriak Sailkatugabeak | Etiketak , , | Utzi iruzkina

Cibermedios

Data: 2005(e)ko azaroaren 4a Egilea: Joxe Aranzabal

Prentsa digitalak hamar urte bete ditu Espainian, eta, hori dela eta, zenbait adituk liburu bat atera dute: “Cibermedios. El impacto de internet en los medios de comunicación en España.”:http://e-periodistas.blogspot.com/2005/11/se-publica-cibermedios-un-repaso-diez.html Ramon Salaverriak koordinatu du lan hori, eta Espainiako Hezkuntza Ministerioak ordaindu.

Liburua honako irakasle hauek egin dute: Mª Ángeles Cabrera González, Rosario Calvo Diéguez, Rafael Cores Fernández-Ladreda, Javier Díaz Noci, Manuel Gago Mariño, Antonio Isasi Varela, Moisés Limia Fernández, Xosé López García, Koldo Meso Ayerdi, José Luis Orihuela Colliva, Mª Bella Palomo Torres, Xosé Pereira Fariña, Idoia Portilla Manjón eta Charo Sádaba Chalezquer. Denak irakasleak Malaga, Santiago de Compostela, Nafarroa eta EHU unibertsitateetan.

Liburuak kontuan hartzen ditu, atal batean, zibermedioak euskaraz. Baita blogak ere.

Kategoriak Sailkatugabeak | Etiketak , , , , | 6 iruzkin

Liburu bat blogen gainean

Data: 2005(e)ko azaroaren 3a Egilea: Joxe Aranzabal

Laster ESIC Editorial
argitaletxeak liburu bat aterako da, “Blogs. La conversación en internet que está revolucionando medios, empresas y ciudadanos”, eta hor bost adituk blogak izango dituzte hizpide. Gehiago jakin nahi duenak blogen gainean, hortxe izango du aukera ona.

Honako idazle hauek idatzi dute liburua:

  • Julio Alonso: Blogak eta enpresak.
  • “José Luis Antúnez:”:http://www.ideasapiens.com/blogs/is/ CMSen eragina blogen piztueran.
  • “José Luis Orihuela:”:http://www.ecuaderno.com/ Weblogak eta blogosfera.
  • Juan Varela: Kazetaritza partehartzailea: 3.0 kazetaritza.
  • Octavio Rojas: Blogak eta Harreman Publikoak.

Egileek blog bat sortu dute liburu hau sustatzeko, eta bertan kontatuko dute nola egin duten behar elkarlanean. Horrela irakurri diot Octavio Rojasi.

Nire doktore tesia dela-eta, liburu hau eta beste asko irakurri beharko ditut. Beraz, kaleratzen denean, eskatuko dut.

Kategoriak Sailkatugabeak | Etiketak , , , | Utzi iruzkina

Txertoa linfoma folikularraren kontra

Data: 2005(e)ko azaroaren 2a Egilea: Joxe Aranzabal

Lehendabizi Lierni koinatak esan zidan, eta gero Interneten aurkitu nuen berria, propio bilatuta: Nafarroako Unibertsitateko ikertzaile talde batek txerto bat aurkitu omen du linfoma folikularraren aurka, hau da, nik daukadan minbizi motaren kontra, eta txerto hori hartu duten gaixoen %80 ez omen ditu berriz linfoma berak gaixotu.

Nonbait, froga guztiak egin dira linfoma folikularra bigarrengoz izan duten gaixoekin, eta emaitzak onak izan dira, Maurizio Bendandi doktoreak esan duenez. Txertoak ez omen du kalterik egiten inola ere, eta pertsonalizatua da, “oinarritzen baita proteina batean, zeina ateratzen baitzaio gaixo bakoitzari”. Taldeko eledunek esan dute txertoa kimioterapiarekin batera aplikatzen dela, tratamendua eraginkorragoa izate aldera.

Albisteak dio Espainian urtero 40 urtetik gorako 5.000 pertsona gaixotzen omen direla linfoma folikularrak jota, minbizi mota bat zeinak eragiten baitu linfa sisteman, eta hondatzen baititu gaixoaren defentsak.

Datorren astelehenean Valdecillara noa, kontrola egitea tokatzen zait-eta, eta aprobetxatuko dut medikuari galdetzeko zer dakien albiste horren gainean, eta niretzat eraginik izan lezakeen.

Kategoriak Sailkatugabeak | Etiketak | 2 iruzkin

Steve Jobs-en sekretua

Data: 2005(e)ko urriaren 28a Egilea: Joxe Aranzabal

Steve Jobs Apple konpainiako lehendakaria, eta AEBetako enpresa gizonik karismatikoenetako bat, arabiar baten semea da, Fredric Allan Maxwell idazleak argitaratu duenez Dan Gillmor-en blogean. Jobs-en aita biologikoa Abdulfattah Jandali da, zeina 1952an iritsi baitzen AEBetara Siriatik, 21 urte zituela. Beraz, Steve Jobs da orain arabiar-amerikarrik ospetsuena bere herrian.

Iragan ekainean, horrelaxe kontau zien Steve Jobs-ek Standford Unibertsitateko ikasleei:
Nire ama biologikoa —kontatu zien Jobs-ek berak iragan ekainean Stanford Unibertsitateko ikasleei—, nire ama biologikoa unibertsitate ikasle bat zen, ezkongabea, eta erabaki zuen ni adopzioan ematea jaiotzen nintzenean. Hark nahi zuen ni jasotzen nindutenak unibertsitate lizentziadunak izatea, beraz, dena prest zegoen abokatu batek eta bere emazteak ni jaso nazaten. Baina azken unean otu zitzaien neska bat nahi zutela. Orduan, nire gurasoek, zeinak itxaron lista batean baitzeuden, dei bat jaso zuten: ‘haur bat daukagu, ezustean; nahi duzue?’. Eta haiek, baietz. Nire ama biologikoak baimena eman zuen adopzio hartarako, nire gurasoek ziurtatu ziotenean ni unibertsitatera joango nintzela.

