Uztailaren 6tik 8ra Oñatiko Unibertsitate zaharrean nazioarteko kongresua dugu, Ekonomia Sozialari buruzkoa: “IISJ Congreso Internacional: La Economía Social”. Ekonomia soziala zer den entzunda izango duzue, helburu sozialak bilatzen dituen enpresa-ekonomia eredua. Zenbaitzuek beren presentzia dudan jartzen duten arren, kooperatibak ekonomia sozialeko erakundeak dira, hala kontsideratzen dira. Kooperatibekin batera, zeintzuk agente ekonomiko zein sozialak diren, GKEak ditugu, besteak beste.
Ekonomia Soziala lantzen duen kongresu honetan MU Enpresagintza – MIKeko ikertzaileok ere parte hartu dugu, bai antolakuntzan, eta baita gure ponentziekin ere. Nik ere hartu dut parte, nire tesian lantzen ari naizen gaiaren lehen emaitzak aurkezteko. Zer aurkeztu dudan? Ba Mondragon Korporazioa aurkeztu dut, 2 diapositibatan laburtuta, ezaugarri gakoekin. Ondoren, azken urteetako salmenten bilakaera aitzakia gisa hartuta, kooperatibek dituzten krisia kudeatzeko tresnak azaldu ditut. Alde batetik, kooperatibek duten malgutasunerako gaitasuna ardatz dituen neurriak aipatu ditut: aurrerakinen murrizketa, interesei uko egitea (kapitalizatuz, adibidez), aurre-erretiroak… Beno, hainbat neurri, post batzuetarako ematen duen gaia (tesi baten zati baterako ere bai, jakina). Bestalde, Arrasateko Kooperatiben Esperientziaren baitan sortutako erakunde eta tresnak ere aipatu ditut, Lagun-Aro eta Zerbitzu Zentralak kontuan izanik, besteak beste. Lagun-Aroren Enplegu Laguntza Prestazioa da aipagarriena, beharbada. Kooperatiben arteko interkooperazioa ardatz duena. Hor ditugu bazkideen birkokapenak, adibidez. Tresna horrek kooperatiba batean dagoen pertsonal beharra eta soberan duenaren arteko elkartrukea du ardatz. Beste tresna garrantzitsu bat, kooperatiben artean dagoen elkartasunaren seinale garbia, emaitzen birmoldaketa da. Zer den emaitzen birmoldaketa? A eta B kooperatibak baditugu, eta Aren irabaziak Brenak baino handiagoak badira, bien arteko parekotasuna bilatzea da, emaitzen zati bat elkarbanatuz. Gauza bera gertatzen da galeren kasuan. Galerak ere sozializatu egiten dira eta, arraroa dirudien arren, Ak galerak baditu, baina Brenak baino txikiagoak badira, emaitzen zati bat Bri pasako dio, bere balantzea oraindik ere negatiboagoa izatea lortuz. Ez da, badirudien arren, gauza teoriko bat. Aurreko krisialdietako txostenetan ikusi nuen islatuta kasu hori.
Beno, gaurkoz nahikoa hitz egin dizuet nire tesiari buruz, ezta?
