Egia esanez gero, Aldusen berri izan nuen programa informatiko baten bidez, garai batean PageMaker programa Aldus PageMaker baitzen. Gero jakin nuen Aldus izen hori eman ziotela programari Berpizkunde garaiko inprimatzaile eta tipografo handi baten omenez, Aldus Manutius italiarra. Gutenbergen ondoan Aldus izango da, seguruenik, Berpizkundeko inprimatzailerik garrantzitsuena Europan. Bera hasi zenean negozio horretan baziren berrogeita hamar bat urte alemanak asmatu zuela moldiztegia, eta Europan mila bat irarkola bai, izango ziren lanean.
Aldusek, berriz, berrikuntza galantak ekarri zituen: berak asmatu zituen letra erromatarrak, Bembo letratipoarekin. Baita letra italikoak edo kurtsiboak. Bereak dira, halaber, octavoak edo sakelako liburuak, garai hartan iraultza demasekoa jende ikasiarentzat, Europan batetik bestera ziharduena.
Erregistratu egin zuen letratipo italikoa, haren monopolioa izateko, bai eta lortu ere: garai hartako Aita Santuak dekretu bat sinatu zuen Aldusen monopolioa ziurtatzeko. Alferrik, ordea. Halako arrakasta izan zuen, non mundu guztiak kopiatu baitzuen estilo hori, kasurik egin gabe Aita Santuari.
Erantzun bat Aldus Manutius bidalketan