Etiketaren artxiboa: oñati

Lau kilometroa

Utzi erantzuna

Aste gogorra

Aste luzea izan
da. Bost saio egin ditut eta luzea egin zait, baina ondorioak oso positiboak
izan dira eta maratoiari begira ondo nagoela esan dezaket eta morala oso goian
daukadala esan dezaket.

Astelehenean
deskantsatu egin nuen, igandean Amurrion izan nintzen 15 kilometrotako
lasterketa batean eta ez zitzaidan astelehenean entrenatzea komeni
(Laudio-Amurrio, ordubete eta bederatzi minututan egin nuen. Ibilbidearen
gehiengoa aldapa gora azken 1500 metroak izan ezik). Asteartean Gasteizko Prado
parkean izan nintzen eta bi serie luze egin nituen, lehena 12 minutukoa (2950 metro) eta
bigarrena hamar minutu eta erdikoa (2700 metro). Hurrengo egunean oraindik aurreko
entrenamendutik nekatuta 500eko hamar serie burutu nituen Mendizorrotzako
atletismoko pistan. Guztiak minutu eta berrogeita hamabost segundotik behera
eta hazkena 1:36ean. Beste entrenamendu gogor bat. Ostegunean korrika egitera
joan nintzen eta ordu eta laurdeneko entrenamendu bat burutu nuen, asko
nabaritu nituen aurreko egunetako saoiak baina ez zitzaidan asko axola. Ostiralean
oso nekatua nengoen eta agenda arazoengatik ez nintzen entrenatzera irten. Ondo
egin nuen. Larunbatean Oñatira bueltatu nintzen eta arratsaldean bira luze bat
egin nuen korrika.

Oñatiko
korrikalarientzako Olateko zentral elektrikoa meka bezalakoa da musulman
batentzat. Korrika egiten dugunok horra joaten garenean zerbait berezia
sentitzen dugu eta joan eta etorri hamaika bider egin arren urtean beti pozten
gaitu hara joatea. Horrek esan nahi duelako korrika egiteko gai garela. Ba
larunbatean Olatera joan, Lamiategi igo, Usakora jaitsi eta bueltan bariantetik
Zahorreko errotondaraino joan nintzen. Ordu eta hogei minutu gutxi gora behera.
Igandean berriz Arantzazura igo nintzen eta ama joan zen nire bila nire autoan.

Astea gogor hasi nuen eta astebukaera ere gogor entrenatu ostean oso
pozik itzuli naiz Gasteizera. Gauzak ondo egiten ari naizela uste dut eta
azaroa 30 iristeko gogoa daukat. Egun horretan demostratuko dut gai naizela amaitzeko
maratoi bat. Hori bai gogor entrenatu beharra dagoela ikusten dut.

Oñatiko duatloia, txalo bero bat

Utzi erantzuna

Gaur errazena atzoko duatloiari buruzko
kronika labur bat eta balorazio pertsonal egitea izango litzake. Ba egingo dut.
Irabazleak Galinier frantziarra gizonezkoetan eta Murua gipuzkoarra izan ziren.
Nire aldetik, iaz baino bi minutu gehiago egin nituen baina gustura geratu
nintzen helburua Lisboa delako.

Orain aipamen berezi bat egin nahi diot lagun
bati. Ruben Garcia oñatiarrari, gure artean Gartxi bezala ezagutua. Orain dela
ia urtebete, Oñatiko duatloia amaitu ostean gauen buelta bat eman nuen
koadrilakoekin. Gai bat duatloiena izan zen eta Rubenek zioen entrenatzen
bazuen bukatuko zuela, atzetik esan zioten berak Oñatiko duatloia bukatzen
bazuen besteek (U. P.k eta A.M.k) Aloñako igoera egingo zutela.

Atzo iritsi zen eguna Rubenentzat, erakusteko
egin zuen lana azken asteetan buru belarri sartuta egon den proiektuan. Hor
azaldu zitzaidan plazan algodoizko kamiseta batekin, korrika egiteko fraka
luzeak eta utzitako bizikleta batekin. Beldurrez zegoen ea lehenengo mozketa igaroko
zuen eta bizikletan denboraz iritsiko ahal zen bigarren mozketara. Lehenengoa
erraz igaro zuen, bigarrena gogorrago egin zitzaion, baina kasta handia
erakutsiz amaitzea bukatu zuen. Koadrilakook oso pozik jarri ginen, esperantzak
bazeuden baina kontrako sentimendua ere airean sumatzen zen.

