Jing edo pantaila-bideoak

Data: 2007(e)ko azaroaren 12a Egilea: Joxe Aranzabal

Egun hauetan aplikazio bat probatu dut, Jing, eta horren bidez pantaila-bideoak egin ditzaket, ingelesez screencast deitzen direnak. Pantaila-bideoa bideo-grabazio bat da, eta erakusten du ordenagailuaren pantailan zer gertatzen den. Batzuetan ahots eta guzti joan liteke. Gaur egun asko erabiltzen da, bai irakaskuntzan eta bai tutorialak egiteko, edozein motatakoak.

Jing Windows eta Mac sistema eragileekin erabil daiteke; nik Mac OS Xekin erabili dut, arazo barik. Nahikoa da aplikazioa jaistea nor bere ordenagailura, hortik aurrera, ordenagailua pizten den bakoitzean, Jing ere piztu egiten da. Nire ordenagailuan, pantailaren goiko aldean kokatzen zait, eskuin partean.

Bi aukera
Jing aplikazioak aukera ematen du pantaila-argazkiak eta pantaila-bideoak egiteko, erabiltzaileak zer aukeratzen duen, bat ere kamerarik erabili barik. Pantaila-bideoen kasuan, beharrezkoa da aurretik ondo pentsatzea zer egin eta zer esan, irudiak eta hitzak uztartuta doaz-eta. Behin grabazioa eginda, aplikazioak gordetzen ditu bideoak Screencast.com webgunean, beraz, komeni da hor ere izena ematea. Bideoak zer iraupena duen, denbora gehiago edo gutxiago beharko da ordenagailutik Screencast.com-era igotzeko.

Ikusi nahi baduzue adibide bat, ikusi nik prestatu dudana Jing erabilita: “Zelan txertatu argazki bat blogean”. Mikro barik grabatu nuen, ordenagailuari zuzenean hitz eginda.

Kategoriak Sailkatugabeak | Etiketak , , | 2 iruzkin

8. probintzia, 9. saioa

Data: 2007(e)ko azaroaren 11a Egilea: Joxe Aranzabal

Horra “8. probintzia“ irratsaioaren 9. saioa. Azaroaren 11n egin dugu Euskadi Irratian, Amarauna saioan.

Edukiak
Bederatzigarren saioan honako gai hauek jorratu ditugu:

    * Euskal idazleak blogari.
    * Zertaz hitz egin den aste honetan euskal blogosferan.
    * Bi blog aipagarri: G&A: Gauez eta azpikeriaz eta Dantzan.com.

powered by ODEO

Kategoriak Sailkatugabeak | Etiketak , , , | Utzi iruzkina

Nire tesia euskarazko Wikipediaz izango da

Data: 2007(e)ko azaroaren 9a Egilea: Joxe Aranzabal

Aldatu egin dut nire doktore tesiaren gaia: ez da izango euskaldunok zelan erabiltzen ditugun informazio batzaileak; izango da euskarazko Wikipedia. Aldaketa handia da, eten egin baitut orain arte landu dudan gaiarekin, baina erabakia ez dut bat-batean hartu.

Nahikotasun froga egin nuenean Aurki.com informazio batzailearen gainean, ordurako argi nuen doktore tesia ez nuela egingo Aurkiren haritik tiraka, sumatzen bainuen horrek ez lukeela askoz ere gehiagorako emango. Hori zela-eta, hasi nintzen pentsatzen aztertuko nituela informazio batzaileak orokorrean, hobeto esanda, euskaldunok zelan erabiltzen ditugun informazio batzaileak (Aurki.com, Bloglines, Google Reader…) eta zelan kudeatzen dugun informazio gainkarga.

Hala ere, errezeloa nuen gai hori horrela eginda, berdin-berdin egin zitekeela Norvegian edo Hego Afrikan, eta ez zuela lotura handirik izango euskal komunitatearekin, Nahikotasun frogako epaimahaikideek iradoki zidaten moduan.

