Agur Bloglines, ongi etorri Reader

Data: 2008(e)ko abuztuaren 25a Egilea: Joxe Aranzabal

Bizpahiru urtez ibili naiz Bloglines informazio batzailea erabiltzen, baina orain pare bat hilabete kontu bat ireki nuen Google Reader batzailean, probatzeko. Eta behin probatuta, erabaki dut hemendik aurrera Google Reader erabiliko dudala, arrazoi nagusi batengatik: Google Reader-ekin denbora aurreratzen dut, informazioi iturriak bizkorrago bistaratzen ditut-eta, batez ere feedak modu laburtuan jasotzen ditudanean.

Kategoriak Sailkatugabeak | Etiketak , | 5 iruzkin

Ukiezinak

Data: 2008(e)ko abuztuaren 20a Egilea: Joxe Aranzabal

The world is flat liburuan, Thomas L. Friedman kazetariak ukiezinak aipatzen ditu, mundu lau batean lana bermatuta izango luketenak, horien lana ezingo bailitzateke automatizatu, aldatu edo eraman munduko beste toki batera, beste batek hobeto edo merkeago egin lezan. Eta ukiezinen artean “jende berezia” aipatzen du, hala nola Michael Jordan, Madonna, Elton John eta J.K. Rowling. Merkatu global bat dute euren lanetarako, eta soldata globalak jasotzen dituzte.

Berehala pentsatzen jarri naiz ea Euskal Herriak ote duen horrelako jende berezirik ukiezinen artean, eta izen hauek etorri zaizkit gogora: Iñaki Lopez de Arriortua, Bernardo Atxaga, Pedro Miguel Etxenike, Miguel Indurain, Rafael Moneo eta Koldo Saratxaga.

Kategoriak Sailkatugabeak | Etiketak | Utzi iruzkina

Bilatzaile optimizatzaileak

Data: 2008(e)ko abuztuaren 19a Egilea: Joxe Aranzabal

Teknologia berriak lanbide berriak ari dira sortzen etengabe. Adibidez, bilatzaile optimizatzaileak.

Horien lana da aztertzea etengabe bilatzaile handienek (Google, Yahoo! eta MSN, besteak beste) zer algoritmo darabiltzaten bilaketen emaitzak sortzeko, eta ondoren diseinatzea marketin eta web estrategiak, kokatzeko nor bere konpainia sailkapenen goi mailan. Bilatzaile optimizatzaileen lanak eskatzen du sintesi bat matematika eta marketinaren artean.

Zergatik izan daitezke garrantzitsuak bilatzaile optimizatzaileak? Eman dezagun liburuak erosi nahi dituzula. Beraz, Googlera zoaz, eta bertan idazten duzu “books”. Hor agertuko zaizkizu Barnes & Noble eta Amazon, besteak beste. Baina lehendabizi agertzen denak aukera gehiago izango ditu zure arreta jaso, eta bertan eros dezazun. Eta hori milaka aldiz errepikatzen bada, dirutza ederra izan daiteke enpresarentzat.

Hala ere, Shari Thurow adituak dioen moduan, hobetu nahi izanez gero webgune baten sailkapena bilaketen emaitzetan, modurik onena da eskaintzea eduki eta produktu baliagarriak.

Kategoriak Sailkatugabeak | Etiketak , | Utzi iruzkina

Lurra laua da

Data: 2008(e)ko abuztuaren 18a Egilea: Joxe Aranzabal

Begoña arrebaren etxean izan naiz hiru egun, eta han nengoela, liburu bat aurkitu nuen, La tierra es plana, justu egun batzuk lehenago nik erositako beste baten itzulpena: The world is flat.

Hasi nintzen irakurtzen, eta harrapatu egin ninduen, oso ondo idatzita baitago. Liburu horretan Thomas L. Friedman kazetariak —The New York Times egunkarian idazten du nazioarteko arazoez— azaltzen du teknologia berriek zelan zelaitu duten mundua, gaur egun gero eta jende gehiagok du-eta aukera lana edo informazioa partekatzeko munduko beste edozeinekin.

Beraz, lehen 150 orrialdeak gaztelaniaz irakurri nituen. Orain, ostera, ingelesez ari naiz, etxeko alea irakurtzen. Lehen aldia izango da, seguruenik, liburu bera bi hizkuntzatan irakurtzen dudala irakurraldi berean, kasu honetan zati bat gaztelaniaz eta bestea ingelesez.

Kategoriak Sailkatugabeak | Etiketak , , | Iruzkin 1

Emakumea bere bakardadean

Data: 2008(e)ko abuztuaren 12a Egilea: Joxe Aranzabal

Maribel Moreno txirrindulari espainiarrak positibo eman du Pekinen. Bakarrik geratu da, horrelakoetan gertatzen den bezala. Thriller askotan bezala, agente sekretu bat harrapatzen dutenean: prestatu eta bidali dutenek ez dute ezagutzen.

Kasu honetan ere, txirrindularia prestatu eta bidali zutenak berehala agertu dira kazetarien aurrean deitoratzeko kirolari espainiarraren jarrera. Estatua, federazioa, agintea lanean jarri dira, Espainiaren izen ona bermatzeko.

