Joan den astean Miren alaba eta bere ikaskideak Sukarrietan izan ziren, astebetez beste modu bateko ikasketak egiten, askoz ere lotuagoak izadiarekin. Pozik etorri zen bueltan, han lagun asko egin zuelako.
Bere ikaskide batzuek, gainera, blog bat egin zuten, Sukablogariak, eta hor ikusten da zelako lanak egin dituzten Sukarrietan. Zorionak irakasleei eta baita blogari gazteei ere. Oso lan txukuna egin dute.
Horra “8. probintzia“ irratsaioaren 24. saioa. 2008ko martxoaren 9an egin dugu Euskadi Irratian, Amarauna saioan.
Edukiak
Saio honetan, honako gai hauek jorratu ditugu:
Miarritzera joan behar nintzen bazkaltzera, atzo zozketa bat irabazi bainuen gaurko, baina bidaia bertan behera utzi, eta nire jaioterrira joan naiz goiz erdian. Atzoko atentatuaren ostean, premia nuen elkartasuna adierazteko herriko sozialistei.
Hara joan aurretik, arretaz irakurri ditut Imanol Muruaren eta Anjel Lertxundiren zutabeak Berria egunkarian. Tamalez, ezin dut loturarik egin ez batarekin, ez bestearekin. Baita Katixa Agirrek eta Hasier Etxeberriak beren blogetan idatzitakoak. Bizirik gaude, pentsatu dut, herri honetan oraindik badago kemena horrelako basakeriei erantzuteko.
Behin Mondragoen, autoa Bizkaia etorbidean utzi dut, pentsaturik herri barruan ezingo nuela beste inon utzi. Handik oinez joan naiz plazarantz. Zarugalde ia hutsik zegoen. Arbolapetan, betiko joan-etorria, baina ezer berezirik ez. Zurgin kantoian bai igartzen zen mugimendu handiagoa, batez ere parrokia inguruan. Eta handik behera egin dudanean, Erdiko kaletik plazarantz, zer zen hura: furgonetak, antena paraboliko itzelak, kiosko bat telebista kameralarientzat… eta jende piloa udaletxerantz begira.
Garaiz nenbilen, eta Elkar liburu dendan sartu naiz, denbora egiteko. Irten naizenerako, Erdiko kale anabas hutsa zen: furgonetak, autoak, oinezkoak… Udaletxerantz egin dut, eta arkupetan itxaron dut, atari nagusiaren ondoan. Kazetariak eta bizkarzainak, trumilka. Eta militante sozialista batzuk, triste. Halako batean, agintariak eta ordezkari politikoak jaisten hasi dira. Aurpegi ezagunak, eta flashak lan etengabean.
Ismael besarkatu dut, eta Paco agurtu, Arrasateko militante sozialistak. Durduzatuta ikusi ditut, noraezean moduan, eta hunkituta. Halako batean, isiltasuna egin da plazan, eta hantxe egon gara, hamar bat minutuz. Alderdietako ordezkari asko zegoen han, baina mondragoetar gutxi esango nuke, batez ere sozialistak ez diren mondragoetarrak. Halako batean, txaloek hautsi egin dute isiltasuna, eta orduan alde egin dut, autorantz.
Zelan idatzi Interneten, horixe ari nintzen azaltzen ikasleei gaur arratsaldean. Saioaren erdian, atsedenaldi labur bat egin dugu, eta orduan jakin dut, ikasle batzuek esanda, PSE-EEko zinegotzi ohi bat hil dutela Mondragoen, tirokatuta.
Ez nuen ezagutzen Isaias, baina, lerro hauen bidez, nire besarkadarik sentikorrena eman nahi diot bere familiari. Baita Paco Garcia eta Arrasateko talde sozialistari ere. Isaias hil dutenei, berriz, nire mespretxurik handiena.
Azaltzen diedanean nire ikasleei zelan
txertatu argazki bat blogean, esplikatzen diet Flickr zerbitzuan
kopiatu beharreko HTML kode puska ezin dela itsatsi blogean, aurretik
ez bada hango testua HTML bihurtu, “ezin baitira nahasi sagarrak eta
legarrak”.
Hori behin eta berriro aipatzen diet, eta ikasleek barre egiten
dute, ateraldi bitxi bat bailitzan, baina nago horrek berak laguntzen
diela egin beharrekoa hobeto ulertzen.
Hona hemen zerrenda bat, zer erreminta eta webgune erabiltzen dudan gehien, Web 2.0 erakoak. Astean behin, gutxienez, hor nonbait. Ikusi dut Tech Crunch webguneak urtez urteko konparazio bat egiten duela, eta erabaki dut, nik ere horrelako zerbait egin dezakedala. Hurrenkera alfabetikoan jarri ditut:
G ugari agertzen da hor, Googlen aplikazio asko. Badakit, eta hanka-sartze bat izan daiteke Googlen hainbeste aplikazio erabiltzea, baina hain ondo dabiltza, eta hain erosoak dira…!
Artikulu interesgarria irakurri dut SuccessCREEations webgunean, bai Hillary Clinton eta baita Barack Obama lehendakarigaiek zelan erabili dituzten hedabide sozialak beren kanpainetan. Konparazio horretan Barack Obama irten da irabazle, garbi.
