Garirekin hizketan, Skype bidez

Data: 2007(e)ko maiatzaren 31a Egilea: Joxe Aranzabal

Aspaldiko partez, Skype piztu eta azken bertsioa instalatu dut. Berehala, konturatu naiz Gari Araolaza konektatuta zegoela, eta deitu egin diot. Harrituta geratu naiz bere aurpegia ikusi dudanean bideo konferentzian, sekulako kalitatearekin. Zoritxarrez, nik ezin nion entzun, ez dakit zergatik, baina berak niri bai. Beraz, nik berari berba egin, eta berak niri txateatu. Horrela ibili gara.

Esan diot sekulako ilusioarekin jarraitzen ari naizela bere eta Luistxoren bidaia AEBetan, Kalifornian baitabiltza Tagzania aurkeztu, harremanak egin eta ahal dutena ikasten. Gustura omen dabiltza, baina logurak jota, jet lag madarikatuak eraginda. Ahal baduzue, irakurri bai Garik Teknosexuan eta baita Luistxok Ingelesen Hilerrian idazten ari diren kronikak. Cheerio!

Kategoriak Sailkatugabeak | Etiketak , , , | 4 iruzkin

Sakelako telefonoa Mirenentzat

Data: 2007(e)ko maiatzaren 30a Egilea: Joxe Aranzabal

Ekainaren 15ean Miren alabaren urtebetetzea izango da, eta erabaki dugu sakelako telefono bat oparituko diogula. Sasoi batean segapoto bat eskatu zigun, eta beste aldi batean Wii joko bat.

Orain arte ezetz esan diogu, baina gu ere konturatu gara tramankulu horiek bere garaiko baliabide sozial indartsuak direla, eta, guk geure sasoian komikiak-eta zelan, berak ere ikasi beharra duela baliabide horiek erabiltzen, jolaserako eta harremanetarako. Nahi dugu, halaber, ikas dezan zelan kudeatu telefonoaren kostoa, horren zati bat bere kontura joango da-eta.

Kategoriak Sailkatugabeak | Etiketak , , | 6 iruzkin

Koalizioa

Data: 2007(e)ko maiatzaren 29a Egilea: Joxe Aranzabal

Koalizio garaia iritsi zaigu. Alderdi politikoek hitzarmenak egin beharko dituzte elkarren artean, alkatetzak eta gobernuak osatzeko. Baina zer da koalizioa?

Hiru definizio
Hona bizpahiru definizio koalizioari buruz:

  • Euskal Hiztegia: Liga, hitzarmena, elkartea, alderdi politikoena edo estatuena bereziki.
  • Wikipedia: koalizio bat da aliantza bat erakundeen artekoa, eta aliantza horrek dirauen bitartean, kideek elkarlanean dihardute, bakoitzak bere interesean. Era horretako aliantza izan daiteke behin behinekoa edo komenientzien araberakoa. Horrela, koalizioa eta ituna bestelakoak dira oso.
  • Elections Act (Australia): koalizioa da aliantza edo elkarte bat alderdi politikoen artekoa, eta egiten da ziurtatzeko gehiengo bat legebiltzarrean.

Kategoriak Sailkatugabeak | Etiketak | Utzi iruzkina

Bi elkarrizketa Hezkuntza Telebistan

Data: 2007(e)ko maiatzaren 28a Egilea: Joxe Aranzabal

Josi Sierra pedagogoak hainbat elkarrizketa argitaratu ditu Hezkuntza Telebistan, horietako bi niri egindakoak maiatzaren 10ean, biok Donostian ginela, Informatikari Euskaldunen Bileran. Batean nire gaixotasunaren gainean hitz egiten dut, eta bestean komunikazioari buruz. Bietan, Alberto Agirreazaldegi ari da kazetari lanak egiten, bera izan baitzen Josi eta bion arteko zubia.

Hezkuntza Telebista
Hezkuntza Telebista & Blogak (HTB) proiektu berria eta berritzailea da, eta erakutsi nahi ditu eskolan egiten diren bideoak. Partekatu nahi ditu hezkuntzan sortu, erabili eta ikusgarri diren bideoak, eta horretarako erabiltzen ditu Web 2.0k eskaintzen dituen tresnak.