Jakiunde eta Jimmy Wales
Horrela nengoela, Jakiunde erakundearen berri izan nuen. Ez zitzaidan gustatu. Ordenagailura joan, eta idatzi egin nuen horren gainean, eta hausnarketa labur bat egin nuen eliteen moldea eta wiki moldea kontrajarrita.

Astebete geroago, Gasteizera joan nintzen Jimmy Wales Wikipediako sortzaileari entzutera. Gogoan dut aretoan sartu bezain laster pentsatu nuela Wikipedia izan zitekeela gai aproposa nire doktore tesirako, euskarazko Wikipedia. Ondoren, Jimboren zenbait erantzunek sendotu egin zuten hasierako ustea. Badaezpada, Arkaitz Zubiagari galdetu nion ea doktore tesirik eginda ote dagoen euskarazko Wikipediaren inguruan, eta hark ezetz.

Handik bi egunera galdera egin nion nire tesi zuzendariari, Aitor Zuberogoitiari. Ondo iruditu zitzaion. Atzo, bestalde, nire erabakiaren berri eman nuen Oñatin, MUren Enpresa Zientzien Fakultatean egiten ari nintzen ikastaro batean, tesiaren inguruko metodologiaz hitz egiten ari baikinen. Ikaskideek barre egin zuten, bi astean bi gai aipatu nituelako, oso bestelakoak, baina ikusi zuten euskarazko Wikipediak ematen zuela tesi bat baino gehiagorako.

Beraz, bai. euskarazko Wikipedia izango da nire doktore tesiaren ikergaia. Orain mugatu egin behar dut gaia eta galderak idatzi, galderek gidatuko dituzte-eta metodologia eta erantzunak.

Kategoriak Sailkatugabeak | Etiketak , , | 4 iruzkin

Wikipediaren alde

Data: 2007(e)ko azaroaren 8a Egilea: Joxe Aranzabal

Motibo asko dago Wikipedia entziklopediaren alde egiteko. Hona hemen banaka batzuk:

  • Fidagarria da. Wikipediak baditu akatsak, beste entziklopediek dituzten bezala, baina akatsok oso bizkor zuzentzen dira, besteetan ez bezala. 2004an Alex Halavais Buffaloko Unibertsitateko irakasleak 13 akats sartu zituen, nahita, Wikipedian. Ordu pare bat igaro aurretik, koponduta zeuden.
  • Zehatza da. 2005eko abenduan Nature zientzia aldizkariak alderatu zituen 43 artikulu Entziklopedia Britannican eta Wikipedian. Aldizkariaren ustez, Entziklopedia Britannicarenak ziren apur bat zehatzagoak. Steve Jobsen iritziz, Wikipedia da entziklopedia zehatzenetako bat.
  • Bizkorra da. 2004ko Gabonetan tsunami batek eraso zituen Indiar Ozeanoko kostaldeak, eta hil zituen 175.000 pertsona. Bederatzi ordu geroago sarrera bat zegoen Wikipedian, 76 hitzez osatua, tsunamiaren gainean. Hogeita lau ordu geroago, sarrera hura 400 aldiz editatua zen, eta 3.000 hitz inguru zituen, argazki, grafiko eta taula eta guzti, hondamendia hobeto azaltzeko. Berrogeita zortzi ordu geroago, sarrerak zituen 6.300 hitz eta editatu zuten 1.200 aldiz. Grafiko gehiago zituen, eta bideo bat. Sei hilabete geroago, hasierako sarrerak izan zituen 7.000 aldaketa baino gehiago, eta bukatu zuen 7.200 hitzekin. Sarean ez zegoen beste webgunerik hainbeste informazio eskaintzen zuenik tsunamiaren gainean.
  • Demokratikoa da. 2007ko azaroan 1.000.000 erabiltzaile zituen, izena emandakoak. Sekula ez du hainbeste jendek parte hartu horrelako proiektu batean, munduko jakintza toki batean jartzeko helburuarekin.
  • Handia da. 2007ko azaroan Wikipediak 8.000.000 artikulu zituen argitaratuta.
  • Librea da. Wikipedia software librean oinarrituta dago.
  • Doakoa da. Wikipediak lurperatu egin ditu hainbat ordainpeko entziklopedia.
  • Euskalduna ere bada. 235 hizkuntzatan argitaratzean da, tartean euskaraz. Gureak 21.214 artikulu ditu argitaratuak.