Egileak aukeratu ditu hainbat hedabide sozial, eta alderatu du zelan erabili dituzten hautagai demokrata biek.
Bloga
Irabazlea Obama da. Egilearen iritziz, Obamaren taldeak ahalegin handiagoa egin du blogean, eta horrek trafiko eta partehartze handiagoa erakarri du haren blogera. Ez batak ez besteak ez dute idazten beren blogetan, baina Obamaren taldeak egunean 30 bat mezu argitaratzen ditu, bost lagunek sinatuak. Clintonek, aldiz, bost mezu eguneko, pertsona berak idatziak.
MySpace
Irabazlea: Hillary. Clintonen profilak ditu 44.353 lagun eta 8.276 iruzkin. Obamarenak, aldiz, 22.467 lagun eta 1.520 iruzkin. Obamak eduki gehiago izan arren, Clintonek babes handiagoa du hemen.
Facebook
Irabazlea: Obama. Illinoisko senatariak 641.042 laguntzaile ditu hor, eta 90.723 mezu. Hillaryk, berriz, 125.114 laguntzaile eta 89.321 mezu. Harrigarria badirudi ere, hemen Obamak eduki gutxiago eskaintzen du, nahiz eta bere kanpainak lan hobea egin duen Facebook-eko komunitatearekin bat egiteko orduan.
Twitter
Irabazlea: Obama. Ez seguruenik oso lan ona egin duelako, baizik eta aurkariaren lan eskasagatik. Obamaren kontuak 6.661 jarraitzaile ditu, 73 eguneratze egin ditu, eta beste 6.793 konturen jarraipena egiten du. Hillaryren kontuak, ostera, 958 jarraitzaile ditu, 47 eguneratze egin ditu, eta ez du inoren jarraipenik egiten.
Ondorioak
Egilearen iritziz, hedabide sozialak oso lagungarri izan daitezke edozeinen mezua plazaratzeko. Obamaren taldeak horrela ulertu du, eta txertatu ditu hainbat baliabide bere marketin estrategian. Horrek eraman du Obama ezezagun izatetik faborito nagusi izatera. Alderantziz, Clintonen taldeak atxiki dio komunikazio estrategia tradizionalari, non hedabideak manipulatu egiten baitira hautagaiaren mesedetan.
Artikulu horrek oihartzuna izan du Social Media webgunean, eta hor ere Obama ikusten dute lehendakarigai egokiagoa, hedabide sozialak beste modu batean darabiltzalako:
Horra “8. probintzia“ irratsaioaren 24. saioa. 2008ko martxoaren 2an egin dugu Euskadi Irratian, Amarauna saioan.
Edukiak
Saio honetan, honako gai hauek jorratu ditugu:
Adobek orain dela gutxi atera du Adobe AIR behin betiko bertsioan. Software horrekin, garatzaileek hainbat erreminta sortuko dituzte, posible egingo dutenak hainbat aplikazio on line eta off line erabiltzea. Alegia, Interneten konektatuta edo konektatu barik egonda. Horrek aldaketa handiak ekar ditzake, zelan darabiltzagun sareko aplikazioak, eta hori hobeto ulertzeko, begira dagoeneko zelakoak diren aplikazio horietako zenbait, garatzaileek moldatuak Adobe AIR horren beta bertsioa erabilita, iazko ekainean plazaratu baitzen.
Informazio gehiago aplikazio hauen gainean, GO2WEB2O blogean.
Bart gauean aurkitu dut irrati hau, eta iruditzen zait zeresan handia emango duela. Finetune deritzo, eta denetik du: berez da sareko aplikazio bat, iTunes ere uztartzen du, Facebook eta Wii bezalako tokietan jo daiteke, eta, jakina Finetune AIR aplikazioa du, ordenagailuaren mahaigainerako. Horrekin, erabiltzaileak ez omen du zertan Interneten egon musika entzuteko, aplikazioak sinkronizatu egiten baitu musika guztia nor bere ordenagailuarekin.
Bertan izena emanda, lehen zerrenda egin dut, 45 abestiz osatua. Abeslari bakoitzagandik hiru abesti aukera daitezke. Eta, halako batean, nekatuz gero abestiak aukeratzen, aplikazioak botoi bat du, I’m lazy, hor klik egin, eta berak osatuko du zerrenda, erabiltzaileak ordura arte erakutsitako musika joeretan oinarrituta. Saiatu naiz euskal abeslariak edo musika taldeak bilatzen Finetune horretan, baina oraingoz ez dut bat ere aurkitu.
Off line ere bai
Behin zerrenda sortuta, instalatu egin dut Finetune Air nire ordenagailuaren mahaigainean, eta itzali egin dut Firefox. Piztu Finetune Air nire mahaigainean, eta hortxe zeuden abesti guztiak, nahiz eta ni konektatuta egon ez Internetera. Zoragarria!
Nahi baduzue entzun nire lehen musika zerrenda, hementxe duzue, Faroan txertatuta, eskuineko zutabean. Klik egin play botoian, eta entzun.
