Aurten banuen jakinmin apur bat Zilarrezko Euskadi sariaren inguruan, jakitearren nola moldatuko zen nire liburua, Medkuak esan dit minbizia dudala, orain bi hilabete aurkeztu zena. Apirilaren 23a igaro zen, eta joan den ostiralean jakin genuen Joan Mari Irigoienek eta Martin Berasategik irabazi dutela aurtengo saria. Arrastorik ere ez nola saldu zen nirea, sariaren arduradunek bakarrik jakinarazi baitzituzten lehen bi sailkatuen izenak.
Irakurri dut Andoni Arantzegik emandako informazioa, eta ondorio hauek atera ditut:
- Liburu gutxi. Atentzioa eman dit zein liburu gutxi saldu dituen liburu irabazleak, bai euskaraz (61 ale) eta baita gaztelaniaz ere (95 ale). Beharbada urteroko kontua izango da hau, baina ni aurten erreparatu diot lehendabizi.
- Izen egokiagoa. Akaso ez dira hain liburu gutxi, aintzat hartuz gero bakarrik zenbatzen direla egun horretan Donostian saldutako liburuak, ez Euskadin saldutakoak, nahiz eta sariaren izena izan Zilarrezko Euskadi saria. Horregatik, egokiagoa izan liteke Zilarrezko Donostia saria. Horrek zehatzago adiraziko luke sariaren eremua. Edo bestela, zabal dadila eremu hori Euskal herri osora, edo Euskal Herriko hiriburuetara.
- Argitaletxeen arteko lehia. Durangorako nola, Liburuaren Egunerako ere estrategia berezia dute Euskal Herriko argitaletxeek: aurreko hamabost egunetan liburu mordotxoa aurkeztu zuten, batzuk ospakizunaren bezperan. Beraz, liburu horiek harrapatzen dute hedabideen arreta.
- Unearen garrantzia. Aurtengo irabazleak, euskarazko liburuen artean, oso lotuta etorri dira une honetan bizi dugun momentuarekin: Komunista .com etorri da justu komunista hitza boladan dugun unean, alderdi komunista batek, EHAKek, 9 jarleku irabazi dituenean Eusko Legebiltzarrean. Eta Don Kijote Mantxako, liburu horren inguruan antolatu diren ospakizun guztien erdian, aurten 500 urte betetzen baitira Cervantesek Don Quijote de la Mancha argitaratu zuela.
Irabazleei, zorionik beroenak. Eta nire liburuari dagokionez, nire editoreari galdetuko diot ea zer moduz saldu zen Donostian, apirilaren 23an.
