Egun hauetako zaparradak eta gaurko eguraldi iragarkiak ikusita, Oñati aldera jotzea erabaki dugu. Oñatin, norantz? Uraren eragina onduen ikusiko dugun tokira, Usakora!
Hau edertasuna! Harrituta, liluratuta, txundituta utzi gaitu presa inguruak. Ur-kantitatea, zarata… Ikuskizuna! Ederki asmatu du Usakora etortzea proposatu duenak. Eskerrik asko Idoia.
Pelikuletan bezala, hor goitik uretan murgiltzeko tentazioari eusten (jejeje). Angelinesek kontatu digu, gaztetan bertara etortzen zirela murgil egitera. Ba gaur, gu haien antzera…
Herrirantz hurbiltzen, arrosa, gereziak, Aloña mendia… begientzat gozamena. Eta oinak bizkortu beharrean zaparradatik libratu nahi badugu, laino ilun-ilunak datoz eta. Paseo ederra gaurkoa, eta lehorrean. Hau pagotxa!