Orduko hartan, Jobs-ek ez zuen aipatu nor zen bere aita biologikoa. Hori orain jakin da garbi, nahiz eta Mona Simpson, Jobsen arreba eta eleberrigile famatuak zerbait adierazi zuen, modu ilun samarrean.

Frederic Allan Maxwell-ek, zeinek idatzi baitu beste liburu bat Microsoft enpresako kudeatzaileari buruz, Bad Boy Ballmer, uste du Steve Jobsen nortasunak —haren adimena, sormena, anbizioa, xarma, egomania, ikonoklasismoa eta arriskuak hartzeko zaletasuna— gehiago zor diela bere guraso biologikoei hazi zutenei baino.

Albiste honen berri Bloglinesen irakurri dut, Dan Gillmor-en blogetik ekarria. Hala ere, klik egin dudanean Gillmor-en blogean, desagertua zen handik, jakin ez zergatik. Horregatik ipini dut goiko argazkia horren frogatzat.

Kategoriak Sailkatugabeak | Etiketak | Utzi iruzkina

Inoizko eleberririk onenak

Data: 2005(e)ko urriaren 27a Egilea: Joxe Aranzabal

Time aldizkariak zerrenda bat argitaratu du, Inoizko 100 Eleberririk Onenak eta hor jasotzen ditu 1923a ezkero ingelesez argitaratu diren nobelarik onenak, Lev Grossman eta Richard Lacayo aldizkariko kritikarien ustez. Horietatik gutxienez 13 euskaratuta daude.

Euskaratuta

Oker ez banabil, 100 eleberri horietatik 13 bat euskaratuta daude; baliteke gehiago ere izatea, denak ez ditut-eta kontrolatzen. Hauek dira:

  • Animal Farm. George Orwell
  • Beloved. Toni Morrison
  • The Big Sleep. Raymond Chandler
  • The Catcher in the Rye. J. D. Salinger
  • The Grapes of Wrath. John Steinbeck
  • The Great Gatsby. F. Scott Fitzgerald
  • Lord of the Flies. William Golding
  • The Lord of the Rings. J. R. R. Tolkien
  • On the Road. Jack Kerouack
  • Red Harvest. Dashiell Hammett
  • The Sound and the Fury. William Faulkner
  • The Spy Who Came in from the Cold. John Le Carré

    Aldizkariak hurrenkera alfabetikoan sailkatu ditu eleberriak. Hala ere, aldizkariko irakurleek egin dute zerrenda bat, eleberririk gogokoenekin.

  • To the Lighthouse. Virginia Wolf

Irakurleen sailkapena

  1. The Grapes of Wrath
  2. 1984
  3. Blood Meridian
  4. Are You There God? It’s Me, Margaret
  5. Lolita

Time aldizkaria baino apalagoa izan behar-eta, nire galdera askoz ere mugatua izango da: zeintzuk dira inoizko 5 eleberririk onenak zuentzat, edozein hizkuntzatan argitaratuak?

Kategoriak Sailkatugabeak | Etiketak | 2 iruzkin

Google Scholar eta doktore tesia

Data: 2005(e)ko urriaren 26a Egilea: Joxe Aranzabal

Zehaztu guran nabil nire tesiaren izenburua. Igandean beste proposamen bat bidali nion doktoretza ikastaroko irakasleari, baina hark erantzun oraindik zehatzago zedarritu behar dudala arazoa.

Orduan Google Scholar zerbitzuaz gogoratu naiz. Izan ere, oraindik orain Googlek berritu egin du zerbitzu hori, zeinek eskaintzen baitu oso bide erraza literatura akademikoa bilatzeko. Tesiak, liburuak, laburpenak eta artikuluak; denetik aurki daiteke hor.

Blog hitza idatzitakoan, Google Scholar-ek hainbat tesi eta artikulu ekarri zidan begi bistara. Horietako batzuen izenburuak idatzi ditut zerrenda batean, ikusteko nondik nora bideratzen duten tesia zenbaitek: erretorika, enpresa, demokrazia, generoa…

Ariketa ona izan da, zerrenda hori lagungarri izango dut-eta, nire tesia zehazteko orduan. Uste dut sarri joko dudala Google Scholar-era tesia lantzen dudan bitartean. Horregatik, lekutxo bat egin diot nire nabigatzailearen barran, gogokoenen tokian.

Kategoriak Sailkatugabeak | Etiketak | 2 iruzkin

Aurkezpenak PDF formatuan

Data: 2005(e)ko urriaren 25a Egilea: Joxe Aranzabal

Asteburu honetan lehen aldiz, aurkezpen bat prestatu dut Keynote programa erabilita, Powerpoint bezalako programa bat, Applek atera zuena orain pare bat urte. Gustura aritu naiz berorrekin jolasean, eta gustura geratu emaitzarekin.

Ordea, nahi izan dudanean Powerpointera esportatu, beste lankide batzuei bidaltzeko, ezin. Baina orduan konturatu naiz banuela beste irtenbide bat, eta ona: aurkezpena PDF formatuan gordetzea. Pentsatu eta egin.

Nire laneko ordenagailuan ez daukat Keynote, ez eta programa horrekin aurkezpena egiteko erabili ditudan letratipoak. Hala ere, eta PDF formatuari esker, nire PCan berdin-berdin ikusi dut aurkezpena, xehetasunik galdu gabe. PDF formatua izugarri baliagarria da horretarako. Hemendik aurrera, badakit.

Kategoriak Sailkatugabeak | Etiketak | Utzi iruzkina