Orain denbora asko ez dela, Gari Araolazak harritu gintuen bere blog ederrarekin, Teknosexua, zeinek azpititulu moduan baitauka geek euskaldun baten memoriak. Baina zer da berba hori, geek?
Euskaltermen begiratu dut, eta begira zer dioen. Geek: Internetekin zoratuta dagoena, ahal duen denbora guztia sarean murgilduta ematen duena. Nahiko definizio neutroa.
Baina beti ez da horrela izan. Begiratu dut beste hiztegi batean, The New Hackers Dictionary, eta hor aurkitu dut beste definizio bat, askoz ere negatiboa: gizartean integratu gabea, kirasduna, eta horrelako beste lore batzuk.
Seguru nago Garik beste definizio bat emango diola hitz horri. Nik, behintzat, ez dut ikusten bera lehen definizioaren barruan, eta are gutxiago bigarrenean.
Zer egingo diogu ba…
Nire blogaren aurkezpenean aipatzen dut antisozialaren inguruko definizio hori. Euskalterm-en hori idatzi duenak ba ote daki zein ona den Bloglines? ezagutuko ote du Skype edo inoiz emango zuen erantzunen bat lagun baten blogean?
Gora sagardotegiak eta futbola!
Ez dakit bertan asmatu zen berba hori, baina Douglas Coupland-en Microsiervos nobela (Ediciones B) geek-en biblia da. Denboraz, beharbada, hitzaren zentzua aldatuko zen pixkabat, baina nobela honetan agertzen diren geek-ak nahiko martzianoak dira: Microsoft, batez ere, eta beste informatika enpresa batzuetan lan egiten dute, mila ordu egunero eta asteburuak barne, eta euren bizitza osoa eta harremanak informatikaren inguruan egiten dute. Jende arraroa, benetan, nobela honetan agertzen dena. Ez dira informatikaz baliatu, informatikarako soilik bizitzen dira eguneko 24 orduak. Nik enuke geek bat izan nahi (behintzat liburu honetan agertzen diren geek-ak bezelakoa) .
Izen bereko webloga ere badago: Microsiervos.
Neuk hitz hori irakurri edo entzun izan dudanetan, erabiltzen zuten zuk esandako bi esanahi horiek bat eginda edo, baina baita konnotazio maitakor batekin ere. Internet-zaleok tribu antisozial baina sinpatiko bezala ikusten gaituzte, antza.
Ziur asko Gari Araolazak gehiago jakingo duela honetaz, baina aipatutako nobela horretan geek ez da Internet-zalea, Informatika-obsesoa baino.
Orain bai, Gari, ausartu zara zeure definizioa ematen, eta eskertzen dizut, oso bestelakoa baita alderatuz gero besteok ekarri ditugunekin.
Garbi daukat hitz horrek bilakaera garbia izan duela azken urteotan. Gaur egun askoz ere zentzu positiboagoa du lehen baino.
Bide batez, esan dezadan lagun baten galderari erantzuteko geek hitza ahoskatzen dela gik.
Ondo segi.