Jakina, euskarazko Wikipedia oraindik ez dago ingelesezkoaren parean. Baina badakigu haren ereduak balio duela. Beraz, hori izango da gure erronka etorkizunean: geurea onenen mailan jartzea.

Kategoriak Sailkatugabeak | Etiketak | 4 iruzkin

Faroaren oihartzuna Sustatun

Data: 2007(e)ko azaroaren 6a Egilea: Joxe Aranzabal

Ikasturte honetan Sustatuk hiru artikulu hartu ditu Farotik, editoreek interesgarri iritzita. Editoreek ez ezik, irakurleek ere interesgarritzat jo dituzte artikuluok, hirurak baitaude iraila ezkero gehien klikatu direnen artean.

Sailkapena Artikulua Jasotako klik kopurua
1. Txortan, etimologia 981
11. Pornografia 2.0 erara 700
15. Jakiunde eta Wikikunde 611

Sustatu efektua
Horrelakoetan eragina noranzko bietan igartzen da: Sustatuk hartzen du zerbait Farotik, baina ordainetan Faroak bisita piloa jasotzen ditu Sustatutik bueltan. Ez daukat esaterik zenbateko den Sustatu efektua, Goiena.net-ek ez baitauka neurgailurik bere blog komunitatean, baina badakit oso nabarmena dela.

Kategoriak Sailkatugabeak | Etiketak , | Utzi iruzkina

Zelan bihurtu sakelako telefonoa eskaner

Data: 2007(e)ko azaroaren 5a Egilea: Joxe Aranzabal

Bai. Zure segapotoa eskaner bihur daiteke, zure eskuko eskanerra, baldin eta argazkiak atera baditzake. Berdin zure argazki kamera digitala. ScanR.com etxeari esker. Proba egin dut, eta badabil, xemeikorik ordaindu barik.

Argazki bat atera diot MUniversitas aldizkariaren orrialde bati, eta ScanR.com webgunera bidali dut posta elektroniko bidez. Handik bost minutura, nire argazkia PDF dokumentu bihurtuta zegoen, nire ordenagailuan. Bereizmen apaleko PDFa zen, baina egokia irakurtzeko.

ScanR.com-ek, gainera, aukera eman dit dokumentu bera testu gisa jaisteko. Jaitsi dut, eta, jatorrizko orrialdea lau zutabetan zegoenez, eta despiezatua, testua apur bat nahasita jaso dut, baina hor zegoen dena.

ScanR.com
Enpresa horrek JPEG irudiak jasotzen ditu, eta PDF edo Word dokumentu bilakatzen ditu. Horretarako, erabiltzaileak izena eman behar du webgunean. Zerbitzarii multzo batek prozesatzen du jasotako irudia. Ondoren, beste prozesadore multzo batek harrapatzen du dokumentuan dagoen ageriko testu guztia, garbitu eta PDF bihurtzen du. Hori guztia 30 bat segundotan, eta jendearen partehartze barik.

Zerbitzua hilean bost aldiz erabiliz gero, doakoa da. Aldiz, hilean 3 dolar ordainduz gero, muga barik erabil daiteke.

Kategoriak Sailkatugabeak | Etiketak , | Utzi iruzkina

8. probintzia, 8. saioa

Data: 2007(e)ko azaroaren 4a Egilea: Joxe Aranzabal

Horra “8. probintzia“ irratsaioaren 8. saioa. Azaroaren 4an egin dugu Euskadi Irratian, Amarauna saioan.

