Horra “8. probintzia“ irratsaioaren 7. saioa. Urriaren 28an egin dugu Euskadi Irratian, Amarauna saioan.
Edukiak
Zazpigarren saioan honako gai hauek jorratu ditugu:
Eusko Ikaskuntzak Jakiunde sortu du, “maila goreneko erakunde aholkularia”, eusko inteligentziaren Olinpo moduko bat. Zorterik onena opa diot, baina irudipena dut ez ote den beste erakunde bat, bat gehiago, XIX. mendeko eredura sortua, pentsaturik herri bateko eliteak bakarrik atera dezakeela aurrera herri hori.
Gure garaian jerarkiak ez dira desagertu, jakina, baina teknologiak, demografiak eta ekonomia globalizatuak aldaketa sakonak ekarri dizkigute, eta sortzen ari dira produkzio molde berriak, eta horiek oinarrituta daude komunitatean, elkarlanean eta autoantolaketan, eta ez jerarkian eta kontrolean. Horri deritzo wiki moldea, eta horrela sortu dira Linux eta Wikipedia, mundu osoan erabiliak, eta horrela sortu da gure artean Euskalbar.
Wiki moldean, konektatuta dauden milaka lagunek parte har dezakete berrikuntzan, aberastasunaren sorkuntzan eta gizartearen garapenean, halako moldez non garai batean amestu ere ez genuen egiten. Horregatik, XXI. menderako nik nahiago wiki moldea.
Sarean ipini dut orain astebete HUHEZIn aurkeztu nuen txostena, Aurki.com informazio batzailearen gainekoa. Baita egun hartan erabili nuen aurkezpena ere. Hemen aurki ditzakezue:
Mila esker zuen erantzunekin lagundu zenidaten guztioi, txosten horretako zenbait atal egin baititut Aurki.com-eko erabiltzaileek emandako erantzunei esker.
Webgunea eta bloga ditu Bernardo Atxagak Interneten, txukun askoak, gainera. Hemendik aurrera, Atxagari buruz zerbait zehatza jakin nahi dugunean, Atxaga.org webgunera jo besterik ez dugu izango. Baina zelakoa da Atxaga blogaria?
Zuhur abiatu da Bernardo Atxaga blogari gisa, eta ulertzekoa da. Seguru nago medioa hobeto ezagutu ahala, eta konfiantza hartzen duen neurrian, hasiko dela beste zenbait baliabide erabiltzen. Ongi etorri, Bernardo, euskal blogosferara!
Larunbatean izan nuen Befunky aplikazioaren berri, eta orduan bertan eskatu nuen gonbita bat, erreminta probatzeko, izena eman aurretik gonbita bat jaso behar baita. Nik biharamonean jaso nuen. Hauxe duzue nire lehen lana Befunky aplikazioan. Flickr-etik hartu nuen argazki hau, eta eraldatu egin nuen, komiki baterako-edo. Bertan Gari eta Luistxo agertzen dira, blogari eibartarrak.
Befunky oso erraza da erabiltzen, eta emaitza harrigarriak lor daitezke berarekin. Jostagarria eta entretenigarria da, oso. Ahal baduzue, probatu.
Horra “8. probintzia“ irratsaioaren 6. saioa. Urriaren 21ean egin dugu Euskadi Irratian, Amarauna saioan.
Edukiak
Seigarren saioan honako gai hauek jorratu ditugu:
Nahi baduzue zuen seme-alaben ingelesa etxean landu modu entretenigarrian, harpidetu Sesame Street kanalera Miro telebistan, eta 5 minutuko saioak jaitsiko dituzue, jeneralean gai baten ingurukoak, eta oso modu erakargarrian landuak. Konturatu barik, txikiek hiztegia eta ahoskera landuko dute.
Irakasle zaretenek, bestalde, beste horrenbeste egin dezakezue ikastetxeko ordenagailuetan.