Kategoriak Sailkatugabeak | Etiketak , , , | 2 iruzkin

Kamerafonoak 10 urte bete ditu

Data: 2007(e)ko maiatzaren 23a Egilea: Joxe Aranzabal

Laster hamar urte beteko dira Philippe Kahn gazteak sortu zuela sakelako telefono kameraduna, kamerafonoa. Atzo Associated Press agentzian Kahn-ek berak zioenez, “tramankulu hark sekulako eragina izan zuen, oso erosoa delako. Jatetxe batera baldin bazoaz, eta urtebetetze bat ospatzen ari badira, konturatuko zara bat baino gehiago kamerafonoa atera eta argazkiak egiten hasiko direla. Itzela da”.

AEBetako etxeen %41ek badaukate kamerafono bat gutxienez, eta nekez aurkituko duzu kamerarik bako sakelakorik, diote adituek. Gartner etxeak, bestalde, aurreikusten du 2007an 589 milioi kamerafono salduko direla eta 2010erako, 1.000 milioi.

Kategoriak Sailkatugabeak | Etiketak , | Utzi iruzkina

Goienkaria, eredu

Data: 2007(e)ko maiatzaren 22a Egilea: Joxe Aranzabal

Goienkaria, ikasgai      

Miren alabaren liburu bati begiratzen nenbilela, Euskara 6 Eleketan, Haritza argitaletxearena, hara non aurkitu dudan Goienkaria darabilela egunkarien ezaugarriak azaltzeko, Goiena Komunikazio Taldeak ostiraletan kaleratzen duen astekaria. Poztu naiz, Goienkaria euskarazko prentsaren adibide bikaina delako.

Kategoriak Sailkatugabeak | Etiketak , | Iruzkin 1

Peaceful soldadua

Data: 2007(e)ko maiatzaren 21a Egilea: Joxe Aranzabal

Orain hiru bat hilabete erosi nuen liburu hau, Peaceful soldadua, baina orain heldu diot, ezin gusturago, bikain idatzita baitago, eta halatsu euskaratua.

Peaceful anaien historiak hunkitu egin nau, bai beren herriskan igarotako pasarteak nola Belgikan gertatutakoak, Lehen Mundu Gerraren erdian. Bukaera aldera, Johnny cogió su fusil etorri zait burura, film hura bezala, eleberri hau ere gerraren kontrako aldarri ozena baita, nahiz eta biak oso bestelakoak diren. Ahal baduzue, irakurri.

Kategoriak Sailkatugabeak | Etiketak , | Utzi iruzkina

Tintin eta Milou

Data: 2007(e)ko maiatzaren 17a Egilea: Joxe Aranzabal

Albiste hau irakurtzen ari nintzela, alegia Spielberg eta Jackson zinegileek bat egingo dutela Tintinen gaineko film bat egiteko, gogora etorri zait noiz izan nuen Tintinen berri lehen aldiz. Saturraranen izan zen, hango apaizgaitegian. Astean behin, oker ez banabil, hango zine areto txikian elkartzen ginen ikasle guztiak, eta zinea barik, diapositibetan ikusten genituen Tintin eta Milouren abenturak. Frantsesez idatzita zeuden, eta Pablo Areso irakasleak itzultzen zizkigun gaztelaniara, sekulako graziarekin. Une gozoak izaten ziren haiek.

Kategoriak Sailkatugabeak | Etiketak , , | 3 iruzkin

Internetek, irakurketa areagotu

Data: 2007(e)ko maiatzaren 16a Egilea: Joxe Aranzabal

Askotan kontrajartzen dira Internet eta liburuak, Internet eta egunkariak, Internet eta irakurketa. Denak, berriz, ez datoz bat konparazio horrekin, adibidez, Jason Calacanis, Interneteko enpresario eta blogari ezaguna. Atzo La Vanguardiak egindako elkarrizketan horrela zioen:

  • “Internetek lortu du denok irakur eta idatz dezagun sekula baino gehiago”.

Merezi du elkarrizketa irakurtzea eta osteratxo bat egitea haren blogean.

Kategoriak Sailkatugabeak | Etiketak , , , | 2 iruzkin

Zozoa

Data: 2007(e)ko maiatzaren 15a Egilea: Joxe Aranzabal

Egun hauetan ari naiz gozatzen batik bat zozoen kantuarekin. Goizean goiz, gure teilatuen gainean jartzen dira, eta sekulako kontzertua eskaintzen digute. Iluntzean, beste horrenbeste. Baina bai fakultatean eta baita beste edonon ere, kantu betean sentitzen ditut. Bejondeiela!

Kategoriak Sailkatugabeak | Etiketak | 2 iruzkin