20. irteera: Udaletxera!

Gaur, Naroa Arenazak eta Gaizka Bengoak “Bastoien erabilera” edo “Nordic Walking” inguruan azalpenak eman dizkigute eta probatzeko aukera ere izan dugu. Teknika interesgarria!

Oinez hasi Biteritik, s. Andresen dagoen Dr Córdoba y Oro plazaraino, ezkutuan dagoena, eguzkitsu eta baketsu. Zergatik izena, noren omenez? Arrasaten, 1615ean jaio eta Coria zein Cuencako Canónigo Magistral izan zenaren izena du; Ciudad Rodrigo eta Orenseko apezpiku izendatua eta, Ciudad de Méxicorako artzapezpikua ere bai baina, bere apaltasunak eraginda, kargu guzti horiei uko egin omen zien (Letona eta Urangaren artxibotik). Cuencan, 1658.n zendu zen.

Jarraian, Arrasateko udaletxera. Harlanduz eginikoa, XVIII. mendean,  barroko estiloan eraikia. Balkoiak eta burdinez egindako elementuak R. Ametzola elorrioarrenak dira eta, fatxadako armarria M. Carrerarena, 1766. urtean egindakoa.

Pleno aretoan Ander Garai zinegotziak eta, María Ubarretxena alkateak hartu gaituzte. Lehen azalpenak Marijo Axpek, udal-artxiboko arduradunak, Arrasateko antzinako dokumentu garrantzitsuak erakutsiz: Hiri-gutuna eta Pribilegioaren pergaminoak. Lehena Alfontso X.k emana, bestea aldiz, Gaztela eta Leoneko erregeek. Udaletxea ezagutzeko biran, linterna moduko espazio ederra, Carrarako marmolezko zutabe ikusgarriaz inguratua, alkatearen bulegoa… Azalpenetan, udalaren gobernuan idazkari eta kontu-hartzailearen garrantziaz jabetu gara. Beti ere, ezjakintasunean, gauzak sinpleagoak direla uste izaten dugu beraz, ongi etorria jasotako informazioa. Sortu diren galderei erantzuna jaso eta agurtu aurretik, eskailera eder horietan argazkirako prestatu gara.

Erdiko kalean behera, portaloiko eskulturari erreparatu diogu, Iñigo Arregik sortutako Harresi Ezkutua. Burdinazko (corten altzairua) obra arina eta, esanguratsua. Arrasaten jaiotako eskultoreak, Jorge Oteiza gaztetxotan ezagutu eta haren jarraitzailea bihurtu zen. Egun, bere obra hainbat galeria eta erakusketetan ikusgai.

Eskertzekoa udaletxean jasotako harrera eta, gaurkoan ere, gustura.

Informazio iturriak, gehigarria:

  • https://eu.wikipedia.org/wiki/Martxa_nordiko
  • Letona eta Urangaren artxiboak (KulturAte)
  • https://eu.wikipedia.org/wiki/Arrasateko_udaletxea#/media/File:Arrasate_udaletxea.jpg
  • http://www.iarregi.com/
  • http://www.euskonews.eus/0567zbk/elkar_eu.html
  • https://patrons.org.es/inigo-arregi/

Arrasateko udaletxea, XX.mende erdialdeanI

Utzi erantzuna

Zure e-posta helbidea ez da argitaratuko. Beharrezko eremuak * markatuta daude