Zer idazten dugu blogetan?

Azken aldian hainbat galdera plazaratu dira euskal blogosferan, blogariok ote gabiltzan geure burua nabarmendu nahian, idazten ote ditugun interesik bat ere ez duten gauzak, etab. Gaur saiatuko naiz galdera horiei erantzuten.

Geure burua nabarmendu nahian ote gabiltza?

Mikel Iturriak idazten zuen aurrekoan, Elena Lakaren mezu gogoangarria aitzakia hartuta, “oigo y leo por ahí que los bloggers somos unos exhibicionistas. Ni entro ni salgo, pero me quedo con este tipo de exhibicionismo, a pecho descubierto”.

Luis Rojas Marcos psikiatrak dio La fuerza del optimismo bere azken liburuan denok dugula bizi-bizirik jasota geure autobiografia, eta, lagun minekin aritu edo ezagutu berri ditugun pertsonekin, etengabe hitz egiten dugula geure iraganaz. “Are gehiago —dio—, iraganari buruzko kontuak gogoraraztea da mintzagai gogokoenetako bat, eta elkarrizketa guztietan irteten omen da, sei bat aldiz bai orduko”.

Blogak boladan daude, eta perretxikoak bezala agertzen ari dira nonahi. Udako Euskal Unibertsitateak ere ikastaro bat antolatu du uda honetarako, blogen gainean. Horren harira, Patxi Gaztelumendik hainbat galdera plazaratu ditu bere blogean, gure artean eztabaida sanoa piztu guran. Saiatuko naiz niri dagokidan zatia erantzuten.

Bat nator Rojas Marcosekin, eta, horren haritik, esango nuke blogetan geure buruaz idazten dugunean ere, hori besterik ez dugula egiten, geure autobiografiaz idatzi. Blogetan aurkitu dugulako beste plaza bat gure arteko elkarrizketak bideratzeko. Beraz, esango nuke ez dihardugula geure burua nabarmendu nahian, baizik eta beste eremu bat aurkitu dugula apeta unibertsal hori betetzeko. Ordea, nola esparru hori berria den, blogena, hainbat jende ari da esaten exhibizionista hutsak garela.

Zer idazten dugu?

Faroa sortu nuenetik, aldatu egin dut idazteko erregistroa, lehen Sustatun erabiltzen nuena. Gaixotu nintzenetik, 2002ko irailaren 11n, bi urtean dezente idatzi nuen Sustatun, estilo nahiko landuan, gainera. Eta hori horrela zen, denbora nuelako artikuluak lantzeko.

Orain, berriz, lanean dihardut egun osoz, eta askoz ere asti gutxiago daukat artikuluak-eta prestatzeko. Beraz, beste estilo bat ari naiz lantzen Faroan: estilo laburra. Gaiei dagokienez, denetik sartzen dut hemen: hausnarketak, kontakizunak, aipuak, anekdotak, eta —oso noiz behinka— artikulu landuak, denbora eskatzen duten horietakoak. Adibidez, Etxeparegandik Sintxanengana, orain dela gutxi argitaratua.

Ni saiatzen naiz zehatza izaten idazten dudanean, eta idazteko modu erraza bilatzen dut, ahozkotasunetik gertu, hobeto komunikatzeko.

Azken aldi honetan, gainera, beste blog bat ari naiz elikatzen, Gizakom, nire lantokian, HUHEZIn egiten hasi garena, eta horrek ere denbora dezente kentzen dit. Adibidez, TU Lankide aldizkariari buruz prestatu dudan artikulua egiteko, aldizkaria bera hartu, hainbat artikulu irakurri, begiratu Interneten zer aurki nezakeen aldizkari horren gainean, eta artikulua osatu dut.

Nola idazten dugu?

• Esaldi laburrak. Saiatzen naiz esaldi laburrak egiten.
• Aditza aurrera. Aurreratu egiten dut aditza, konturatu bainaiz Sebero Altubek ezarritako estiloak sekulako arazoak dituela euskaraz komunikatzeko orduan.
• Testu antolatua. Saiatzen naiz testua ondo antolatzen, izenburuak tartekatuz, eta horretarako bolatxoak edo zenbakiak erabiltzen ditut sarri, testua sailkatzeko, irakurleak errazago gainbegira dezan zer dagoen artikuluan.
• Lotura ugari. Ahalegintzen naiz irakurketa transbertsala eskaintzen, eta horretarako ahalik eta lotura gehien sartzen ditut, harira datozenean, irakurleak ahalik eta irakurketa aberatsena izan dezan.

  Patxi Gaztelumendik dio blogetan irakurtzen dituen gauza askok eta askok ez dutela bat ere interesik. Seguru horrela dela. Baina seguru nago gauza asko daudela blogetan interes handikoak. Gauza bera gertatzen da eskuz banakako txapelketan, pilotan, edo futbolean, nahiz eta Europako Txapeldunen kopa izan, edo gure inguruan jokatzen diren hainbat eta hainbat txirrindulari lasterketatan.

• Erantzunak. Saiatzen naiz erantzunei erantzuten, irakurle horiek jakin dezaten kontuan hartzen ditudala beraiek esandakoak, haiekin bat etorri edo ez, elkarrizketa baita blogen aberastasunik handienetako bat.

Non dago idazten dugunaren interesa?

Saiatzen naiz erabiltzen gairik interesgarrienak, ikuspegirik originalena, eta modurik errazena, baina badakit emaitzak ez direla beti nire gustukoak. Horrelakoetan, irakurleak eskubide osoa du alde egin eta beste larretan bilatzeko gustuko janaria. Nik ere horixe egiten dut nabigatzen dudanean.

Joxe Aranzabal