Euskal blogosferako txoko honetatik, zorionak
Ruben.

Lagun bat.

Gustatu
zitzaidan: Goienako komunikabidea niregana jotzea
Debagoieneko ordezkari bezala iritsi pertsonala emateko lasterketari buruz.
Eskualde bateko ordezkari zarela esatea, agian, handi geratzen zait, baina
espero dut nire azalpenak ahalik eta zuzenenak izatea eta ulerterrazak (eta ez
dagoena ados nire adierazpenekin, ezin diot ezer egin horri).

Gustatu
zitzaidan, ber bi: Lokalekoen animuak, eta
herrian behingoan bertakoa sentitu naizela, hala ere, jende asko hotz animuak
ematerakoan.

Arratsaldean Oñatiko plazara animatzera

Utzi erantzuna

Gaur arratsaldean, lauretan abiatuko da Oñatiko XVII. duatloia herriko plazatik. Probak 8 kilometro izango ditu korrika (bi buelta herriko zirkuitu bati), ondoren bizikletak hartu eta 40 kilometrori aurre egingo zaie (Oñati-Antzuola-Deskarga-Legazpi-Udana-Oñati) eta lau kilometroko bira batekin herriari amaitutzat hemango zaio lasterketari.


 


Blog honetatik eskaera sinple bat egin nahi diet lasterketa (Euskadiko garrantzitsuenetako eta politenetakoa, aurten 340 lasterketarirekin) hurbiltzera ikusten den orori: Mesedez, animatu lehenengo lasterketaritik azkenekoraino. Lurralde honetan badakit oso hotzak garela kirolariei animatzerakoan, soilik zeintzuk doazen lehenengo eta emakumeak interesatzen zaizkigu.


 


Baina berriro diotsuet, animatu guztiei mesedez. Lehenengo korrikalaritik azkeneko korrikalariarenganaino.


 

Ez zitzaidan gustatu: lehengo urtean nire herriko lasterketan helmugaratzean jendeak ez zuela txalo bat bera ere egin eta hizlariak aipu bat ere ez zidala egin, eta berriz Durangoko duatloian helmugaratu nintzenean hizlariak nongoa nintzen, dortsalaren zenbakia eta izen-abizenak aipatu zituen bozgoragailuetatik.

Urkulura errege egunean

Utzi erantzuna


Aurten zerbait berezia egin nahi nuen errege egunean. Iaz familiarekin pasa nuen eguna eta bazkaldu guztiok batera egin genuen, luxu handiarekin. Orain dela bi urte Lizarra aldera hurbildu nintzen han errege bezperako gabean sortzen den giroa erakarrita.


 


Aurten aitarekin bizikleta hartu eta Urkulura joatea erabaki nuen. Eguraldiak, urtarrilean eta neguan egonda, harrigarria badirudi ere oso ona zen. Eguzkiak alde guztietatik joten zuen eta hain pozik nengoen manga motzean joatea erabaki nuela. Erabakia gainera ondo hartutakoa manga luzeak ez nituelako faltan bota.


 


Urkulu izugarri aldatu da. Lehen pista soilik zen eta edonor ibili zitekeen (edonorekin esan nahi dut edozein motordun ibilgailu) eta oinezkoentzako eta motorgabeko ibilgailuentzako egin dutenetik inguruak asko irabazi du. Orain Urkuluz gozatzeko aukera handia dugu eta horrelako guneak aprobetxatu egin behar dira.


 


Beste alde batetik jende ugari hurbildu zen urtegira. Batez ere umeak beraien jostailu berriak erabiltzera, eta hauekin nola ez gurasoak. Esandakoa, giro berezia errege egunean Urkulun eguerdi aldera.

Urte berri on!!!

Utzi erantzuna

Urte berri on guztioi!!!

Aurtengo urtea inoiz baino hobeto hasi dut.
Hasteko 31ko arratsaldean Oñatiko San Silvestrean parte hartu nuen, hemen
aipatu bezala. Azkenean koinatuak ez zuen parte hartu baina nire aitak bai. Nahiko
denbora polita irten zitzaidan, 33 min eta 45 segundo inguru. 03:58ra
kilometroa. Aitak ere ondo bukatu zuen, azkenengo kilometroan lagundu nion eta
uste zuena baino denbora hobeagoa egin zuen. Horren ondoren afaria eta festa,
egun ona zalantza izpirik gabe.

