Orain dela egun batzuk blog honetan erantzun gehien jaso zituen mezua idatzi nuen, eta geroxeago Facebook-en jarraitu zuen eztabaida luze bat sortu zuen. Eztabaida hartan, euskararen rola ikerketan gaia aipatu zen, gai hori berori jorratzen ari ez ginen arren. Horregatik, oraingoan gai hori lantzeko asmoa dut, asmo onenenetik, eta oraingoan ere nire ezagutza apaletik.
Badira urte batzuk ikerketan murgilduta nagoela, MU Enpresagintza-n eta MIKen. Artikuluren bat idazteko zortea izan dut, ponentzia batzuk aurkeztu, proiektu batzuetan parte hartu eta doktoretzan murgiltzeko aukera. Eta horretan ari naiz egun. Nire esperientzia urte gutxikoa den arren, urteotan ikerketaren baitan hizkuntzen erabileraren garrantziaz ohartu naiz.
Hizkuntzei dagokienez nire aukerak zeintzuk izan diren? Ba doktoretza euskaraz egiten ari naiz (koherentzia hutsagatik), ikerketa proiektuak euskaraz zein gaztelaniaz egin ditut, ponentziak gaztelaniaz eta ingelesez aurkeztu ditut, eta artikulua gaztelaniaz idatzi dut. MIKeko blogean zein Kooperatibagintzan blogean, berriz, euskaraz idatzi dut, gehienbat. Hizkuntzen aukeraketa honetan, ahalegindu naiz koherentzia/euskaltzaletasuna eta erabilgarritasuna/zabalkundea kontuan hartzen. Hau da, ikertzaile bezala euskarari garrantzia eman baina nire ikerketaren berri nazioarteko hizkuntzetan eginez.
Orain dela urtebete, EMUNeko teknikari den Edurne Gonzalezen eskutik ikerketan euskarak izan zezakeen presentzia aztertu genuen, hainbat unibertsitate eta fakultatetako kideekin. Bertan errealitate bat islatu zen: gure ikerketaren emaitzak aurkezterako orduan (foro zientifikotan), ezinbestekoa da ahalik eta hedatuen dauden hizkuntzetan egitea (jakina, hobe ingelesez kasu askotan, ez?). Hala ere, euskarak izan dezake gure ikerketa proiektuetan bere lekua, eta bat egin genuen horretan. Doktoretza tesietarako erabiltzeaz gain, dibulgaziorako tresna baliagarria dela ondorioztatu genuen. Izan ere, komunitate ez zientifikoari bideratutako artikuluak bide ona izan litezke gure hizkuntzari behar duen bultzadatxotako bat emateko.
Ikasturte honetan, berriz, ildo berean aritu gara lanean, eta Mondragon Unibertsitateko hiru fakultateetako ikertzaileak bildu ginen Goi Eskola Politeknikoan. Lan-jardunaldia izan zen, eta gure beharrak islatu genituen, euskarak behar duen bultzadarako landu beharreko puntuak identifikatuz.
Oraindik, esan liteke, hasierako fasean dagoela gure hausnarketa, baina berton bildu ginenok argi ikusten genuen gure hizkuntzak, bere berezitasunak kontuan izanik, bere egoera kontuan izanik eta, bereziki, gure komunitatearekin eta identitatearekin bat egiteko, ahalegin gehigarria egin behar dugula. Ea pixkanaka horretan guztian sakontzen dugun.