Bai. Atzo aurkeztu nuen HUHEZIn Aurki.com informazio batzailearen gaineko ikerlana, eta epaimahaiak bikain eman zidan. Hala ere, sentipen gazi-gozoa atera nuen aurkezpenetik, nahi eta uste baino luzeagoa irten zitzaidalako aurkezpena. Amaitutakoan, uste osoa nuen hor nonbait ibiliko nintzela hasieran erabakitako denboratik, 30 minutu, baina bai zera: 55 minutura joan nintzen!
Bestela, uste dut lan txukuna egin nuela aurkezpenarekin, argia eta ulerterraza izan baitzen. Hori bilatu nuen, eta uste dut lortu nuela. Beraz, alde horretatik, pozik.
Eskerrak eman nahi dizkiot Aitor Zuberogoitia lankideari, bera izan baita nire tutorea lan honetan, eta laguntza handia eman didalako. Baita Iñaki Garcia lankideari, berak gidatu baininduen SPSS programaren bide bihurrietan. Orobat CodeSyntaxeko lagunei, eman didaten laguntzagatik Aurki.com batzailea aztertzeko. Eta, jakina, Alazne Aiestaran, Joseba Azkarraga eta Jon Sarasua epaimahaikideei, aurkezpena bukatutakoan eskaini zizkidaten iradokizun, proposamen eta oharpenengatik.
Laster sarean ipiniko ditut bai ikerlanaren testua eta baita aurkezpena bera ere, nahi duenak kontsulta ditzan.
Atzo Galdakaoko ospitalean izan nintzen, kontrol eguna nuen-eta. Pozik itzuli nintzen etxera, azterketen emaitzak onak izan baitziren. Berba bat ere ekarri nuen handik: onkotxipa. Jesus Ojanguren medikuak aipatu zidan giza genoma osatu zenetik, minbiziaren inguruko ikerkuntza izugarri aurreratu dela, batez ere onkotxipei esker.
Onkotxipak txip bereziak dira, biotxip edo ADN txipen aldagai bat, bereziki diseinatuak minbizia aztertzeko. Gero jakin dut biotxipak direla beirazko edo beste material bateko xafla txikiak, zentimetro gutxikoak, eta itsatsita daramatela milaka giza gen, ilaratan eta zutabetan eratuak. Erabiltzen dira lagin bateko gen kopuru handiak aztertzeko (odolekoak, ehunekoak edo tumor batekoak) denak batera, eta oinarritzen dira geneen propietate batean, zeinaren bidez beste gen batzuetara itsasten baitira, berdin-berdinak direnean.
Jesusek esan zidanez, bost urte barru gaur egungo ikerkuntzek emaitza ikusgarriak eragingo dituzte, eta horiek erabat aldatuko dute diagnostikoak egiteko modua eta tratamendua bera ere, kasu askotan. Hala bada, hala biz, eta ez bada, ora pro nobis.
Astebete pasatxo nabil Miro telebista probatzen nire ordenagailuan. Hiru laguni ere lagundu diet berau instalatzen, harrigarria iruditu baitzait. Bloglines informazio batzaileak nola, Mirok ere halaxe ekartzen ditu telebista programak edo bideoak nork bere ordenagailura, ondoren konputagailuaren pantailan ikusteko. Jakina, aurretik harpidetu egin behar, RSS bidez, saio edo bideo horietara.
Nire ordenagailuaren pantaila 15 hazbetekoa da, eta hor izugarri ondo ikusten dira Mirok ekarritako saioak, berauek kalitate onez emititzen direnean. Goiena Telebista ere hortxe ikusten dut orain, pantaila osoan, eskertzekoa benetan, nahiz eta, kasu horretan, kalitatea ez den hain handia. NBC telebistaren gaueko albistegia jaisteko, bestalde, 20 bat minutu behar izaten ditut, baina bitartean nik lanean segitzen dut. Horrek ez du etenik.
Miro probatzera gonbidatzen zaituztet, jakinda, gainera, dagoeneko baten batek euskaratu dituela Miroren azala eta hainbat gauza, Miro software librearekin egina baitago.