Orain hemen nago ordenagailu aurrean zuei
idazten urte berria zoriontzeko eta aurtengo proposamenak ea berriro ere
errealitate egiten ditudan.

Hori da guztia, zorionak urte berriarengatik
eta ondo bukatu oporrak (oporrak zaudetenoi oraindik) eta lanera itzuli
zaretenoi animuak eman besterik ezin dut egin.

12 hilabete, 12 kirol ekintza

Utzi erantzuna

Hemen doa nire urteko laburpen txiki bat. Kirolari
buruz egin dut zerrenda, eta urteko hilabete bakoitzari egin dudan kirol
jarduera bat jarri diot.

Arrikrutzeko kobetan

2 erantzun

Gaur goizean Arrikrutzeko koba egon naiz
bisitatzen Nafarroako lagun batzuekin. Orain dela hilabete batzuk, ireki zen
garaian, Mikel Irizarrek aipatzen zuen bere blogean turismoa egiterakoan
inguruan ez dugula apenas egiten eta kanpokoek berriz gure baino hobeto
ezagutzera iristen direla gure bailara. Orduan arrazoia bazuela konturatu
nintzen eta nire buruari esan nion haitzuloa bisitatuko nuela. Gaur izan da D eguna.

Historialariontzat eta batez ere aurrehistoria
ikasten dutenentzat ez du aparteko garrantzirik Arrikrutzek. Ikusteko ederra da
eta bisita gidatua oso ondo dago. Kobako historia jakitea oñatiar batentzat oso
ongi datorkio horrela Oñatiko zati garrantzitsu baten historiaren jabe egiten
garelako.

Agian faltan bota dut lokatzara apur bat eta
kaskoak, baina tokia oso ondo egokitu dute adin guztietako pertsonentzat. Eta
nahi baldin badut leku basatiago bat, espeologiara hurbiltzen den ekintzaren
bat, Oñati aberatsa denez kobazuloetan hamaika aukera daukat mundu horretan
barneratzeko eta lokatzez eta urez estaltzeko.

Ondorioztatu dut bisita merezi duela eta oso
gomendagarria da pertsona ororentzat. Beraz aukera baduzue egun hauetako batean
joateko, ez ezazue galdu aukera eta hurbildu Araotzeko auzora kobazulo paregabe
hau ikustera.

Oñati ez dut gustuko… korrika egiteko

Utzi erantzuna

Egia da, Oñati ez zait batere gustatzen korrikalarientzako. Agian gustu kontua izango da, edo agian konparaketa egiten dudalako Gasteizekin, baina Oñati bezalako herri bat ez dut uste ona denik korrika egiten dutenentzat.


Adibidetzat jo dezaket iragan egunean gertatu zitzaidana. Ordubeteko saioa egin behar nuen eta ez zaidanez gustatzen paisaiak behin eta berriro ikustea entrenamendu batean (pistan entrenatzea ahalik eta gutxien saiatzen naiz), Olatera joan nintzen. Gau itxia zen jada eta inoiz ez bezalako arriskuak hartu nituela esan dezaket, hala ere jakinda zer zegoen bidean (iluntasuna, errepide estua, autoak…). Hala ere ez nuen beste ibilbide seguruagorik egiteko aukerarik ordubetean. Non bestela?


Horregatik ez zait gustatzen Oñati. Saio luzeak egiterakoan kontuan hartu behar direlako hainbat faktore oso arriskutsu (adibidez bariantera ez naiz joaten trafiko kopurua oso handia delako). Eta beste alde batetik daukagun atletismo pista Ibarran ez delako batere onargarria. Herri batean non korrika munduak hainbeste garrantzia duen (urtean lau lasterketa gutxienez, Oñatiko duatloia eta Zegama-Aizkorri mendi maratoia kontuan hartu gabe), ezin da onartu 315 metroko pista irregular bat.


Hala ere hau guztiarekin ekin behar diogu gure egunerokoari, pena bat da, baina errealitatea ere bada.

SOS bat Laixan Euskara elkartearen eskutik

Utzi erantzuna

Gaur arratsaldean
e-mail hau iritsi zait nire helbide elektronikora. Datorren larunbatean
jokatuko den Arrasate-Oñatiri buruz doa. Badirudi jendea falta dela bidegurutzetan jartzeko eta laguntzeko.

