sasoibide+: S.Kristobal-Loo-Etxaldebarri

Meatzerreka auzoko Etxaldebarrira gaurkoan. Baserri ederra, eguzki-begi, arku dotorea… atarian Joxe Mari Langaran, argi eta azalpenak eskaintzeko prest.

Anderola izena zuen baina, suntsitu eta gero berriztu zutenean Etxaldebarri jarri zioten, horrela azaltzen da XIX.eko dokumentuetan. Hala ere, badakite askoz lehenagokoa dela. Garai baten, Monterroneko kondea zen jabea, beste zenbait baserrienen antzera. Joxe Mariren ama zenak kontatutakoa, errege bidea bertatik pasatzen zela, Bilbora zihoana. Eta, diligentzien kaballo aldaketa Loon egiten omen zen.

Etxaldebarriren aurrean ereinotz ederra dago. Bestalde, baserritik gertu bi kare zulo, garai baten lurra lantzeko eta maluen kontrako ezinbesteko elementua lortzeko, karea hain zuzen ere. Lurra lantzeaz gain, basoa, ardiak eta lurren mugak babesteko harrizko paretagintzan lan handiak egindakoak ziren Langaranen arbasoak. Kontu kontari atsegina eta beste zenbat histori ote ditu buruan, gure jakin-mina asetzeko berriz ere bisitan bueltatu beharko. Esker mila Joxe Mari!!

Ilundu aurretik, Joxe Mari agurtu eta, pausu biziaz abiatu gara. Bueltako bidea, aldapan behera erraza; Meatz Erreka elkartearen aurretik pasatzean, aspaldiko bisitan egin ziguten harrera bikainaz oroitu eta eskertu. Kontu horiekin, konturatu gabe Muxibarrera heldu gara. Ilundu eta hoztu egin du, kafetxo bat hartuko dugu?

Deja un comentario

Tu dirección de correo electrónico no será publicada. Los campos obligatorios están marcados con *