Atzo irakurri nituen Berria egunkarian Haimar Zubeldia txirrindulari usurbildarraren adierazpenak. Adierazgarriak ziren, oso. Hedabideetatik jakin zuen aurten Giroa egin beharko zuela. Gainera, berak ez zuen Giroa egin nahi, Tourra baizik. Baina, beste erremediorik ez-eta, gaur ekingo dio Italiako Itzuliari.
Elkarrizketa irakurri ahala, gogora etorri zitzaizkidan iaz Horrillok eta Mayok El País egunkarian egindako adierazpen batzuk, Tourra hastear zela. Ermuko txirrindulariak azpimarratzen zuen Mayok beti ematen duela duen guztia, eta ez beste batzuek moduan, saiatzen direla bakarrik hiru urtez behin, kontratua berritu behar dutenean. Orduan ez nuen zalantzarik Horrillok Haimar zuela gogoan.
Espainiako Itzulia iritsi aurretik ere, Mayok berak sekulakoak esan zituen, kokoteraino zegoela, ez zuela gogorik Vuelta egiteko, nahikoa eta gehiago egin zuela iaz, Duphiné eta beste lasterketa batzuk irabazita. Beste batzuk ere hor zebiltzala, majo kobratzen, baina potrojorran antza. Berriro, Haimarren itzala pasatu zen nire gogotik.
Haimarri errealitatea etorri zaio muturraren aurrera: urtero puntaren puntan dabiltzanek izan dezakete Tourra besterik ez prestatzeko pribilejioa.
