Heldu da! Hiru kanporaketa egin ostean, Uribe-Kostako Bertsolari Txapelketako finalerako txanda heldu da. Finala, larunbatean izango da, hilak 12, arrastiko 18.00etan, Villamonteko Kultur Etxean. Xabi Payaren aginduetara abestuko dute finalistek:
Itxaso Paia
Arrate Illaro
Jone Uria
Joanes Igeregi
Aitzol de Kastro
Ekaitz Larrazabal “Katxo”
Gonbidatuta zaudete!
Ostiralean, Uribe Kostako Bertsolari Txapelketako hirugarren eta azken kanporaketa saioa izan zen Algortako Itzubaltzeta Gaztetxean. 75 pertsona izan ziren afaltzen eta 80 saioa entzuten. Aurreko asteko baino giro apalagoa egon zen, baina gazte asko hurbildu ziren bertsoekin gozatzeko.
Bertsotan Miren Loizaga, Jagoba Pereda, Aitzol de Kastro, Jone Uria, Joanes Igeregi eta Ekaitz Larrazabal “Katxo” aritu ziren, Arkaitz Gomezen aginduetara. Epaitzen, aldiz: Josu Arroyo, Peio Unzurrunzaga, Trino Azkoitia eta Nahikari Ayo.
Jende nahikotxo hurbildu zen saiora. Aipatu beharra dago, saio guztietatik, saiorik onena izan dela. Puntuek gora egin zuten eta lan txukuna egin zuten. Saioa bizi-bizi hasi zen Miren Loizaga eta Jagoba Peredaren arteko ofizioarekin. Puntuak erantzuten oso ondo ibili ziren eta bakarkako ale politak entzun genituen.
Jone Uria nagusitu zen saioan. Honakoa izan zen puntuazioa:
1. Jone Uria 251,5
2. Joanes Igeregi 232
3. Aitzol de Kastro 222,5
4. Ekaitz Larrazabal “Katxo” 218,5
5. Miren Loizaga 202
6. Jagoba Pereda 185,5
Azken kanporaketa izanda, badakigu nortzuk izango diren ekainaren 12ko finalean (beltzez daudenak sailkatua dira):
Jone Uria251
Arrate Illaro249,5
Itxaso Paia238,5
Joanes Igeregi232
Aitzol de Kastro225,5
Ekaitz Larrazabal – Katxo218,5
Josu Landeta217,5
Miren Loizaga202,5
Gabi Basañez192,5
Peio Etxebarria186
Jagoba Pereda185,5
Oier Iturralde – Atano185
Unai Angulo184,5
Peio Ruiz de Agirre184,5
Arkaitz Gomez180,5
Kanporaketeei bukaera emanda, finala baino ez da geratzen. Zita, ekainaren 12an, Villamonte Kultur Etxean, 18.00etan.
Larunbatean jokatu zen Abra Saria eta bigarrengoz geratu da txapela gurean. 2004an Xabi Payak eskuratu zuen txapela, eta larunbatean, berriz, Jone Uriak irabazi zuen, bere lan dotorearen ondorioz.
Saio azkarra eta polita izan zen. Gaiak aktualitatekoak izan ziren, gazteekin zerikusia zutenak. Zortziko nagusiko lanean, entzun ziren alerik onenak. Nahiz eta batzuk gai serioak izan, bertsolariek umore puntua jartzen jakin zuten.
Zortziko nagusian, honako gaia jarri zieten Ane Labaka eta Jone Uriari: Elkarrekin afaldu duzue jatetxe batean. Kontua eskatu, ordu erdi pasa eta zerbitzaria ez da ageri. Lehen bertsoan, hauxe bota zuen Anek: gure dirurik ez dute behar / ta alde egin dezagun. Jonek, aldiz, aipatu zuen barrako zaharrak gonbidatu zituela, Aneren eskotea ikusita. Horrelakoekin krisia bukatu duela esan zuen Anek, baina Jonek ilusioa kendu zion esanez, kartera prestatzeko zerbitzaria kontuarekin zetorrela.
Zortziko txikiko lanak, lehen puntuak erantzun eta bakarkako lanak entzun ondoren, epaileek Ane Labaka eta Jone Uria buruz-burukora pasatzea erabaki zuten.
Buruz-burukoan sei motzean ofizioa bat abestu zuten, kartzelan sentsazio bat sentiarazi publikoari eta bakarkakoan hiru bertso. Abestu beharreko sentsazioa asperdura izan zen. Hau izan zen bi bertsolariek abestu zituzten bertsoak asperdura sortzeko:
Ane Labaka
Eguraldia desberdina da
berdin uda, berdin negu.
Saiatu ezkero gure bizitzan
zerbait lortu dezakegu.
Nere amonak mezetara joan
ta egiten du erregu,
ta politikak gure herrian
sortzen dute nahiko ernegu,
bide hontatik segi ezkero
denok lo hartuko degu.