Edukiak
Zortzigarren saioan honako gai hauek jorratu ditugu:

    * Podcastak.
    * Zertaz hitz egin den aste honetan euskal blogosferan.
    * Bi blog aipagarri: Aramaio eta Mutilmedia.

powered by ODEO

Kategoriak Sailkatugabeak | Etiketak , , , | Utzi iruzkina

Podcastak entzuleak gehitzen ditu

Data: 2007(e)ko urriaren 31a Egilea: Joxe Aranzabal

Batez beste 46 lagunek entzun dute sarean 8. probintzia, Euskadi Irratian igandero egiten dudan saioa. Lehen atala ez nuen grabatu, eta hori ez dago sarean. Handik aurrerako guztiak zintzilikatu ditut podcast moduan hiru tokitan: Odeon, Faroan eta 8. probintzian. Azken saioa kenduta, oraindik ez baitu astebete egin, horrela banatzen da entzule kopurua podcast bakoitzean.

Irratsaioak Entzuleak
2. saioa 68
3. saioa 67
4. saioa 24
5. saioa 41
6. saioa 33
Batez beste 46,6

Beharbada ez dira asko izango, 46 entzule batez beste, baina pozik egoteko moduan nago, jende horrek entzun baititu podcastak interesa duelako euskal blogosferan. Beraz, irratia iristen ez den jendearengana iristen dira podcastak, eta haren eragina zabaltzen dute.

Kategoriak Sailkatugabeak | Etiketak , , , | 2 iruzkin

Zeinuen hizkuntza ere hizkuntza gutxitua da

Data: 2007(e)ko urriaren 30a Egilea: Joxe Aranzabal

Euskara, katalana eta gaelikoa hizkuntza gutxituak badira, halakoxea da zeinuen hizkuntza, gorrek darabiltena. Horixe irakurri dut Minority Language Media liburuko artikulu batean, “Signs of Change: Sign Language and Televisual Media in the UK/Aldaketa seinaleak: zeinuen hizkuntza eta telebista Erresuma Batuan”.

Artikulua oso interesgarria iruditu zait, eta berehala pentsatu dut guk zer egiten dugun geure arteko gormutuek ere jaso dezaten informazioa behar duten moduan. Ezer asko ez. Eusko Legebiltzarrean eztabaida potoloren bat dagoenean, orduan jartzen dira interpretari batzuk itzultzen politikarien hitzak, eta kito, esango nuke.

Karrera amaierako proiektu interesgarria izango litzateke aztertzea zertan diren Euskal Herriko gormutuen komunikazio premiak, ondoren hainbat irtenbide eskaintzeko.

Kategoriak Sailkatugabeak | Etiketak , | 4 iruzkin

Ikasle baten balentria

Data: 2007(e)ko urriaren 29a Egilea: Joxe Aranzabal

Hemezortzi urteko ingeles ikasle batek, Nik Haleyk, iragarki bat sortu zuen iPod Touch musika irakurgailuaren gainean, eta ipini zuen YouTuben. Erantzun asko jaso zituen, eta onak. Antza denez, Appleko norbaitek ere ikusi zuen iragarkia. Applek berehala erabaki omen zuen iragarki hori bera erabiliko zuela telebista kanpaina batean. Beraz, ikaslea Los Angelesera eraman, eta han grabatu zuten berriz ere iragarkia, baina bereizmen handian. Atzo ziren ematekoa, futbol amerrikarreko World serieak aprobetxatuta.

Ikasgaiak
Wired agerkariaren iritziz, guk denok, eta gure ikasleek ere bai, badugu zer ikasirik kasu honetatik:

  • Ondo aukeratu musika. Nik Haleyk Brasilgo talde baten abesti bat erabili du, CSS, eta deitzen da “Music Is My Hot Hot Sex”. Esan liteke letra iPodzale amorratu batek egina dela. Gainera, abestiak badu ezaugarri aproposik YouTuberako: erritmo errepikatua + neska abeslari azentuduna + sexu aipamen etengabeak.
  • Ez gastatu produkzioan. Kamerarik ere ez duzu behar. Haleyk sortu zuen bideo hori Applen webgunetik hartutako bideo klipak erabilita.
  • Maitasun akritikoa. Enpresa baten arreta bereganatzeko eraginkorragoa da enpresaren produktuei maitasun akritikoa erakustea, gutun bat bidaltzea baino iradokizunak egiten.

Kategoriak Sailkatugabeak | Etiketak , , | Utzi iruzkina