GURE GAZTEAK BBK TXAPELKETAN!

Erantzun 1

Orain aste batzuk Bertsolari Gazteen XVIII. BBK Sariketa hasi zen. Txapelketa hau eskualdeka jokatzen da eta bi kategoriatan banatzen da: 18 urte arte eta 19-24 urte bitarte.


Gure eskolako gazteek Ipar Uribeko eskualdea ordezkatzen dute eta bihar bertan egingo dute debuta finalaurrekoetan. Arerio bezala Busturialdea izango dute. Saioa Derioko Txorierri BHI Institutuan izango da, bihar, hilak 16, goizeko 11.30etan.


Pasa den urtean txapela eskuratu zuten eta ia aurten berriro eskuratzeko zortea duten.


Zorte on eta egurra!

BERTSO-AFARIA BERNA ETXEAN

Utzi erantzuna

Motorrak berotzen gabiltza eta beste ekitaldi batekin gatozkizue. Bertso-afaria antolatu dugu Algortako Berna Etxea jatetxean Sustrai Colina eta Andoni Egañarekin.



Zita, martxoaren 27an, 21.30etan, Algortako Berna Etxea jatetxean. Lekua erreserbatzeko bi era dituzue:


– Email bat bidalita ALBEko helbidera: albegetxo@gmail.com
– SMSa bidalita ALBEko mugikorrera: 605704385


Lehenbailehen eman izena!

ABRA BIGARRENGOZ ETXERA

2 erantzun

Larunbatean jokatu zen Abra Saria eta bigarrengoz geratu da txapela gurean. 2004an Xabi Payak eskuratu zuen txapela, eta larunbatean, berriz, Jone Uriak irabazi zuen, bere lan dotorearen ondorioz.


                       Jone Uria kantuan


Saio azkarra eta polita izan zen. Gaiak aktualitatekoak izan ziren, gazteekin zerikusia zutenak. Zortziko nagusiko lanean, entzun ziren alerik onenak. Nahiz eta batzuk gai serioak izan, bertsolariek umore puntua jartzen jakin zuten.


Zortziko nagusian, honako gaia jarri zieten Ane Labaka eta Jone Uriari: Elkarrekin afaldu duzue jatetxe batean. Kontua eskatu, ordu erdi pasa eta zerbitzaria ez da ageri. Lehen bertsoan, hauxe bota zuen Anek: gure dirurik ez dute behar / ta alde egin dezagun. Jonek, aldiz, aipatu zuen barrako zaharrak gonbidatu zituela, Aneren eskotea ikusita. Horrelakoekin krisia bukatu duela esan zuen Anek, baina Jonek ilusioa kendu zion esanez, kartera prestatzeko zerbitzaria kontuarekin zetorrela.


Zortziko txikiko lanak, lehen puntuak erantzun eta bakarkako lanak entzun ondoren, epaileek Ane Labaka eta Jone Uria buruz-burukora pasatzea erabaki zuten.


Buruz-burukoan sei motzean ofizioa bat abestu zuten, kartzelan sentsazio bat sentiarazi publikoari eta bakarkakoan hiru bertso. Abestu beharreko sentsazioa asperdura izan zen. Hau izan zen bi bertsolariek abestu zituzten bertsoak asperdura sortzeko:


                  Ane Labaka eta Jone Uria


Ane Labaka


Eguraldia desberdina da
berdin uda, berdin negu.
Saiatu ezkero gure bizitzan
zerbait lortu dezakegu.
Nere amonak mezetara joan
ta egiten du erregu,
ta politikak gure herrian
sortzen dute nahiko ernegu,
bide hontatik segi ezkero
denok lo hartuko degu.


Jone Uria


Nahiz eta saioa badoan
bere pausuan aurrera,
egin beharko dizuet
nik kartzelatik harrera.
Pazientea izango naiz
hori da nire jarrera,
denborak ez du axola
behintzat nire arabera.
Beraz, denbora badoa
bertso erdia betea da,
oraindik asko falta da,
baina hainbeste ez, keba
notizia berri bat dut,
zuek denontzat gainera
bakarka botako ditut
beste hiru habanera.


Epaileen erabakiz, Jone Uria txapeldun atera zen. Hementxe sailkapena:


                   Jone Uria Trinoren eskutik txapela jasotzen


1. Jone Uria
2. Ane Labaka
3. Amaia Iturriotz
4. Peio Ormazabal
5. Saioa Alkaiza
6. Ekaitz Samaniego


Eskerrak eman behar dizkiegu Ukberri.net agerkariari eta Zumarraga-Urretxuko bertso-eskolak egindako jarraipenagatik. Izenetan klikatuz gero; kronika, audioak eta bideoak ikusi ditzakezue.


             Bertsolariak, epaileak, idazkariak eta antolatzaileak

ABRA SARIA 2010

Utzi erantzuna

2010a indartsu hasi zitzaigun Santa Agedari koplatzen, baina oraingoan beste proposamen batekin gatozkizue.