Jone Uria
Nahiz eta saioa badoan
bere pausuan aurrera,
egin beharko dizuet
nik kartzelatik harrera.
Pazientea izango naiz
hori da nire jarrera,
denborak ez du axola
behintzat nire arabera.
Beraz, denbora badoa
bertso erdia betea da,
oraindik asko falta da,
baina hainbeste ez, keba
notizia berri bat dut,
zuek denontzat gainera
bakarka botako ditut
beste hiru habanera.
Epaileen erabakiz, Jone Uria txapeldun atera zen. Hementxe sailkapena:
1. Jone Uria
2. Ane Labaka
3. Amaia Iturriotz
4. Peio Ormazabal
5. Saioa Alkaiza
6. Ekaitz Samaniego
Eskerrak eman behar dizkiegu Ukberri.net agerkariari eta Zumarraga-Urretxuko bertso-eskolak egindako jarraipenagatik. Izenetan klikatuz gero; kronika, audioak eta bideoak ikusi ditzakezue.
2010a indartsu hasi zitzaigun Santa Agedari koplatzen, baina oraingoan beste proposamen batekin gatozkizue.
Larunbatean, hilak 27, Abra Sariaren IX.edizioa jokatuko da Algortako Villamonte Kultur Etxean. ALBEk hainbat ekitaldi antolatzen ditu, baina garrantzia ematen diegu gazteei, eta horregatik sortu zen Abra Saria.
Aurten parte hartuko duten bertsolariek, eskarmentu handia daukate herrialdeetako eta Euskal Herriko eskolartekoetan, eta ziur gaude, zeresana emango dutela gerora. Hauek dira aurten parte hartuko duten bertsolariak:
Peio Ormazabal – Arrigorriaga (Bizkaia)
Amaia Iturriotz – Urretxu (Gipuzkoa)
Saioa Alkaiza – Antsoain (Nafarroa)
Ekaitz Samaniego – Gasteiz (Araba)
Ane Labaka – Lasarte (Gipuzkoa)
Jone Uria – Algorta (Bizkaia)
Epaile lanetan, honakoak arituko dira:
Martin Aramendi
Iñaki Aurrekoetxea
Eneko Bidegain
Asier Ibaibarriaga
Eta gai-emaile lanetan, Miren Loizaga arituko da.
Gogoratu zita: otsailak 27, 19:00etan, Algortako Villamonte Kultur Etxean. Zapaturarte!
Jone Uriak Bertxoko Txapelketako txapela irabazi zuen pasa den ostiralean Aramaion jokatu zen finalean.
Hementxe klikatuta Bertsozale Elkarteko webgunean dagoen kronika irakurgai duzue.
Zorionak Jone!
Urtea bukatzear dago eta agurrerako ALBEk gala antolatu du. Egitarau mamitsua eta sorpresaz betea izango da.
Saioan Jone Uria, Onintza Enbeita, Aitor Sarriegi eta Julio Soto izango dira. Saioaz gain, Balendin Enbeita Bertsopaper Lehiaketaren sari banaketa egingo da. Gaztetxoen eta gazteen taldeak ikuskizun bat prestatuta daukate. Urtearen errepasoa egingo dugu argazkiz osatutako bideoaren laguntzaz eta horrez gain, luntxa izango da.
Beraz, gorde data zuen agendan:
Abenduaren 19an, Areetako Andres Isasi Musika Eskolan, 19.00etan.
Hemen gatoz azken berri batzuk emateko:
– Fredi eta Xabi Payak Aupa Maurizia! liburua aurkeztu dute. Maurizia Aldaiturriaga panderojolearen biografia pertsonala eta musikala egin dute.
– Arrate Illarok Okelar Bertso-Paper lehiaketa irabazi du. Sari-banaketa Santo Tomas aurreko larunbatean burutuko da.
– Jone Uria Bertxoko Sariketako finalera heldu da. Finala abenduaren 4an izango da Aramaion.
1800 bertsozale jaso zituen igandean Gernikako Jai-Alai pilotalekuak. Finala gero eta gertuago dago eta giroa gori-gori bertsozale eta bertsolarien artean.
Finalaurrekoetako bigarren itzuli honetan, Gernikan abestea egokitu zitzaion Jone Uriari. Ikusmira zegoen, gazteak eta beteranoak aurrez aurre. Sustrai Colinak batu zituen puntu gehien, baina oraindik Belodromoan gertatzen denaren zain geratu beharko da.
Aipagarria izan zen Sustrairekin egindako kopla saioa. Honako gaia jarri zieten: Apustuzaleak zarete biok. Duela astebete, elkarrekin egin zenuten apostua, urtebetez aposturik egin gabe nork agoantako ote duen. Frontoia zaudete biok, ezinegonik. Koplatan egitea konplikatua da eta are gehiago txapelketa batean. Baina horrela erantzun zion Jonek Sustrairi:
Nahiz orain zabiltzan Sustrai
ni izorratzeko planean,
apostua ez da apostu izaten
dirurik ez dagoenean.