Bergauza egin dute Samuel Sanchez eta Contador txirrindulariek, nola bere garaian egin zuten Ullrich, Riis eta beste askok, aitortu aurretik eurak ere dopatu egin zirela. Etsigarria.

Kategoriak Sailkatugabeak | Etiketak , , , | 3 iruzkin

Arandigoien

Data: 2008(e)ko abuztuaren 9a Egilea: Joxe Aranzabal

Arandigoien
Aste honetan hiru egun igaro ditugu Arandigoienen, Nafarroan. Villatuerta ondoan dago Arandigoien, Lizarratik lau bat kilometrora. Gauak Arandigoien ostatuan egin ditugu. Egunez, berriz, Villatuertako igerilekura edo Lizarrara joan gara, gure lagunekin batera. Egun politak izan dira, beroak eta lasaiak.

Kategoriak Sailkatugabeak | Etiketak , , | Utzi iruzkina

Bost urte transplantea egin zidatenetik

Data: 2008(e)ko abuztuaren 5a Egilea: Joxe Aranzabal

2003ko uztailaren 29an, goizeko 10:30ean, hezur muinaren transplantea egin zidaten Valdecilla Ospitalean, Santanderren. Ordu erdi bat iraun zuen transplanteak: tarte horretan, Fatima arrebak emandako hiru poltsa zelula sartu zidaten kateter bat erabilita.

Bost urte igaro dira harrezkero —garai hartan linfoma folikular bat tratatzen ari zitzaizkidan, odoleko minbizi mota bat—, eta gaur egun bizimodu normala egiten ari naiz. Egun batzuk berandu konturatu ginen bosgarren urteurrena zela, baina ohartu bezain laster, kopa bana txakolin edan genuen urteurrena ospatzeko.

Kategoriak Sailkatugabeak | Etiketak , , | 5 iruzkin

Bost egun Londresen

Data: 2008(e)ko uztailaren 28a Egilea: Joxe Aranzabal

Tower Bridge atzean dugula

Uztailaren 20an Londresera abiatu ginen Bego emaztea, Miren alaba eta hirurok, bost egunerako. Primeran ibili ginen: eguraldi ona, leku zoragarriak, bestelako janariak…

Metroa ibili genuen batetik bestera joateko. Baita autobus ireki bat eta itsasontzi bat Tamesis ibaian ibiltzeko. Eta hankak, hainbat kilometro egin genituen-eta oinez. Hiru gauzak eman didate atentzioa bidaia honetan:

  • Garraioa. Ezin hobeak, batez ere metroa eta trenak, lotura egiteko aireportuekin.
  • Kartelistika. Bikaina. Oso zaila da metroan edo aireportuetan galtzea, dena oso ondo seinalatuta baitago.
  • Turismoa. Londres Disneylan handi bat bihurtu da, ikuskizun piloarekin.

Nire lehen bidaia izan da atzerrira, gaixotu ondoren. Banuen, bada, ilusioa Londresera joateko, azkenengoz 2000.ean izan ginen-eta han. Mirenentzat, berriz, lehen aldia zen, eta primeran pasatu du. (Argazkia: Miren Aranzabal)
 

Kategoriak Sailkatugabeak | Etiketak | Utzi iruzkina

El Dr. Jekyll y Mr. Hyde

Data: 2008(e)ko uztailaren 21a Egilea: Joxe Aranzabal

Aspalditik daukat etxean Dr. Jekyll eta Mr. Hyde, Robert Louis Stevenson idazlearen eleberri txikia euskaraz, eta hainbat aldiz ahalegindu banaiz ere berau irakurtzen, sekula ez naiz iritsi 12. orrialdetik harago: itzulpenak, letratipoak, eta testuaren lerroarteko eskasak atzera eragin didate beti.

Aurreko batean, berriz, Donostian nintzela, El Dr. Jekyll y Mr. Hyde ikusi nuen, Alianza argitaletxeak paratua, eta erosi egin nuen. Ostiralean hartu nuen esku artean, eta larunbaterako irentsia nuen. Atsegin handia izan dut liburu hori irakurtzen.

Lerro hauek irakurtzen dituzuenerako, Londresen izango naiz, eta aukera izango dut berriz ikusteko Soho, Regent’s Park eta beste hainbat leku, eleberrian agertzen direnak. Izan ontsa.

Kategoriak Sailkatugabeak | Etiketak , , | 3 iruzkin

Tio Patxi hil da

Data: 2008(e)ko uztailaren 17a Egilea: Joxe Aranzabal

Atzo hil zen tio Patxi Arrasateko Ospitalean, 100 urte eta bi hilabete zituela. Justu hil zen Ramon anaia eta biok bera bisitatzera joatekoak ginen egunean. Bera zen zaharrena zazpi neba-arrebaren artean, tartean gure aita zena; maiorazkoa, beraz, eta baserrian egin zituen bere bizitzako urterik gehienak, harik eta Angiozartik Bergarara jaitsi zen arte bizi izatera, Jesusa alabarekin.

Aguleta baserrira joaten ginen bakoitzean (Argulaeta, Euskaltzaindiaren arabera), beti etxean sentiarazi gintuen. Gizon ona zen. Aranzabaldarroi geratzen zitzaigun patriarka. Gugan bego.

Kategoriak Sailkatugabeak | Etiketak , | Iruzkin 1