Asier Illarramendi eta Xabi Alonso Real Madrilen jokatzen
Ulertzen dut realzale gehienen poza Asier Illarramendi Realera itzuliko delako, eta ez naiz nor Asierren beraren erabakiak epaitzeko, baina, zer esango dizuet, pena apur bat eman dit albisteak, Realak eta Real Madrilek itxi dutela tratua eta Illarra “bere betiko etxera” itzuliko dela.
Nire ustez, Illarramendi jokalari oso ona da, elitekoa, eta Madriletik irteteko aukera aprobetxatu beharko zukeen beste salto bat emateko, berari dagokion mailan, Liverpoolen, esate baterako, talde mitikoa, mitikoen artean, eta interesa erakutsi omen duena jokalaria fitxatzeko. Han Illarrak aukera izango zuen bere karrera indartzeko, beti ere maila gorenean, eta bere esperientzia sendotzeko. Baina mutilak besterik erabaki du, antza.
Orain urte batzuk, izugarri poztu nintzen Liverpoolek Xabi Alonso eraman eta donostiarrak aurkezpeneko prentsaurrekoa ingelesez egin zuenean. Orduan ifrentzua izan zen Miguel Angel Angulo, Valentziako jokalari aparta, zeinak Arsenalek, uste dut, fitxatu ondoren (sinatzea bakarrik falta zen), hegazkinetik jaitsi bezain laster etxera eramateko eskatu baitzuen, ingelesez hitz egin beharrak eta egoeraren arrotzak ikaratuta.
Pena apur bat daukat, baina, azkenean tratua mamitzen bada, zorterik onena opa diot Asier Illarramendiri Realean.
