sasoibide+: untzilla

Gaur Untzillara, Aramaioko elizatea, ibilbide berria guretzat. Olandiotik gora, Murugaineko bidean Naparrena baserriraino; hortik Etxezurirantz, aurrera egin eta marka zuri-horia azaltzen den horretan gorantz doan bidea hartu. Eskuinerantz, Murugainera darama. Paisai ederra aurrean duguna, bidea ona, lasaia.

Muru, etxe taldeak atentzioa deitu digu, orain artekoak baserri solteak, hemen aldiz hirurak elkarrekin, oso gertu. Etxe ederrak; horietako baten atarian loreontzian fruta arbolak: limoia, laranja eta mandarina; fruituak ikusita gustuko tokian daude, argitsua eta iparretik babesean. Bertan zegoen lagunak zenbait azalpen eman digu, horien artean, aitzinean leku horretan dorretxe bat zegoela (1592), Galartzaren antzerakoa. Toki estrategikoa hau ere.

Untzilla eliz atarian bueltako bidea nondik egingo dugun aztertu eta erabaki dugu. Hiru aukeretatik, Suñatik jaitsi eta Gesalibarreraino; han nekearen arabera, Aramaioko busa hartu edo oinez Arrasateraino. Beherantz ba!

Gaurko paseoa neurtu dugu: Biteritik abiatu eta Gesalibarreko elizaraino 10 kilometro exkax izan dira. Neurri egokia guretzat eta oso gustuko ibilbidea, gomendagarria. Eskertzekoa gaurkoa prestatu duten taldekideei (Loli, Elena, Begoña, Idoia…), bejondeizuela lagunok!!

INFORMAZIO OSAGARRIA

  • ELIZATEA, eliza baten inguruan dagoen auzoa edo baserri multzoa da. Euskal Herriko udal egituraren oinarrizko unitatea zen eta erabakiak hartzeko herriko elizaren atarian auzokide guztiak biltzetik zetorkion izena. Gaur egun, Aramaion gehiago erabiltzen da auzoaren kontzeptua. (Aramaio.eus)
  • https://aramaio.eus/aramaio-ezagutu/elizateak/

Deja un comentario

Tu dirección de correo electrónico no será publicada. Los campos obligatorios están marcados con *