Larunbatean, hilak 27, Abra Sariaren IX.edizioa jokatuko da Algortako Villamonte Kultur Etxean. ALBEk hainbat ekitaldi antolatzen ditu, baina garrantzia ematen diegu gazteei, eta horregatik sortu zen Abra Saria.


     


Aurten parte hartuko duten bertsolariek, eskarmentu handia daukate herrialdeetako eta Euskal Herriko eskolartekoetan, eta ziur gaude, zeresana emango dutela gerora. Hauek dira aurten parte hartuko duten bertsolariak:


Peio Ormazabal – Arrigorriaga (Bizkaia)
Amaia Iturriotz – Urretxu (Gipuzkoa)
Saioa Alkaiza – Antsoain (Nafarroa)
Ekaitz Samaniego – Gasteiz (Araba)
Ane Labaka – Lasarte (Gipuzkoa)
Jone Uria – Algorta (Bizkaia)


Epaile lanetan, honakoak arituko dira:


Martin Aramendi
Iñaki Aurrekoetxea
Eneko Bidegain
Asier Ibaibarriaga


Eta gai-emaile lanetan, Miren Loizaga arituko da.


Gogoratu zita: otsailak 27, 19:00etan, Algortako Villamonte Kultur Etxean. Zapaturarte!

MARTIRIAK EMAN ZUENA

Erantzun 1

Santa Ageda joan da, baina hemen gatoz egunak eman zuenaren errepaso txiki bat ematera.


                  


Goizetik hasi ziren ALBE, AEK eta Egizuko lagunak koplaka Martiartu aldetik, baserriz baserri, antzinako erara. Bertako baserritarrei ibili ziren kantuan eta baten bat ere animatu zen haiekin.


                      Santa Ageda 2010 por Algortako Bertsolari Eskola II


                    Santa Ageda 2010 por Algortako Bertsolari Eskola II


Arrastian, Getxoko estradetatik ibili ziren kantuan, alai eta arrastiko azken orduan Algorta aldera etorri zen taldea, erdigunetik abesteko. Batzuk goiz bukatu zuten eta beste batzuk gaueko ordu txikitan. Datorren urtean, askoz gehiago!


Eskerrik asko Ukberri.net eta Guillermo Uriari egindako argazkiengatik!


                Santa Ageda 2010 por Algortako Bertsolari Eskola II


 


                Santa Ageda 2010 por Algortako Bertsolari Eskola II


            


              Santa Ageda 2010 por Algortako Bertsolari Eskola II

SANTA AGEDA, AGEDA,…

Erantzun 1

Sante Ageda, Ageda
biher da Sante Ageda…


Bertsozaleok! Bihar Santa Ageda bezpera dugu eta denok batera aterako gara Getxoko kaleak alaitzera. Hemen dituzue kedadak gurekin elkartu nahi baduzue martiriari abesteko eta koplatzeko. Bi aukera dituzue:


– 16.00etan Getxoko La Benta tabernan.
– 20.00etan bertso-eskolako egoitzan.


Bihar arte! Iiiieeeeuuup!


Santa Ageda por Albe. Algortako Bertsolari Eskola.


 

AITOR MENDILUZE ETA JONE ALBERDI IRABAZLE BALENDIN ENBEITA BERTSOPAPER LEHIAKETAN

Utzi erantzuna

Aitor Mendiluze bertsolari irurarraren Nork ez du lorerik entzun? lanak Balendin Enbeita bertso sariketaren 9. edizioko gailurra jo du. BECen zazpigarren postua lortutako bertsolariak ispiluarekin izandako elkarrizketa batean oinarritu da sorta saritua osatzeko. Gazteen mailan Jone Alberdi urretxuarraren Bizitzaren bila lana izan da onena.     


 


Algortako Bertsolari Eskolak (ALBE) Balendin Enbeita 9. Sariketa abiatu zuen iragan uztailean. Zehaztutako arauen arabera, bertso-jartzaileek urriaren 1era arte izan zuten nahi adina bertso-sorta bidaltzeko lehiaketara. Epea amaituta, ALBEk hautatutako epaimahaiak lan handia izan du aurkeztutako sorta guztien artean onenak aukeratzen. Mirari Azulak, Trino Azkoitiak, Juanjo Respaldizak eta Joseba Santxok osatu dute epaimahaia. Zehazki, bertso-jartzaile hauen lanak saritu dituzte, eta, beraz, ondoan adierazitako sariak emango zaizkie hurrengo larunbatean, abenduaren hemeretzian, ALBEren urteroko AHOBIEN GALAn:



  • Nagusien maila (+18)


  1. Aitor Mendiluze (Irura)  Txapela, 1.200 euro eta garaikurra.

  2. Nikolas Zendoia (Zarautz)  900 euro eta garaikurra.

  3. Jone Uria (Getxo)  600 euro eta garaikurra.


  • Gazteen maila (<18)


  1. Jone Alberdi  (Urretxu)  Txapela, 300 euro eta garaikurra.

  2. Ainhoa Mujika (Beasain) 150 euro eta garaikurra.

  3. Imanol Uria (Getxo)  90 euro eta garaikurra.

Zorionak!