Zortziko txikian Beñat Gaztelumendirekin egokitu zitzaion kantatzea. Bizilagunak zarete Jone eta Beñat. Beñaten pisu azpian bizi zara, Jone. Lau gau dira Beñatek goizeko 3etan aspiragailua pizten duela. Joneren lehen bertsoa jarraian<.
Lo egoten nahiz beti
nire ametsetan,
eta gero hasten da
hau ez dakit zertan!
Harrituta naukazu
zu Beñat, benetan,
beti garbitzen duzu
parrandatik bueltan.
Kartzelako gaian, gehienek bide bera hartu zuten. 300 eurorekin irten zara etxetik, eta ezer gabe itzuli zara berriz. Parrandan joan eta dirurik gabe itzuli zirela abestu zuten gehienek, nahiz eta baten batek bide zailagoak aukeratu.
Honela geratu zen sailkapena:
Sustrai Colina 655
Igor Elortza 641
Beñat Gaztelumendi 634,25
Miren Amuriza 631,25
Jone Uria 613,25
Jon Martin 606,5
Estekak:
Txapelketa Nagusiko webgunea
Bertsoa.com
Berria
Gara
Eta bukatzeko, Joneren azken agurra:
Udalekutan mila lagun ta
une datozkit gogora,
eskuetatik nahi gabe ihes
joaten zitzaigun denbora,
eta parrandan zenbat alditan
elkartu garen gerora.
Bertso-eskolan ere ze giro
aurrean duzue froga.
Eskolak jaso edo emanda
etxeratzea gustora.
Ta saioetan ze emozio
zuen txalotik txalora.
Zorionez nahiz ta BEC betetzea
den azken aldiko moda,
bertso mundua txapelketa bat
baino askoz gehiago da.
Fredi, Xabi eta Jonerentzat txapelketa bukatu da. Lan ezinhobea egin dute eta harro gaude! Baina Joneren bertsoak esaten duen bezala, bertsolaritza txapelketa baino askoz gehiago da!
Jakingo duzuen bezala, gure eskolakidea den Jone Uriak txartela lortu du finalaurrekoetako bigarren itzulirako. Gernikan egokitu zaio abestea honako bertsolariekin: Sustrai Colina, Miren Amuriza, Beñat Gaztelumendi, Igor Elortza eta Jon Martin.
Saioa, Gernikako Jai-Alai Pilotalekuan izango da, 17.30etan.
Animo Jone!
Igandean ALBEko tropelak Hendaiarako bidea hartu zuen Jone Uria animatzeko. Saioa polita izan zen eta azkenean puntu gehien batu zituena Amets Arzallus izan zen.
Jendez gainezka zegoen frontoia, gero eta gutxiago falta da finalerako eta nabaritzen da urduritasuna publiko eta bertsolarien artean. Beltzenia frontoira bertsolari ugari hurbildu ziren finalaurrekoetako lehen itzuliko azken saioa zelako.
Aipatzekoa da Jonek erakutsi zuen freskotasuna puntu erantzunean. Hona hemen Zuriñe Iarrituk botatako azken puntuaren erantzuna:
Larru gorritan inoiz
ipini ezkero,
ondokoa jarriko
litzateke bero.
Jendea egoten da
niregatik ero,
eta beste gauzarik
ezin dut espero.
Txalo zaparrada handia jaso zuen Jonek. Askotan seiko motzeko saioak astunak izaten dira, baina Hendaian ale politak entzun ahal izan genituen. Joneri Amets Arzallusekin egokitu zitzaion abestea. Gaia honakoa izan zen: Neba-arrebak zarete eta zuen ama alarguna ikusi duzue gaur zuen adin bertsuko bati besotik helduta. Zu Jone izugarri poztu zara; Amets ez. Ederra izan zen Jonek botatako lehen bertsoa:
Zelako bikote fina
printzea eta erregina,
amarentzako gazte hori da
gaur printze urdina.
Lehenago dena zen mina
etzait inporta adina;
edo ez behintzat gure amaren
zoriona adina.
Puntuazio goitik joan zen eta honakoak puntuazioak:
Amets Arzallus 704
Jon Maia 679
Julio Soto 652,5
Aitor Sarriegi 651
Jone Uria 634
Onintza Enbeita 631,5
Gauzak horrela, Jonek bigarren itzulirako txartela lortu du. Xabi eta Fredi atean geratu dira. Hala ere, saio politak egin dituzte, zorionak zeueri be!
Hemen dituzue Hendaiako saioko estekak:
Txapelketa Nagusiko webgunea
Bertsoa.com
Bertsoplaza.tv
Berria
Gara
Ukberri