Ni bolondres bezala
agertu naiz. Mesedez, ez baduzu ezer egiterik datorren larunbatean seiretatik
zortzeratara, apuntatu. Horretarako irakurri arretaz jaso dudan mezua eta
besteei jakin arazi.

Aupa lagun,

Urteroko
moduan Arrasate-Oñati lasterketia antolaitten hasitta gagoz. Aurten, XXV.
ediziñua egingo dogu eta mariatzaren 12xan arratsaldeko 18:30ttan izango da.

Azken
urtietan egunian bertan egin biharreko bidekurtze eta kurben zainketan jente
oso gutxirekin ibilli gara eta honela jarraittu ezkero, lasterketia bertan behera geraketako arriskuan dago edo behintzat Laixanek ezin
izango  dau lasterketa honen antolaketia bere gain hartu. 25 urtien
zihar eginddako lasterketa hau galtzeia penagarrixa izango litzake, azken
urtietan izandako arrakastia kontuan hartzen badogu; gaztetxuen lasterketatan
batez be. Horregatik, zure laguntzia eskaketara gatoz. Aurreko urtian ,
zuetako asko  etorri ziñain lagunketara eta aurten be, erantzun bardiña
jasotia espero dogu lasterketa honen martxa ona ziurtatuta geratu dedin.

Lasterketan,
Arrasatetik Oñatira dagozen bidekurtze eta kurbetan korrikalarixak jarraittu
biharreko bidia adierazten eta trafikua zainketan lagundu gura badozu, gurekin
harremanetan jarri ohiko helbide eta telefono zenbakittan (Bidebarrieta 18,
behia · 943 71 63 11 · laixan@laixan.org). Gutxi gora-behera arratsaldeko
6retatik 8retara bittartian egotia eskaketan dotsuegu.

Aldez
aurretik eskerrak eta zuen barri izango dogulakotan, jaso agur bero bat.

LAIXAN EUSKARA ELKARTEA

ARRASATE-OÑATI LASTERKETAKO LAN-TALDIA

*Laguntzaille guztien artian herriko jatetxe batian bi
lagunentzako bazkarixa/afarixa zotz egingo dogu.

Lasterketiaren inguruan
informaziño gehixago: http://www.goiena.net/debagoiena/albisteak/arrasate-onati-lasterketarako-izenematea-zabalik-dago

LAIXAN EUSKARA ELKARTEA

Bidebarrieta 18, behea

20560 OÑATI

laixan@laixan.org

943 71 63 11

Aloñako igoerarik gogorrena

Erantzun 1

Gaur goizean Oñatin Aloñako III igoeran parte
hartu dut. Lasterketa hau urteko garrantzitsuenen artean daukat sartuta
(besteak Oñatiko Duatloi, Donostiako Maratoi erdia, Behobia-Donostia eta
Oñatiko San Silvestreak dira).

Iaz egin nuen denbora eta postua hobetzea
lortu dut. Nire marka 10 minutu eskas hobetu dut eta 170. postuan amaitu. Aurten
gainera esan beharra dago parte hartzaile kopurua gainditu egin dela, 271
korrikalari irteeran.

Bero izan da nire etsai nagusia. Hasieratik
tenperatura altuekin irten gara eta bide gora joan ahala ez du asko freskatu. Igoera
gogorra izan arren, batez ere Urtiagainetik aurrera eta Gurutzera iritsi baino
azken kilometroa, indarra erabiltzen denez eta gainera iristea nuenez helburu,
tenperaturak ez dit egin min handia. Hori bai, iaz baino askozaz likido gehiago
edan behar izan dut ibilbide guztian zehar.

Baina jaitsiera igoera baino gogorragoa izan
da. Ni ez naiz oso trebea eta tenperatura altuak gogaitu egin nau momentu
batzuetan. Gainera ezker abduktorea asko kargatu zait Gurutzetik Belarrera eta momentu
batzutan ia geldirik nioan. Baina hala ere Oñatiko plazara iristea lortu dut
asko sufrituz eta oso pozik.

Herrian korrika egitea oso berezia da. Aste
batzuk lehenago hemen egindako lasterketekin gogoratzen naiz motibatzeko. Gainera
familia ikusteko aprobetxatzen dut.

Esan dezaket, bihar seguruenez izugarrizko mina izango dudala baina gaur
egindakoarekin oso pozik nago.